Hidingoto 28 - Ma Jou ai Demo-demo o Totobelohoka

O Paulusu de ai dodiawo o Malata ma nuuhoka

¹ De ngomi mata-mata mimahiadonoka ma dudungiha de ahao naga o nyawa imihingahu abe ma nuuhu gea ma romanga o Malata ma nuuhu.

² De o Malata ma nyawa ona gea manga hininga duru irahaiholi ngomino. Abe ma oraha gea o maata de o awana, de ona gea imidafongo irahai angamoi ona imidaulu la ka idadi ngomi mimarauku o ukuoka.

³ De ahao o Paulusu una waleino o gota ma jaga la gea mimahidaulu, de abe ma oraha una wakelenga ma gota ma ukuoka de o dodiha ma biha moi ihupu ma gota ma hidogoronaino ma titi ma haukino iloara. De gea ihupuino de iwituduku o Paulusu ai giamika de ko iwipidilua!

⁴ De o nuuhu ma nyawa gea yamake ma dodiha abe ka idideukuohi ai giamoka de ona yomakoketemo ato, “Abeika, una gea boteua watobatomaka o nyawa! Angamoi ngaro una kangano ko iwilutua o gahioka masara naa mia jou abe muna matobahohowono onangika abe de manga howonoka, muna mihidaenoka de ai hohowono abe itiai wamake, ho to una naa ai gahe adonoka!” Hokogea manga hininga yomahingahu.

⁵ Masara o Paulusu ka wohikokawiiwi la ma dodiha iotakuku ma uku ma goronauku de ko kia-kiaua idadi unangika!

⁶ De ma nyawa genangoka iwilega-lega de iwidodamaa la una ahao ai giama iloboho eko ka itodokanino worubauku ai honenge. Masara duru manga dekana iwidodamaa hiadono ihioriki abe ko woboditoua ma titi iwituduku de o dodiha ma biha gea. De hokogea yamake de manga hininga yaturuuruoka de naa yomaputuhoka ato una gea manga jou womatengo.

⁷ De ko ikurutikaua de ma dowongi gea naga ma tonaka abe to ena ma dutu ai gogere ikurutiye. De una gea ai romanga o Puliusu. De o Puliusu una gea o Roma ma nyawa abe wodadioka ma nuuhu ma nyawa manga hihira wokokurutiye. De unangoo womidafongo irahai, abe mia wange hangeino de womileleani de o inomo.

⁸ De ma oraha gea naga o Puliusu ai baba wopanyakeuku, abe iwigogama de ai pokoro duru iodiri hiadono womahupu-hupu. De o Paulusu woiki witutumu unangika de wigahoko Ma Jouiye de wifokumu, de o Puliusu ai baba gea wotogumoka ai kangelaino!

⁹ De ipahaino de o nuuhu ma nyawa mata-mata abe naga de manga popanyakeoka ona yokokiboaino de o Paulusu wahikokitogumu onangika!

¹⁰ De mangale ma titi una wahikokitogumoka ho ma nyawa genangoka duru manga horomati ilamoko itagi ngomino. De ipahainoli abe ma oraha adonoka la ngomi ma nuuhu gea mianoaika de ona yaoino o inomo de o kiahonanga irupa-rupa la mia dodagi ma perelu duru imihidailako ma amoko.

O Paulusu de ai dodiawo ihigila-gila manga dodagi o Roma ma kotaika

¹¹ De abe ma oraha mia kapa iwederuku de ahao mia mede hangeino abe mimanoa o Malata ma nuuhoka. De o kapa moioli naga genangoka abe to ena ma gogoana ihiaini hiadono o rato de o maata ma oraha ipahaikahi. De ma kapa gea iboa o Alesandaria ma kotaka de aino, de to ena ma dodunguu naga ma kapa ma dihiraka abe yodiai o gotaino. De ma dodunguu gea ma rupa hoka o Roma manga jou yahinooto abe yohago. Ho abe mia mede hange ibooto de ahao ma kapa gea mifarene.

¹² De ma nuuhu gea mianoaika de ipahaino mitulu o Sirakusa ma kotaika abe o nuuhu moiokali, de genangoka mia futu hange mimaidu.

¹³ De o Sirakusa ma kotaka de misoboli de mihidete o Regiumu ma kotaika abe imanoa o Italia ma tonakoka. De mia futu moi dika genangoka angamoi ma dawangeino de o kolehara iwuwu ho misoboli de mihidete mimahimoteke ka hiadono o Putioli ma guguti ma kapongo mimahiadono. De mia dodagioka abe o Regiumoka de o Putiolika gea mia futu moi dika o gahioka de mimahiadonoka. De o Putiolioka de ma kapa mianoaika de miutiha.

¹⁴ De genangoka mimakamake de o nyawa yamuruono naga abe mia gogianongoru o ngongakuoka. De mia gogianongoru gea imiahoko la ka idadi mimahidodogumu onangoka mia futu tumidino. De mia futu tumidi ipahaino de ahao misoboli de mitagi-tagi abe mia dumutu o Roma ma kotaika.

¹⁵ De mia gogianongoru o Roma ma kotaka ona imigihene abe ma titi ahao ngomi miboa manga kotaika, ho ona yamuruono naga yoboa de imibuhuku o kapongoka abe ihiromanga o Apiusu ma Pahara angamoi manga pahara ma amoko gea imanoa o Apiusu ma ngekomoka. De ahao migila-gila mitagi-tagioli o kapongo moiikali. De genangokali naga mia gogianongoru utuoli o Romaka de aino yoboa de imibuhuku, abe ma kapongo gea ihiromanga o Dodogumu ma Tau Hangeika. Ho abe ma oraha o Paulusu wamake mia gogianongoru mata-mata gea de wotarimakase Ma Jouika, de duru ai hiningaka iwihiputurungoka ma titi manga boa unangino.

¹⁶ De ipahainoli de ahao mimahiadono o Roma ma kotaika. De ma kotaka gea de iwihigunoa o Paulusu la wogogere o tau moioka abe ka una de o tentara womatengo dika yogogere genangoka.

O Paulusu o Abari ma Rorahai wahingahu-ngahu o Roma ma nyawaika

¹⁷ De o Paulusu womahiadono o Roma ma kotaika de o futu hange ipahaika de ahao una wahokino o Yahudi ma nyawa manga hihira ma kotaka gea la yomatoomuino unangoka. De yomatoomuinoka de watemo wato, “Ahi gogianongoru, nengokadauino o Yerusaleeme ma kotaka de ihitaoko de ihihidoaka o Roma ma poparetaika. De gea ngohi ko iwa ahi howono to ngone nanga gogianongoruika de ko tahowonua abe ma titi to ngone nanga hirahi de nanga biaha. Ho ngaro ahi howono ko iwa masara ona ihitaokino de ihihidoaka o Roma ma nyawaika.

¹⁸ De o Roma ma nyawa ona ihitailako de ihiurusu ipaha de ona manga hininga la ihihihupuika dika de ko ihihohowonua de o hohonenge angamoi o howono ko yamakeua ahi datoro eko ahi demoino.

¹⁹ Masara manga putuhu gea o Yahudi ma nyawa manga hihira o Yerusaleemoka ona ka yoluku enangika angamoi ona yoigo ato ihihohonenge dika. Ho ngohi tamao abe kiani togahoko la o Roma manga koano wokokurutiye o Kaisara ai himangoka toboa. Abe ko ahi hiningaua la tahihowono eko tatae to ngohi ahi nyawaika, masara tamao abe ko iwaka ahi ngiriki de kiani tomademo o Kaisara ai himangoka la tomahitaana abe ahi howono ko iwa ma paretaika.

²⁰ De o wange naa togahoko la ngini mata-mata niboaino la ka idadi homakamake de homahikoriki. De naga ma titi moioli, la hiadono ka idadi tinihingahu nginika abe ngohi ihidapakiti de o rante ma titi moi dika, de gea ma titi ngohi tongaku abe to ngone nanga Mesia Una woboaka. Abe ma dodihiraino de Ma Jou wonahibehehongo ngone o Isiraele ma nyawaino wato ahao wonahidingoto nanga Mesia ngoneuku. De naa ma dodihirainohi de hidodamaa de duru hongano-nganono la Una woboa. Masara naa tosanangi tinihingahu abe Una gea woboaka. De abe ahi ngongaku genangika, gea dika ma titi hiadono ngohi naa ihidapakitoka.”

²¹ De ma hihira gea iwipaluhu o Paulusika ato, “Ngomi naa ko kia-kiaua miihene ma titi to ngona ani howono. Abe ko miodafongua o hurata o Yudea ma tonakoka de aino, de ko moiua yoboa ngomino la inikalaki ma titi ani demo eko ani datoro.

²² De ngaro ko iwa mia gurubungu ngonaika masara ngomi mioigo mitoihene to ngona ani demoika abe nomahingahu ma titi ani ngongaku. Abe moi dika miihenino, de gea ma titi o kia-kiaka dika de o nyawa yongelo ani doomu manga ngongaku ma demoika.”

²³ De o Paulusu wosanangi womahingahu ai hininga onangika ho wogelenga ma gahe la ahao ma wange adonoka de yomakamakeoli. De ma wange gea adonoka de o nyawa manga ngoe yoboaino o Paulusu ai tauino la yotoihene ai demoika. De una wahingahu onangika abe ma titi hokokia Ma Jou wahikoano ai nyawaika, de nagali wadotoko onangika ma titi o Yesusu abe Ma Jou ai Demo-demoino. De gea wohipake ma demo abe o Musa ai buku motoaino de abe Ma Jou ai uru ma dodofanga manga buku to enangoo ma demo wohipake la wadotoko ma titi o Yesusu. De ma wange gea abe womulaenge wadotoko gea ka o ngoruminohi, de wogila-gila wadotoko ka hiadono ihumuririhuku.

²⁴ De o nyawa utu abe yotoihene ai demoika ona iwingaku o Yesusika, de naga utuoli abe ko iwingakua.

²⁵ De onangoka naga abe yomaketeloliliara ma titi o Paulusu ai dodotoko ma demoino, de hatoli manga dekana yomakoketemo de yomaketeribuutu. De ma bahauku de o Paulusu wahingahu onangika o demo moiokahi abe wahitiari wato, “Ma dodihiraka de Ma Jou o Womaha duru wagoungu abe ma titi ngini utu nia pea ma dogowini. Abe ma oraha gea Una wotemo Ma Jou ai uru ma dodofanga o Yesaya ai uruino. De ma oraha gea Ma Jou o Womaha wotemo nanga totoforaika wato,

²⁶ ‘Ngona kiani noiki de nahingahu ani gogianongoru ahi nyawaika de notemo nato, Ngaro ngini nihigali-gali nihigihene ahi demoino masara ngini ko nihiorikua, De ngini gea ngaro nihigali-gali niolega ahi datorino masara gea ngini ko nihiorikua ma titi genangino.

²⁷ De hokonaa idadi abe hiadono ngini ko nihiorikua ma titi, angamoi ti ngini nia pea duru itogowinoka, de gea nia ngauku hoka ko idadiokaua iihene, de ngaro nia lako ma ko idadiokaua nimahioriki. De gea mata-mata idadi nginika ma titi abe ngini ma hirete nimangiriki la niato ufa nimahioriki nia lakoino, de ufa nia ngauku iihene, de ufa ti ngini nia hiningaka niataoko to Ngohi ahi hininga de ahi datoro. Angamoi nako nihioriki done nitoba de nia howono Ngohi Ma Jou taofi.’ Hokogea Ma Jou ai demo ngone o Isiraele ma nyawaino duru ma dodihiraka.”

²⁸ De ahao o Paulusu ka wotemohi onangika wato, “De naa ngohi tinihingahu abe Ma Jou ai Demo-demo gea inidaene nginiukuoo angamoi ti ngini naa nia pea ma dogowini duru nimaketero dika hoka nia totoforali manga pea ma dogowini. Abe ngini niolukoka ai abari abe hokokia Una waduhunu o nyawa manga howo-howonino. Ho mangale ma titi ngini niaolukoka ho Una wohidingoto ai abari gea ona ko o Yahudi ma nyawaikaua, de ona ahao yosanangi yodafongo enangika!”

²⁹ [De o Paulusu wotemo ipaha de o Yahudi ma nyawa gea yokokisobo masara ona duru ka yomaketeloliliarohi ma titi ai demoino.]

³⁰ De o Paulusu wogogere ai tauoka gea abe wahewaino hatoli ai dekana, abe ai taongo hinootoino ma dekana genangoka womanoa. De onagona dika yoboaino la iwitutumu de una wadafongo irahai ai tauoka.

³¹ De una ka ihikaika duru de ai hininga ma domoroini wahingahu-ngahu o nyawaika abe ma titi hokokia Ma Jou wahikoano ai nyawaika de abe ma titi nanga Baluhu idodutu o Yesusu Kristusu. De abe ma oraha gea de ko moiua ihitaili yatatoko ai demo la ko itagiua, ho ka idadi o Paulusu ka ihikaika wahiabari o nyawaika.