Hidingoto 23 - Ma Jou ai Demo-demo o Totobelohoka

¹ De manga hihira gea yomatoomuinoka de o Paulusu iwiao to ona manga hima-himangoka. De una duru wadamaana onangika de wato, “Ahi balu-baluhu de ahi gogianongoru, ngohi naa tomahingahu ahi hininga abe ma dodihirainohi de ka hiadono ma oraha naa naga de tamao ahi hiningaka abe ngohi ka ihikaika taniiki Ma Jou ai mau de ko talawanua!”

² Ka de ai demo gea ipaata ai uruoka de aino de manga hidemo ma nyawa wokokurutiye o Ananiasa una wahuloko ai nyawaika abe yomahitigino de o Paulusu la ona iwipoka ai uruoko.

³ De iwipoka ipahaino de ahao o Paulusu witemo manga hidemoika gea wato, “Ngona gea nomadokangeluku dika, ho ahao Ma Jou Unangoli wonipoha ngonaika! Angamoi ngona ma oraha naa nato nohiurusu la nohioriki ngohi tatilakuru nanga pareta eko koua. Masara ngona ma hirete natilakuroka nanga pareta abe nahuloko la ngohi ihipoka masara ko nihiorikuahi ma titi ahi howono naga eko ko iwa! De genangino duru nanga pareta natilakuroka!”

⁴ De ona abe yomahitigino de o Paulusu onangoli iwihitiari ato, “Done sarakia hiadono ngona notemo hokogea unangika abe nanga hidemo ma nyawa Ma Jouiye wokokurutiye?”

⁵ De o Paulusu wopaluhu wato, “Ahi gogianongoru, tomahilooa, angamoi ko tihiorikua abe una gea nanga hidemo wokokurutiye. Abe igoungu Ma Jou ai Demo-demo inahitiari ato, ‘Ko idadiua niadoana ti ngini nia balu-baluhika abe inihipareta.’”

⁶ De o Paulusu wahioriki abe ma hihira ma doomuoka gea de naga utu yaniiki o Saduki ma doomu ma nyawa manga dodotokika de naga utuoli o Farisi ma nyawa manga dodotoko yaniiki. Ho una wopoaka wato, “Ahi gogianongoru, ngohi naa o Farisi ma nyawa abe tomaketero dika hoka ahi totofora angamoi onangoo mata-mata yodadioka o Farisi ma nyawa! De ngohi naa ihitaokoka de naa ihihitailako de ihileha-leha mangale ma titi ngohi duru tomahinganono o momomikika. Abe tongaku ahao o nyawa mata-mata yomomiki manga honengino!”

⁷ De hokogea dika wotemo de ma hihira ma doomu gea yomareguoka ho o Farisi de o Saduki ma nyawa duru yomaketeloliliaroka.

⁸ Angamoi o Saduki ma nyawa ona yongaku ato o nyawa yohonengoka de duru ko idadiua yomomiki manga honengino. De ngaro abe ma titi Ma Jou ai momalaekata eko o nyawa manga jiwa, masara o Saduki ma nyawa yaoluku gea mata-mata. Masara nako o Farisi ma nyawa, ona yomangaku ato gea mata-mata naga, abe ngaro o momomiki de ngaro o momalaekata de o nyawa manga jiwa, masara gea mata-mata igou-goungu naga.

⁹ De ona yomaketeloliliaroka ho hiadono o gangamo idadioka manga hidogoronaka. Abe naga o Farisi ma nyawaino abe yotobadoto-dotoko o Musa ai Paretaino yamuruono naga, de ona yomataiti yomaokoino de yomahingahu manga hininga de manga demo ma bobuturungu ato, “Nako ngomi naa miato o Paulusu gea ko iwa ai howono, angamoi marai igoungu o malaekata eko o nyawa manga jiwa abe nengokadauino iwitemo unangika.”

¹⁰ De ahao o Saduki ma nyawa onangoli yomahingahu manga hininga abe ihiboa-boaka manga demo. De hokogea yogila-gila yomakoboaka de manga ilingi ka idogo-dogo ilamokiye. De naga utu o Paulusu ai aridatekoka abe yomaketelitauru o Paulusu aika aino. De ika-ika de ma tentara manga haeke wohawana wato marai ahao o Paulusu ai badanga iwika-kakihoka, ho wahuloko ai tentaraika la iwiao o Paulusu to ona manga hidogoronaino de iwihigilio ma tentara ma ngiika.

¹¹ De ma futu gea de nanga Baluhu idodutu womahimatoko o Paulusika de wihingahu wato, “Paulusu, ngona ufa ani hininga ihuha masara ka idadi notomoroini dika. Angamoi abe imaketero hoka o Yerusaleeme ma nyawaika naa nahingahuokau ma titi Ngohi, duru hokogenangoo ngona ahao o Roma ma kotaka de nahikodoku onangikali ma titi o Abari ma Rorahai.” Hokogea nanga Baluhu wihingahu o Paulusika.

O Yahudi ma nyawa yamuruono naga iwihidee o Paulusika ato iwitoma

¹² De o Paulusu nagahi o tentara ma ngioka abe ona ko iwihihupuahi ma rorahaiika. De ma dawangeino de naga o Yahudi ma nyawa yamuruono naga o Yerusaleemoka abe yomatoomuino de iwihidee o Paulusika la ato iwitoma. De ona yomahiketehibehehongo de o koboto moi abe ato ona mata-mata ko idadiuahi yolomo eko yokere ka hiadono iwitomaka. Ho kiani iwitomakahi de gea ahao ona ka idadi yolomo de yokere abe hoka manga biaha.

¹³ De manga ngoe abe yomahiketehibehehongo de o koboto gea naga yamoruata yofoloi.

¹⁴ De yomahiketehibehehongo ibooto de ahao ona yoiki manga hidemo ma nyawaika de manga hihira utuikali de yomahingahu onangika hokokia iwihideeoka o Paulusika ato, “Ngomi naa duru mimahiketehibehehongoka la ko kia-kiauahi ngomi miolomo eko miokere naa de ka hiadono wiwitomaka o Paulusu.

¹⁵ De hokonaa ka idadi homakuduhunu ngini de ngomi. Ngini de nia dodiawo abe o Isiraele ma nyawa mia hihira utuoli, ngini kiani niwihuloko ma tentara manga haeke la una ma moioli wiao o Paulusu ti ngini nia hima-himangoka. Abe ka idadi niwieluku niato bari niwileha-lehali unangika la duru nihioriki ma titi ai howono hokokia. Masara to ngomi mia hidee la ma oraha iwiao nia dodoomu ma ngiika de manga dodagi ma goronaka de ngomi wiwitoma o Paulusika.” De hokogea yomakodotoko la ka idadi o Paulusu iwitoma.

¹⁶ De yomakodotokoka masara o Paulusu ngoi firanga ami ngofaka una woihene ma titi to ona manga hidee gea, ho woiki ma tentara ma ngiika de wihingahu ai pepe o Paulusika.

¹⁷ Wihingahu ipaha de ahao o Paulusu wiahokino o tentara ma hihira womatengo de wogahoko unangika wato, “O goduuru naa niao ani haekika, angamoi naga ai hingahu ma demo moi abe duru kiani wihingahu unangika.”

¹⁸ De ma tentara gea wohimoteke o Paulusu ai hininga ho wiao ma goduuru ma haekika de wihitararono unangika wato, “Ahi baluhu, kangano o Paulusu abe wiwitaokino una wohiahoko de wogahoko la ngohi tiao o goduuru naa ngonaino. Angamoi wato bari naga ai hingahu ma demo abe ngona duru kiani noihene to una ma hirete ai uruino.”

¹⁹ De ma haeke gea wiso ma goduuru ai giamika de wiao ma datekika la ka yahinootoka dika de ahao wileha unangika wato, “O kia naga nato nohihingahu ngohino?”

²⁰ De una wihingahu wato, “Bootino o Yahudi ma nyawa yamuruono naga yoboaino de yogahoko ngonaika la ato itebini ngona kiani niaooli o Paulusu to ona manga hihira manga hima-himangoka. Abe ona ato bari iwileha-lehali ma titi ai demo eko ai howono hokokia.

²¹ Masara gea ufa ngona nohimoteke de to ona manga hidee ma dorou gea! Angamoi naga o nauru yamoruata yofoloi abe ahao iwihagogono ma ngekomo ma date-datekoka la genangoka yomahidiaioka la ahao ma oraha una de ani nyawa yatilakuru manga gogogono ma ngi de ona iwingika de iwitoma o Paulusika. De hongoli ona gea yomahiketehibehehongoka de o koboto ato ona ko yolomuahi de ko yokeruahi abe ma oraha naa de ka hiadono iwitoma o Paulusika. Ho ona yomahidiaioka de bootino yoboaino la yogahoko ngonaika. De ona duru yongano-nganono la ngona nohimoteke de to ona manga gogahoko ma demo gea.”

²² De wihingahu ipaha de ahao ma haeke wihitiari ma goduuruika wato, “Ko idadiua ngona noade-ade abe ma titi noboa ngohino de nohihingahuoka to ona manga hidee gea.” De wihitiari ibooto de wihuloko wato, “Naa ka idadi nolio dika ani tauika.”

O Paulusu iwiao o Kaisarea ma kotaika

²³ De o Paulusu ngoi firanga ami ngofaka wosoboka de ahao ma tentara manga haeke wahokino ai nyawa yahinooto abe ona yodadi o tentara ma hihira. De ona yoboa ai himangino de una wahuloko wato, “Ngini kiani niahidiaiohi nia nyawa la bootino yofutuku abe o takoro hiwo adonoka de ahao ngini nisobo niloiki o Kaisarea ma kotaika. Abe kiani nia tentara yaratuhu hinooto abe yotobalou-lou niatoomuino, de nia tentara abe yososawaro yoparangi de o kuama onangoo kiani yaratuhu hinooto niatoomu, de nagali nia tentara yamoritumidi abe yotobafarene o kuda ma poretuku onangoo kiani niahidiaiohi la bootino ngini niwiao o Paulusu o Kaisareaika.

²⁴ De kiani niahidiaiohi o kuda la o Paulusu unangoo wofarenuku, la ngini mata-mata bootino niwiao de nihidodiai niwigoa-goana o Paulusu ka hiadono nimahiadono nanga gubernuuru o Felikisi ai tauika abe o Kaisarea ma kotaka.”

²⁵ De ma haeke wahuloko ibooto de ahao o hurata wohitulihi ma gubernuurika. De ai hurata ma demoka itemo ato,

²⁶ “Ahi baluhu o Gubernuuru Felikisi. Ngohi naa o Kalaudiusu Lisiasa, de ahi tabea tohidingoto ngonaika!

²⁷ De ma nauru abe tihidingoto ngonaika, una gea o Yahudi ma nyawa yamuruono naga iwitaoko unangika de iwipoha-poha la ato iwitoma. De ngade-ngade iwitomaka abe ma oraha ngohi de ahi tentara toboa unangika. De mangale ma titi toihenino abe una wodadioka o Roma ma kawaaha womatengo, ho tihihupu manga hidogoronaino la tato ko kia-kiaua idadi unangika ma dorou.

²⁸ De ahao ngohi tiao to ona o Isiraele ma nyawa manga hihira ma doomuika la ona ka idadi iwileha-leha unangika hiadono tato tohioriki ai howono done o kia.

²⁹ De manga doomuoka gea ko itedekanuahi de ka idadi tamake abe ona yomaketeloliliara ma titi manga agama ma pareta dika, abe tanu ko kia-kiaua ai howono. De ngaro ona utu ato una wahowonoka masara ngohi tato ngaro ufa dika de iwibuika de ngaro ufa iwitoma, angamoi ai howono ko kia-kiaua.

³⁰ De ipahaino de toihene abe naga o nyawa utu iwihideeoka ato iwitoma o Paulusika. Ho ka de manga hidee gea toihenino de tihidingoto ngonaika. De ahao ngohi tahingahu o Yahudi ma nyawa abe iwitae-tae unangika tato ona kiani yoboa to ngonali ani himangino. De gea yoboa la ka idadi inihitararono ngonaika to ona manga dadae ma demo hokokia unangika. Hokogea dika aika ahi hurata.”

³¹ De ma futu gea de ma haeke ai tentara yodiai imaketero abe hoka una wahulokoka. Ho ona mata-mata yomakiniiki de o Paulusu ka hiadono o Antipatarisi ma kapongika.

³² De ahao ma dawangeino de ma tentara abe yatobalou-lou genangoka de yogilio manga dingiika o Yerusaleeme ma kotaka. Masara ma tentara abe yotobafarene o kuda ma pore-poretuku ona yogila-gila yomakiniiki de o Paulusu ka hiadono manga dumutu yomahiadonoka o Kaisarea ma kotaika.

³³ De yomahiadonoka de yoiki manga gubernuurika ho iwiao o Paulusu to una ai himangoka de manga haeke ai hurata gea iwihidoaka unangika.

³⁴ De ma gubernuuru o Felikisi una wobasa ma hurata de ahao wileha o Paulusika wato, “Ho ngona naa o tonaka o kiaino noboa?” De o Paulusu wipaluhu wato, “Ngohi naa o Kilikia ma tonakoka ma nyawa.”

³⁵ De ahao ma gubernuuru wihingahu wato, “Ahao ma oraha ona initae-tae yomahiadono nenangino de ahao ka idadi toihene manga dadae ma demo ngonaika, de ngonaoo ka idadi nomademo ahi himangoka.” De wihingahuoka de ma gubernuuru wahuloko ai nyawa la iwiao o Paulusu o Herodese ai tauika de duru ihidodiai iwigoa-goana genangoka.