Hidingoto 26 - Ma Jou ai Demo-demo o Totobelohoka

¹ De ma koano o Agaripa witemo o Paulusika wato, “Naa tonihidoaka ma oraha la ngona ka idadi nomademo.” De o Paulusu wohidoakiye ai giama de womademo wato,

² “Ahi baluhu nanga koano o Agaripa, ngohi naa duru tosanangi abe ngona naga la ka idadi notoihene ahi demoino. Abe ma oraha naa de tomademo ma titi o Yahudi ma nyawa ma hihira manga dadae ma demo ngohino.

³ De gea tosanangi angamoi tonihioriki abe ngona duru notobahioriki ma titi o Yahudi ma nyawa mia hiaturu de mia pareta de ma liliara abe naga ngomioka. Ho naa ngohi togahoko la ahi demoino notoihene de ani hininga ma dongohono.”

⁴ “Abe ma titi ahi wowango ma ade-ade, tanu o Yahudi ma nyawa mia hihira abe onangoo naga nanga doomuoka o wange naa, ona ihiorikoka ma titi ahi wowango, ho ihioriki abe tagou-goungu ahi demoino naa. Abe ngohi naa ahi etetekinohi de ihidoto-dotoko ma titi ngomi o Yahudi ma nyawa mia pareta de mia biaha. De gea ihira-hira ihidotoko to ngohi ahi tonakoka de ipahaino ahao o Yerusaleeme ma kotaka de ahi dodotoko igila-gila.

⁵ De ona gea o Yahudi ma nyawa mia hihira ihihiorikoo abe ngohi tatobaniiki o Farisi ma nyawa manga dodotokika, abe ma dodotoko gea nako to ngomi mia agama ma doomu mata-mataika de ka to onangohi duru ihidodiai yaniiki o Musa ai Paretaika. De mia hihira abe naga nanga hidogoronaka naa, onangoo tanu ka idadi inihingahu abe tagou-goungu ahi demoino, iti abe yosanangi yomangaku.

⁶ De ngohi naa ihitailako de ihiurusu ma titi moi dika, de gea abe ngohi tomahinganono Ma Jou ai behehongika abe Una ma dodihiraka de wahibehehongoka to ngomi mia totoforaika.

⁷ De ngohi ahi nganganono ko imakohowonua de ahi gogianongoru o Yahudi ma nyawa utu manga nganganono. Angamoi ngomi homoi-homoi mimahidutu o Isiraele ai ngofa-ngofaka yangimoi de yahinooto manga dutuika, de ngomi mata-mata o futu de o wange mimahuba-huba Ma Jouika. De gea ma titi o kia hiadono ka ihikaika mimahuba-huba Unangika? Gea ma titi abe ngomi mata-mata mia nganganono ka moi, abe Ma Jou ma dodihiraino de womihibehehongo wato ahao wihidingoto mia Duduhunu ngomiuku! De ipahaino de Una gea wihimomiki ai honengino! De gea ai datorino de to ngomi o Yahudi ma nyawa mia nganganono abe Ma Jou wohingodumoka! Masara, ahi koano, to ngomi mia hihira abe onangoo naga nenangoka, ona ihitae ngohino ato bari ko idadiua tomahinganono genangika! Ho gea done sarakia?”

⁸ De ahao o Paulusu womalega o Yahudi ma nyawaika abe naga genangoka de wotemo wato, “De ngini o Yahudi ma nyawa nihiorikokau abe Ma Jou ka idadi wakunu wahimomiki o nyawa manga honengoka de aino. Ho done sarakia niwioluku ma titi Una wihimomikoka o Yesusu ai honengino?”

⁹ De o Paulusu wogila-gila womademo wato, “De ngohi naa ma hirete ma dihiraino de duru ahi hininga la tato kiani talawana de tahikokangela o nyawaika abe iwitobanii-niiki o Yesusika abe Una o Nasaretoka ma nyawa.

¹⁰ De ipahaino de ngohi tamake o kuaha mia hidemo ma nyawa yokokurutiyeino la ka idadi tahikokangela onagona dika o Yerusaleemoka abe iwingaku-ngakuoka o Yesusika. De ona manga ngoe tabuika, de naga utu abe yaurusu de yaputuhu ato kiani yahohowono de o hohonenge, de ngohioo tahimoteke de manga hininga abe tato kiani ona gea yahohonenge dika onangika.

¹¹ De ma ngoe idadi abe mia dodotoko ma tau-tauoka de tahuloko o nyawa la yahipoha-poha de o migi onangika abe iwingaku-ngakuoka, angamoi ngohi toigo la yapoha-poha hiadono ona gea iwingelo manga Baluhika. De ahi ngamo duru ilamoko onangika hiadono ko mia tonakokaua dika abe tahitobahikangela, masara ngohi totagi-tagi o tonaka utuikali la onagona dika manga doomuino abe yomanoa o homoa ma kota-kotaka, onangoo talingiri la ka idadi tahikokangela onangika.”

¹² “De o wange moiuku de ahi dumutu o homoa ma kota moiika abe o Damasiki ma kotaika toiki la o ngongaku ma nyawa tahikokangela genangoka. De naga ngohioka o higunoa ma hurata mia hidemo ma nyawa yokokurutiyeoka de aino abe ona ihihidoaka ma kuaha la talingiri de tahikangela ona iwingaku-ngakuika.

¹³ De, ahi koano, ngade-ngade o wange ikorona de naga o Horogaka de auku ma dararono moi ihitararono ngomiuku abe ngohi de ona mimakiniiki, de ma dararono gea nako hohidotelega de ma wange masara ka nenangohi duru kohadararono.

¹⁴ De ngomi mata-mata ka mihidurubauku, de ahao ngohi toihene ma ilingi moi itemo ngohino de to ngomi o Ibarani mia demo ato, ‘Saulusu, Saulusu! Adodoa ho ngona nohihikangela Ngohino ma titi ani datorino? Angamoi ngona noigo nohihikangela Ngohino masara tanu nomahikangela dika, abe ngona nomaketero hoka o hapi moi abe ingamo ho apitoko ma bobohaika. Abe to ngona ani datorino de ngonaoo nomahikangela dika.’”

¹⁵ “De ngohi tato, ‘Masara ahi baluhu, ngona naa onaguna?’” “De Una ahi Baluhu wopaluhu wato, ‘Ngohi naa o Yesusu abe ngona nohihikangela Ngohino!

¹⁶ De naa ngona kiani nomomikiye! Angamoi Ngohi tomahimatoko ngonaika la tonihitagongo moi. Abe ngona tonigorakiye la nodadi ahi duduhunu abe ngona ahao natobahingahu-ngahu o nyawaika abe ma titi tomahimatoko ngonaika. De ahao abe hokokia tomahimatokoli ngonaika, de ma titi genangoo kiani nahingahu-ngahu o nyawa manga ngoe-ngoeika.

¹⁷ De Ngohi ahao toniduhunu o nyawaino la ufa ikiriaholi inihikangela. Abe ngaro to ngona ani nyawaino de onanginoo abe ko o Yahudi ma nyawainoua masara gea ahao toniduhunu ona mata-mataino. De Ngohi ahao tonihidingoto ona ko o Yahudi ma nyawaikaua

¹⁸ la to ona manga hininga ma lako ka idadi ifelenga la ka idadi ihioriki ma gou-goungu. De abe ihiorikoka ma gou-goungu, gea imaketero hoka manga hininga ma fufutu yanoaka la o dararoninoli yoboa, angamoi gea yanoa o Ibilihi ma haeke ma kuaha la yomanoali Ma Jou ai kuaha ma goronaka. De ona gea ahao ka idadi manga howo-howonino aofioka. De gea yodadi Ma Jou ai kokawaaha la manga gogere duru imakadaene dika de to Una ai kokawaaha utu mata-mataika manga gogere. Abe ma hiowa gea mata-mata ahao idadi onangika ma titi abe ihingaku-ngakuoka Ngohino.’ De hokogea ahi Baluhu idodutu o Yesusu ai demo ngohino abe ma dihiraino.”

¹⁹ De o Paulusu wohigila-gilali ai demo wato, “De, ahi koano o Agaripa, ngohi duru ko talawanua ma behehongika abe o Horogaka de auku ihihimatoko ngohiuku, masara duru taniiki enangika.

²⁰ Abe ihira-hira de tahingahu-ngahu o Damasiki ma nyawaika abe hokokia tamakeoka ma himatoko ma goronaka, de ipahaino de o Yerusaleeme ma nyawaika tahingahu-ngahu, de o Yudea ma tonaka ma amokikaoo tahingahu-ngahu. De ino ino de onangoo abe ko o Yahudi ma nyawaikaua tahingahu-ngahu. De o nyawa mata-mataikaoo de duru tahigaro tato kiani yoporete manga howo-howono de yomangali Ma Jouika. De hongoli tahigaro tato ona kiani yotobadiai o datoro ma rorahai manga wowangoka la genangino de yomahitaana abe yagou-goungu yotobaka manga howo-howonino.”

²¹ “De ipahaino de o wange moioka ngohi naga Ma Jou ai Tauoka, de ka itodokanino de o Yahudi ma nyawa yamuruono naga ihitaoko ma titi ahi demoino gea de ihipoha-poha la ato ihitoma!

^22-23 De ngaro hokogea manga hidee ngohino masara Ma Jou wohiduhunu hiadono ko tohonenguahi ho ngohi nagahi nginioka de ka idadi tiniade-ade ngini mata-mataika abe hokokia idadioka ngohino. Abe ngaro ngini nia gogere hatoli ikokurutiye eko ngaro ma dodipokouku masara tosanangi tiniade-ade ngini mata-mataika. Angamoi ngohi naa ahi dodotoko ko o rerehenua ma dodotoko, masara duru imakiniiki dika de o Musa ai demo de Ma Jou ai uru ma dodofanga manga demo abe ma dodihiraka de ona ihitulihukuoka Ma Jou ai Bukuoka. Abe ona gea ma dodihiraino de yotulihi ato ahao ma oraha adonoka de Ma Jou ai Mesia woboauku masara o nyawa iwihikangela Unangika hiadono wohonenge. De ipahaino de Una gea duru wohira womomiki ai honengino la ai abari gea idadi imaketero hoka o hilo moi o nyawaika. Abe to Una ai abari ma demoino gea de ka idadi o Yahudi ma nyawa de onangoo abe ko o Yahudi ma nyawaua ona mata-mata ka idadi waduhunu manga fufutuoka de aino la yamake ma dararono ma gou-goungu.”

²⁴ De o Paulusu ka wotemo-temohi ai gogiriaka de ka itodokanino de ma gubernuuru o Fetusu waamo-amokiye wato, “Paulusu, ngona naa initogohangoka! Abe bote ngona nomadotokoholi ho hiadono duru initogohangoka naa!”

²⁵ De o Paulusu wipaluhu wato, “Ahi baluhu abe duru tonihoromati o Fetusu, naa tomahingahu ngonaika abe ko ihitogohangua, masara ahi demo nginika naa duru ma gou-goungu dika de duru itaana!

²⁶ De ngohi tonganono abe nanga koano o Agaripa una naa duru wohioriki abe ma titi naa ena mata-mata. De ngohi ahi demoino de ko tomatongohonua angamoi una wohiorikoka ma titi mata-mata abe tiniade-adeoka. De gea kiani wohioriki angamoi o nyawa mata-mata yoihenoka de ihioriki abe hokokia idadi o Yesusika.”

²⁷ De ahao o Paulusu womalega o Agaripaika de witemo wato, “De naa, ahi koano o Agaripa, ka idadi tonilehahi dika. Ho sarakia, ngona ko iwa ani ngongaku Ma Jou ai uru ma dodofanga manga demoika? Masara tohioriki abe ngona nangaku enangika!”

²⁸ De o Agaripa wipaluhu wato, “Ho mode ngona naa nato bote ani demo muruono dika de genangino ngohi tingaku o Kristusika?”

²⁹ De o Paulusu wato, “Iya, ngaro niperelu o demo muruono dika eko ma ngoeika masara ngohi duru tonganono de tomaniata Ma Jouika la ika-ika ahao ngini mata-mata nenangoka ka nimaketero dika abe hoka ngohioli. Masara igoungu tonganono abe ahao naga moi dika homakohowono, la nginioka ufa naga nia papakiti abe hoka to ngohioli.” Hokogea o Paulusu ai demo onangika.

³⁰ Ka de wotemo ibooto de ahao ma koano de ma gubernuuru de o ngo Berenike de ona utu mata-mata yomaokoino de yokokisobo.

³¹ De ona ma dodoomu ma ngioka de yosobo de ahao yomakoketemo ma titi o Paulusu. De ona yomaketehiningamoi abe yotemo ato, “Una gea duru ko iwa ai howono abe genangino de kiani iwihohowono de o hohonenge. De ngaro ai howono la kiani iwibuika masara ko iwa!”

³² De ahao o Agaripa witemo o Fetusika wato, “Nako hoka nengokadauino de una ko wogahokua la iwihidingoto o Kaisarika, gea ka idadi hihihupu dika ma rorahaiika! Masara mangale ma titi ai gogahoko ma demo itagioka ho kiani hihidingoto o Romaika.”