Hidingoto 7 - Ma Jou ai Demo-demo o Totobelohoka

O Setefanusu ai demo abe o Isiraele manga hihira manga hima-himangoka

¹ De ahao o Isiraele manga hidemo ma nyawa wokokurutiye wileha o Setefanusika wato, “Sarakia, abe ona naa manga dadae ma demo ngonaika, manga demo gea igoungu eko koua?”

² De hokonaa o Setefanusu ai bobaluhu unangika, wato, “Ahi gogianongoru de ahi balu-baluhu abe duru tinihoromati, abeika nitotoihene ahi demo naa. Abe duru ma dodihiraka de nanga Jou abe Una duru de ai medebini ma dararonoka, Una womahimatoko nanga tofora o Abarahaamika abe ma oraha ka wogogerohi o Mesopotamia ma tonakokahi. De ai tonaka gea naga ma romanga moioli, abe ihiromanga o Kasidimi ma tonaka. Abe ma oraha gea ko womaturuuruahi o Harana ma tonakika.

³ Ho womahimatoko unangika de wihuloko wato, ‘Ngona kiani ani tonaka nanoaka de ani dutu onangoo nanoaika la noiki o tonaka moiikali abe ahao tonihidumutu ngonaika.’

⁴ De wihuloko ipaha de o Abarahaama wanoaka ai tonaka gea abe o Kasidimi ma tonakoka de wosobo de womaturuuru o Harana ma tonakika. De genangoka ai dekana wogogere ka hiadono ai baba wohonenge. De ai baba wopahaka de ahao Ma Jou wiao o Abarahaama la ma moioli womaturuuru, ho wiao la hiadono womanoa to ngone nanga tonakoka naa.

⁵ De ngaro Ma Jou wiao nenangino masara ko wihidoakua o tonaka unangika la idadi to una ai tonaka. Abe ngaro ma tonaka ma hohutuloo ma ko wihidoakua, masara wihibehehongo unangika abe ahao naga ma oraha abe ma tonaka naa mata-mata idadi to Abarahaama de ai totoforauku manga tonaka. De ma oraha wihibehehongo de ko iwahi ai ngofaka o Abarahaama.

⁶ De naga moioli Ma Jou wihingahu o Abarahaamika, de gea wihingahu abe ahao ai totoforauku yomanoa o tonaka moiokali abe genangoka ma nyawa duru yahikangela onangika hiadono yahidadi manga gogilaongo. De hokogea yahikangela abe o taongo o ratuhu iata ma dekanino de ahao manga kangela ibooto.

⁷ De gea Ma Jou wihibehehongo o Abarahaamika wato, ‘Ahao ma nyawa gea abe yahikangela ani totoforauku de yahidadi to ona manga gogilaongo, ma nyawa gea ahao tahohowono. De ipahaino de ani totoforauku ka idadi yohupu o homoa ma nyawa gea manga giamoka de yaino la yoboa nenangino de yomahuba-huba Ngohino.’ Hokogea Ma Jou ai behehongo o Abarahaamika.

⁸ De ahao Ma Jou wihibehehongo o Abarahaamika wato kiani una de ai nau-nauru mata-mata ai tauoka yomahuna. Ho ai ngofaka o Isaka una wihunaka abe ma oraha una ai ngumuru ka ai wange tufange dika. De o Isaka wolamoko de ipaha wodadi o Yakubu ai baba, de ipahaino de o Yakubu unangoli wodadi nanga totofora yangimoi de yahinooto manga baba abe ngone o Isiraele ma nyawa mata-mata nanga totofora ona gea.”

⁹ “De ipahaino de o Yakubu ai ngofa-ngofaka duru iwitaleana manga dodotika o Yusupu, ho iwifukunu dika la wodadi o Mesiiroka ma nyawa manga gilaongo o Mesiiri ma tonakoka. Masara Ma Jou Una naga de de o Yusupu

¹⁰ de witobaduhunu ai kangela mata-mataino. De Ma Jou wokarajaanga o Mesiiri manga koano ai hiningaka la ma koano duru wisanangi o Yusupika, de nagali abe Ma Jou wihiowa o Yusupu la ai sosawaro duru o fara moi. Ho ma bahauku de ma koano gea wigoraka la o Yusupu wodadi o Mesiiri ma nyawa manga haeke wokokurutiye. De hongoli wihitagongo o Yusupika la wohiaturu ma koano ai tau ma karajaanga mata-mataika.”

¹¹ “Masara ipahaino de o hafini duru kohaamoko idadi o Mesiiri ma tonakoka de o Kanani ma tonakokaoo yadaene, ho nanga totofora o Kanani ma tonakoka duru yokangelaka ma titi manga inomo amataka.

¹² De ahao o Yakubu woihenino abe o Mesiiroka nagahi o inomo yofukunu, ho wahidingoto ai ngofa-ngofaka la yomaija ma inomo genangoka.

¹³ De abe to ona manga dodagi ma hinooto abe yoiki o Mesiiri ma tonakika la ma inomo yomaija de o Yusupu womahingahu onangika wato, ‘Ngohi naa ti ngini nia dodoto!’ De womahingahu ipaha de ahao naga abe iwihingahu o Mesiiri manga koanoika la unangoo ka idadi wahioriki ma titi o Yusupu ai ria-riaka gea.

¹⁴ De ahao o Yusupu wibehehongo ai baba o Yakubu wato, ‘Baba, ngona de ani nyawa mata-mata kiani nikokiboa ngohino la nigogere naa o Mesiiri ma tonakoka.’ Abe o Yakubu de ai dutu ona gea yamoritumidi de yamotoa.

¹⁵ De gea o Yakubu ona mata-mata yokokiboa o Mesiiri ma tonakino. De ino ino de o Yakubu de ai ngofa-ngofaka ona mata-mata yoborihonenge o Mesiiroka.

¹⁶ De yopahaka de ahao ika-ika manga honenge yototaka de yalungunu o Sikeme ma tonakoka. Abe genangoka ma dihiraino de o Abarahaama womaijaino o lungunu ma ngi moi abe o Hamoro ai ngofa-ngofakino womaija.”

O Setefanusu womademo abe ma titi manga dadae ma demoka de ona ato una wingelo o Musaika

¹⁷ De ahao o Setefanusu wohigila-gila ai demo onangika wato, “De gea ka itigi moduku ma oraha abe Ma Jou wohingodumu ai behehongo la wahiluasa ai nyawa. Abe ma dihiraino wihibehehongo o Abarahaamika wato, ‘Ahao ani totoforauku ka idadi yohupu o nyawa gea manga giamoka de yaino.’ De gea igoungu abe ma oraha gea nanga totofora o Mesiiri ma tonakoka duru yofaa-faatuku hiadono duru ko manga ngoe.

¹⁸ De ahao o Mesiiroka manga koano womatengoli iwigoraka ho wituruuru ma koano wohira-hira. Masara ma koano ma hungi una gea ko wihiorikua ma titi o Yusupu de ai ade-ade.

¹⁹ De ma koano gea naga ai hidee ma dorou abe nanga totoforaika ho waribuutu onangika la manga ngofa-ngofaka ma gilau yanoaika dika la wato yokokihonenge.”

²⁰ “De duru ma oraha gea abe o Musa womaboa, abe Ma Jou womalega unanguku de wimake abe ma ngofaka gea duru worahai. De o Musa ai dimono iwipaliara manga tauoka abe ma oraha womaboa ka hiadono ai ngumuru ai mede hange.

²¹ De gea ma bahauku de kiani iwidogunoaika ma hoanoka, masara ma koano ngoi ora mimake de mihidadi ami dofo ho mipaliara abe imaketero hoka to muna ma hirete ami ngofaka.

²² De o Musa iwidotoko o Mesiiri ma nyawa manga sosawaro mata-mata, de ipahaino de ngaro ai demo de ngaro ai datoro, masara mata-mataika de duru wososawaroka.”

²³ “De o wange moiuku abe o Musa ai ngumuru adonoka ai taongo moruata de ipuda ai hiningaka la watutumu ai gogianongoru o Isiraele ma nyawa.

²⁴ De watutumu ai gogiriaka de wamake abe o Mesiiri ma nyawa womatengo wihikangela o Isiraele ma nyawa womatengoika. Hokogea wamake ho o Musa widuhunu ai gianongoru de wihibalaha ho witomaka ma Mesiiri ma nyawa gea.

²⁵ De gea o Musa wofikiri wato bote ai gogianongoru ka idadi ihioriki abe Ma Jou wihidingoto o Musa la waduhunu ona manga kokangelaino, masara ona ko iwingakua o Musaika.”

²⁶ “De ma dawangeinoli de o Musa woikoli la ma moioli watutumu ai gogianongoru, de gea wamake o Isiraele ma nyawa yahinooto yomakopoha. De una wohitaili la wahitogumu manga kangamoino la ibootohi yomakopoha ho wataere onangika wato, ‘Ahi gogianongoru, naa done sarakia? Adodoa ho ngini nimakopoha, angamoi ngini naa o giadutu?’”

²⁷ “Masara ma nauru abe wahowonoka una ka witila o Musaika de wibobeto unangika wato, ‘Ho ngona naa done sarakia nomagoraka la nato nomiduhunu ngomi? Angamoi ngomi ko minigorakua la nodadi to ngomi mia hihira, de ko mioigoua la ngona nomitailako de nomiurusu mia liliara naa!

²⁸ Ho sarakia, bote ngona naa nohitoma abe imaketero hoka kanugono nitomaka o Mesiiri ma nyawa gea?’

²⁹ De o Musa ka de woihene ma demo gea de wohawanoka ho woara o Mesiiri ma tonakoka de waino o Midiana ma tonakika. De o Midianoka womadionikika ko ai dekana ho ai ngofaka o nauru yahinooto yomaboa genangoka.”

³⁰ De o Setefanusu wogila-gila wotemo wato, “De uku uku uku de o taongo moruata ipahali de ahao o Musa naga o tonaka ma kakaahaka abe itigi-tigino de o Sinai ma loku. De genangoka o malaekata womahimatoko o Musaika abe o uku itoka-tokara o gota moi ma dodipokouku ma goronaka.

³¹ De o Musa wamake ma gota itoka-tokara gea de womatemo ai hiningaka wato, ‘Ma uku gea done sarakia?’ Ho una womahitigi enangika la womalega ma ukuika de nanga Baluhu idodutu witemo unangika wato,

³² ‘Ngohi naa ani totofora manga Jou, abe o Abarahaama de o Isaka de o Yakubu ona yomahuba-huba Ngohino.’ De gea o Musa woihene de duru wofafara ma titi ai hawana duru ilamokoholi ho womatatoko ai himanga de ko womalegaua genangika.”

³³ “De ahao nanga Baluhu wotemo wato, ‘Ani sandaala nahuputoka angamoi ma tonaka naa tomadingakino Ngohino ho duru itebini.’

³⁴ De ahao wihingahu wato, ‘Naa Ngohi tonihingahu la duru nohioriki abe Ngohi tamakeoka ahi nyawa abe ona duru yokangelakaholi o Mesiiroka. De Ngohi toihenoka abe ihigari-gari manga kangela ma dubuho. Ho naa toboaino la taduhunu manga kokangelaino. De naa ngona kiani noikohi angamoi tonihidingoto ngona o Mesiiri ma tonakika.’

³⁵ Ho una gea abe ma dihiraino de ai gogianongoru iwioluku unangika, duru una gea abe Ma Jou wihidingotoli ma oraha naa. Abe ma dihiraino gea de ai gogianongoru iwitaere o Musaika ato, ‘Ngomi naa ko minigorakua la nodadi to ngomi mia hihira de ko mioigoua la ngona nomitailako de nomiurusu mia liliara naa!’ Ho gea Ma Jou wipake ai malaekata womatengoino la o Musa wihidingoto ai nyawaika. Abe ai malaekata gea womahimatoko o gota ma dodipokouku ma uku ma goronaino de o Musa wihidingoto la wodadi ai nyawa manga hihira de manga duduhunu abe manga kokangelaino.

³⁶ De o Mesiiroka de o heheranga ma ngoe wodiai de Ma Jou ai kuaha ma dodunguu ka ihikaika wahimatoko la genangino de wahihira ai nyawa o Mesiiri ma tonakoka de yaino. De ipaha wahihira abe ma oraha o Bongo-bongo ma gahi ma hidogoronaika yomahihora abe ma dudungu yaniiki ka hiadono doka ma honongaika. De yomahihora ipaha de ka ihikaika o Musa wahihira-hira ai nyawa ka hiadono manga taongo moruatino o tonaka ma kakaahaka. De ma ngi gea mata-mata de una o heheranga ma ngoe wodiai manga hima-himangoka.”

³⁷ “De ma dihiraino gea de o Musa una ma hirete wahingahu o Isiraele ma nyawaika wato, ‘Ma Jou ahao wigoraka womatengoli ai uru ma dodofanga ti ngini nia hidogoronaino. De una gea ai hiningaka de womaketero abe hoka ngohioli.’

³⁸ De o Musa una naga de de nanga totofora manga dodoomu o tonaka ma kakaahaka, de una wodadi manga hidemo Ma Jouiye. Ho o Musa wohitobadofanga o Isiraele ma nyawa manga demo Ma Jouika, de wadofangoli Ma Jou ai malaekata ma demo nanga totoforaika. De genangoka hamake o wowango ma ngango ma abari ma malaekatino abe o Sinai ma lokuoka.”

O Setefanusu womademo abe ma titi manga dadae ma demoka de ona ato una wongelo o Musa ai Paretaika

³⁹ De o Setefanusu wohigila-gilali ai demo onangika wato, “De ngaro hokogea o Musa wao de waleleani irahai ai gogianongoruika, masara nanga totofora ona ka iwioluku unangika de yoigo yogilio dika o Mesiiri ma tonakika.

⁴⁰ Abe ma oraha o Musa nagahi o Sinai ma lokuokahi de ona yotemo o Harunika ato, ‘Abeika nonahidailako nanga jou muruono naga la ena gea dika inahihira-hira. Angamoi ko hohiorikua o kia idadi o Musaika, una abe wonahihupu o Mesiiri ma tonakoka de haino.’

⁴¹ Hokogea manga demo ho ona yomadiai manga pangao abe ma rupa o hapi ma ngofaka. De yomadiaiukuoka de yomahuba-huba enangika de duru yokokimorene ma titi ma pangao gea abe yodiaioka.

⁴² De ahao Ma Jou waporete onangika de wahidoakika la ona yomahuba-huba o jou-jouika abe imanoa daku ma dihangoka. De gea imaketero abe hoka Ma Jou ai demo abe atulihoka ai uru ma dodofanga womatengo ai bukuoka, abe genangoka itemo ato, ‘Ahi ngofaka o Isiraele ma nyawa. Abe ngini ma dihiraino nia dekana o taongo moruata o tonaka ma kakaahaka de ka ihikaika nimahuba-huba, gea niagoungu nimahuba Ngohino, eko bote nia huhuba ma dumutu moiikali?

⁴³ Koua, gea ko Ngohinoua nimahuba! De ngaro ma tau o ngoerino abe nitobaao-ao aika aino, masara gea tanu taetongo ko to Ngohiua ahi tau o ngoerino. Angamoi ma oraha gea de nimahuba-huba o popangaoika, ho gea koaho tohiromangoli ma tau gea tato to Moloko ma tau o ngoerino abe nitobaao-ao nia dodagioka. De ma dihiraino gea nagali nia pangao moioli, abe niao-ao o murumu ma rupa moi ihiromanga o Refana la nimahuba-huba enangika. Ho tanu o Moloko de o Refana ena gea abe idadi nia jou ma dodihiraino la nimatobahuba-huba enangika. Ho mangale ma titi gea ho Ngohi ahao tinihidoakika o homoa ma nyawa manga giamika abe kohagurutika o Babele ma nyawa manga tonakoka.’” “De hokogea Ma Jou ai demo nanga totoforaika ma dodihiraino.”

O Setefanusu womademo abe ma titi manga dadae ma demoka de ona ato una wongelo Ma Jou ai Tauika

⁴⁴ De o Setefanusu wogila-gila wotemo wato, “De igoungu abe ma oraha nanga totofora yomanoa o tonaka ma kakaahaka de naga onangoka Ma Jou ai Tau o Ngoerino abe doka ma goronaka de naga to Una ai Pareta abe wahibehehongo onangika. De ma oraha yodiai ai Tau o ngoerino gea de duru yaniiki itiai Ma Jou ai hidumutu ma demo abe wihimatokoka o Musaika la ihioriki hokokia ma tau gea ihigoko.

⁴⁵ De ipahaino abe ma oraha o Yosua wahihira nanga totofora de yaparangi onangika ko o Yahudi ma nyawaua abe Ma Jou wakiniiki to ngone nanga tonakoka de aino. De ma oraha gea de Ma Jou ai Tau o Ngoerino enangoo ihingohamika manga tonaka ma hungika. De genangoka yogila-gila yapake ka hiadono ma oraha abe o Dautu wahikoano nanga totofora.”

⁴⁶ “De Ma Jou wisanangi nanga tofora o Dautika. De ipahaino de naga o Dautu ai hininga moi ipuda, ho una wogahoko Ma Jouika wato, ‘Ahi Jou, ka idadi ngohi todiai o tau moi abe ahao idadi to Ngona ani gogere? De tohigoko ipaha de ahao genangoka o Isiraele ma nyawa mata-mata ka idadi yomahuba-huba Ngonaiye.’ Hokogea o Dautu ai gogahoko Ma Jouika.

⁴⁷ Masara tanu gea ai ngofaka o Saloomo abe wodiai Ma Jou ai Tau gea.

⁴⁸ De ngaro hohiromanga ma tauika gea hato to Ma Jou ai Tau, tanu Una duru Wokokurutiye ho ko idadiua wogogere o tauoka dika abe ngone o nyawa nanga giamoka de aino hodiai. Abe gea duru imakiniiki de to Ma Jou ai demo abe ai uru ma dodofanga ma dihiraino wohitulihuku wato,

⁴⁹ ‘Ahi kuaha ma kadera ma ngi gea o Horoga, De o dunia gea ka ma eteteke dika abe hoka ahi lou ma hiaini ma ngi. Ho ngini done sarakia de niato ka idadi nihidiai ahi tau moi la ihiwedono? Duru ko idadiua! De o gogere hokokia ma rupa abe ngini nihihidoaka Ngohino?

⁵⁰ Angamoi Ngohi naa abe totobatulaada o Horoga de o dunia de to ena ma dola mata-mataika!’ Hokogea Ma Jou ai demo abe ma titi to Una ai gogere!”

⁵¹ De o Setefanusu wogila-gila wotemo manga hohihira ma doomuika wato, “De ngini naa duru nia pea kohadogowinoka! De nia hininga ka imaketero dika hoka ona ko iwihiorikua Ma Jou angamoi nia hininga ko yodafongua Ma Jou ai demo, de nia ngauku yoluku iwihigihene Unangika! De ngini ka ihikaika niwilawana Ma Jou o Womahika! De genangino de nimaketero dika abe hoka ma dodihiraino nia totoforali manga hininga, angamoi onangoo iwilawana Unangika!

⁵² Abeika nimahihohininga abe ma dihiraino de Ma Jou wohidingoto ai uru ma dodofanga yamuruono naga ti ngini nia totoforaika. Angamoi nia totofora gea duru yahikangela ai uru ma dodofanga mata-mataika. Moioo de ko iwa abe ko yahikangelaua! Abe ma dihiraino gea de naga ai uru ma dodofanga abe yahingahu-ngahu ato ahao nanga Mesia woboa, Una abe duru Wototiai. De ngaro ai uru ma dodofanga gea masara nia totofora ka yahohonenge onangikaoo. De nanga Mesia gea ngini abe niwihidoakika ai musuika, ho ngini niwitomaka!

⁵³ Abe Ma Jou ma dodihiraino de winihidoakoka to Una ai Pareta nginika abe ma titi ai malaekatino winihidoaka. Masara hadongoo niamakeoka ai Demo-demo gea de ka nioluku enangika ka hiadono nanga Mesia niwitomaka!” Hokogea o Setefanusu ai dodaere ma demo onangika.

⁵⁴ De o Yahudi ma nyawa manga hohihira duru manga hininga ihidafaeiye de manga ngamo abe o Setefanusu ai dodaere ma demo onangika. De ona manga ingiri duru ihidokagoli abe ma titi yomahimatoko abe manga ngamo duru ilamoko.

⁵⁵ Masara o Setefanusu una iwilufungu de Ma Jou o Womaha ho una wodamaana dika daku o Horogaiye. De dakena wamake Ma Jou ai medebini ma dararono, de nagali wimake o Yesusu abe Una womaokoino duru Ma Jou ai nirakoka.

⁵⁶ Ho o Setefanusu wahingahu onangika wato, “Abeika, ngohi ka idadi tamake abe o Horoga ifelengaika de Una abe o Horogaka de wauku woboa masara o nyawaino womaboa, Una gea womaokoino duru Ma Jou ai nirakoka.”

⁵⁷ Ka de ma hohihira yoihene ai demo gea de ngade-ngade manga hininga itoaka, ho manga ngauku yajumuoka de yokokipoaka la ibootohi yoihene to una ai demoino. De ona gea ka yomataipopaatika unangika la iwitaoko.

⁵⁸ De iwitaokino de iwitauru iwiao o kota ma hoanika la iwihohakaru unangika ka hiadono iwitomaka. De ona abe kanganoino yodadi o hakihii ma nyawa abe iwitae-tae o Setefanusika, ona manga baju ma lape moi yahuputoka de yakelenga dau womatengo ai louoka. De una gea ai romanga o Saulusu.

⁵⁹ De abe iwihohakaru manga gogiriaka de o Setefanusu womaniata wato, “Ahi Baluhu o Yesusu, naa tomagahoko la Ngona nodafongo to ngohi ahi jiwa!”

⁶⁰ De ahao una watilabukuku de waamo-amokiye wato, “Ahi Baluhu, togahoko la manga howono naa ngohino Ngona naapongo dika!” De hokogea wotemo ibooto de una wopahaka.