Higalioli 29 - Ma Jou ai Demo-demo o Totobelohoka

O Pasala 29 ko atailakouahi O Musa ai hitiari ma demo ai gogianongoruika

¹ Abe ma demo-demo naa tohitulihuku, gea ena o hiaturu ma demo abe Ma Jou o Yawe wihuloko o Musaika la una ahao wadofanga ai gogianongoru o Isiraele ma nyawaika. De gea manga behehongo ma demo abe ona de Ma Jou yomahiketehibehehongo o Moaba ma tonakoka. De ma dihiraino nagau manga behehongo abe yodiai o Sinai ma lokuoka, masara naa ena manga behehongo moioli.

² Ho o Musa wakokiahokino o Isiraele ma nyawa mata-mata de wadofanga Ma Jou ai hitiari ma demo onangika wato, “Ngini niamakeoka de ti ngini nia lako hinooto Ngohi Ma Jou ahi datoro mata-mata abe todiai o Mesiiri ma tonakoka. Abe ahi datorino gea de talawana to ona manga koano o Firaunu de to una ai huhuloko de to una ai kokawaaha mata-mataika.

³ Ma oraha gea ngini niamake to Ngohi ahi hohowono ma ngoe onangika de ahi heheranga ma ago-agomo.

⁴ De ngaro ma oraha gea hiadono ma oraha naa naga masara Ngohi ko tinihidoakuahi o hininga la ka idadi niataoko ma titi genangino. De hokogenangoo ti ngini nia lako ko imahiorikuahi de nia ngauku ko iihenuahi!

⁵ De gea tinihihira-hira o tonaka ma kakaahaino nia taongo moruata ma dekanino, de ngaro hokogea masara nia pakeanga de nia sandaala ko ibabitua.

⁶ De ma oraha gea ngini o roti ko niolo-olomua de o angguru de o daluku duru ko niokerua, de ngaro hokogea masara Ngohi ka ihikaika tinihidailako nia badanga ma perelu la ka idadi nihihioriki abe Ngohi naa nia Jou o Yawe!”

⁷ De ahao o Musa ka wotemohi onangika wato, “Ma dihiraino abe ma oraha ngone hokokiboaino naangino, naga o Hesebono ma kota manga koano o Sihono de o Basana ma tonaka manga koano o Ogo, ona homoi-homoi yoboaino la inaparangi, masara ngone ka idadi hahikala onangika.

⁸ De hahikala ipahaino de manga tonaka gea homahitongone de ahao hahikodoku nanga gogianongoru o Rubene de o Gaada ma nyawaika, de nagali nanga gogianongoru o Manase ma nyawa manga honongaika, onangikaoo hahikodoku ma tonaka.”

⁹ “Ho mangale ma titi Ma Jou o Yawe duru winihiowa nginika hokogea ho ngini kiani naga nia hingounu to Una ai behehongo ma demoika la ufa niawohanga enangika. De nako ngini ka ihikaika nianiiki itiai ai demo gea de ahao ti ngini nia datoro mata-mataika naga de ma hasiloka.

¹⁰ De o wange naa ngini mata-mata nimaokoino duru Ma Jou ai himangoka. Abe ngaro nia dutu homoi-homoi manga haeke de ti ngini mata-mata nia dimo-dimono de nia hohihira, de ngaro ngini o balu-baluhu o nauru

¹¹ de nia ngofa-ngofaka ma gilau de ti ngini nia feka-fekata. De ngaro o homoa ma nyawa mata-mata abe yomadioniki nia hidogoronaka de inileleani ma titi inipela-pelakuku nia hidaulu ma gota de nia akere iniono-onoko.

¹² Ho ngini mata-mata naga duru to Una ai himangoka o wange naa la ka idadi ngini de Una nimahiketehibehehongokali.

¹³ Abe o wange naa de Una winihibehehongo nginika abe nidadioka to Una ai nyawa de abe Una ti ngini nia Jou. De ai behehongo ma demo gea duru imakiniiki de to Una ai demo nginika ma dihiraino de imakiniikoo de ai behehongo ma demo ti ngini nia totofora o Abarahaama de o Isaka de o Yakubika.

^14-15 De ma behehongo naa ma dumutu ko nginikaua dika abe naga ai himangoka o wange naa. Abe ngaro ti ngini nia totoforaukuoo abe ko yomaboauahi ma oraha naa, masara to Una ai behehongo yadaene onangikaoo. Ho ngaro ngini naa de ngaro nia totoforauku masara ngini mata-mata nimahiketehibehehongo de Ma Jou o Yawe.”

¹⁶ “De ngini mata-mata ka niohiningahi abe ma titi nanga wowango ma oraha ngone ka o Mesiiri ma tonakokahi. De abe ma oraha hohupuino de gea kiani hotagi-tagi nanga musu manga tona-tonakino nanga dodagi ma goronaka.

¹⁷ Abe ngini ma hirete niamakeoka de nia lako nanga musu gea manga datoro ma dodorou abe hoka yomahuba-huba manga popangaoika. De gea manga pangao abe yomadiai o gotaino de o hakaruino de o haakaino de o gurasino.

¹⁸ Ho ngohi tinihitiari nginika la duru ko moiua nia hidogoronaka abe nimahirehene Ma Jouino la nianiikoli o homoa ma nyawa gea manga jou-jou. Ufa hiadono naga nia hininga hokogea nginioka, abe ngaro o nauru eko o ngofeka eko nia doomu moi eko nia dutu moi masara duru ko idadiua nirehene hokogea. Angamoi nako naga nginioka abe yaniiki manga jou ma homoa, ahao done hiadono to ona manga hininga gea imahora-hora ngini utuikali hiadono ko nia ngoe inihirehenoka nginioo.

¹⁹ Abe nako naga o nyawa nginioka yoihene Ma Jou ai behehongo ma demo de ka yoluku yaniiki enangika, gea ufa yomatemo manga hiningaka ato, ‘Ngohi naa ka yaowa dika abe ngaro ahi pea hatoli itogowini masara duru tonganono o hiowa dika tamake ahi wowangoka.’ Ufa manga demo hokogea angamoi ahao ka onangua dika abe o bobinaaha yadaene masara manga dodiawo abe manga hininga ma rorahai dika, onangukuoo o bobinaaha yadaene.

²⁰ De onagona dika nginioka abe yomahirehene hokogea, ahao Ma Jou o Yawe ko waofiua manga howono Unangika, de ipahaino to Una ai ngamo duru kohaamoko yadaene onanguku. Abe ma behehongo naa ma demo ma koboto de ma lolae mata-mata yahidotadaene onanguku, de genangino ma ngekomo hiadono Ma Jou duru wahihanga to ona gea manga roma-romanga la ibootohi o nyawa yofetongo to ona manga romanga.

²¹ De ahao Ma Jou duru wahikatingaka ma nyawa gea la o Isiraele ma nyawa mata-mataino de ona dika abe Una duru wahohowono la imakiniiki de ma behehongo naa ma hitiari ma demoino.

²² De ipahaino de ti ngini nia ngofa-ngofakuku de nagali o homoa ma nyawa abe yoboa manga tonaka homoi-homoiino, ona mata-mata ahao yamake to ena ma hasili, abe ma titi ma hohowono de ma popanyake abe Ma Jou wohipoha ti ngini nia tonakoka mangale nia howono gea.

²³ Abe nia tonaka ma amokika ahao naga ma gahi de ma uba itoka-tokara yawoongo ma tonaka gea. Ho ko moiua yodatomo de ko moiua iwangoiye genangoka, de ma bahauku de ahao hamake imakadaene hoka o kota ma dodihiraino gea o Sodomo de o Gomora de o Adima de o Seboimi. Angamoi ma kota gea Ma Jou duru wahibinaaha mangale ma titi ai ngamo duru kohaamoko.

²⁴ De nako hiadono ma titi nia howo-howonino de Una kiani wahibinaaha ti nginioli nia tonaka hokogea, ahao o homoa ma nyawa mata-mata yomakokeleha ato, ‘Done ma titi o kia hiadono ma tonaka gea Ma Jou o Yawe duru wahibinaaha enangika? Adodoa ho to Una ai ngamo duru ifae hiadono idadi kohaamoko?’

²⁵ De ahao naga abe yopaluhu ato, ‘Angamoi to Una ai nyawa ka yawohanga manga behehongo ma demo ho iwiporete to ona manga totofora manga Jou. Abe ma dodihiraino ma oraha yohupu o Mesiiri ma tonakoka de yaino de manga totofora yomahiketehibehehongo de manga Jou o Yawe, masara naa ka iwiporetokali.

²⁶ Ho ona yomahirehene ma homoaika de yomahuba-huba o homoa ma nyawa manga jouika. Abe ngaro o Isiraele ma nyawa gea tanu duru ko yahiorikua o jou-jou ma homoa gea, de manga Jou o Yawe duru wahitiari wato ufa yomahuba-huba enangika, masara ka uku dika yodiai.

²⁷ De gea ena ma titi hiadono Ma Jou o Yawe ai ngamo duru ifae ma amoko de ihidumutu ma tonakika gea. Ho ma koboto ma demo mata-mata abe ma dodihiraino de ihitulihukuoka to Una ai behehongo ma goronaka, gea mata-mata yadaene ma tonakuku gea.

²⁸ De genangoo ma titi hiadono Ma Jou hoka wakiwuku ai nyawa manga tonakoka de yaino de wakiniiki o tonaka moiikali. Gea mata-mata idadi mangale ma titi to Una ai ngamo duru kohaamoko onangika, de gea marai duru itararono hamake o wange naa.’ Marai hokogea ahao o homoa ma nyawa yomakoketemo nako ma oraha adonoka.”

²⁹ De ahao o Musa ka wotemohi wato, “To ngone nanga Jou o Yawe, naga Unangoka ma dogogono muruono naga abe ko moiua ihioriki. De nako ngone duru ko ihiorikua ai demo gea, ngaro ko haniikua masara ko iwa nanga hohowono genangino. Masara naga ai demo ma ngoe abe wonahimatokoka ngoneino, ho ngone mata-mata naga nanga tagongo ka ihikaika la hohingounu enangika. Abe ngaro ngone o balu-baluhu de ngaro nanga ngofa-ngofaka masara ngone mata-mata kiani hakokiniiki ai hitiari de ai behehongo ma demoika gea done nanga hohowono inadaene ngoneuku.”