Hidingoto 21 - Ma Jou ai Demo-demo o Totobelohoka

O Paulusu ai dodagi o Yerusaleeme ma kotaika

¹ De ngomi de o Efesusu ma gareja ma hihira mimakitingaka ipahaino de ahao o kapa mifarene de miloiki o Koso ma nuuhika. De ma dawangeino de o Koso mianoaika de mia kapa itulu jai-jai o Rodoso ma nuuhoka de ahao migila-gila de mimahiadono o Patara ma kapongiha.

² De o Pataroka de o kapa miaturuuru ho moioli mifarene abe ma dumutu o Fenisia ma tonakika angamoi gea hatoli itigi-tigino de to ngomi mia dumutu.

³ De ipahaino de mia dodagi ma goronaka o kapaka gea de miatilakuru o Sipurusu ma nuuhu ho gea ka idadi miamake mia kapa ma gubadioka. De ahao mimahiadono ma guguti ma ngiiha o Tirusu ma kotaka abe gea imanoa o Siria ma tonakoka. De genangoka mia kapa ma kiahonanga mata-mata ihiguti ma dudungiha.

⁴ Ho ngomioo miuti ma dudungiha de mialingiri mia gogianongoru o ngongakuoka. De ona miamakeoka de ahao mimahidodogumu onangoka mia minggu moi. De onangino naga abe yatobalufungu de Ma Jou o Womaha, de ona iwihitiari o Paulusika ato koaho ufa una wogila-gila o Yerusaleemika.

⁵ De abe mia minggu moi ipahaino de ahao ngomi mihupuoli ma dowongioko la mifarenoli ma kapa. De ma oraha mihupuoko de mia gogianongoru o ngongakuoka mata-mata ona de ngomi mimakiniiki. Abe ngaro ma nau-nauru de ngaro manga feka-fekata de manga ngofa-ngofaka, masara duru mata-mataika yomakiniiki de ngomi la ngomi mihupu dai ma dowongioko. De mimahiadonoko de mitilabukuku de mimaniata abe mimakagahoko Unangiye.

⁶ De mimaniata ipahaino de ahao mimakitingaka, angamoi ngomi o kapa mifarene de ona yokokilio manga tau-tauiha.

⁷ De o Tirusoka de misobo de mihidete o Petolemaisi ma kapongika, de genangoka miatutumu abe mia gogianongoru yamuruono naga gea ma kapongoka. Masara ngomi ka mia futu moi dika genangoka

⁸ de ahao ma dawangeino migila-gila miloiki o Kaisarea ma kotaika. De ma kotaka gea mimahidodogumu nanga gianongoru o Filipusu ai tauoka, abe una watobahingahu-ngahu o Abari ma Rorahai o nyawaika. De una ma dihiraino de iwigorakoka la wodadi o gareja ma duduhunu womatengo, ho una de ai dodiawo yabutaanga ona yatobaleleani o inomo o gareja ma nyawaika abe naga de manga pereluoka.

⁹ De o Filipusu naga ngoi ora yaruata abe ona ko yoilakuahi, de ona mata-mata yatobalufungu de Ma Jou o Womaha la ka idadi Ma Jou ai hingahu ma demo yahingahu-ngahu o nyawaika.

¹⁰ De ngomi mimanoa o Filipusoka mia futu muruono, de o wange moiuku de naga womatengo woboaino abe unangoo iwitobalufungu de Ma Jou o Womaha la wadofanga Ma Jou ai hingahu ma demo o nyawa-nyawaika. De una gea ai romanga o Agabusu, abe una o Yudea ma tonakoka de waino woboa.

¹¹ Ho gea womitutumu ngomi de ahao o Agabusu waleino o Paulusu ai bulu de gea ena wapake la womahidapakiti ai louuku de ai giamino. De o Agabusu womahidapakitoka de ahao womihingahu ngomino abe hokokia ahao idadi o Paulusika. Ho una wato, “Hokonaa Ma Jou o Womaha ai demo nginika, abe Una wato, ‘O bulu naa ma dutu, una ahao o Yahudi ma nyawa manga hihira o Yerusaleemoka iwihidapakiti unangika. De ona gea iwihidapakiti duru imaketero abe hoka ngohioli naa tomahidapakitoka. De ahao una iwihidoaka o Roma ma poparetaika.’”

¹² De ma oraha ngomi miihene ma hingahu ma demo gea de ngomi mata-mata abe mimakiniiki mitagi-tagi de o Paulusu de onangoo mia gogianongoru ma kotaka gea, ngomi mata-mata duru migaho-gahoko o Paulusika la miato ufa wogila-gila woiki o Yerusaleeme ma kotaika.

¹³ De o Paulusu womipaluhu wato, “Done adodoa ho ngini hokonaa niari-ari? Angamoi nia koongoino de duru nihihitubuho ahi hininga! Abe ngohi tanu tomahidiaioka la o Yerusaleemoka de ihibuika, de hongoli ka idadi ona ihitomaka, iti tohiboa o higiriiri nanga Baluhu o Yesusu ai romangika!”

¹⁴ De hokogea woluku mia demo unangika abe womaputuhoka wato kiani o Yerusaleemika wogila-gilaika. De ma bahauku de ngomi mianoaika dika abe mihitaili miatatoko ai ngekomino, ho ngomi miato, “Iti nanga Baluhu ai mau idadi nanga wowangoka.”

O Paulusu watutumu o gareja ma hihira o Yerusaleemoka

¹⁵ De o futu muruonohi dika de mia kiahonanga miahidiaioka la genangoka de misobo la mitagi-tagi o Yerusaleeme ma kotaiye.

¹⁶ De mia gogianongoru o Kaisarea ma nyawa yamuruono naga mimakiniiki de de ngomi o Yerusaleemika, de mimahiadoniye ma kotaiye de ona imiao mia gianongoru womatengo ai tauoka la mimahidodogumu unangoka. De mia gianongoru gea ai romanga o Manasono, de una wolamoko o Sipurusu ma nuuhoka. De una gea ai dekanoka abe iwingaku o Yesusika.

¹⁷ De o Yerusaleemoka gea mia gogianongoru o ngongakuoka ona mata-mata duru imidafongo irahai.

¹⁸ De gea mimahiadono o Yerusaleeme ma kotaino de ahao ma dawangeino ngomi de o Paulusu miloiki la miato wiwitutumu o Yakobusu. De o Yakobusoka naga o Yerusaleeme ma gareja ma hihira mata-mataika yomatoomuinoka.

¹⁹ De o Paulusu ai tabea wahidoakohi ona homoi-homoiika de ahao una duru wohidodiai woade-ade onangika abe hokokia Ma Jou ai datoro wodiaioka ma titi o Paulusu ai karajaangino. Abe gea Ma Jou ai datoro ma oraha o Paulusu naga ko o Yahudi ma nyawaua manga hidogoronaka.

²⁰ De ona yototoihene ai ade-ade ma demoino de ahao ona iwihigiriiri Ma Jouika ma titi ai datoro wodiaioka. De ahao ona iwitemo o Paulusika ato, “Mia gianongoru, marai ngona nohiorikoka abe nenangoka o Yahudi ma nyawa onangoo duru yosana abe iwingakuoka, de ona mata-mata manga hininga ka itagiohi o Musa ai Paretaika ho ona duru ka yaniikohi.

²¹ De o Yerusaleeme ma kotaka naa naga nanga gogianongoru o ngongakuoka abe o Yahudi ma nyawaino de ona gea yoihenino ma titi ngona ani dodotoko. De gea yoihenino ato bari ngona natobadotoko abe ko itiaiua o Yahudi ma nyawaika abe yogogere o tonaka utuokali. Abe bari nadotoko onangika la ona ka idadi yoporete dika o Musa ai Paretaika ho ko yaniikokaua. De ona yoihenino ato bari nadotoko nanga gogianongoruika la nato ngaro ufa dika de manga ngofa-ngofaka yomahuna, de o Yahudioka nanga biaha utuoli ka idadi yanoaika dika.

²² De hokogea nanga gogianongoru utu manga hininga ngonaika, ho naa done sarakia hodiai? Angamoi ko idadiua hagogono onangino ma titi ani boa, ho duru itararono abe ona ahao yoihene abe ngona noboainoka de boteua iningamo ngonaika.”

²³ De ahao ma hihira gea yogila-gila yotemo ato, “Hokonaa to ngomi mia hininga, ho ngona naniiki dika mia demoino. Naga ngomioka o nauru yaruata abe yomahibehehongoka moi Ma Jouika.

²⁴ Ho ngona de ona nimakiniiki Ma Jou ai Tauika la ngini nimakutuono nianiiki ma pareta ma hiaturu abe genangino de nimahitebini Ma Jou ai himangoka. De ipahaino abe ma oraha adonoka la ona yaruata manga behehongo ihingodumoka de ngona kiani nabangu ma titi to ona manga huhuba Ma Jouika ma bobangu. De ahao abe gea mata-mata ihingodumoka de ona ka idadi manga pea aborongkoka la yomahitunguu abe manga behehongo ihingodumoka. De gea ahao o nyawa abe inimake ngona ani datoro gea Ma Jou ai Tauoka de ka idadi ihioriki abe ngona nagou-goungu naniikohi to Una ai Pareta ngoneino. Ho ona ahao ko yongakuokaua o nyawa manga hiade-ade ma demo abe ato bari ngona noporetoka o Musa ai Paretaika. Hokogea ngomi minihigaro ngonaika la ahao nodiai.”

²⁵ De ahao nagahi manga demo moioli o Paulusika, abe ona ato, “De abe ma titi nanga gogianongoru o ngongakuoka abe ko o Yahudi ma nyawaua, ngomi naa miato irahai la ngona nahihohininga onangika ma titi mia huhuloko ma demo ma dihiraino. Abe ma dihira mia hurata ma goronaka de migahoko onangika la ka yaniikohi nanga pareta muruono naga dika. Abe miato ufa yaolomo o aewani ma roehe abe ihihubaka o pangaoika. De abe o aewani ma awunu ko idadiua yaokere eko yaolomo. De nako naga o aewani abe o nyawa yahookoko la yatoma enangika, enangoo ma ko idadiua yaolomo to ena ma roehe. De ufa yomakitigi ko itiaiua. Hokogea dika mia huhuloko onangika abe ko o Yahudi ma nyawaikaua.”

O Paulusu iwitaoko o Yerusaleeme ma kotaka

²⁶ De o Paulusu wohimoteke abe ma gareja ma hihira manga demoika, ho ma dawangeino de una de ona yaruata gea yomakutuono yaniiki ma pareta ma hiaturu abe hokokia yomahitebini Ma Jou ai himangoka. De yomahitebini ibooto de ahao yoiki Ma Jou ai Tauika. De genangoka o Paulusu womahingahu o nyawa manga hima-himangoka abe ona yamotoa yomahibehehongoka moi Ma Jouika. De womahingahuoo abe nako hiadono manga behehongo ihingodumoka de ahao ona yamotoa yoboainoli la ka idadi ihitunguu abe manga behehongo gea abooto. De gea manga dodunguu yomahihuba de o huhuba moi Ma Jouika.

²⁷ De yomahingahuoka de ipahaino abe manga gahe ngade-ngade adonoka angamoi itigioka manga wange tumidi ipahaikaka. De ma wange gea de o Paulusu naga Ma Jou ai Tauoka, masara nagali o Yahudi ma nyawa yamuruono naga abe o Asia ma tonakino yoboa. De ona gea iwimake o Paulusu de ahao yahikagaro manga dodiawoika hiadono o nyawa manga ngoe duru iwingamo o Paulusika ho iwitaokino.

²⁸ De ona yopoa-poaka ato, “Abeika ngini o Isiraele ma nau-nauru! Ngini kiani nimiduhunu ngomi naa! Angamoi una naa ai dodotoko imakalawana de to ngone nanga wowango, abe una wotagi-tagi aika aino de wahigaro o nyawa ko manga ngoeika la wato ngaro ufa de yaniiki to ngone nanga pareta! De ai demoino de wahitipokouku Ma Jou ai Tau naa. De hiadono una wohipeseke Ma Jou ai Tau abe ma titi waoino ona ko o Yahudi ma nyawaua la onangoo yowohamino Ma Jou ai Tau ma loa naa, de gea duru ko idadiua!”

²⁹ Hokogea ona yopoa-poaka angamoi kanganoino de o kota ma goronaka de ona iwimake o Paulusu de ai dodiawo womatengo o Torofimusu. De ai dodiawo gea igoungu una ko o Yahudi ma nyawaua abe o Efesusu ma kotaka de waino woboa. Ho ona yopoa-poaka ato bote o Paulusu wiao ai dodiawo gea la yowohama Ma Jou ai Tau ma loaika, masara ko hokogenangua o Paulusu wodiai, angamoi ona kangano o kota ma goronaka dika de ko Ma Jou ai Tauokaua.

³⁰ De gea idadioka o huruhara abe imahikabarihi hiadono o kota ma amokika, de o nyawa ko manga ngoe iwingamo o Paulusika. De ona yongamo-ngamo gea iwiliara o Paulusu Ma Jou ai Tau ma loaka de aino. Ho ka de iwihihupuoka de ma loa ma ngorana ma dadatoko atatokoka.

³¹ De ona mata-mata iwipoha-poha unangika la ato iwihohonenge, masara ma abari abe hokokia idadi gea imahiadono o Roma manga tentara manga haekika. Abe naga iwihingahu ato, “O Yerusaleeme ma kota mata-mataika de idadioka o huruhara ma amoko!”

³² De manga haeke gea womataiti wahokino ai tentara ma nyawa de manga hidimono yamuruono naga de yomapopaata o nyawa ko manga ngoe gea manga hidogoronaika. Ho ka de ma kokawaaha yamake ma tentara manga haeke de ai tentara yoboaino de yomatogumu ho ko iwipohakaua o Paulusika.

³³ De ma haeke wiadono o Paulusika de witaokino de wahuloko ai tentara la iwihidapakiti unangika de o behi ma rante hinooto. De ahao ma haeke waleha manga ngoe-ngoeika abe una witao-taokino gea onaguna, de walehaoo abe hokokia idadi hiadono yomakangamo.

³⁴ De abe yopalu-paluhu unangika, utu onangino yopoaka manga demo moi masara utuoli manga demo imakohowono yopoaka. Ho ngaro yopaluhu masara duru ko wohiorikua ma titi angamoi manga demo ko imakiniikua, de hongoli manga hagaaga duru ilamokiye ho wokangela woihene. De mangale ma titi ko wamakeua ma titi ho wahuloko ai tentara la iwiao o Paulusu o tentara ma ngiika la witailako genangoka.

³⁵ De abe ma oraha yomahiadono ma ngute o tentara ma ngioka gea de o nyawa manga ngoe-ngoe gea duru yahideefotino la ato iwipohali o Paulusika, ho ma tentara kiani iwigoraka o Paulusu de iwimokuoka la ufa o nyawa iwiadono unangiye.

³⁶ De o nyawa manga ngoe ona yahidoduruino de duru yopoa-poaka ato, “Niwitomaka dika! Niwitomaka dika!”

O Paulusu wahikodoku ai wowango ma ade-ade o nyawa manga ngoe-ngoeika

³⁷ De ma tentara ngade-ngade iwihingohama manga ngi ma goronaika de o Paulusu witemo manga haekika wato, “Ka idadi ngohi tonitemo ngonaika?” De ma haeke wiheranga de wato, “Ho mode ngona naa ka idadi notemo de o Yunani ma demo?

³⁸ Masara ngohi tato bote ngona o Mesiiri ma nyawa gea abe ma dihiraino de nalawana o Roma ma poparetaika! Abe ma oraha gea de nodadi o tobatoma ma nyawa manga hihira de nahihira-hira ona abe yasana iata o tonaka ma kakaahaika la niloara o poparetaka de niaino. Eko gea ko ngonaua?”

³⁹ De o Paulusu wipaluhu wato, “Koua, gea ko ngohiua! Ngohi naa o Yahudi ma nyawa abe o Tarasuusu ma kotaka de taino toboa, abe ahi kota gea o nyawa de manga horomatioka ahi kotaika. De ahi kota gea imanoa o Kilikia ma tonakoka. Ho naa tomagahoko la ka idadi tatemohi o nyawa manga ngoe-ngoeika naa.”

⁴⁰ De ma haeke wohimoteke, ho o Paulusu womaokoiye ma nguteoka de wataere de ai giama la o nyawa gea yomariidohi. De hokogea idadi abe ona mata-mata yomarii-riidoka, ho una watemo onangika de wapake to ona manga demo, o Ibarani ma demo abe yatobapake genangoka.