Higalioli 32 - Ma Jou ai Demo-demo o Totobelohoka

O Pasala 32 ko atailakouahi

¹ De hokonaa ma nyanyianga ma demo abe o Musa wobasa onangika, itemo ato, “Abeika nitotoihene ahi demoino, ngaro ngini mata-mata o Horogaka nigogere, de ngaro nginioli o duniaka mata-mataika.

² Tonganono la ahi dodotoko ma demo naa inidubukuku hoka o awana nginiuku, abe imaketero hoka o awana ma akere itubuku o datomo ma doriuku la naga ma bobero, la ahi demoino de ka idadi inihiomukika nia ngongakuoka.

³ Ho ngohi naa tagorakiye Ma Jou o Yawe ai romanga, de nginioo kiani nimangaku abe nanga Jou duru Wokokurutiye.

⁴ De nanga Jou Una hoka o lokuhakaru moi abe ai datorino de duru ko iwa ma howono, de to Una ai hidee mata-mata ka ma totiai dika. Ho duru ka idadi homahinganono nanga Jouika, angamoi duru ko ma iwa abe waputuhu ihowono masara watobagou-goungu de wotobatotiai dika.

⁵ Masara nako to Una ai nyawa ona ko yatobagou-goungua Unangika, abe manga datorino de ko imakiniikua de to Unangoli ai hininga, ho done sarakia hahiromanga hato ona to Una ai ngofa-ngofaka? De ona gea yodadioka o dutu moi abe manga hininga ikokifuludioka de abe yotobaelu-eluku.

⁶ Ho naa tinileha, ngini abe nidadioka o bodo ma nyawa, mode nia datorino gea abe niwihibalaha Ma Jou o Yawe ai hininga ma rorahai nginika? Done ti ngini nia Baba onaguna, de abe winitobatulaada, mode ko Unangua? Ka Una gea dika abe winihidadi la o dutu moi ma amoko nidadioka!

⁷ Abeika nimahihohininga hokokia idadi ma dodihiraka, de ufa niawohanga nia totofora manga ade-ade. Abeika nialeha nia baba homoi-homoiika de nia balu-baluhika, de ona gea ka idadi iniade-ade hokokia idadi ma oraha gea.

⁸ Abe ma dodihiraka de Ma Jou Wokokurutiye o tonaka wahikodoku o dutu amomoiika, de o dunia ma nyawa mata-mata wahikeregu, la o dutu homoi-homoi naga manga tonaka de ma bati-batingoka. De gea wahikeregu la o dutu homoi-homoi gea naga de manga jouoka, abe manga jou gea ka idadi wahipareta ma nyawaika genangoka.

⁹ Masara nako o Yakubu ai totoforauku, o dutu moi gea yodadioka to Ma Jou o Yawe ai regu, la wato Una dika wahipareta onangika.

¹⁰ Abe ma dodihiraino gea de Ma Jou o Yawe wamake ona o tonaka ma kakaahaka, de ma tonaka gea ka ma homoa dika de o hidaloko kohabuturungu ka ihikaika italoko genangoka. De gea Una watobagoana de watobadotoko onangika, de ka ihikaika watobagoana angamoi ai hininga duru adaene onangika.

¹¹ Ho Una hoka o koloba ma mayo abe itobagoana to ena ma ngofaka, de itobadama-dama / itobangooto ma ngofaka ma lokuiye la ka idadi yoduhunu. De Unangoo imaketero hoka ai gafuufu wohirefe la wohihoho dakuiye, la ufa o bodito ka idadi yadaene.

¹² De ma oraha gea ka Ma Jou o Yawe dika wahihira-hira onangika, abe ko iwa o jou ma homoa ona yanii-niiki.

¹³ De gea wahiakunu la ka idadi yotagi-tagi o tonakoka abe itoporoniye, de ona ka idadi yolo-olomo to ena ma redi ma hasilino. Una wahidailako o ofungu ma gula abe o lokuhakaru ma bakorino, de o saitunu ma minya ka idadi wahidoaka onangika ngaro ma tonaka gea o hakaru mata-mataika.

¹⁴ De nagali wahidailako o hapi ma susu ma haki abe itogowinoka, de o susu o kabingi ma duduonino, de ma roehe de ma hakioka abe o domba de o kabingino abe imanoa o Basana ma lokuoka. De nagahi o gandumu ma roehe duru ma rorahaiholi, de o angguru ma teongo ma gohaka. Ho gea mata-mata ma inomo de ma ngokere abe Una manga Jou ka ihikaika wahidailako ai nyawaika la yososanangi dika.

¹⁵ Masara ipahaino de o Isiraele, abe to Una ai nyawa gea, ona yodadi yokutufuru de ahao yotobalawana, abe ona marai yolomo ilamokoholi hiadono yogodeoka! De duru yososanangi dika masara gea de iwiporete de iwinoaika manga Jou abe watulaada, de hiadono iwihitipokouku Unangika abe wodadioka manga Duduhunu, ho Una abe hoka manga lokuhakaru ko ihelo-helorua masara ka iwietongo ko kia-kiaua.

¹⁶ De ona gea o jou-jou ma homoali yomahijou enangika, ho hiadono to Una ai daleana itagi, de mangale ma titi ona yomahuba-huba o popangaoika, ho ai hininga ma ngamo duru ifae.

¹⁷ Angamoi manga huhuba gea yomahihuba o toka-tokatika de ko Ma Jouikauali, abe ma dihiraino de o jou-jou ma homoa gea ko yahiorikuahi, ho hadongoo ahao ma oraha gea yoihene ma titi o jou ma hungi gea, masara ka idadi ka dau de yomahuba-huba enangika. De ngaro manga totofora ko kia-kiaua ihioriki ma titi o jou ma homoa gea, masara ka idadi o Isiraele ma nyawa naa manga huhuba yomahihuba enangika.

¹⁸ Ho ona ka iwinoaika dika manga Duduhunu abe wahidoaka o wowango onangika, de hiadono duru iwiwohanga manga Jou abe manga boa ihititi Unangoka dika.

¹⁹ Masara Ma Jou o Yawe naga womalega onangika de wamake manga hininga ma datoro, de to Una ai ngamo itagi onangika hiadono waemono manga datorika gea.

²⁰ Ho Una wotemo wato, ‘Ngohi naa kiani tomaidulu onangoka de aino, abe ma oraha naa ka toluku taduhunohi ona gea, ho abeika ahao hamake hokokia manga baha idadi onangika. Angamoi ona naa manga hininga hoka ikokifuludioka, de ko iwaka manga hingounu onangoka.

²¹ De mangale ma titi ona yomahuba-huba o jou ma homoaika, ho ahi daleana ihifuaeliye ahi hiningaka, de ma titi manga popangao gea abe duru ka parahaja dika, hiadono to Ngohi ahi ngamo ka idadi itagi onangika. Ho naa Ngohioli ahao tohifuaele to ona manga daleana, abe tapake ka o homoa ma nyawa dika la ahi nyawa manga daleana ipuda. De ona ko o Yahudi ma nyawaua abe ko kia-kiauahi yataoko ma titi Ngohi, duru ona gea abe Ngohi tapake la ahi nyawaoo manga ngamo ipuda manga kokihiningaka.

²² Abe to Ngohi ahi hininga ma ngamoino de hoka o uku idadioka, de ma uku gea duru imahihora mata-mataika, ngaro hiadono dau o hone-honenge manga ngiuku masara imahiadono genanguku, de ma uku gea aolomo o dunia de to ena ma joro mata-mataika, de hiadono o loku ma timi-timiuku enangoo ma youkuoka.

²³ Ho Ngohi ka ihikaika tahiboa o kangela ma ngoe ahi nyawaika, abe gea hoka tatobatoi-toimi onangika hiadono ahi hihiipi tohikiditokoka.

²⁴ Ho gea ahao ona o hafini ma amoko yadaene onangika, de o gogama imahihora-hora onangoka hiadono naga manga odiri ilamoko, de nagali tohidingoto o fuhuku ma aewani la agoli-goli onangika, de o aewani abe imalia-liara ma tonakoka de naga de ma bihaka, enangoo yagoli onangika.

²⁵ De nako ona naga ma homoaka ahao manga musu yoboaino la yabaataika onangika, de ngaro manga tau ma goronaka masara naga abe yangohama onangika, de gea ahao manga ngofa-ngofaka yatomaka dika, ho ahi nyawa gea duru yohawanokaholi. Angamoi ngaro manga goo-goduuru de manga momoholehe de manga ngofaka ma gogilau de manga dimono abe yapoperekioka masara ona manga ngoe yokokihonengoka.

²⁶ De Ngohi ahi hininga tanu toigo la tahibinaaha dika onangika, la hiadono o homoa ma nyawa ka idadi yawohangika dika o Isiraele ma nyawa.

²⁷ Masara gea tomahitiari tato ufa hiadono manga musu gea yataoko ko itiaiua, abe ufa hiadono ona yomahigiriiri de yato bote gea ona ma hirete manga hilaku. Ho done ona gea yomagorakiye ato, “Mangale ma titi to ngone naa nanga bobuturungu, hiadono o Isiraele ma nyawa ko yaiwaka. Gea ko Ma Jou o Yaweua ai datoro masara ka ngone dika hodiai!” Ho gea ma titi hiadono ahi nyawa gea ko tahibinaahauali.’

²⁸ De ahao Ma Jou ka wotemohi wato, ‘Ahi nyawa gea duru ko iwa manga sosawaro, de duru yokangela yataoko o tobahioriki.

²⁹ Masara Ngohi duru toigo la ona naga manga sosawaro de ka idadi yataoko ahi hitiari ma demo naa, la gea ka idadi ihioriki abe ahao o kokangela yadaene onanguku.

³⁰ De abeika manga bodo, angamoi ngaro ona yamake manga musu yomatengo dika de yapoa yakiniiki manga gogianongoru yasana moi, masara ko yataokua abe gea idadi mangale ma titi Ngohi manga dadatoko tafukunoka manga musuika. De done sarakia ka idadi manga musu yahinooto dika de manga gogianongoru yasana ngimoi ka yoara dika? Gea ma titi moi dika, abe manga Jou yahidoakoka manga musuika gea.

³¹ De ngaro manga musu ma ka idadi yataoko itiai abe ma titi to ona manga jou ko imaketeroua de o Isiraele ma nyawa manga Jou. Abe ona gea ka idadi hato ko iwa manga duduhunu eko manga dadatoko, ho ona ma hirete dika kiani yomaduhunu.

³² De manga musu gea Ngohi taetongo tato ona manga hininga duru itotorou dika. Abe ona yomaketero hoka o Sodomo de o Gomora ma nyawa manga hiningali. Ho Ngohi tahiketero ona de o angguru ma roehe ma dorou, de manga angguru ma hofoko de ma bihaka, de ngaro ma hofoko ma hahaku masara enangoo duru imali dika.

³³ Ho to ona manga angguru ma teongo de ma bihaka, abe imakadaene dika de o dodiha ma biha inataduku.

³⁴ De ahi nyawa manga musu gea manga datoro Ngohi naa duru tagogono ahi hiningaka, abe Ngohi duru ko tawohangua hokokia yahikangela ahi nyawaika.

³⁵ Ho ahao ma oraha adonoka de Ngohi tahibalaha onangika, de ko itedekanokaua de ahao manga hibinaaha iboa onangika, de gea ahao manga hohowono ma amoko imataiti dika yadaene onanguku.

³⁶ De ahao Ngohi Ma Jou o Yawe tahibalaha la ahi nyawa ka idadi o totiai yamake, de ahi hininga ma dora ma hiokoo itagi ahi nyawaika. Abe ma oraha gea Ngohi tomalega onangika de tamake abe ko yomangakunokaua, de ona gea duru yohutuloka, abe ngaro o gilaongo ma nyawa eko ona abe ko o gilaongua, masara ngade-ngade yohotumoka mata-mata.”

³⁷ De ahao ma oraha gea de Ngohi taleha ahi nyawaika tato, “Ho naa o kiaikaka ti ngini nia jou-jou, de ena gea abe nimahinganono enangika angamoi niato bote duru de ma buturungoka, done o kiaika iloiki?

³⁸ De ngini niahihuba o aewani ma haki enangika gea, de nagali o angguru ma teongo ma gohaka niahihuba nia jouika gea la bari yokere. Ho irahai ena gea dika imasikaa de iniduhunu nginika, de abeika nitaili dika la nimahitatoko enangoka ma oraha o bodito inidaene!

³⁹ Ho naa abeika nimalega Ngohino la duru nihioriki Ngohi naa o Yawe! De duru ko iwa o jou utu yomakadaene hoka Ngohioli! Abe Ngohi dika ka idadi tahohonenge de tohiwango, de ka Ngohi dika takunu tahiodiri de ahao tahitogumoli. Nako hiadono ahi kuaha itagioka, moioo de ko iwa ka idadi ihitatoko eko ihilawana Ngohi.

⁴⁰ De naa Ngohi tohidoakiye ahi giama de tomahikoboto moi. De hokonaa ahi koboto ma demo tato, ‘Abe duru imaketero hoka Ngohi igoungu towango ka hiado-adonika, to Ngohi ahi demo nenangoo duru ma gou-goungu.

⁴¹ Naga Ngohioka ahi humaranga o dopo-dopoino abe duru ileletongo, de gea ma dae moi abe tapake la tahohowono o nyawaika. Ho ahao ma oraha ahi humaranga gea tomagihoro ipaha de tagoraka ahi giamoka, gea ahao tahibalaha ahi musuika la manga hohowono yadaene, de ona abe ihidohata Ngohino kiani manga hibalaha yaohana!

⁴² De ahi humaranga hoka aolomo ahi musu manga roehe, de nagali ahi hihiipi mata-mata abe ahao duru yopehaka de manga awunu. Abe ma awunu gea naga utu ihupu manga badangino abe yataokinoka, de utu yohone-honenge manga badangino, de utuoli ahi musu manga baluhu wokokurutiye ai awunu.

⁴³ Ho ngini mata-mata abe o Horogaka nigogere, koaho ngini nigogarago ma titi Ngohi naa tolaku-laku, abe ngini o jou-jou o Horogaka naa, irahai ngini mata-mata nimahuba-huba Ngohino. De hokogenangoo ngini abe ko o Isiraele ma nyawaua, nginioo mata-mata kiani nigogarago dika ka ma moi de to Ngohi ahi Isiraele ma nyawa. Angamoi Ngohi naa ahao tahibalaha ahi nyawa yatoma-tomaka manga awunu, hiadono ahi musu manga dodotoko kohadubuho yadaene. De ahao ona abe ihidohata Ngohino tadotoko onangika ka hiadono ahi nyawa manga tonaka tahiofi ho itebinokali.’ Hokogea to Ngohi ahi koboto ma demo.”

⁴⁴ Ho ipahaino de o Musa de o Yosua yoiki o Isiraele ma nyawaika de o Musa wobasa ma nyanyianga ma demo gea mata-mata onangika.

⁴⁵ De o Musa wobasa ipahaino de ahao una wahitiari o Isiraele ma nyawa mata-mataika wato,

⁴⁶ “Abe ma behehongo ma demo mata-mata tinidofanga nginika o wange naa, ngini kiani ka ihikaika nimahihohininga de nianiiki enangika. De kiani niadotoko ma demo mata-mata gea nia ngofa-ngofakika la onangoo ka idadi yatobaniiki enangika.

⁴⁷ Angamoi ma behehongo ma demo gea ko ihomoaua masara ma titi duru ikurutiye. Abe ka idadi hotemo hato ti ngini nia wowango ihititi duru ma behehongo gea ma demoka. Ho nako ngini naga nia hingounu enangika ahao ka idadi nia wowango ikuru-kurutu ma tonakoka gea abe o Yorodani ma akere doka ma honongaika.”

O Musa womalegaika ma gurutika de wamake o Kanani ma tonaka

⁴⁸ De duru ma wange gea dika de Ma Jou o Yawe witemo o Musaika wato,

⁴⁹ “Ngona noikohi o Moaba ma tonakika de nodoa o Abarimi ma loku-lokuiye. De nomahiadoniye de ahao nogila-gila nodoa o Nebo ma loku ma pukuiye abe ma loku gea o Yeriko ma kota ma daanika. Ho nomahiadoniye ma pukuiye de ka idadi nomalegaika doka o Kanani ma tonakika abe Ngohi tahidoaka o Isiraele ma nyawaika la idadi manga oara ma tonaka.

⁵⁰ De ma tonaka gea namake ipaha de ahao ngona ani wowango ma baha adonoka ho ma lokuoka gea de ngona nohonenge. De gea ahao ka idadi ngona de to ngona ani totofora abe yohira-hira yohonenge nimatoomuino. Ho gea idadi ngonaika abe imaketero hoka idadioka ani riaka o Harunika, angamoi unangoo wopahaka de ahao yomatoomuino una de nia totofora gea.

⁵¹ De gea ngini inihinooto nihonenge ma titi moi dika, abe ma dihira gea de ngini nihilawana Ngohino o Isiraele ma nyawa manga hima-himangoka. Abe ma oraha gea ngini mata-mata naga o Ribuutuino ma akere o Kadesoka, de gea imanoa o Sini ma tonaka ma kakaahaka. De genangoka ma ngi abe ahi nyawa manga himangoka de ngini inihinooto ko iwa nia horomati Ngohino.

⁵² Ho gea ma titi hiadono ma oraha ngona o loku ma pukuoka de ka idadi nomalega dika ma tonakika gea doka ma dola ma honongaka. Masara abe ma titi ngona de ani gogianongoru nimakiniiki la ngonaoo nowohama ma tonakika, gea Ngohi duru ko tonihigunoaua ngona nowohama genangika.” Hokogea Ma Jou ai demo unangika abe ma oraha itigioka o Musa ai wowango ma baha.