Hidingoto 20 - Ma Jou ai Demo-demo o Totobelohoka

O Paulusu wahiputurungu ai gogianongoru manga ngongakuika abe o Yunani ma tonakoka

¹ De o huruhara gea ipahaka de ahao o Paulusu wahokino ai gogianongoru o ngongakuoka. De ona yokokiboainoka de una wahiputurungu ona manga ngongakuika de ahao womahilooa wato kiani wosobo. De gea o Efesusu ma kotaka de wosobo de woiki o Makedonia ma tonakika.

² De ai dodagi ma goronaka de wadulu-dulu o kapongo amomoiika de ai gogianongoru wahiputurungu manga ngongakuika. De ipahaino ahao wogila-gila o Yunani ma tonaka ma honongaika abe ihiromanga o Akaya ma propinsi.

³ De una wogogere o Akaya ma tonakoka ai mede hangeino de ahao womahidiaioka la wolio o Siria ma tonakika. De una ai hininga la o kapa wofarene abe ma dumutu o Siriaika, masara itigioka wosobo de woihenino naga o Yahudi ma nyawa yamuruono naga abe iwihideeoka ato iwitoma. De gea woihenino ho womaputuhu wato wogilio wotowongioli ho waniikoli ai dingii abe watilakuroli o Makedonia ma tonakino.

⁴ De naga o Paulusu ai dodiawo manga ngoe abe yomakiniiki de de una. Abe o Berea ma nyawa naga womatengo ai romanga o Sopatere abe una o Pirusu ai ngofaka, de naga o Tesalonika ma nyawa yahinooto o Arisitarakusu de o Sekundusu, de o Derebe ma nyawa womatengo o Gayusu. De nagali o Timotiusu de o Asia ma nyawa yahinooto o Tikiku de o Torofimusu.

⁵ De ona gea yohiraika yoiki o Toroasa ma kapongika la genangoka de imidamaa abe ngomi ahao miahidoduruika ma kapongika gea.

⁶ De abe o Totilakuru de o Roti abe ko Iwa ma Ragi ma rame-rame ipahaino de ahao ngomi mifarene o kapa o Filiipi ma kota ma dowongioka ho o Makedonia ma tonaka mianoaika. De mia dodagi o kapaka mia futu motoaino de ahao mimahiadono o Toroasa ma kapongika, de genangoka mia futu tumidi.

O Yutikusu iwiotaka abe o Paulusu ai dodotoko ma gogiriaka

⁷ De ngomi o Toroasa ma kapongokahi de o Gareja ma wange adonoka ho ngomi mimatoomuino de mia gogianongoru genangoka la mianiiki nanga Baluhu ai hiketero. De yofutukuoka de o Paulusu wohingahu-ngahuohi o Abari ma Rorahai angamoi ma dawangeino de wosobo, ho ai demo hatoli ma gurutu abe wotemo-temo, de ko womatogumua ka hiadono o futu gorona.

⁸ De ma futu gea ngomi mimatoomuino o tau ma lape hangeoka, de naga o posi ma ngoe abe ihitararono ma kamarika.

⁹ De naga genangoka o goduuru womatengo ai romanga o Yutikusu, de una gea wogogeruku o jendela moioka abe idateke ma hoanika. De una wohitaili wotoihene o Paulusu ai demoika, masara ino ino abe o Paulusu ko womatogu-togumua de o Yutikusu ko wapoakaua angamoi duru iwikiooko. De ahao una duru iwikiookoka ho hiadono ka itodokanino de iwiotaka ma lape hangeoka de wauku. De ona yauku unanguku de iwigoraka masara una wohonengoka.

¹⁰ Masara o Paulusu unangoo woutiuku de womamotumuku o Yutikusu ai badanguku de wikooino. De wikoo ipahaino de o Paulusu wotemo wato, “Ngaro ufa nia hininga ihuha, angamoi una naa ai wowango nagahi!”

¹¹ De womomiki ipahaino de ahao ngomi mata-mata milioli ma lape hangeiye gea de mimakutuono mianiiki nanga Baluhu ai hiketero ma inomo de ma ngokere. De miolomo ibooto de ahao o Paulusu wohigila-gilali ai demo abe womihigaro ngomino ka hiadono ngomi imihidetebiniye. Ho womihigaro ipaha de ahao o Paulusu wosobo.

¹² De ma goduuru gea o Yutikusu ai gogianongoru yamuruono naga iwile de iwiao la wolio ai tauika, de ona manga hiningaka de duru yalaruoka angamoi una ka wowangohi.

O Paulusu de o Efesusu ma gareja ma hihira yomakubuhuku o Miletusu ma kapongoka

¹³ De o Toroasa ma kapongokahi de ngomi de o Paulusu mimakitingakohi jai-jai angamoi una womihidingoto o gahioko la ngomi mihira mifarene o kapa abe ma dumutu o Asoso ma kapongika. Masara ngomi mimaketehibehehongo de una la ahao mimakamakeoli o Asosoka. Ho ngomi mihira misobo de ipahaino ahao o Paulusu wanoaika o Toroasa de wotagi-tagi wotowongi o Asoso ma kapongika.

¹⁴ De una womahiadono o Asosika ho mimakamakeoli genangoka de ahao mimakiniiki de de una abe mifarene o kapa moioli de miloiki o Metilene ma kapongika.

¹⁵ De ma dawangeino de ngomi miatilakuru o Kioso ma nuuhu, de ma dawangeinoli de mihidotobiki o Samoso ma nuuhika. De ahao mia futu moiohi de mimahiadonoka o Miletusu ma kapongika.

¹⁶ De ma dihiraino de o Paulusu womaputuhoka wato ai dodagioka naa de ko wotulua o Efesusu ma kotaka done iwitedekanaholi o Asia ma tonakoka gea. Angamoi una ai hiningaka de woigo womataiti womahiadono o Yerusaleemika la ka idadi o Pentakosta ma rame-rame una wohirame-rame genangoka.

¹⁷ Ho ma oraha miuti ma dudungiha o Miletusu ma kapongoka de ai hurata wohidingoto o Efesusu ma gareja ma hihiraika la wabehehongo onangika. Abe una ai behehongo ma demoka wato, “Ngini nimataiti niboa nihibuhuku o Miletusino la nenangoka ngone ka idadi homakamakeoli!”

¹⁸ De o gareja ma hihira gea yomahiadonino de o Paulusu womahingahu ai hininga onangika wato, “Ngini nihioriki ahi wowango ma datoro abe ma dihirainohi abe ahao toboa o Asia ma tonakino naa ka hiadono ma oraha naa naga.

¹⁹ Abe ngohi tao itiai ahi tagongo nanga Baluhu ai karajaangino, de gea todiai de ahi hininga ma dodipokouku. De naga ma ngoe idadi abe o kangela taohana hiadono ahi koongo itifa, angamoi ma titi o Yahudi ma nyawa manga hidee ma dorou ngohino.

²⁰ De ngaro hokogea idadi ngohino masara duru ko ma iwa abe o demo ma gou-goungu eko o higaro ma demo ma rorahai tatumungu. Hokogenangua, masara ngaro nia tau-tauoka de ngaro o nyawa manga ngoe manga hima-himangoka masara duru tinihiree-reeika de o demo ma gou-goungu dika.

²¹ De ahi demo gea ma titi moi dika tinihingahu-ngahu ngini o Yahudi ma nyawaika de abe ko o Yahudi ma nyawaikaua. Abe ngohi tato kiani o nyawa mata-mata manga howo-howono yoporete la yomangali Ma Jouika de iwingaku nanga Baluhu idodutu o Yesusika.”

²² “De ngohi ma oraha naa ahi dumutu o Yerusaleeme ma kotaika mangale ma titi tamao ahi hiningaka abe Ma Jou o Womaha wohihira-hira genangika. De ngohi ko tohiorikua o kia ahao tohimanga genangoka,

²³ masara igoungu naga ma hingahu ma demo abe Ma Jou o Womaha wohimatoko ahi gogianongoruino ma titi ngohi. Abe naa ma duru ma oraha ngomi mitulu-tulu o kota de o kapongo homoi-homoioka de naga to Una ai hingahu abe ihidumutu ngohino. De gea ihihingahu abe ahao tomahiadono o Yerusaleemoka de ahao o nyawa ihitaokino de kiani o kokangela tohimanga.

²⁴ Masara ngohi ahi hininga hokonaa. Abe ahi wowango naa tanu taetongo ko kia-kiaua ma titi, nako ko imakiniikua de nanga Baluhu o Yesusu ai mau ngohino. Ho mangale ma titi gea ho ngohi ko topusingua nako o nyawa ihitoma, iti ko ihitomauahi de ka idadi tabootohi ahi karajaanga abe nanga Baluhu wohihitagongoka ngohino. De ahi tagongo gea la tahingahu-ngahu o nyawaika o Abari ma Rorahai abe ma titi Ma Jou duru wonahiowa de ai hininga ma owa ngoneino.”

²⁵ De o Paulusu wogila-gila womahingahu ai hininga wato, “Ngohi naa tinihingahu dika abe ngini de ngohi ahao ko homakamakeokauali o duniaka naa. De ngini naa abe ma dihirainohi de tinihikodoku nginika o abari abe hokokia Ma Jou ahao wahikoano ai nyawaika.

²⁶ Ho mangale ma titi ngini niihenoka ahi abari gea, ho nako naga abe nihonenge de ko iwa nia ngongaku, gea ko to ngohiokaua ahi tagongo.

²⁷ Angamoi ngohi Ma Jou ai hingahu ko tomatumungua, masara duru tinihingahu to Una ai mau mata-mataika abe wonahingahuoka ngone o nyawaino.”

²⁸ “De naa tinihitiari moi nginika! Abe ngini kiani nimagoana ngini ma hirete done nirehene Ma Jou ai ngekomoka de aino. De nginioo kiani niagoana nia gogianongoru mata-mataika abe Ma Jou o Womaha winihitagongoka nginika la ngini nidadioka to ona manga gogoana ma nyawa. Ho Ma Jou ai gareja ma nyawa ona gea kiani ngini niapaliara irahai, angamoi Una womaijaino ai nyawa de wofangu de to Una ma hirete ai awunu!

²⁹ De kiani niagoana irahai angamoi ngohi duru tohioriki abe tosoboka de ahao naga o nyawa abe o rerehene ma dodotoko yotobadotoko. Abe ahao ona yoboa ti ngini nia doomuino de yahirehene nia gogianongoru utu manga ngongakuoka de aino. De ona gea tahiketero de o fuhuku ma kaho abe duru itualono de gea yatobatoma o domba.

³⁰ De ngaro ngini naa masara ahao naga utu nia doomuino abe yahikawalimi to Una ai demo la ato ka idadi onangikali nanga gogianongoru yanii-niiki.

³¹ Ho ngini kiani duru nimahidodiai! De ufa niawohanga ahi dodotoko de ahi hingahu ma demo tinihikodokuoka abe ahi taongo hangeino ma dekana ti ngini nia hidogoronaka! De gea ngohi o futu de o wange tinihigaro ngini homoi-homoiika la to Una ai totiai niatobanii-niiki, de ma ngoe idadi abe ahi koongo itifa ma titi ahi hininga duru itagi nginika!”

³² “De naa ngohi tinihidoaka ngini Ma Jou ai giama ma hoatika. De togahoko la ngini nimanoa duru ai Demo-demo ma goronaka. Abe ai Demo-demoino gea de wonahingahu ma titi ai hininga ma owa duru ma amoko ngoneuku. De nako ngini ka ihikaika niongaku de nimahinganono ai Demo-demoika, gea ahao ngini nibaluhu Unangika. De ipahaino de ahao Una winihidoaka nginika ma hiowa mata-mataika abe ma dodihirainohi de wonahibehehongoka wato ai nyawa mata-mata ahao hakokimake.”

³³ De o Paulusu wohibobaha ai demo onangika abe wato, “De ngohi naa ma dihirainohi de duru ko tohafinua o nyawa manga tiwi eko manga baju ma rorahaiika.

³⁴ De ngini nihioriki abe to ngohi ahi giamino naa de tomahidailako ahi wowango ma perelu. De ngaro ahi dodiawo manga perelu abe ihitobaniiki, masara to onangoo manga perelu tahidailako.

³⁵ De ngohi ka ihikaika ahi wowangoino de tinihimatoko nginika abe hokokia ka idadi o hu-huha ma nyawa haduhunu ma titi nanga karajaangino, la ngini ka idadi nimaaduru hoka ngohioli ahi karajaanga ma dubuho. De irahai ngini nimahihohininga abe ma titi nanga Baluhu idodutu o Yesusu ai demo. Abe Una ma dihiraino wato, ‘Nako o nyawa abe yahidoa-doaka de abe yodafo-dafongo, ka onagonahi de manga hininga duru isosanangi? De gea o nyawa yahidoa-doaka yososanangi, angamoi ona gea ahao manga hiowa ilamoko yamake Ma Jouino!’ Hokogea nanga Baluhu ai demo abe ngone kiani ka ihikaika hanii-niiki enangika!” De hokogea o Paulusu wohibobaha ai demo o Efesusu ma gareja ma hihiraika.

³⁶ De wotemo ibooto de ahao o Paulusu watilabukuku de womaniata abe wagahoko Ma Jou ai hiowa onangika.

³⁷ De ona mata-mata duru yoari ma titi kiani yomakitingaka de una, de iwikokikooino de iwibounu la manga dora unangika yomahimatoko.

³⁸ De ona manga hininga duru ihuha ma titi ai demo onangika abe wato ahao ko yomakamakeokaua. De ipahaino de yomakiniiki de de una dai ma kapaoko la genangoka de wanoaka una wosobo.