Hidingoto 9 - Ma Jou ai Demo-demo o Totobelohoka

O Paulusu ai wowango ma ngekomo duru aturuuruoka ma titi o Yesusu

¹ De abe ma oraha gea o Saulusu ka ihikaika waniiki ai hidee abe wato ona iwinii-niiki nanga Baluhu idodutuika, ona gea mata-mata wahideeoka wato ka wahohonenge dika. Ho una woiki o Isiraele manga hidemo ma nyawa Ma Jouiye wokokurutiye

² la womagahoko o higunoa ma hurata unangino. Abe ma hurata ahao ihidumutu o Yahudi ma nyawa manga dodotoko ma tau ma hihiraika abe naga o Damasiki ma kotaka. De ma hurata ma goronaka de o Saulusu woigo la ma hidemo wokokurutiye wihidoaka o kuaha unangika la nako ahao wamake o nyawa o Damasikoka abe yatobaniiki ma dodotoko abe ma titi o Yesusu, ona gea o Saulusu ka idadi wataoko de wahidapakiti de o rante. De wataokino de ahao ai hidee la waoino o Yerusaleeme ma kotaino la yamake manga hohowono genangoka. De gea ai hidee la ngaro o nau-nauru de ngaro o ngo-ngofeka masara ona mata-mata abe yatobaniiki o Yesusu ai dodotoko ahao wataoko de wahohowono. De manga hidemo ma nyawa wokokurutiye una woihene o Saulusu ai gogahoko gea de wosanangi ai demoika. Ho wodiai ma higunoa ma hurata gea de wihidoaka o Saulusika.

³ De ipaha o Saulusu o Yerusaleemoka de wosobo la woiki o Damasiki ma kotaika. De abe hatoli womahitigika de ma kota gea de ka itodokanino naga o Horogaka de auku ma dararono iwihitararonuku unanguku, de gea duru kohadararono!

⁴ De una worubauku ma tonakuku de ahao woihene o ilingi itemo unangika ato, “Saulusu, Saulusu! Adodoa ho ngona nohihikangela Ngohino ma titi ani datorino?”

⁵ De una wato, “Masara ahi baluhu, ngona naa onaguna?” De ma ilingi iwipaluhu ato, “Ngohi naa o Yesusu, abe ngona nohihikangela Ngohino!

⁶ De naa tonihuloko la nomomikiye de nogila-gila nowohama ma kotaika. De nomahiadonoka de ahao naga abe inihingahu ngonaika o kia ahao kiani nodiai.”

⁷ De o Saulusu ai dodiawo naga abe yomakiniiki de de una o Damasiki ma kotaika ona duru yokokiherangoka de ko ihiorikua koaho o kia yotemo ho yomarii-riidoka dika. Angamoi onangoo yoihenoka o nyawa manga ilingi gea masara ma nyawa ko yamakeua!

⁸ De o Saulusu una womomikiye de ai lako wafelanga masara ko womahiorikokaua. Ho ai dodiawo gea iwituda abe yogila-gila yowohamika o Damasiki ma kotaika.

⁹ De yomahiadonoka de o Saulusu una ai wange hangeino worafioka, de ngaro o inomo ma ko wolo-olomua de ngaro o akere ma ko wokerua.

¹⁰ De naga o Damasiki ma kotaka womatengo wingaku-ngaku abe ai romanga o Ananiasa. De nanga Baluhu idodutu womahimatoko unangika de wiahoko wato, “Ananiasa!” De wipaluhu wato, “Ahi Baluhu! Ngohi naga!”

¹¹ De nanga Baluhu wato, “Ngona noikohi ma kota ma ngekomika doka abe ihiromanga ato ma ngekomo yorikotika. De genangoka ahao namake o Yudasa ai tau. Ho noikohi o Yudasa ai tauika de nogahoko la ka idadi nitutumu abe genangoka naga o Saulusu abe una o Tarasuusu ma kotaka ma nyawa. Abe una gea ma oraha naa naga womaniata Ngohino.

¹² De Ngohi tihimatokoka unangika o himatoko moi, abe gea ma goronaka de o Saulusu wamake ngona o Ananiasa noboa unangino de nifokumu unangika la ai lako womahiorikoli. De hokogea abe tihimatokoka o Saulusika doka ma tauoka gea.”

¹³ De o Ananiasa wato, “Masara ahi Baluhu! Ngohi tigihenoka ma titi ma nyawa gea! Abe una ai datoro ma dorou ma ngoe wodiaioka ani nyawa yotebi-tebinika o Yerusaleemoka!

¹⁴ De ngomi miihenino abe nanga hidemo ma nyawa yokokurutiye iwihidoakoka manga kuaha unangika la una ka idadi o Damasiki ma kotaka naa de ngomi miningaku-ngaku mata-mata womitaoko.”

¹⁵ Masara nanga Baluhu wotemo wato, “Noikohi de naniiki dika ahi demo abe tonihulokoka. Angamoi o Saulusu una gea tiirikoka la tato ahi Abari ma Rorahai una wao de wahingahu-ngahu onangika abe ko o Yahudi ma nyawaua de o kokoanoika, de ngaro o Isiraele ma nyawaikaoo ma ahao wahikodoku ahi wowango ma ade-ade ma demo.

¹⁶ De Ngohi ahao tihimatoko abe hokokia kiani iwihikangela unangika abe ma titi wohinii-niiki Ngohi.”

¹⁷ De witemo ipaha de ahao o Ananiasa woikoka witutumu o Saulusika. De womahiadono ma tauika de wifokumu de ai giama de wotemo wato, “Ahi gianongoru o Saulusu, nanga Baluhu idodutu o Yesusu, abe nengokadauino womahimatoko ngonaika o ngekomoka, Una gea abe wohihidingoto ngohi ngonaino la wato tonihitogumu ma titi ani lako la ka idadi nomahiorikoli. De wohihidingoto la ka idadi ngona inilufungu de Ma Jou o Womaha.”

¹⁸ Ka de wotemo hokogea de ka itodokanino naga abe o Saulusu ai lakoka de auku iotakuku, abe gea ena ma rupa hoka o nawoko ma unafa. Ho iotakoka de o Saulusu ai lako itogumoka ho ka idadi womahioriki. De ahao una womaokoiye de womaohiki abe ma titi ai ngongaku o Yesusika.

¹⁹ De womaohiki ibooto de o inomo wolomo ho ai badanga ma buturungu ka ilio. De ipaha de o Saulusu ka womagoo-gogerohi o Damasiki ma kotaka o futu muruonohi la wadodiawo o ngongaku ma nyawa genangoka.

O Saulusu o Abari ma Rorahai wahingahu-ngahu

²⁰ De gea womulaengoka wahingahu-ngahu o nyawaika ma titi o Yesusu, abe una wotobawohama manga dodotoko ma tau-tauoka de wotemo wato, “O Yesusu Una duru wagoungu Ma Jou ai Ngofaka!”

²¹ De ona abe yotoihene unangika ona mata-mata duru yokokiherangoka. De yomakokeleha ato, “Ngohi tato bote una gea abe nengokadauino o Yerusaleemoka de duru wahikokangela ona iwinii-niiki o Yesusu genangoka hiadono wato wahibinaaha onangika. De nagali ngomi miihenino abe gea ma titi woboa nanga kotaino naa, la onagona dika iwinii-niiki o Yesusika de una ka idadi wataoko onangika. De gea wahidapakiti de o rante la waoika abe nanga hidemo ma nyawa yokokurutiye manga ngiika o Yerusaleemoka. La genangoka de ahao manga hohowono yamake.”

²² De abe ma oraha o Saulusu wahikodoku Ma Jou ai Demo-demo o nyawaika de ai demo ka idogo-dogo iputurungu, ho hiadono o Yahudi ma nyawa abe o Damasiki ma kotaka ko idadiua iwihikala ai demoino. De ai demoino gea de wihitaana abe o Yesusu Una duru wagoungu Ma Jou ai Mesia abe ma dodihiraino de wihibehehongoka wato ahao wihidingoto ngoneuku.

²³ De ipahaino de o Yahudi ma nyawa manga hihira genangoka yomaputuhu ato kiani iwitoma o Saulusika.

²⁴ Masara naga abe yoihene manga hidee ma dorou ma demo de iwihingahu o Saulusika. Abe o kota ma ngoranoka naga o nyawa iwigoa-goana o futu de o wange la ka idadi iwitaoko de iwitoma unangika.

²⁵ Ho o futu moiuku de ai gogianongoru yamuruono naga abe iwingaku-ngaku o Yesusika, ona iwiao o kota ma dadaduhu ma doonga moiika. De yomahiadonika de iwihuloko la womagogono dau o tupa ma amoko moi ma goronauku de ahao iwihidowora de o tali o dadaduhu ma poretuku la ka idadi woara ma hoanika.

²⁶ De ipahaino abe o Saulusu womahiadono o Yerusaleeme ma kotaiye de una woigo wato watutumu ona iwingaku-ngaku genangoka, masara ona mata-mata iwikokimodongo unangika. Angamoi ona ato bote o Saulusu womadokangelukino dika ho ko wagoungua wingaku o Yesusika!

²⁷ De ahao naga womatengo o Baranabasa, de una wiao o hidingoto ma nyawaika de woade-ade onangika. De gea woade-ade abe o Saulusu yomakamake de nanga Baluhu ai dodagi ma goronaka de hokokia ai demo o Saulusika ma oraha o Damasiki ma kotaika woiki. De o Baranabasa unangoo woade-ade onangika abe hokokia o Saulusu duru wahingahu-ngahu o Damasiki ma nyawaika ma titi o Yesusu ai romanga wohigorakiye.

²⁸ De o Baranabasa ai ade-ade yoihene ipaha de ahao o hidingoto ma nyawa iwidafongo o Saulusika, ho ma oraha genangoka de imahikaika de una ka ihikaika yomakiniiki de de ona o Yerusaleemoka. Abe ona duru de manga domoroini yahingahu-ngahu o nyawaika ma titi nanga Baluhu idodutu.

²⁹ De naga genangoka o Yahudi ma nyawa yamuruono naga abe yotemo-temo o Yunani ma demo dika, de ona de o Saulusu yomakoketemo ma titi o Yesusu ka hiadono yomaketeloliliara. De ma bahauku ona iwihidee la ato iwitoma o Saulusika.

³⁰ Ho ma oraha abe ona iwingaku-ngaku yoihenoka ma titi manga hidee ma dorou gea de iwihiloara abe iwiao o Kaisarea ma kotaika de ahao iwihidingoto la wogila-gila wolio to una ai kapongika abe ihiromanga o Tarasuusu ma kapongo.

³¹ De ipahainoli de o Yesusu ai gareja ma nyawa hatoli ikurangoka abe o nyawa yahikangela onangika. Ho ngaro o Yudea ma tonakoka de ngaro o Galilea ma tonakoka de ngaro o Samaria ma tonakoka, masara ai gareja ma nyawa abe yomanoa ma tonaka mata-mataika gea manga hininga ka idadi iriidi. De ona manga ngongaku ka idogo-dogo iputurungu, de ka ihikaika naga manga horomati itagi nanga Baluhu idodutuika. De nagali abe Ma Jou o Womaha ka ihikaika wahigaro ona abe manga ngongakuika. De ka ihikaika o nyawa yodogo-dogo abe iwingaku Unangika ho ai gareja idogo-dogo ilamoko.

Ma Jou ai Gareja imahihora o Antiokia ma kotaika 9:32—12:25 O Peturusu o nyawa wahitogumu de wahimomikoo manga honengino

³² De ipahainoli de o Peturusu wotagi-tagi de o kapongo homoi-homoiika wotulu-tulu la watutumu ona iwingaku-ngakuoka o Yesusika. De ai dodagi ma goronaka de watutumu nanga Baluhu ai nyawa abe yomanoa o Lida ma kapongoka.

³³ De naga genangoka womatengo ai romanga o Eneasa abe una wolugu-lugu. De una gea ai taongo tufangeino naa abe ka womaidu-idu dika ai nanaooka angamoi ko idadiua womaokoiye. De o Peturusu naga wotagi-tagi ma kapongoka gea de yomakamake una de wolugu-lugu gea.

³⁴ De ahao witemo o Eneasika wato, “Eneasa, ngona naa o Yesusu Kristusu wonihitogumu ani kangelaino! Ho ngona nomaokoiye de ani nanao nalulukoka!” Ka de wotemo hokogea de wotogumoka!

³⁵ De wotogumu ipaha de ona mata-mata o Lida ma kapongoka de o Sarono ma tonakoka gea iwimake abe o Eneasa ka idadi womadagi-dagi, ho ona mata-mata iwingaku nanga Baluhu idodutuika.

³⁶ De ma oraha gea o Yope ma kapongoka de naga momatengo mingaku-ngaku abe ami romanga o ngo Tabita, abe ma titi o luadana. De naga ami romanga moioli abe nako o Yunani ma demoka ona imifetongo ato, o ngo Dorokasa. De muna ami wowangoka de ka ihikaika matobaduhunu o nyawaika, abe ami datoro ma rorahai modiai ami hininga ma hohailoaino de nagali abe o hu-huha ma nyawaika matobaduhunu.

³⁷ De ipahaino muna mopanyakeuku hiadono mohonenge. De ami dodiawo imihidiai ami honenge la ka idadi imilungunu de ahao imikelenga jai-jai o kamar moioka abe daku ma tau ma lape hinootoka.

³⁸ Masara abe ma oraha imikelengauku de yoihene abe o Peturusu una naga doka o Lida ma kapongoka abe ko ikurutikaua de o Yope. Ho ona yahidingoto manga dodiawo o nauru yahinooto la iwibehehongo o Peturusika ato, “Ngomi duru migahoko la nomataiti noboaino!”

³⁹ De ipaha de o Peturusu yomakiniiki de ona yahinooto ho woboa ma tauino. Ka de womahiadono de yomataiti iwiao daku ma kamarika. De ma kamar ma goronaka de naga o ngo bao-bao duru yomahikudutukino de ona mata-mata imigari-gari. De naga utu abe iwihimatoko o Peturusika manga baju abe nengokadauino de o ngo Dorokasa madiai de mahidoaka onangika.

⁴⁰ De ahao o Peturusu wogahoko la ona mata-mata yokokihupu ma kamaroka de aino. De yokokihupuoka de una watilabukuku de womaniata Ma Jouiye. De womaniata ipaha de womaleloro la wohimanga ami honengika de wotemo wato, “Tabita, Nomomikiye!” Ka hokogea dika de muna ami lako mafelanga! De momalega o Peturusika de ahao momomiki de mogogeruku.

⁴¹ De ahao una womiso ami giama de womihimotekiye la ka idadi momaokoiye. De momaokoino de ahao una wahokino o ngo-ngofeka yofao-fao gea de abe utu iwingaku-ngaku mata-mataika de wahimatoko o ngo Tabita onangika la ka idadi ihioriki abe muna ka mowangokali.

⁴² De ma abari gea duru imataiti imahikabarihika o Yope ma nyawa mata-mataika, de ona manga ngoe iwingaku nanga Baluhika.

⁴³ De o ngo Tabita momomiki ipaha de ahao o Peturusu womanoa hatoli ai dekana o Yope ma kapongoka, abe womadioniki womatengo ai tauoka abe ai romanga o Simono. De o Simono una gea ai karajaanga o aewani ma kai watobatebini ka hiadono inouhu.