Hidingoto 19 - Ma Jou ai Demo-demo o Totobelohoka

O Efesusu ma kotaka de o Paulusu wadotoko ma titi Ma Jou o Womaha

¹ De abe ma oraha o Apoloso una nagahi o Korintusu ma kotaka abe o Akaya ma tonakoka de o Paulusu una wotagi-tagi de watilakuru o tona-tonaka ma ngoe hidutu una womahiadono o Efesusu ma kotaika. De genangoka yomakamake una de o gogianongoru o ngongakuoka yamuruono naga.

² De ona ma oraha yomakoketemo de o Paulusu waleha onangika wato, “Sarakia, nengokadau ma oraha niongaku o Abari ma Rorahaiika de niwimakeoka Ma Jou o Womaha ma oraha gea?” De iwipaluhu ato, “Koua. Abe ngomi tanu ko mihiorikua ani demo ma dumutu hokokia! Angamoi ko kia-kiauahi miihene abe ma titi Ma Jou o Womaha Una naga eko koua!”

³ De o Paulusu walehali wato, “Ho nia gogohiki o kia niamake nginika?” De ona ato, “To Yohanese ai gogohiki ngomi miamake.”

⁴ De o Paulusu wato, “O Yohanese ai gogohiki gea ma dumutu la o nyawa yomahingahu abe yoigo manga howo-howono yoporete de yomangali Ma Jouika. Masara o Yohanese unangoo ma hirete wahigaro o nyawa-nyawaika la iwingaku o Yesusika, abe Una gea wihidoduruino o Yohanesino.”

⁵ Ka de yoihene ai demo gea de yoigo yomaohiki de nanga Baluhu idodutu o Yesusu ai romangino, ho naga abe yaohiki onangika.

⁶ De yomaohiki ipahaino de ahao o Paulusu wafokumu onangika de gea Ma Jou o Womaha woboaino de walufungu ona homoi-homoiika. De ahao ka itodokanino ona gea yotemo-temo de o demo utuinoli abe ma dihirainohi de ko ihiorikuahi, de nagali abe ka idadi yahikodoku Ma Jou ai hingahu ma demo o nyawaika. De ma hiakunino gea de Ma Jou wahitaana abe ona yagou-goungu yamakeoka Ma Jou o Womaha onangika.

⁷ De ona gea o nau-nauru abe ngade-ngade yangimoi de yahinooto manga ngoe.

O Paulusu o Abari ma Rorahai wahikodoku de o heheranga wotobadiai o Efesusoka

⁸ De o Paulusu una ai mede hangeino de una ka ihikaika woiki o Yahudi ma nyawa manga dodotoko ma tauika la wahingahu de wahigaro onangika abe ma titi hokokia Ma Jou wahikoano ai nyawaika. De ma oraha gea una duru wahingahu de ai domoroini onangika la wato yongaku ai demoika.

⁹ Masara naga o nyawa yamuruono naga genangoka abe ka yaoluku ai demoika de duru yalawana nanga Baluhu ai dodotoko ma ngekomika hiadono o nyawa manga hima-himangoka de ona ihitipokouku Ma Jouika ma ngekomo gea. Ho mangale ma titi manga lawana gea ho o Paulusu wanoaika manga dodotoko ma tau la wodoto-dotoko o ngi moiokali. De naga manga ngoe abe iwingaku-ngakuoka onangoo yanoaika manga dodiawo la yomakiniiki de de o Paulusu. De naga ma kotaka gea o tau moi ma amoko abe ka idadi o nyawa manga ngoe yomatoomuino genangoka de yotoihene o nyawa manga dodotokika. De ma tau gea ma dutu ai romanga o Tiranusu. Ho o Paulusu una o wange-wangeiye wahikodoku o Abari ma Rorahai o nyawaika o Tiranusu ai tau ma amokoka, de ka idadi o nyawa yomakeleha de yomakoketemo de de una ma titi ai dodotoko onangika.

¹⁰ De hokogea ka ihikaika wotobadoto-dotoko de wahikodoku Ma Jou ai Demo-demo o nyawaika abe ai dekana o taongo hinootoino. Ho o nyawa abe o Asia ma tonakoka gea yogogere, ngaro o Yahudi ma nyawa de ngaro ona ko o Yahudi ma nyawaua, masara ona ko manga ngoe ka idadi yoihene nanga Baluhu idodutu ai abari ma titi o Paulusu ai demoino.

¹¹ De ma oraha gea de Ma Jou duru wihiakunu o Paulusika la ka idadi o heheranga ma ngoe wotobadiai.

¹² Abe hiadono o nyawa yaoino manga gahauku ma gegehe eko manga ngoere ma belaka moi la gea ena iwihiso o Paulusu ai badangino. De ma ngoere gea iwihiso ipahaino de ahao ka idadi yao manga dodiawoika abe yopopanyakeuku eko yakitokata de yagelenga manga badanguku. De gea ka de yagelengauku de yokokitogumoka manga kangelaino, de abe naga de manga tokatoka gea imatitokoka onangino!

^13-14 De ma moiukuoli naga o Yahudi ma nyawa o doomu moi abe ona yotagi-tagi yotulu-tulu o kapo-kapongika la o nyawa onagona dika yakitokata de ona yaditoko hiadono ma tokata iloaroka. Abe ona ma doomuoka gea o ria-dodoto yatumidi, de to ona manga baba o hidemo ma nyawa wokurutiye Ma Jouika abe ai romanga o Sekewa. De ona gea yoihenino ma titi o Paulusu ai datoro ho onangoo ato ihitaili abe yapake nanga Baluhu o Yesusu ai romanga ma oraha yahititoko o tokata o nyawaino. Ho ona gea yahuloko o tokatika de manga demo hokonaa, “Ngohi naa tonihuloko de tapake o Yesusu ai romanga, abe Una gea o Paulusu ka ihikaika wifetongo de watobadotoko o nyawaika! Ho naa o Yesusu ai romanga tapake de tonihuloko la nohupuino de noaroka!”

¹⁵ De ma tokata gea yapaluhu onangika ato, “O Yesusu tihioriki, de o Paulusu to unangoo ai romanga tohioriki, masara nako ngini naa, ngini done onagona?”

¹⁶ De hokogea itemo de ahao una gea abe iwikitokata wabaatika onangika de duru wahikangela manga badangika hiadono wahikala ona mata-mataika. Ho ma bahauku de ona o ria-dodoto ma tauoka de yaino yoaroka de manga baju mata-mata akakihoka ho ngade-ngade de manga bululunokahi, de manga badanga duru ma odiri.

¹⁷ De manga ade-ade gea duru imataiti imahikokabarihi o Efesusu ma kota ma amokika, ho ngaro o Yahudi ma nyawa de ngaro ona ko o Yahudi ma nyawaua masara ona mata-mata yokokiihenoka. Ho ma kotaka gea de duru yokokihawanoka hiadono ma nyawa duru iwihoromati nanga Baluhu o Yesusu ai romangika.

¹⁸ De ona abe iwingaku-ngakuoka ona manga ngoe yomakokingaku manga gogianongoru manga hima-himangoka abe ma titi manga datoro ko itiaiua.

¹⁹ De o nyawa abe ma dihirainohi de o motaraa eko o wokuhu eko o dodiai o kia dika yotobadiai, ona gea yaoino manga buku mata-mata abe to ena ma dola manga dodiai ma hiaturu hokonaa de hokonaa ihitulihuku. De o nyawa manga hima-himangoka de yatufuku manga buku gea ho youku hiadono itinoka. De manga buku gea tanu duru de ma ijaka, abe nako hoka yafukunu gea o tiwi duru kohaamoko ka idadi yamake, abe imaketero de o nyawa manga karajaanga ma hewaino nako yokarajaanga o wange-wangeiye abe ma dekana ngade-ngade manga taongo o ratuhu moi de moruange.

²⁰ Ho ma oraha gea de ma abari abe ma titi nanga Baluhu idodutu duru imahikokabarihi ma amokika de duru ilaku o nyawa manga hiningaka ho manga ngoe iwingaku Unangika.

Ma Jou ai Gareja imahihora o Roma ma kotaika 19:21—28:31 O Efesusu ma nyawa yalawana o Paulusu ai dodotoko ma demoika

²¹ De ipahaino de o Paulusu womaputuhu ai hiningaka la ahao una kiani o Efesusu ma kota wanoaika de woikohi o Makedonia de o Akaya ma tonakika de ahao wogila-gila wolio o Yerusaleeme ma kotaika. De abe ai gogianongoru o Yerusaleemoka watutumu ipahaino de ahao duru woigo woiki o Roma ma kotaika.

²² De hokogea womaputuhoka ho una wahidingotohi ai dodiawo o Timotiusu de o Eratusu la ona yahinooto yohira o Makedonia ma tonakika, de ahao una wahidoduruino. De ona yahinooto wahidingotoka masara una ma hirete wato kiani womagoo-gogerohi o futu muruonohi dika abe genangoka o Asia ma tonakoka.

²³ Masara ma oraha gea abe ko wosobouahi de naga o kangela ma amoko idadi abe o Efesusu ma nyawa manga ngoe yalawana Ma Jou ai ngekomika.

²⁴ Abe naga womatengo wotobadiai o kiahonanga o haakaino, de ai romanga o Demetiriusu. De abe una gea wotobadiai de wotobafukunu o nyawaika, gea o haaka abe ma rupa hoka o pangao ma tau masara duru ieteke. Abe o Efesusu ma kotaka gea de manga ngoe yomahuba-huba manga pangao moiika abe ihiromanga ato, “Nanga Jou o ngo Aratemisi.” De mangale ma titi o nyawa manga ngoe yomaijaino ma pangao ma tau ma rupa ho o Demetiriusu una wahikarajaanga o nauru manga ngoe la ona mata-mata yotobadiai ma rupa gea o haakaino.

²⁵ Ho o wange moiuku de una wahokino ai dodiawo manga ngoe abe ona manga karajaanga hatoli ka imakadaene dika de to unangoli ai karajaanga. De watoomuinoka de watemo onangika wato, “Ahi gogianongoru, ngini nihioriki abe ngone mata-mata homatiwi-tiwi nanga karajaangino naa la ka idadi homahidailako nanga perelu nanga tau homoi-homoioka.

²⁶ De marai nihiorikoo abe naga womatengo o dionikino ma nyawa nanga kotaka naa abe ai romanga o Paulusu. De una gea duru wonahikangela nanga karajaangino. Angamoi una gea ma titi ai dodotoko ma demoino de wahigaro o nyawa ko manga ngoeoka wato o popangao gea tanu ko o jou ma gou-goungua angamoi o nyawa manga giamino de idadi! De hokogea idadi ko o Efesusu ma kotakaua dika masara nanga tonaka mata-mataika de o nyawa iwihigihene unangika gea!

²⁷ De ngohi naa ahi demo ma dumutu ko ma titiua to ngone nanga karajaangika dika, masara tohidifikiroo ma titi nanga jou o ngo Aratemisi gea! Angamoi igoungu ma titi o Paulusu dika hiadono naga utu abe ona ko iwaka manga horomati nanga jouika. De mangale ma titi gea ho nanga karajaanga ma hofoko o nyawa ko yomaijainokaua gea abe hotobadiai. De abe ma titi nanga jou o ngo Aratemisi muna gea duru mokokurutiye, de nanga tonaka naa o Asia ma tonaka ma amokika de homahuba-huba munangika. De ngaro o dunia ma amokika masara naga manga ngoe abe munangika yomahuba-huba. Ho ngohi tato duru hiokoo nako o nyawa ko imilegaikaua munangika de yoetongo to muna ami tau ato ko kia-kiaua! Angamoi gea ahao ami romanga awea-weara dika!” Hokogea o Demetiriusu ai demo onangika.

²⁸ De ai demo gea ai dodiawo yoihene de manga ngamo duru ifae, de ona mata-mata ka ma moi ihigali-gali yopoa-poaka ato, “O Efesusu nanga jou o ngo Aratemisi muna duru mokokurutiye!”

²⁹ De hokogea yopoa-poaka hiadono o nyawa manga ngoe yoboaino yomatoomuino la ato ihioriki o kia idadioka. De ko itedekanuahi de o kota ma nyawa gea ona mata-mata duru yolilifangoka angamoi ko ihiorikuahi ma titi. De ahao ona mata-mata yomataiti yoiki o kota ma dodoomu ma amoko ma ngiika. De utu naga abe yataokino o Paulusu ai dodiawo yahinooto o Gayusu de o Arisitarakusu. Abe ona yahinooto ma dihiraino de yomakiniiki de o Paulusu ma oraha una o Makedonia ma tonakoka de aino woboa.

³⁰ De o Paulusu wamake abe hokokia idadi de una woigo wato wowohama ma kota ma dodoomu ma ngiika, masara ai gogianongoru o ngongakuoka ona ko iwihigunoaua ato done iwibodito.

³¹ De o popareta ma nyawa yamuruono naga abe yomaketedodiawo de o Paulusu, onangoo duru ko yoigoua la una wowohamika, ho iwihurata unangika de yahuloko manga nyawa la manga hurata yomataiti iwidotaka. De manga hurata ma dolaka iwihibehehongo ato, “Ngomi duru minihitiari la ufa nowohama ma dodoomu ma ngiika angamoi gea done imaketero abe hoka ani wowango nahidoakika dika onangika.”

³² De doka o dodoomu ma ngi ma goronaka de ma nyawa mata-mata yopoa-poaka, masara manga demo ko imakiniikua angamoi utu hokonaa manga demo ma dumutu, de utuoli manga demo ma dumutu moiikali. Ho ona duru yolilifangoka. De hiadono naga manga ngoe genangoka abe duru ko ihiorikuahi ma titi o kia hiadono yomatoomuino!

³³ De naga womatengo o Yahudi ma nyawa genangoka abe ai romanga o Alesandere. De ai dodiawo yamuruono naga iwihuloko la una womaokoino o nyawa manga ngoe gea manga hima-himangoka la wahitararono onangika abe hokokia idadioka. Ho una woaguru de wataere de ai giama la o nyawa yomarii-riidohi de iwitotoihene unangika.

³⁴ Masara ipahaino abe ma nyawa iwihioriki una o Yahudi ma nyawa de ka yoluku yoihene ai demoika ho ihigali-galioli yopoa-poaka abe manga demo imaketero hoka ma dihirainoli. De gea o takoro hinootoino abe ona ka ihikaika yopoa-poaka ato, “O Efesusu nanga jou o ngo Aratemisi muna duru mokokurutiye! O Efesusu nanga jou o ngo Aratemisi muna duru mokokurutiye!” Ka hokogea dika ihigali-gali manga demo.

³⁵ De ipahaino de ka idadi manga kota ma hihira wahiriidi la watemo onangika. De una wotemo wato, “Ahi gogianongoru o Efesusu ma kokawaaha! O dunia ma nyawa mata-mata inahioriki abe ngone o Efesusu ma nyawa ngone hodadioka nanga jou o ngo Aratemisi ami tau ma gogoana. De ngaro to muna ami rupa abe ma dodihiraka de iotakuku o Horogaka de auku ngoneuku, masara enangoo ngone naa hotobagoa-goana nanga kotaka naa!

³⁶ De mangale ma titi o nyawa ko moiua ka idadi ihikala nanga demo gea ho ngini ngaro ufa dika de nia hininga ipusingi ma titi o nyawa utu manga demoika. De ufa hiadono ngini nidiai moi abe ko niafikirikaua ho duru ibodo ma datoro gea.

³⁷ Abeika nimafikirohi nia datoro naa. Angamoi ngini niataokino o nau-nauru naa nanga himangoka ma titi nia hininga ma ngamoino dika, masara done manga howono o kia? Abe ona ko yotohikua nanga jou ami tauino, de ko iwa manga demo yotemoka abe imingelo munangika.

³⁸ Ho ngohi tato nako nanga gianongoru o Demetiriusu de ai dodiawo naga manga dadae ma demo ma gou-goungu abe ato yatae onangika, gea ahao kiani yaoika o hiurusu ma ngiika la ona ahao yatailako manga howono de hiadono yamake manga putuhu sarakia.

³⁹ De nako naga nia gurubungu utuoli, gea kiani nianiiki nanga pareta ma hiaturu abe kiani homatoomuino nanga kota ma hohidimono mata-mata manga hima-himangoka la haniiki itiai ma pareta.

⁴⁰ Masara nako hokonaa dika hodiai gea tanu homahikangela dika, angamoi o Roma ma popareta ona ka idadi inatae ngoneino ato o huruhara hodiaioka, angamoi nanga dodoomu naa tanu ko iwa ma titi abe itararono. De nako ona o Romaka ato kiani ngone homahitararono, gea ahao done sarakia hotemo la homademo?”

⁴¹ Hokogea manga kota ma hihira ai demo onangika, ho wotemo ibooto de ahao wahuloko la ona mata-mata yokokilio manga tau homoi-homoiika.