Hidingoto 24 - Ma Jou ai Demo-demo o Totobelohoka

O Paulusu iwiao ma gubernuuru o Felikisi ai himangino

¹ De o Paulusu iwibuioka o Kaisarea ma kotaka de o wange motoa ipahaino de ahao o Yahudi ma nyawa manga hihira yamuruono naga yoboa o Yerusaleemoka de yaino. Abe naga onangoka o Ananiasa to ona manga hidemo ma nyawa wokokurutiye Ma Jouika, de nagali womatengo ai romanga o Teretulusu, abe una duru wososawaro de o pareta. De o Teretulusu gea una woboa la ka idadi wihitararono o gubernuurika ma titi manga dadae ma demo o Paulusika.

^2-3 De ahao o Paulusu unangoli iwiaoino manga hima-himangoka, de o Teretulusu una witemo ma gubernuurika la ka idadi witae o Paulusika. De una wato, “Ahi baluhu o gubernuuru, ngomi o Yahudi ma nyawa mitarimakase ngonaika. Angamoi ngona ma dihirainohi de nomihipareta irahai la hiadono mia tonakoka de o dame ilaku ngomioka. De naga ma kangela ma ngoe ngomioka abe ngona nahihanga ma titi ani hininga ma sosawaroino ho ma oraha naa de mia hininga isosanangioka. De ma titi ani hininga ma rorahai gea mata-mata ho ngomi duru mitarimakase ngonaika.

⁴ De naa togila-gila de tonihingahu ma titi ahi dadae ma demo unangika gea done ngona nohidebeturu ma titi ahi demoino nato ifoloiholi. Ho naa ngohi togahoko la ma titi ani hininga ma rorahaiino de ngona jai-jai dika notoihene ahi demoino abe ma titi to una gea ai howono.

⁵ Abe ngomi duru wiwietongo unangika gea miato una o nyawa abe ka ihikaika wahikapusaka o nyawa manga hiningaika hiadono o kangela miaohana. De una ka ihikaika wahigaro o Yahudi ma nyawaika la yalawana o Roma ma poparetaika. De gea ngaro nenangoka o Isiraele ma tonakoka de ngaro o dunia ma amokika masara duru ma ngoe idadioka abe una wahikapusaka o nyawa manga hininga hiadono o huruhara idadioka. De una gea wodadioka to ona manga hihira abe o doomu moi ihiromanga ato o Nasaretoka manga doomu.

⁶ De hongoli nengokadauino de una wohitaili la wohipeseke Ma Jou ai Tau o Yerusaleemoka, de duru ma oraha gea abe ngomi wiwitaokino la wiwihitogumu ai datoro ma dorou gea.

⁸ De ngona ma hirete ahi baluhu, ngona ka idadi nileha-leha unangika la hiadono nohioriki abe mia dadae ma demo gea unangika duru ma gou-goungu dika.”

⁹ Hokogea o Teretulusu ai demo ma gubernuurika, de ahao o Yahudi ma nyawa utu manga doomuino onangoo yotemo-temo ato, “Iya, igoungu! Abe o Teretulusu wotemoka gea ai demo mata-mata duru igoungu!”

¹⁰ De ona yotemo ipahaino de ahao ma gubernuuru wigawi o Paulusika la unangoli ka idadi womademo. De o Paulusu wotemo wato, “Ahi baluhu, ngohioo duru tohioriki abe ngona ani taongo muruono ibooto abe ngona ka ihikaika notoihene ngomi o Yahudi ma nyawa mia kangela la ahao naputuhu onagona yahowonoka de manga hohowono kiani hokokia yamake onangika. Ho mangale ma titi naga ani sosawaro ma amoko ma titi to ngomi mia wowango ma datoro ho ngohi tosanangi dika tomademo to ngona ani himangoka.

¹¹ De naa ngohi tomahingahu abe ko ihitedekanuahi o Yerusaleemoka, abe ka o wange ngimoi de hinooto ibooto abe ngohi tomahiadono o Yerusaleeme ma kotaiye la ka idadi tomahuba-huba Ma Jou ai Tauoka. De ngona ahi baluhu ka idadi naleha-leha o nyawaika la nohioriki abe duru tagou-goungu ahi demoino.

¹² De tomahiadono Ma Jou ai Tauika de duru ko iwa abe ngohi de o nyawa mimaketeloliliara, de duru ko iwa o huruhara idadi ngohioka, abe ngaro mia dodotoko ma tau-tauoka eko ngaro o kota ma ngeko-ngekomoka masara duru ko iwa o huruhara.

¹³ De gea ma titi hiadono ngohi tato to ona gea manga dadae ma demo ngohino ka o homoa ma demo dika, de ona duru ko idadiua yomahitaana abe manga demoino de yagou-goungu, angamoi gea yoeluku dika.

¹⁴ Masara naga moi dika abe ka idadi tomangaku ngonaika. De gea tomangaku abe ngohi tomahuba-huba to ngomi mia totofora manga Jouiye abe tatobanii-niiki o Yesusu ai dodotoko ma ngekomika la genangino de tomahuba Ma Jouika. De ona gea abe ihitae-tae ngohino, ona ihiromanga mia ngekomo gea ato o rerehene ma dodotoko, masara hokogenangua. Angamoi ngohi duru tangaku ngomi o Yahudi ma nyawa mia Paretaika de Ma Jou ai Demo-demo mata-mataika abe ma dodihiraino to Una ai uru ma dodofanga ihitulihukuoka manga bukuoka.

¹⁵ De ngohi tomahinganono Ma Jouika abe imaketero hoka o nyawa gea ihitae-tae yomahinganono Unangika. Abe ngomi mata-mata mimahinganono Unangika la Una ahao wahimomiki o nyawa mata-mata abe ngaro ona yototiaioka de ngaro onangoli abe yototiaiua to Una ai himangoka, masara duru mata-mataika ahao Una wahimomiki.

¹⁶ De mangale ma titi ahi nganganono gea ho ngohi ka ihikaika tomaribuutu la ahi hiningaka de ko tahowonua, abe ngaro Ma Jouika de ngaro o nyawaikaoo masara tohitaili la tato ufa todiai o howono.

¹⁷ De ngohi naa ahi taongo muruono ibooto abe ko ihiwa o Yerusaleeme ma kotaka, de ahao naa ma duruino tolioli ma kotaika gea. De tolioino de ngohi tao o dora ma hidoaka ma tiwi abe tahidoakoka ahi gogianongoru o Yahudi ma nyawaika, de tahidoaka ipaha de ahao toiki Ma Jou ai Tauika la o huhuba tomahihuba Unangika.

¹⁸ De abe ma oraha ona ihitae-tae ihimake ai Tauoka de ngohi tomahitebinoka Ma Jou ai himangoka. De ma oraha gea de ko iwa ngohioka o nyawa manga ngoe abe ihigilolitino ihinii-niiki, de ko iwa o huruhara o nyawa manga hidogoronaka.

¹⁹ Masara naga o Yahudi ma nyawa yamuruono naga genangoka abe o Asia ma tonakoka de yaino yoboa. De ona gea abe tanu kiani yoboa nenangino la ihitae ngohino nako naga manga hiningaka abe yofikiri ato ngohi tahowonoka, angamoi ona gea abe ihimake Ma Jou ai Tauoka.

²⁰ De ipahaino de ihiao to ngomi o Yahudi ma nyawa mia hihira manga doomuika la ona ihileha-leha ma titi hokokia idadioka. De ngaro ona mia hihira gea masara ona ko yamakeua ahi howono o kia dika ngohioka! De abe ma titi gea, ngona ahi baluhu ka idadi naleha onangika gea abe ihitae-tae angamoi onangoo naga nanga doomuoka o wange naa, de onangoo ihioriki abe ko yamakeua o howono ngohioka!

²¹ Abe ma dihiraino gea manga doomu ma himangoka de naga moi dika ahi demoino abe marai ona yoigo la ihititi ahi howono genangoka. De gea ahi demo abe ngohi topoaka de tomahingahu onangika tato, ‘Ngohi naa ihitaokoka de ihihitailako o wange naa mangale ma titi ngohi duru tomahinganono o momomikika. Abe tongaku ahao o nyawa mata-mata yomomiki manga honengino!’” Hokogea o Paulusu womademo ma gubernuuru ai himangoka.

²² De ma gubernuuru o Felikisi, una duru ma ngoe woihenoka abe ma titi o Yesusu ai dodotoko ma ngekomo, masara ngaro hokogea ma una wahuloko dika la o nyawa mata-mata yokokilio dika. De gea ko yosobouahi de wahingahu onangika wato, “Kiani hidodamaa ma tentara manga haeke gea abe ai romanga o Lisiasa. Ahao ma oraha una woboaino de ahao ngohi ka idadi taputuhu abe ma howono onagonaka.”

²³ De ona yokokilio de ahao wihuloko ai tentara ma hihira womatengoika de wihitagongo o Paulusu unangika wato, “Ngona ka idadi nihingohamoka o kamar moioka masara kalioli nihikangela unangika. Ka idadi nihigunoa la ma hohutulu waika waino, de ka idadi ai dodiawo yoboaino de iwitu-tutumu ai kamaroka la iwihidailako to una ai perelu.”

²⁴ De o wange muruono ipahaino de ahao ma gubernuuru de ngoi fekata ona yoboa la ato yomakamake de o Paulusu. De ma gubernuuru ngoi fekata muna o Yahudi ma nyawa momatengo, de ami romanga o ngo Dusila. Ho ona yoboaino de iwiahoko o Paulusu, de una woboa manga himangoka. De ona yahinooto yotoihene to una ai demoika abe una wahingahu-ngahu onangika ma titi o ngongaku o Yesusu Kristusika.

²⁵ De una duru wahigaro onangika abe ma titi Ma Jou ai totiai ma ngekomo de abe hokokia ngone kiani homatongohono la ufa hahowono Unangika. De nagali wahitiari ma titi abe Ma Jou ahao woboali de wonahohowono ngone o nyawa mata-mataika. De abe ma oraha o Paulusu wahingahu-ngahu gea mata-mata onangika de ma gubernuuru o Felikisi una duru wohawanoka, ho una wotemo o Paulusika wato, “Naa ngona ka idadi nolio dika ani ngiika, de ahao muruonoka dika abe nako naga ahi oraha de ahao tonibehehongoli.”

²⁶ De naga moioli ai hiningaka abe ma gubernuuru womatemo wato, “Marai ahao ma oraha tibehehongoli de una wosanangi wohihidoaka o tiwi la wato tihihupu ma rorahaiika.” Ho una duru ma ngoe wibehehongo o Paulusu la ona ka idadi yomakoketemo.

²⁷ De hokogea dika igila-gila abe ma gubernuuru witobaahoko o Paulusu la yomakoketemo ka hiadono ai taongo hinooto ibooto wogogere genangoka. De ma taongo hinooto gea ipahaino de ahao o Felikisi iwihiguti de womatengoli wituruuru, abe ai romanga o Perekiusu Fetusu. De una gea abe iwigorakiye la wodadi to ona manga gubernuuru genangoka. De abe ma oraha o Felikisi ko wosobouahi de tanu ka idadi wihihupu o Paulusu ma rorahaiika, masara una womaputuhu wato winoaika dika o gogoana ma ngi ma goronaka. De hokogea womaputuhu angamoi una woigo la o Yahudi ma nyawa ufa iwingamo masara ka idadi iwisanangi unangika.