Higalioli 1 - Ma Jou ai Demo-demo o Totobelohoka

O Pasala 1:1-18, 23-46 ko atailakouahi Ma Jou wahuloko la o Sinai ma lokuoka de yosobo

^1-5 De igoungu, o Isiraele ma nyawa mata-mata ka nagahi o Moaba ma tonaka ma kakaahaka abe dina o Yorodani ma akere ma honongaiha, angamoi ona ko yomahihorauahi de ko yowohamuahi o Kanani ma tonakika. Abe manga dodogumu ma ngi gea hatoli imakitigino de o Sufu ma kota, de nagali o kota muruono naga manga arihonongaka. Abe o Parana ma kota naga manga honongaka moi de ma kota o Tofele de o Labana de o Haseroto de o Disahaba manga hononga moiokali, ho manga ngi ma kota gea ma hidogoronaka. De ma oraha gea Ma Jou wahikalaka o koano yahinooto. De gea wihikala o Sihono abe una wahikoano o Amori ma nyawaika de manga kota ma mayo o Hesebonoka. De nagali wihikala o Ogo abe una wahikoano o Basana ma nyawaika de manga kota ma mayo o Asitarotoka, abe ma kota gea imakitigino de o Ederei. De nako o nyawa o Sinai ma lokuoka yosobo de yotagi-tagi yaniiki ma ngekomo abe atilakuru o Edomo ma loku-loku de ipaha yomahiadono o Kadese-Baranea ma kotaino, gea biaha o futu ngimoi de moi manga dodagi. Abe o Kadese-Baranea gea duru o Kanani ma tonaka ma batingoka. Masara ma oraha gea o Isiraele ma nyawa yotagi-tagi yaika yaino ngade-ngade manga taongo moruata ibooto de ko yowohamuahi o Kanani ma tonakika. Ho o Moaba ma tonaka ma kakaahaka gea de o Musa wadofanga Ma Jou o Yawe ai demo o Isiraele ma nyawa mata-mataika.

⁶ Abe wahingahu wato, “Ma dodihiraino abe ma oraha ngone nagahi o Sinai ma lokuokahi de Ma Jou o Yawe wonatemo wato, ‘Ngini naa iniwedonoka nia dekana abe nimahidodogumu o lokuoka naa.

⁷ Ho naa irahai la ibootohi nimahidodogumu naangoka ho koaho nisobo de nitagi-tagi o Amori ma nyawa manga tonakika abe naga ma loku ma ngoe genangoka. De naga ma tonaka utuoli abe kiani nitagi-tagi genangika, abe o Yorodani ma akere ma dola de ma tonaka abe itotoporono de ma loku-loku abe doka o Yorodani ma akere ma honongaka, de ma tonaka abe dakuiye idateke, de hiadono o Gogoronaka ma gahi ma ngigorika nimahiadono. Abe gea o Kanani ma nyawa manga tonaka de nagali o Libanono ma tonaka, de ka hiadono o Efaraata ma akere abe duru ma amoko ma akere gea.

⁸ Angamoi abeika, ma tonaka mata-mata gea Ngohi tinihidoaka nginika! Ho ngini kiani niwohamika de nimahitingini dika la nigogere genangoka. Angamoi gea ma tonaka abe ma dodihiraino de Ngohi tomahibehehongo tato ahao tahidoaka nia totofora o Abarahaamika de o Isakika de o Yakubika de to ona manga totoforauku mata-mataika.’ Hokogea to ngone nanga Jou wonahuloko ma dihiraino.”

⁹ De ahao o Musa wotemohi onangika wato, “De ma oraha gea ngohi tomahingahu ahi hininga ngini ahi gogianongoruika tato, ‘Ngini naa nidadioka duru ko nia ngoe, ho nako ngohi ma hirete ko tapoakaua ma tagongo la tinihihira-hira.

¹⁰ Angamoi Ma Jou o Yawe winihidogo hiadono nia ngoe ngade-ngade nimaketero hoka o muru-murumu ma ngoe daku o dihangoka!

¹¹ De naa ngohi duru tonganono la nanga totofora manga Jou o Yawe ka ihikaika winihidogo nginika de winihiowa la ka idadi niamake abe duru imaketero hoka Una winihibehehongo ma dihiraino!

¹² De ngaro ahi hininga ma sanangi naga nginika masara nagali ahi kangela ma amoka, de enangoo ihititi nginioka! Ho done sarakia ka idadi tapoa ahi tagongo gea? Angamoi ngohi kiani ka ihikaika tiniduhunu de nia kangela homoi-homoi de tiniurusu ma oraha ngini nimahiketehigurubungu.

¹³ Ho koaho ngini nimangiriki ti ngini nia nyawa yamuruono naga nia dutu homoi-homoiino abe ngini mata-mata nia horomati itagi onangika de naga manga sosawaro de manga tobahioriki ma amoko. De ahao ngohi tagorakiye ona gea la yodadi ti ngini nia hihira.’”

¹⁴ “De gea ngini nihipaluhu ngohino niato, ‘Iya, irahai ani hidee gea.’

¹⁵ Ho ma nyawa gea abe ngini niairikoka nia dutu homoi-homoiino, ngohi tagorakiye de tahidoaka ma tagongo onangika la yodadi nia tobauru-urusu ma nyawa de nia hohihira. Abe ona utu naga manga tagongo la yaleleani o nyawa yosana moi, de utu yaleleani o nyawa yaratuhu moi, de utuoli yaleleani o nyawa yamoritoa, de nagahi utu abe manga tagongo la yaleleani o nyawa yangimoi dika.”

¹⁶ “Ho ma oraha gea tahuloko o tobauru-urusu ma nyawaika gea tato, ‘Ngini naa naga nia tagongo la niaurusu de niatailako o nyawa manga gurubungu. Abe ngaro nia gogianongoru o Isiraele ma nyawa de ngaro o homoa ma nyawa abe yomadionikino dika nginioka, masara gea kiani niaurusu onagona dika abe naga de manga gurubungoka. De kiani nia putuhu mata-mata ka itotiai dika,

¹⁷ abe duru ko idadiua niairiki o nyawa. Ho ngaro o hu-huha ma nyawa naga manga gurubungu eko o kaya ma nyawa, masara ona mata-mata kiani niaurusu de niatailako itiai manga gurubungu. De ufa hiadono ngini inimodongo o nyawa onagonaika dika, angamoi ahao ti ngini nia putuhu gea ihititi Ma Jouoka dika. De nako ma moi ma moi naga o nyawa manga gurubungu abe ngini niamao ihuhaholi niamake ma gou-goungu ho ko nihiorikua ma putuhu koaho hokokia, gea de ahao ka idadi niboa ngohino. De ngohi ahao tinituruuru la ngohioli taurusu manga gurubungu gea.’

¹⁸ De hokogea ma dihiraino ngohi tinidofanga ma hiaturu ma demo nginika la ngini ka idadi niapoa nidiai ti ngini nia tagongo mata-mataika.”

O Musa ai hohininga ma demo o Isiraele ma nyawaika ma titi ma dihira ona iwilawana ato o Behehongo ma tonaka ko yowohamuahi de kiani yatailakokahi

¹⁹ De ahao o Musa wogila-gila woade-ade wahihohininga o Isiraele ma nyawaika wato, “Ma dihiraino nanga Jou, Ma Jou o Yawe, Una wohiaturu nanga dekana ngone hogogere o Sinai ma loku ma timiuku de ahao wonahingahu kiani hogila-gila o Kanani ma tonakika. Ho gea nanga dodagi ma goronaka de nanga dumutu o loku-lokuika abe genangoka naga o Amori ma nyawa yogogere. De angamoi o tonaka ma kakaahaka gea duru kohaamokika ho hiadono o kangela de o hawana kohangoe inadaene. Masara Ma Jou wonahihira-hira ka hiadono homahiadono o Kadese-Baranea ma ngioka.

²⁰ De genangoka ngohi tinihingahu tato, ‘Abeika, ma oraha naa ngini nimahiadonoka o Kanani ma tonaka ma batingika, de ma tonaka nenanga abe nanga Jou, Ma Jou o Yawe wonahidoakoka naa.

²¹ Abe naa idadioka imaketero hoka nanga totoforaino nanga Jou, wonahingahuoka. Ho naa ngini kiani niwohama de nimahitingini ma tonaka naa abe nanga Jou o Yawe wonahidoakoka. Ho ufa nia hininga ihuha! De ufa nihawana!’”

²² “Hokogea ahi higaro ma demo nginika la tinihimagawe genangoka masara ngini nipaluhu, niato, ‘Irahai ngomi ko miwohamuahi de ihira o nau-nauru yamuruono naga yohira yowohama la nanga ngekomo inahidailakohi. De ona ka idadi o Kanani ma nyawa manga kota-kota yatailako la ngomi mihioriki hokokia midiai la hiadono miahikala la gea manga kota-kota gea mimahitongomi.’ Hokogea ti ngini nia demo ma owa ngohino.”

²³ “De gea ngohi tomodeke de ti ngini nia hidee gea, ho ngohi tahidingoto nia nauru yangimoi de yahinooto nginioka. Abe nia dutu amomoiino o nyawa moi tahidingoto o tonakika gea.

²⁴ Ho ona yosobo de yotagi-tagi yoiki o loku-lokuiye de ipaha yomahiadono o Esekolo ma dolaika la ka idadi yatailako ma tonaka gea.

²⁵ De ipahaino de ona abe yatobatailako gea yale o tonaka ma hasili de yomagao la ka idadi yolioino de inahimatoko ma hofoko gea ngoneino. De ma oraha gea nagali inahingahu manga ade-ade abe yotemo ato, ‘Ma tonaka gea abe nanga Jou o Yawe wato wonahidoaka ngoneino, gea o tonaka ma rorahai.’ Hokogea manga demo.

²⁶ De ngaro hokogea masara ngini ka nioluku niahingounu nanga Jou ai huhuloko nginika ho ko niwohamua ma tonakika gea.

²⁷ De ma oraha gea ngini ka nimagoo-gogere dika nia hijai-jai ma tauoka de niwihigurubungu Unangika. Abe nia gurubungu ma demoino de ngini niato, ‘Maraioka nanga Jou duru wonadohata ngone. Angamoi Una bote wonahihupu o Mesiiroka de aino la ka idadi wonahidoaka dika o Amori ma nyawaika, la ona ahao inahibinaaha dika!

²⁸ Ho done hokokia ahao idadi ngoneino? Angamoi nanga gogianongoru abe yatobatailako gea manga demoino de ihihihanga nanga domoroini. Abe ona yoade-ade ma titi ma nyawa duru ko manga ngoe ma tonakoka gea de hongoli nako ona de ngone masara ka onangohi manga badanga ma gogurutiye. De nagali to ona manga kota ma ago-agomo abe homoi-homoi de ma dadaduhu duru ikokurutiyeholi, hiadono ngade-ngade ma dadaduhu gea imahiadono daku ma dihangiye! De nanga gogianongoru inahingahuoo ato o Anaka ai totoforauku naga ma tonakoka gea, de ona manga badanga duru ilago-agomo!’

²⁹ Hokogea nia gurubungu ma demo masara ngohi tinihigaro tato, ‘Ngaro ufa dika de ngini niamodongo o nyawaika gea!

³⁰ Angamoi ti ngini nia Jou o Yawe, Una gea wohira wowohamika de walawana ma nyawa gea la winidemo ngini, abe imaketero hoka ma dodihiraino de Una walawana o Mesiiri ma nyawaika.

³¹ De gea ngini ma hirete ma dihiraino de niwimake abe hokokia nia Jou winigoana de winipaliara ma oraha nia dodagi ma goronaka abe o tonaka ma kakaahaino nitagi-tagi. De gea Una winipaliara irahai duru imaketero hoka o nyawa womatengo wipaliara ai ngofaka. De ka hokogea dika ai baliara nginika hiadono ma oraha naa abe winiao ma ngiino naa.

^32-33 Abe nia dodagi ma goronakahi gea de Una woiriki nia dodogumu ma ngi abe ka enangohi irahai la nimahidodogumu genangoka. De nagali Una ka ihikaika winihihira-hira abe nako o wange-wange naga o lobi ma lou ho ka idadi ngini nihidoduruika ai poretino, de nako o futu-futu de ma lobi ma lou gea idadi hoka o uku ihololomiye abe genangino de winihihira-hira nia dumutika. De ngaro hokogea mata-mata ai duduhunu nginika ma dodihiraka gea masara ngini ka niolukohi nimahinganono nia Jou o Yaweika.’”

³⁴ “De ma oraha Ma Jou woihene ti ngini nia gurubungu ma demo Unangika de Una duru winingamo. Abe Una ma oraha gea de womahikoboto moi ma titi ngini wato,

³⁵ ‘Ngini mata-mata abe niwango ma oraha naa ka nia hininga itotorou dika. Ho ngini ko moiua ka idadi niwohama ma tonaka ma rorahaiika gea abe ma dihiraino de tinihibehehongo tato tahidoaka ti ngini nia totoforaika. Abe ahao ka idadi nia ngofa-ngofaka yowohama genangika masara ngini naa mata-mata kiani nikokihonengokahi de ahao ona ka idadi yowohama.

³⁶ Masara naga womatengo dika nginioka abe ka idadi wowohamika de gea o Kalebe abe o Yefune ai ngofaka. Angamoi to una gea ai hiningaka de duru ka ihikaika wanii-niiki to Ma Jou ai hininga. Ho ahao unangika de ai totoforaukuikaoo Ngohi tahidoaka manga oara ma tonaka. De manga oara ma hidoku gea tanu duru ma tonakino abe ma dihira o Kalebe watobatailako ma oraha tahidingoto una de ai dodiawo genangika.”

³⁷ De ahao o Musa ka wotemohi onangika wato, “De ma oraha gea de nanga Jou ai ngamo itagi ngohinoo ma titi ngini. Abe Una wohitemo wato, ‘Musa, ngaro ngona ma hirete masara ko tonihigunoaua la nowohama ma behehongo ma tonakika gea.

³⁸ Masara ani duduhunu o Yosua abe o Nuunu ai ngofaka, una gea wonituruuru de ka idadi wahihira-hira o Isiraele ma nyawa ma oraha yowohama ma tonakika. Ho irahai ngona nihigaro unangika angamoi una gea abe wahihira-hira ma oraha yowohama de yomahitoona ma tonaka gea.

³⁹ Ho Ngohi ahao tahidoaka ma tonaka ti ngini nia ngofa-ngofakika abe ma oraha naa ona ko idadiuahi ihikohowono ma rorahai de ma dodorou. Abe ngini ma dodihiraka de niato bote nia ngofa-ngofaka gea o homoa ma nyawa yataokino ho yohonenge dika. Masara abeika Ngohi tato nia ngofa-ngofaka gea abe ahao yamake ma tonaka to Ngohi ahi giamino.

⁴⁰ Masara abe ma titi ngini ma hirete o dimo-dimono, kiani ngini nioporete ma tonaka ma rorahai gea la niogilioli o tonaka ma kakaahaikali abe nia dumutu o Bongo-bongo ma gahika.’ Hokogea nanga Jou ai demo nginika ma dihiraino gea.”

⁴¹ “De gea niihene ai demo ipaha de ahao ngini nipaluhu ngohino de nia toduba ma demo, abe niato, ‘Ngomi naa mimangaku abe miahowonoka nanga Jou o Yaweika. Masara naa mimahidiaioka la miwohama ma tonakika de miaparangi ma nyawaika gea abe hoka ma dihiraino de nanga Jou womihulokoka ngomi.’ Hokogea nia demo de ahao nia nau-nauru yomahinoauku manga dae homoi-homoi de yomahidiai yaparangi. De ona manga hiningaka ato marai ka igapanga dika yaparangi manga musuika abe yogogere o loku-lokuoka gea.”

⁴² “Masara ma oraha gea de Ma Jou wohitemo ngohino wato, ‘Kiani ngona o Musa nahitiari onangika la ufa yoiki yaparangi manga musuika angamoi Ngohi ko tanii-niikua genangika ho ahao manga musu yolaku de duru yahikala o Isiraele ma nyawaika.’

⁴³ De ai demo gea tinidofanga nginika masara duru ko niahigihenua. Abe ngini ka niwilawana dika nanga Jouika de mangale ma titi nia hininga ma sadeino hiadono ka oko dika niwohamika de nitagi-tagi daku o loku-lokuiye la niato niaparangi onangika gea.

⁴⁴ De ahao o Amori ma nyawa abe yogogere genangoka ona yohupu manga ngiino la inibaatika nginika, de manga boa gea duru ihiapoto de duru ikiria, de ngaro ma oraha ngini niato nimahiloara masara ona duru inikiniiki ma gurutika. Abe nia musu gea yomaketero hoka o totoimi ma kusuili abe duru itualono. De abe nimahiloara nia gogiriaka de ona inikiniiki de ka ihikaika inihipoha de inihiodiri. De gea ona inikiniiki o Edomo ma tonakika de ipaha inihikala o Horama ma kotaka, abe gea ma romanga ma titi ‘o Hibinaaha.’

⁴⁵ De inihikala ipaha de ahao nia hou nilioino de duru niari-ari Ma Jou o Yawe ai himangoka, masara Una ka woluku winihigihene nia gari ma ilingika.

⁴⁶ Ho ipahaino de ngini duru nia dekana nimanoa o Kadesoka gea.”