Higalioli 30 - Ma Jou ai Demo-demo o Totobelohoka

O Pasala 30 ko atailakouahi Ahao naga ma oraha o Isiraele ma nyawa iwigilio Ma Jouika

¹ De o Musa ka wotemohi onangika wato, “De ahao naga ma oraha nanga himangoka abe ngini niamakeoka Ma Jou ai hiowa de ai hohowono mata-mata abe kangano tinihingahuokau. De ma oraha gea ngini nimanoa o homoa ma nyawa manga tona-tonakoka angamoi ti ngini nia Jou o Yawe winihikabarihika genangika. Ho gea koaho ngini nimahihohininga ma titi ahi hitiari ma demo nginika o wange naa.

² De irahai ma oraha gea ngini de nia totoforauku nimaputuhu la niwigilioli Unangika de naga nia hingounu to Una ai demoika. Abe nako ngini niwiniiki Unangika de nia hininga ma gahumu de nia wowango ma gahumu,

³ de ahao ti ngini nia Jou Una gea ka idadi wohikawalimi nia wowango ma kangela angamoi ai hininga ma dora ma hiokoo itagioli nginika. Abe gea ahao Una winihitoomuinoli o homoa ma nyawa manga tona-tonakino la ibootohi ngini nimadioniki onangoka.

⁴ Ho ngaro ti ngini nia gogianongoru yomanoa duru manga gogurutikaholi masara Una ka idadi winihikokitoomuino de winihigilio naangino.

⁵ Abe Una ahao winihigogeroli ti ngini nia tonakoka naa abe ma dodihiraino de nia totofora yogogere naangoka, la ma tonaka idadi ti nginioli. De ipahaino de Una duru winihiowa de winihidogo nginika hiadono nako ngini de nia totofora masara ka nginiohi duru niutumoka.

⁶ De hongoli ma oraha gea de ahao Una duru winihitebini ti ngini nia hininga de nia totoforaukuoo manga hininga. De gea ma titi la ngini mata-mata ka idadi niwidora Unangika de nia hininga ma gahumu de nia wowango ma gahumu, hiadono nia wowango duru ma rorahai dika niamake.

⁷ De nagali abe ma oraha gea de ahao Ma Jou ko winihohowonokaua nginika masara ti ngini nia musu onangikali ahao yadaene ma hohowono gea. Ho ona abe inidohata de inihikangela nginika ahao yamake manga hohowono.

⁸ De gea ahao idadiokali abe ngini niwihingounu Ma Jou o Yawe de ka ihikaika nianii-niiki to Una ai hiaturu de ai pareta ma demo abe kangano tinihingahuoka.”

⁹ “De ahao ma oraha gea de Ma Jou duru winihiowa nia giama ma karajaanga hiadono duru ma hasili ifoloiholi, de ngaro nia ngofa-ngofaka de nia duduono ma ngofa-ngofaka de nia redi ma joro masara gea mata-mata Una ahao winihidogo nginika la duru iwoeholi. Angamoi gea de ahao Una duru womorene nginika de wosanangi winihiowa abe imaketero dika hoka ma dihiraino de wahiowa ti ngini nia totoforaika.

¹⁰ Ho iti ngini naga nia hingounu to Ma Jou ai ilingi ma demoika de ka ihikaika nianiiki to Una ai hiaturu de ai paretaika abe ihitulihukuoka ai Pareta ma bukuoka. De kiani niwigilio Unangika de nia hininga ma gahumu de nia wowangoo ma gahumu. De nako ti ngini nia hininga ka hokogea dika Unangika de ahao Una duru winidomorene nginika de wosanangi dika winihiowa ngini mata-mataika.”

Ma Jou ai pareta gea tanu ko ihuhaua haniiki

¹¹ De o Musa ka wodogohi ai demoika wato, “De naa ngohi tinihigaro ngini mata-mataika ma titi to Una ai huhuloko ma demo abe o wange naa tinidofanga nginika. Abe ngohi tato to Una ai demo gea ko ihuhaua nianiiki masara tanu hatoli igapanga niataoko.

¹² Ai demo gea ko yagogonua daku o Horogaka abe duru kohagurutiye ho ko haboaikaua genangika. Ho ngaro ufa ngini nimakeleha niato, ‘Done onagona yodoa daku o Horogaiye de yao ai demo gea dakuku la ka idadi ngone naa hoihene de hiadono haniiki enangika?’

¹³ De hokogenangoo to Una ai demo ko imanoaua doka o gahi ma ngooto ma honongaka abe duru kohagurutika. Ho ngaro ufa nimakeleha niato, ‘Done onagona yomahihora doka ma ngooto ma honongaika de yao ai demo gea ma gurutoka de aino la ka idadi ngone naa hotoihene de hiadono naga nanga hingounu enangika?’

¹⁴ Duru hokogenangua, angamoi to Una ai demo duru ma digi-digino, abe gea imanoa ti ngini nia uru ma kaiino de nagali nia hininga ma goronaka, ho ngini ka idadi niapoa nianiiki enangika de gea ko ihuhaua.”

O Musa wahigaro la yomangiiriki Ma Jou ai ngekomo

¹⁵ De ahao o Musa wahigaro onangika wato, “Abeika, o wange naa tinihingahuoka ti ngini nia ngiiriki hinooto. Abe nako ma ngekomo moi nimangiiriki gea ma hasili ahao niamake ma owa kohangoe de nia wowango ka ma rorahai dika. Masara nako ma ngekomo moioli nimangiiriki gea ahao o kokangela de o hone-honenge dika niamake.

¹⁶ Ho o wange naa duru tinihigaro tato kiani ngini niwidora nia Jou o Yaweika de ka ihikaika naga nia hingounu to Una ai pareta de ai hiaturika la ka idadi nianiiki to Una dika ai hininga ma ngekomo. De gea ahao ngini nia wowango isosanangi dika de winihidogo la hiadono ko nia ngoe. De hongoli ngini ka idadi nimanoa ma tonakoka gea abe ko itedekanokaua de idadi ti ngini nia tonaka, de Una ahao duru winihiowa genangoka.

¹⁷ Masara nako hoka ngini nimaputuhu la nimahirehene ho ko iwa nia hingounu Unangika, de gea nimahigunoa la o homoa ma nyawa manga jou-jou inihiatara hiadono nianiiki de nimahuba-huba enangika.

¹⁸ De nako hokogea ngini nimangiiriki de o wange naa ngohi tinihingahu dika tato ahao o bobinaaha dika kiani niamake! Ho ngaro itigioka abe nimahihora doka o Yorodani ma akere ma honongaika la niwohama ma tonakika gea masara ngini ko initedekanua genangoka.”

¹⁹ “Kangano tinihingahuoka abe naga nia ngiiriki hinooto, de naa marai ngohi duru tinihigaro la nimahidodiai nimangiiriki. Angamoi marai o dunia naa de ma dihangoo idadi hoka o hakihii ma nyawa angamoi ena mata-mata yoihene ahi demo nginika. Abe ngini nimangiiriki o wowango eko o hone-honenge. De gea nimangiiriki o hiowa eko o hohowono. Hokogea ti ngini nia ngiiriki, ho ngohi duru tinihigaro nginika la o wowango dika nimangiiriki la nia wowango ahao duru de ma sosanangioka!

²⁰ De naa ma moioli tinihigaro la niwidora nia Jou o Yaweika de nia hingounu itagi Unangika hiadono niatobagou-goungu ka Unangika dika. Angamoi Una dika abe ka idadi winihiakunu la niwango nisosanangi dika ma tonakoka gea abe ma dodihiraino de Una wahibehehongo ti ngini nia totoforaika o Abarahaama de o Isaka de o Yakubika wato wahidoaka onangika.”