Hidingoto 27 - Ma Jou ai Demo-demo o Totobelohoka

O Paulusu ai dodagi o Roma ma kotaika 27:1—28:10 O Paulusu iwihidingoto o Roma ma kotaika

¹ De ipahainoli de ma oraha adonoka la iwihidingoto o Paulusu o Roma ma kotaika abe o Italia ma tonakoka. De o Paulusu de o nyawa yamuruono naga utu abe onangoo yahidapakiti ma titi o pareta yatilakuru, ona yahitagongo o tentara ma hihira womatengoika la una wagoa-goana. De una gea ai romanga o Yuliusu, de una wodadioka o tentara manga doomu moi manga hihira. De ai doomu ma romanga ihiromanga ato o Koano wokokurutiye ai Tentara ma Doomu.

² De nagali nanga gianongoru o Arisitarakusu abe una o Tesalonika ma kotaka ma nyawa o Makedonia ma tonakoka, unangoo naga de de ngomi ma oraha gea. Ho ngomi mia ngoe mifarene o kapa moi abe iboa o Adaramitiumu ma kotaka de aino. De ma kapa gea ma dumutu la itulu-tulu moduku ma kota-kotaika abe o Asia ma tonaka ma ngigorino anii-niiki.

³ De mia kapa isoboka de ahao ma dawangeino mituluiha o Sidono ma dudungiha. De genangoka ma tentara ma hihira o Yuliusu duru wiao irahai o Paulusika. Abe una wihigunoa la o Paulusu woutiha de ai dodiawo watutumohi la ka idadi ona iwihidailako to una ai perelu.

⁴ De ahao ma kapa mifarenoli de o Sidonoka de misobo de mihidete masara ma kapa ma dodagi hatoli ikangela angamoi o hidaloko ma dekarino miboa. De ma titi ma hidaloko gea ho hiadono imihirehene mia dumutika, ho ma kapa ma dumutu ma dodagi ihirehene la mimahitigi o Sipurusu ma nuuhu ma ngigorino, la ma nuuhu gea imitatokino ho ko imidaenua ma hidaloko.

⁵ De ahao ngomi mihidete o ngooto mitoaka abe o Kilikia de o Pamafilia ma tonaka ma daanoko ka hiadono ma tonaka gea miatilakuroka. De ipahaino de ahao ma kapa itulu o Mira ma kapongiha abe o Likia ma tonakoka.

⁶ De genangoka ma tentara ma hihira wamake o kapa moioli abe ma dumutu o Italia ma tonakika, ho una womihiaturu la ngomi mimaturuuru ma kapa moiikali gea. De ma kapa gea iboa o Alesandaria ma kotaka de aino abe ma kota gea imanoa o Mesiiri ma tonakoka.

⁷ De ngomi mifarenokoka abe o Mesiiri ma kapaino gea de misobo. De mia futu muruonino de ma hidaloko ka imiruwaeohi ho ko itai-taitua mihidete, masara ma bahauku de ka idadi mimahiadono o Kinidusu ma kapongo ma daanoko. De genangoka de ko idadiokaua migila-gila abe mia dumutika ma titi ma hidaloko ma dekarino miboa de italoko duru kohagiria. Ho ngomi ma hidaloko miorehene ho mia hidee la mimahitatoko ma nuuhu. Ho gea o Kereta ma nuuhu ma ngigorino mianiiki la imitatoko o hidalokino. De genangino migila-gila abe miatilakuru o Salamone ma dotoino,

⁸ de ka mimahiigorohi ma nuuhu masara ma hidaloko duru imihikangela ka hiadono ngomi mimahiadono o guguti moi abe ihiromanga o Guguti ma Ngi ma Rorahai, abe gea imahitigino de o Lasea ma kapongo.

⁹ De mia dodagioka de duru miakapaanga ma titi ma hidaloko, ho hiadono itigioka ma oraha abe biaha o rato idadi ma gahioka. De ngomi duru miamao abe ahao o bodito imidaene mia dodagi ma goronaka. De o Paulusu una woiki o kapa ma gogoanika la womahingahu ai hininga de ka idadi yomakoketemo ma titi ma bodito gea.

¹⁰ De una woiki onangika de wato, “Ahi dodiawo, ngohi duru tamao ahi hiningaka abe nako ngone hogila-gila hohidete de ko homahiainua nanga dodagino de o kangela de o bodito ahao inadaene ngoneuku. Abe ngaro ma kapa de ma kiahonanga ahao naga ma rusaka de utu ihihanga, de ngaro ngoneoo nanga wowango ka idadi o bodito haohana nako nanga dodagi hohigila-gila.”

¹¹ De ona yoihene o Paulusu ai demoino masara ma kapa ma kaputeene de ma dutu ona yahinooto manga hininga la yogila-gila dika. De ma tentara ma hihira unangoo woluku o Paulusu ai hininga la wahigihene ona yahinootoika.

¹² De naga ma titi moioli, abe o Guguti ma Ngi ma Rorahai, gea ma ngi ko irahaiua nako ma oraha o rato iboa. Ho ma kapa ma gogoana gea ona yowoe-woe manga hininga la yogila-gila yohidete ka hiadono o Fenikisi ma kapongika. Angamoi genangoka ngaro o rato iboaino masara ko aruwaeua ma kapa abe imatogumu genangoka ma titi yatatoko ma hidalokino. Ho ona manga hininga la mimahiigoro de mimahiadono o Fenikisi ma guguti ma ngiika, abe enangoo o Kereta ma nuuhu ma ngigoroka, la ato mihiaini genangoka hiadono ma oraha o rato ipaha.

O rato yadaene hiadono manga kapa awederoka

¹³ De ipahaino de o hidaloko iwuwu ma hohutulu dika abe gea o kolehara ma hidaloko, ho o kapa ma gogoana ona yafikiri ato ka idadi migila-gila mihidete abe mia dumutika. Ho ona atauriye ma tapu de ngomi mihidete mimahiigoro ma nuuhu.

¹⁴ Masara ka itodokanino de ma hidaloko duru italoko ho hiadono ma ngele itagi iputurungu. De o rato imidaene abe o koremiye iwuwu ho hiadono ma lulu ihiboha-boha ma kapa ma datekino de ahao imihihupu dai ma hoanoko.

¹⁵ De o kapa ma gogoana ko idadiua ihidumutu ma kapa la ma hidaloko ma dekarino miboa angamoi ko apoaua, ho ona yomahidoaka dika ma hidalokika. De ahao ma hidaloko gea duru imitila ho ma kapa imahimoteke ma hoanoko.

¹⁶ De ipahaino de mihidete o nuuhu ma eteteke moi ma poretika abe ma romanga o Kauda. De genangoka mimaputuhu miato kiani ma lepa-lepa abe atuda-tuda mia poretino gea koaho miataurino de mihibareniye la ma kapa ma goronaka miakelenga. Ho ngomi mimakuduhunu de mia buturungu ma gahumu la ma lepa-lepa gea mihibareniye de duru mikangela mihidoa, masara ma bahaika de ka idadi mihibarene ma kapaka.

¹⁷ De mihibareniye ipaha de ahao miato kiani ma kapa mihiputurungu done ikilianga, ho miadehoro de ma lebi hiadono iputurungoka. De o kapa ma gogoana ona yohawana ato done ma rato imitila ka hiadono mia kapa itirii ma gogowaha ma ngioka abe o Siritisi ma tonaka ma daanoko, ho ona ihiguti ma hidete la hatoli ko ikiriaua ma hidaloko imitila. De ngaro ma hidete iutioka masara ma hidaloko ka imitilahi o gahi ma lokuino.

¹⁸ De ma dawangeino ma rato ka italokohi duru kohabuturungu de ma lulu duru ihiboha-boha ma kapaika, ho ma kapa ma gogoana ona yomulaenge o nyawa manga kiahonanga abe naga ihidingo-dingoto ma kapaka, gea yaumo dika ma gahiuku la ufa ma kapa itubuhoholi.

¹⁹ De ma dawangeinoli de ma rato ka nagahi ho ona o kapa ma gogoana yakokiumo ma kapa ma kiahonanga la ma kapa utuohi iuwini, abe ngaro ma kiahonanga gea duru yoperelu la ma kapa yao-ao, masara enangoo yaumoka dika de to ona ma hirete manga giama!

²⁰ De ma rato gea ka italo-talokohi abe o futu muruonino ko iogo-ogorua, ho hiadono ngaro o wange de ngaro o muru-murumu masara duru ko idadiokaua miamake. De gea duru kohadekana ma rato imihidotadaene ka hiadono ngomi mata-mata miato bote ko iwaka mia nganganono abe miwangohi masara mia gahe duru itigioka.

²¹ De ngomi o kapaka gea de duru mia dekanoka ko miolo-olomokaua. De ipahaino de o Paulusu wahokino o kapa ma gogoana de watemo onangika wato, “Ahi dodiawo, ma dihiraino abe ngone nagahi o Guguti ma Ngi ma Rorahaioka abe o Kereta ma nuuhoka de ngini koaho nihigihene ahi demoino abe tonahitiari tato ufa ma ngi gea hanoaika ma koaho genangoka dika hahiainohi la o rato ma oraha ipahaikahi. Abe nako ma oraha gea nihihingounu de ko inadaenua ma kokangela naa de nia kapa ma kiahonanga ko ihihangua.

²² Masara naa tinihigaro la nimahidomoroini dika! Angamoi ngohi naa ka idadi tinihingahu abe ngini ko moiua nihonenge nanga dodagioka naa, masara nako ma kapa gea ahao alutu ma gahioka naa.

²³ De hokogea tinihingahu angamoi o futuika de ahi Jou ai malaekata womatengo woboa ngohino. Abe to ngohi ahi Jou abe titobaleleani Unangika, Una gea wihidingoto ai malaekata ngohino de woboa womaokoino duru ahi datekoka.

²⁴ De woboaino de wato, ‘Paulusu, ufa nohawana masara ka idadi ani hininga iriidi dika, angamoi ngona ahao nomahiadono o Kaisara ai ngiika la una ma hirete woniurusu de wonitailako ma titi ani howono naga eko ko iwa. De hongoli ani hininga ka idadi iriidi angamoi Ma Jou duru ai hininga ma owa ma amoko wonihidoaka ngonaika. Abe ko ngonaua dika abe ko nohonengua o gahioka naa, masara ani dodiawo o nyawa mata-mata o kapa ma goronaka, onangoo wonihidoaka la ko moiua yohonenge.’ Hokogea ma malaekata ai hingahu ma demo ngohino.

²⁵ Ho ngini ka idadi nimahidomoroini dika, angamoi ngohi duru tongaku Ma Jou ai demoika abe ahao idadi duru imaketero hoka Una wotemoka.

²⁶ Masara kiani nanga kapa naa ahao yoduhuputu de iwedere o nuuhu moiika.” Hokogea o Paulusu ai higaro ma demo ngomi mata-mataino.

²⁷ De ipahaino de ma rato ko iogoruahi abe naa mia futu ngimoi de iatino abe ka ihikaika ma rato imidaene. De ngomi ma oraha gea ma hidaloko imitila-tila o gahi ma lokuino abe genangoka ma gahi ihiromanga o Adaria ma gahi. De o futu gorona de ma kapa ma gogoana yamao abe mimahitigi o tonakiha.

²⁸ De ahao ona yatuga ma lukuku ho ihidowora o hakaru abe alikoika de o tali ka hiadono itiki daukuku la ka idadi ihioriki ma gahi ma lukuku o metere muruono genangoka. Ho ihidowora de ahao atauriyeoli de gea ma luku o metere moruange de tumidi. De bootino yodiaioli hokogea de yamake abe ma luku ka o metere monaoko de tumidokahi dika.

²⁹ Ho mangale ma titi ka iowaha moduku ho ona yohawana ato done ko itedekanokaua de ma hidaloko de ma lulu imitila hiadono mioduhuputu o hakaruika abe naga ma tonaka ma ngigorino. De ona yohawanoka ho ma kapa ma tapu iata yaumouku ma duruoka de auku. De yaumo ipaha de yomaniata la ma wange itaiti ipotokaiha la ka idadi mimahioriki.

³⁰ De ma hohutulohi de ahao o kapa ma gogoana ihitaili ma kapa yanoa abe ma lepa-lepa ihidowora o gahiuku la ka idadi genangino yoara. Masara ona ko yoigoua ngomi miahioriki manga hidee ho imieluku ato bari o tapu yaumo ma kapa ma dihiraka de auku.

³¹ De gea o Paulusu wotemo ma tentara de manga hihiraika wato, “Nako ngini niahigunoa la ona yoara, ahao ngini mata-mata nikokihonenge. Ho ufa hiadono ona inanoaika!”

³² De o Paulusu ai demo yoihene de ahao yomataiti yatoaka ma tali la ma lepa-lepa ka iotakuku dika.

³³ De duru o ngoru-ngorumino abe ma wange ko ipotokauhi de o Paulusu duru womihigaro la wato kiani ngomi miolomo. Abe wotemo wato, “Ngini naa nia minggu hinooto ibooto ko niolo-olomua o inomo ma titi nikokihawanoka!

³⁴ Ho naa duru togahoko nginika la iti o inomo ma hohutulu niaolomo la idadi nia buturungu naga genangino. De ngini ka idadi niolomo dika angamoi ko moiua inibodito ma titi ma rato abe inadaene naa!”

³⁵ De womihigaro ibooto de ahao o Paulusu waleino o roti de to ngomi mia hima-himangoka de wohitarimakaseokahi Ma Jouiye. De wohitarimakaseoka de wapelaka de ma belaka moi waolomo.

³⁶ De mimalega unangika ma oraha wolomo ho ngomi mata-mata mitomoroinoka genangino. De wolomo ipahaino de ngomi mata-mata mimulaenge miolomo,

³⁷ abe ngomi mia ngoe ma kapaka gea imiratuhu hinooto de imimoritumidi de imibutaanga.

³⁸ De miolomo ibootino de ahao o kapa ma gogoana o hidingoto ma kiahonanga abe ma dola o gandum enangoo yaumo o gahiuku la ato ma kapa utuohi iuwini ho ko itiriiua.

³⁹ De ma wange ipotokaiha de ka idadi miamake ma dudungu, masara ngaro o kapa ma gogoana ma ko yananakoua abe gea ma tonaka eko ma nuuhu o kia ma ngigorino yamake. De ona yamake o leleoto moi abe naga de ma dowongioka abe yadatoko ma luluino ho ona yoigo ato ihidumutu ma kapa genangiha la yomahidutukiha ma dowongiha.

⁴⁰ De ahao ona yatoaka ma tapu ma tali la yodogunoaika dika ma gahioka. De ona utu yahoheohi ma ririmi de ihiguti la ka idadi ihidumutu ma kapa abe manga hininga ma dumutika. De abe ona utuoli ma hidete ihidoaiyeoli. De manga hidiai gea ibooto de ahao ihidumutu mia kapa gea ma dudungiha.

⁴¹ Masara ma kapa ka ma gurutokohi de itiriioka o gogowahoka. De ma kapa ma dihira duru itiriioka hiadono ko ikelu-keluokaua, masara ma kapa ma duruoka ihigali-gali ihiboha de ma lulu hiadono imulaengoka ikilianga.

⁴² De ma tentara ma nyawa ona yamake abe ma kapa ikilianga ho ona yafikiri abe ma nyawa gea yatobagoana onangika marai ahao yokokiloara. Abe ona yafikiri ato done ona utu yomangumo o gahiuku de yotiboko o dowongiha de ahao yoara dika la yomaduhunu manga hohowonino. Masara ma tentara duru yoluku la o howo-howono ma nyawa gea yoara, ho manga hininga ato koaho yatomaka dika.

⁴³ Masara ma tentara ma hihira una woluku o Paulusu iwitoma, ho una wahitiari la wato ona ko idadiua yatoma onangika. De ahao wakokihuloko la onagona dika ihioriki yotiboko ona gea kiani yohira yomangumo o gahiuku la yotiboko ma dudungiha.

⁴⁴ De ona abe ko ihiorikua yotiboko, ona kiani yomalingirohi o papanga eko o kia dika naga o kapa ma kiahonangoka la idadi manga pupuda, de gea ka idadi yomapupuda ka hiadono dina ma dudungiha. De ipahaino de ngomi mata-mata mimahiadoniha abe ko moiua mihonenge o gahioka!