Hidingoto 8 - Ma Jou ai Demo-demo o Totobelohoka

^1-3 De o Saulusu ai hiningaka unangoo wohimoteke abe wosanangi ma titi iwitoma o Setefanusika. De abe o Setefanusu iwitomaka de ahao naga o nyawa yamuruono naga abe duru iwihoromati Ma Jouika, de ona gea yoboaino de iwilungunu o Setefanusu ai honenge. De gea iwilungunu de duru iwigari-gari ma titi una. De o wange gea abe o Setefanusu iwitomaka de o nyawa yomulaenge duru yahikokangela o gareja ma nyawaika abe o Yerusaleeme ma kotaka yomatoo-toomuino. De o Saulusu unangoo wohitaili la wahikapusaka o gareja ma doomu. Ho una wowohama o tau amomoiika la walingiri o ngongaku ma nyawa. De nako wamake abe iwingakuoka, ngaro o nau-nauru de ngaro o ngo-ngofeka, masara ona gea wataokino de watauru wao la wahingohamika o bui ma tauika. Ho mangale ma titi o nyawa manga ngoe yahikokangela onangika hiadono ona iwingaku-ngakuoka yomahikabarihika o tonaka utuikali. Abe utu yoara o Yudea ma tonakika de utuoli o Samaria ma tonakika yoara. De abe manga hou o Yerusaleeme ma kotaka gea o hidingoto ma nyawa dika, angamoi manga dodiawo mata-mata yomahikabarihoka.

O nyawa duru yahikangela abe iwingaku-ngakuika ho yomahikabarihoka O Filipusu wahikodoku Ma Jou ai Demo-demo o Samaria ma tonakoka

⁴ De ona iwingaku-ngakuoka abe yomahikabarihika ona yotagi-tagi de yahingahu-ngahu o Abari ma Rorahai o nyawaika.

⁵ De naga womatengo ai romanga o Filipusu abe una o Yerusaleemoka de wouti woiki o Samaria ma kota moiika. De genangoka wahingahu-ngahu onangika ma titi o Yesusu Una Ma Jou ai Mesia.

⁶ De o nyawa ko manga ngoe genangoka abe ma oraha yoihene ai abari ma demo de yamake ma heheranga abe una wodiai manga hima-himangoka de ona mata-mata duru yototoihene to una ai demoika.

⁷ Abe genangoka naga o nyawa yamuruono naga abe yakokitokata, masara ona o Filipusu waduhunu abe watitoko manga tokata, de ma oraha ma tokata ihupu manga badangoka de aino de duru ipoa-poaka. De nagali manga ngoe abe yolugu-lugu de yotalo-talo, de onangoo mata-mata wahikokitogumoka ho manga kangela ko iwaka.

⁸ Ho ma kotaka gea ma nyawa duru yogogaragoka.

⁹ De ma kotaka gea naga womatengo ai romanga o Simono. De una gea ai dekanino wososawaro o dodiai hiadono duru ka ihikaika wahiheranga ai gogianongoru o Samaria ma nyawa. Ho una gea womahikurutiye de womafetongo ma titi ai hiakunu ilamokiye.

¹⁰ De o Samaria ma nyawa mata-mataika ngaro yokokurutiye eko yotipokouku ma iwikokifetongo unangika ato, “Una gea Ma Jou ai giama ma dodofanga angamoi duru ai kuaha o fara moi!”

¹¹ De mangale ma titi ai dodiai abe ma dekanino ona yamakeoka ho yokokiherangoka hiadono ai gogere ma kotaka gea duru ikurutiye.

¹² De ipahaino de o Filipusu wahingahu-ngahu onangika o Abari ma Rorahai abe ma titi hokokia Ma Jou wahikoano ai nyawaika de abe ma titi o Yesusu Kristusu woboa la wonaduhunu nanga howo-howonino. De gea o Samaria ma nyawa manga ngoe yongaku ai demoika ho yomaohiki. Abe naga o nau-nauru de o ngo-ngofekaoo manga ngoe yomaohiki ma titi yongaku o Abari ma Rorahaiika.

¹³ De o Simono unangoo wongakuoka de womaohiki. De womaohiki ipaha de witobaniiki o Filipusu abe ngaro o kiaika dika o Filipusu woiki ma una o Simono winiiki genangika. De o Simono duru wiheranga o Filipusika ma titi ma heheranga de ma kuaha ma dodunguu abe o Filipusu wotobadiai o nyawa manga hima-himangoka.

¹⁴ De ipahaino de o hidingoto ma nyawa o Yerusaleemoka yoihenino abe ma titi o Samaria ma nyawa yongaku Ma Jou ai Abari ma Rorahaiika, ho yahidingoto o Peturusu de o Yohanese genangika la yatutumu onangika.

¹⁵ De yomahiadonika de yomaniata abe yagahoko Ma Jouiye ma titi o Samaria ma nyawa gea abe ahao iwingaku-ngaku o Yesusika. De gea yagahoko Ma Jouika la Una ahao wahidoaka ona iwingaku-ngakuika Ma Jou o Womaha manga borihiningaka,

¹⁶ angamoi ma dihiraino de Ma Jou o Womaha ko yalufunguahi onangika. Abe ma oraha gea ona ahao yomaohiki ma titi iwingaku nanga Baluhu idodutu o Yesusika, masara ko yafokumuahi.

¹⁷ Ho yagahoko ipahaino de ahao o Peturusu de o Yohanese yafokumu onangika la ka idadi Ma Jou o Womaha woboa de walufungu manga hiningaka.

¹⁸ De ma oraha gea naga o Simono wolega-lega, de una wamake abe ma titi o hidingoto ma nyawa ka de yafokumu o nyawa manga peauku de yamakeoka Ma Jou o Womaha onangika! Ho ka de wamake de o Simono ai hiningaka ipuda la wato womaijaino manga kuaha gea.

¹⁹ Abe una wotemo onangika wato, “Nako ka idadi, ngohi toigo o tiwi tinihidoaka la ahao ngohioo naga de ahi kuahaka! La ahao ma oraha ngohi tafokumu o nyawaika de ka idadi yamake Ma Jou o Womaha genangino!”

²⁰ De o Peturusu wipaluhu wato, “Koaho ngona de ani tiwi ka ma moi inihibinaahaka! Angamoi ngona nato bote Ma Jou ai hidoaka ma owa ka idadi nomaijaino de o tiwi dika!

²¹ Masara ngona duru ko idadiua minihikodoku ngonaika mia leleani naa angamoi ani hininga duru ko itiaiua Ma Jou ai himangoka!

^22-23 Angamoi ngohi ka idadi tonihioriki ani hininga abe gea duru aomangoka de o daleana ho hiadono inihidapakitoka o howonika. De ngona kiani ani hininga ma dorou gea nanoaka de nomaniata Ma Jouiye de nomagahoko la Una woniapongo ngona ma titi ani howono.”

²⁴ De o Simono wopaluhu wato, “Ngohi duru togahoko la ngini naa nihigahoko ma titi ngohi, la ufa ma hohowono abe nifetongoka ihidaene ngohino!”

²⁵ De yomakoketemo de o Simono ibooto de ahao o Peturusu de o Yohanese ona yoiki yoade-ade o kota ma nyawaika abe hokokia yamake o Yesusu ai wowangoka. De nagali abe yahikodoku Ma Jou ai Demo-demo onangika. De yahikodoku ibooto de ma kotaka gea de yosobo yolio o Yerusaleeme ma kotaika. De manga dodagi ma goronaka de ma ngoe yotulu-tulu o Samaria ma nyawa manga kapo-kapongoka la o Abari ma Rorahai yahingahu-ngahu onangika.

O Filipusu de womatengo o Etiopia ma nyawa yomakoketemo

²⁶ De ipaha de Ma Jou ai malaekata womatengo woboa o Filipusika de wihuloko wato, “Ngona noikohi notagi-tagi naniiki ma ngekomo abe daku o Yerusaleemoka de aoko o Gasa ma kotaoko, abe ma tonaka genangoka o nyawa duru yokuranga.”

^27-28 Hokogea wihuloko de o Filipusu waniiki ai demo ho una wotagi-tagi ma ngekomika gea. De ai dodagi ma goronaka de yomakamake una de o Etiopia ma nyawa womatengo abe una nengokadauino womahuba-huba Ma Jouiye o Yerusaleemoka ho naa wosoboka wato wolio ai tonakika. De una gea o Etiopia ma tonakoka de ai gogere duru ikurutiye. Angamoi to ona manga tonakoka de naga momatengo manga koano abe ami romanga o ngo Kanadake, de una womitobaleleani munangika ho ai gogere duru ikurutiye. Abe una wohiaturu to muna ami tiwi de ami kaya mata-mataika ami tauoka. Ho una o Etiopia ma nyawa naga wofarenuku ai kereta ma goronaka ho wogogeruku de wobasa abe Ma Jou ai uru ma dodofanga o Yesaya ai bukuino.

²⁹ De Ma Jou o Womaha wihuloko o Filipusika wato, “Noikohi de notagi-tagi ma kereta gea ma datekoka la nimakiniiki de una.”

³⁰ De o Filipusu womapopaata ma kereta ma datekika de genangoka woihene abe una wogoo-gogere ma goronaka naga wobasa o Yesaya ai bukuino. Ho wileha unangika wato, “Sarakia, ngona ka idadi nataoko ma demo ma titi abe nobasa-basa gea?”

³¹ De una wipaluhu wato, “Marai ko idadiua, angamoi done sarakia tataoko ma titi nako ko iwa abe ihihitararono ngohino?” De wopaluhu ibooto de duru womagahoko o duduhunu o Filipusino ho wato, “Abeika ngona nofareniye naangiye la nogogeruku ahi datekoka naa de nohiduhunu!” Ho o Filipusu wodoaiye.

³² De hokonaa Ma Jou ai Demo-demo ma hidoku abe una kanganoinohi de wobasa. De gea ma demo itemo ato, “Una gea iwituda o hohonenge ma ngiika abe imaketero hoka o domba yatudaika. De imaketero hoka o domba imarii-riidoka dika abe ma oraha to ena ma gogo yaguti, Ho unangoo duru womarii-riidoka dika.

³³ De una duru iwihitipokouku de iwiao duru ko itiaiua ma oraha iwiurusu. De ahao ko idadiua hoade-ade ma titi ai totoforauku angamoi moioo de ko yaiwa, De gea mangale ma titi ai wowango o duniaka naa ko ikurutuahi de ka itoakoka.”

³⁴ De ma demo gea yobasaka de ahao o Etiopia ma nyawa wileha o Filipusika wato, “Ho ma demoino gea de o Yesaya womahidumutu una ma hirete eko ai demo ma dumutu moiikali?”

³⁵ De o Filipusu wihitararono Ma Jou ai Demo-demo ma hidoku gea unangika, de ipaha ma hidoku ma ngoeoli wagoraka la wihitararono abe wato o Abari ma Rorahai gea ihititi o Yesusoka.

³⁶ De abe manga dodagi ma goronakahi de manga kereta imahitigino de o akere, ho una witemo o Filipusika wato, “Abeika, naga genangoka o akere! Ho boteua ngohi ka idadi tomaohiki naangoka dika!”

³⁸ De wahuloko ai nyawa la ma kereta ihitogumohi, de ipaha ona yahinooto youti ma tonakuku de yoiki dau ma akeruku. Ho o akerika yotobongo de ahao o Filipusu wiohiki unangika.

³⁹ De wiohiki ipaha de ka de ona yofareniye o akeroka de aiye de nanga Baluhu ai Womaha ka itodokanino de wigoraka o Filipusu de wiaoika la o ngi moiikali wikelenga, ho ka aiaho. De abe ma oraha gea de imahikaika de ona yahinooto ko yomakamakeokauali. Masara o Etiopia ma nyawa gea duru wogogaragoka ho ai dodagi wohigila-gila wolio de ai hininga ma sanangi.

⁴⁰ De doka o Filipusu una womalega arihononga de ahao wohioriki abe una naga wikelenga o Asodo ma kotaka, ho wogila-gila wotagi-tagi de o kapongo amomoiika wotulu-tulu la una wahingahu-ngahu o nyawaika o Abari ma Rorahai. De hokogea wogila-gila wotagi-tagi de wahiabari ka hiadono una womahiadonoka o Kaisarea ma kotaika.