Higalioli 31 - Ma Jou ai Demo-demo o Totobelohoka

O Pasala 31 ko atailakouahi Itigioka o Musa wohonenge

¹ De ipahaino de o Musa wohigila-gila ai demo o Isiraele ma nyawa mata-mataika.

² Abe una wotemo wato, “Ngohi naa ahi ngumuru adonoka ahi taongo o ratuhu moi de monaoko. Ho marai ko takunokaua tinihihira-hira ngini, de hongoli Ma Jou wohihingahuoka wato ngohi ko idadiua tomahihora doka o Yorodani ma akere ma honongaika.

³ Masara nako Una gea nia Jou, itigioka ma oraha abe Una ma hirete womahihora dokaika la ka idadi ngini niwihidoduruika Unangika. Abe Una ahao wahikala o nyawa-nyawa gea de wagoraka ma tonaka gea onangino la nginioli winihigogere genangoka. De abe ma titi ahi duruuru o Yosua, una ahao winihihira-hira la nimakutuono nimahihora doka ma akere ma honongaika, abe imaketero dika hoka ma dihiraino Ma Jou winihibehehongo nginika.

⁴ De niwohama ma tonakika ipahaino de ahao Ma Jou wahikala ma nyawa abe yogogere genangoka, imaketero hoka ma dihiraino de wahikala o Amori ma koano yahinooto gea o Sihono de o Ogo.

⁵ Ho Una winihidoaka ma nyawa genangoka ti ngini nia giama ma hoatika, de ngini kiani niadiai onangika duru imaketero abe hoka tinihingahuoka ma pareta ma demo ma goronaka.

⁶ Ho ngini koaho nimaputuhu la ngini naga de nia buturungoka de nia domoroinoka! De ufa hiadono niamodongo onangika de ufa nifafara ma oraha nimarihimanga de ona, angamoi ti ngini nia Jou o Yawe ahao wininii-niiki ma oraha gea. De Una gea duru ko wininoaua de ko winiwohangua.”

⁷ De gea wotemo ipaha de ahao o Musa wiahoko o Yosua la womaokoino o Isiraele ma nyawa mata-mata manga hima-himangoka. De una woboainoka de o Musa wihuloko unangika wato, “Ngonaika tonihigaro tato irahai nomaputuhu la naga de ani buturungoka de nomahidomoroini dika! Angamoi ngona kiani nanii-niiki ani gogianongoru mata-mata naa la nimakutono niwohama ma tonakika gea abe nanga Jou wahibehehongo nia totoforaika wato ahao wahidoaka onangika. De ngona naa abe nahihira-hira la ma tonaka gea idadi to onangoli manga oara ma tonaka.

⁸ De ufa hiadono ani hawana naga eko ani hininga ieteke, angamoi nanga Jou o Yawe Una naga woninii-niiki ngona de winihihira-hira ngini. Una gea duru ko wininoaua de ko winiwohangua nginika!” Hokogea o Musa ai higaro ma demo onangika.

Abe ma titi Ma Jou ai Pareta ma Buku

⁹ De o Musa wotemo ipahaino de ahao una wohitulihuku o Pareta ma demo mata-mata naa o bukuoka. De wotulihi ibooto de ma buku gea wahidoaka manga hohihiraika la yagogonohi. Abe wahidoaka o Isiraele ma nyawa manga balu-baluhika de manga hidemo ma nyawaika abe naga de manga tagongoka la yotobaao-ao Ma Jou ai Peti.

^10-11 De ma buku wahidoaka onangika gea de wahibehehongo wato, “O taongo tumidi ma getongo de ngini kiani niobasa ma buku ma demo naa o Isiraele ma nyawa mata-mata himangoka la ona ka idadi yokokiihene ma buku ma dola. De hokonaa ma gahe ma hiaturu. O taongo atumi-tumiduku naga nanga rame-rame moi abe hohiromanga o Hijai-jai ma Tau ma rame-rame. De nagali nanga biaha ma oraha gea abe o nyawa manga nagimi mata-mata hakokiofioka la duru ko iwaka manga nagimi. Ho ma oraha gea ngini mata-mata nimatoomuino ma ngioka abe Ma Jou wairikoka la idadi nia dodoomu ma ngi de genangoka kiani niobasa to Una ai Pareta ma demo onangika.

¹² De gea kiani o balu-baluhu de o ngofa-ngofaka mata-mata yomatoomuino genangoka, abe ngaro o nau-nauru de ngaro o ngo-ngofeka, de ngaro o homoa ma nyawa abe yomadionikino nia kapo-kapongoka, masara ona mata-mata kiani naga la yokokiihene Ma Jou ai Demo-demo gea. De ai demoino gea de ona ka idadi yomadotoko ma titi Ma Jou ai hininga la naga manga horomati ma amoko Unangika. De hiadono ona duru yomahidodiai yaniiki ai Pareta ma demo mata-mataika.

¹³ De nako hokogea niobasa o taongo tumidi ma getongo, ahao nia ngofa-ngofakoo ka idadi ihioriki ai Pareta, angamoi ona ahao gea yoihene. De gea onangoo ka idadi yomadotoko ma titi Ma Jou hiadono naga manga horomati Unangika. Ho hokogea dika ma hiaturu kiani itagi ka ihikaika, la hokokia dika ma dekana abe nigogere nia tonakoka gea de ngini mata-mata naga nia horomati ma amoko Ma Jouika.”

O Yosua iwigoraka la wituruuru o Musa

¹⁴ De ipahaino de Ma Jou o Yawe wotemo o Musaika wato, “Abeika, naa itigioka ani wowango ma baha. Ho ngona kiani nibehehongo o Yosua la una woboaino, de ahao ngini inihinooto ka idadi niwohamika o Hikamake ma Tau ma goronaika. De genangoka ngini de Ngohi homarihimanga la ka idadi o Yosua tihitagongo de ai karajaanga.” Ho ona yahinooto yoiki yomarihimanga de Ma Jou ma tau gea ma goronaka.

¹⁵ De ahao ma oraha ona naga doka ma goronaka de Ma Jou womahimatoko onangika abe ai rupa yamake hoka o lobi ma lou, de ma lobi gea imanoa daku o tau ma ngorana ma lokuoka.

¹⁶ Womahimatoko de ahao Una witemo o Musaika wato, “Ngona naa enohonenge, de ngona nopahaka de ahao o Isiraele ma nyawa naa yomulaenge yomahirehene la ka yanii-niikoli o jou-jou ma homoaika. Abe ona ahao yowohamika ma tonakika gea de ipahaino de yomahijou o nyawa utu genangoka manga jouika. De gea ona ahao ihioluku Ngohi de ka yawohangika ahi behehongo ma demo abe ma dihiraino de mimahiketehibehehongoka ona de Ngohi.

¹⁷ De ma oraha gea ahao ahi ngamo duru ifae ma amokiye ho hiadono Ngohi ka taporete dika onangika de tanoaika, de ma bahauku de ona o bobinaaha yadaene onanguku. Abe manga kokangela de manga huha ma ngoe ahao yaohana hiadono yomakoketemo manga dodiawoika ato, ‘Boteua nanga kokangela naa inadaene mangale ma titi nanga Jou wonanoaika ho ko iwiwaka nanga hidogoronaka!’

¹⁸ De gea duru igoungu abe Ngohi tomagogono onangino de ko taduhunokaua angamoi to ona manga datoro ma dorou ifoloiholi. De manga dorou gea ma titi ona yomahijou o jou ma homoaika.”

¹⁹ De Ma Jou ka wotemohi ona yahinootoika wato, “Naa tinihidoaka o nyanyianga moi, ho kiani ngini nihitulihuku to ena ma demo de niadotoko o Isiraele ma nyawaika. Ona kiani yomadotoko gea hiadono duru yahioriki ma dola, la to ena ma demo gea idadi hoka o hakihii ma nyawa onangika.

²⁰ Angamoi ona gea ko itedekanokaua de Ngohi tohiaturu la ka idadi yowohama ma tonakika gea abe ma dihira tahibehehongo manga totoforaika tato tahidoaka onangika. De ma tonaka gea duru ma hohailoa angamoi duru ilamoko de ma joro duru ikutufuru. De ipahaino ona yogogere ma tonakoka gea de ahao ka ihikaika yaolo-olomo hiadono ona mata-mata yakokipunuhoka de ka yokokutufuru dika. Hokogea ona yososanangioka de ahao yomahirehene o jou utuika la yomahijou de yomahuba-huba enangika, abe gea duru ihioluku Ngohi de ka yawohanga dika ahi behehongo ma demoika.

²¹ De ahao abe ma oraha ona yalufungu de manga kokangela de manga huha ma ngoe, ma nyanyianga naa ma demo ka idadi yahitaana onangika ma titi manga howono, angamoi manga totoforauku ko yawohangua o nyanyianga ma demo naa ena. De duru igoungu abe o wange naa dika de Ngohi ka idadi tohioriki to ona gea manga hininga ma dodagi ho tinihingahuoka o nyanyianga ma demo ma goronaka. Abe ngaro ma oraha naa ko tahingohamuahi ma tonakika gea abe tahibehehongoka onangika masara tahiorikokau to ona manga hininga.” Hokogea Ma Jou ai demo ona yahinootoika.

²² Ho wotemo ipahaino de ma wange gea dika o Musa wohitulihuku ma nyanyianga ma demo de wadotoko o Isiraele ma nyawaika.

²³ De ahao Ma Jou wigoraka o Yosua, o Nuunu ai ngofaka gea, de wihitagongo de ai karajaanga. De gea Una witemo o Yosuaika wato, “Ngonaika tonihigaro tato irahai nomaputuhu la naga de ani buturungoka de nomahidomoroini dika! Angamoi ngona kiani nahihira-hira ani gogianongoru mata-mata o Isiraele ma nyawa naa la nimakutono niwohama ma tonakika gea abe Ngohi tahibehehongo nia totoforaika tato ahao tahidoaka onangika. De ma oraha ngini niwohamika de Ngohi tininii-niiki nginika.”

²⁴ De ipahaino o Musa wohitulihuku to Ma Jou ai Pareta ma demo naa mata-mataika o buku ma luluoka.

²⁵ De wohitulihi ibooto de ahao o Musa wahuloko o Lewi ma nyawaika abe naga manga tagongo la yatobaao-ao Ma Jou ai Peti.

²⁶ De hokonaa ai huhuloko ma demo wato, “Ma Pareta ma buku ma lulu naa ngini niale de niloiki Ma Jou o Yawe ai Petika. De nimahiadonika de kiani ngini nikelenga ai Peti ma datekoka la genangoka dika imanoa de idadi hoka o hakihii ma demo abe ahao inihitaana nia howo-howono nginika.

²⁷ Angamoi ngohi tinihiorikoka ma titi nia hilawana de nia pea ma dodogowini. Abe ngaro ma dihirainohi de ngohi tomanoa ti ngini nia hidogoronaka hiadono ma oraha naa naga masara ngini ma muruono ibooto niwilawanoka Ma Jouika. De duru tohioriki abe ahao ma oraha ngohi topahaka de ti ngini nia hininga ma lawana ka idogoli ilamoko!

²⁸ Ho irahai ngini niabehehongo nia balu-baluhu de nia hohihira la yoboaino de yomatoomuino ahi himangoka. De ma oraha ona naga ahi himangoka de ngohi ka idadi tahiree-reeika onangika ma titi ahi hitiari ma demo naa. De hongoli marai koaho haahoko o dunia naa de ma dihangoo la enangoo idadi hoka o hakihii ma nyawa angamoi ena mata-mata yoihene ahi hitiari ma demo naa.

²⁹ Angamoi duru tonganono abe ngohi topahaikahi de ahao ngini duru nimahidadidorou de ka nimahirehene la ibootohi niahingounu ahi higaro ma demo nginika abe tato kiani o totiai ma ngekomo dika nianii-niiki nia wowangoka. Ho ahao dokena nia himangika de o kangela de o huha ngini niaohana mangale ma titi nia wowango ma datoro abe duru itotorou Ma Jou ai himangoka. De nia datorino gea de ahao Ma Jou ai ngamo duru ifae nginika.” Hokogea o Musa ai hitiari ma demo onangika.

O Musa ai nyanyianga abe ma dolaino de Ma Jou watailako de waurusu ai nyawaika

³⁰ De ipahaino de o Isiraele ma nyawa mata-mata yomatoomuino o Musa ai himangoka la ka idadi yoihene ai demo. De yomatoomuinoka de ahao una wobasa o nyanyianga ma demo naa mata-mata onangika, abe ma demo duru ihira-hira ka hiadono ma demo ma baha masara gea mata-mata wobasa onangika.