Hidingoto 18 - Ma Jou ai Demo-demo o Totobelohoka

O Paulusu o Abari ma Rorahai wahikodoku o Korintusu ma kotaika

¹ De ipahainoli de o Atena ma kotaka de wosobo o Paulusu de wotagi-tagi o Korintusu ma kotaika.

² De o Korintusoka naga o Yahudi ma nyawa womatengo abe ai romanga o Akila. De una gea womaboa o Pontusu ma tonakoka masara ipahaino de wogogere o Italia ma tonakoka. De o Akila una woilakoka ho ngoi fekata ami romanga o ngo Pirisikila. De ona yahinooto naa ma duru de yakiniiki o Italia ma tonakoka de yaino angamoi o Roma manga koano wahulokoka wato kiani o Yahudi ma nyawa mata-mata yakokinoaika o Roma ma kotaka de yoiki o tonaka utuika. De ma oraha gea manga koano o Romaka ai romanga o Kalaudiusu. Ho o Paulusu de o Akila de ngoi fekata o ngo Pirisikila ona yomakamake o Korintusu ma kotaka.

³ De ipahaino de o Paulusu womanoa onangoka de yomakuduhunu manga karajaangoka, angamoi ngaro o Paulusu de ngaro ona yahinooto masara ona mata-mata manga karajaanga o hijai-jai ma tau yotobadiai o ngoerino.

⁴ De o Hiaini ma wange ma getongo de o Paulusu naga o Yahudi ma nyawa manga dodotoko ma tauoka angamoi una ka ihikaika wahigaro onangika la iwingaku o Yesusika. De ma doomuoka gea naga o Yahudi ma nyawa de onangoo ko o Yahudi ma nyawaua abe wahikokigaro onangika ma titi o Yesusu.

⁵ De ipahaino de o Silasa de o Timotiusu ona o Makedonia ma tonakoka de aino yomahiadono o Korintusu ma kotaino. De ona yomahiadonoka de ahao o Paulusu wanoaika ai karajaanga abe o hijai-jai ma tau wotobadiai la o Abari ma Rorahai enangoli ka ihikaika wahingahu-ngahu o Yahudi ma nyawaika. Abe una wato, “Ngohi naa tagou-goungu tinihingahu ma titi Ma Jou ai Mesia abe ma dodihirainohi niwidodamaa, Una gea o Yesusu!”

⁶ Masara o Yahudi ma nyawa manga ngoe ka yoluku dika ai demoika de iwihitipokouku o Paulusika, ho una ai baju ma guru-gurutuku wafureere la ma kuhuhunu irerouku. De gea wotemo wato, “Ngini naa ahao niamake nia hohowono nginika, de gea idadioka ti ngini dika nia tagongo de ko to ngohiokaua! De nako ngohi, mangale ma titi ngini niaolukoka ho ma oraha naa de imahikaika de ngohi ahao tahingahu-ngahu o Abari ma Rorahai onangika abe ko o Yahudi ma nyawaikaua!”

⁷ De o Paulusu wanoaika ona ma dodotoko ma tauoka de woiki wowohama o nyawa manga tauika abe duru ma dodotoko ma tau ma datekoka. Abe ma tau gea ma dutu una ai romanga o Titiusu Yustusu, abe una ko o Yahudi ma nyawaua masara ma dihirainohi de womahuba-huba Ma Jouika. Ho o Paulusu woiki ai tauika la genangokali ka idadi wadoto-dotoko de wahigaro o nyawaika ma titi o Abari ma Rorahai.

⁸ De ahao naga womatengo abe una wodadi o Yahudioka manga dodotoko ma tau ma hihira, de una ai romanga o Kiripusu. De una woihene o Paulusu ai demoino de ahao wingaku o Yesusika. De ipahaino de to una ai tau ma goronaka onangoo mata-mata iwingaku nanga Baluhu idodutuika. De naga utuoli yowoe o Korintusu ma kotaka gea abe iwingaku o Yesusika de ipahaino ahao ona mata-mata yomaohiki.

^9-10 De o futu moiuku nanga Baluhu idodutu wahimatoko moi o Paulusika de ma himatoko ma goronaka de witemo wato, “Ngona ufa namodongo o nyawaika masara kiani nogila-gila nahingahu-ngahu o nyawaika ma titi ahi abari, de ufa nanoaika angamoi Ngohi naga de de ngona. De ahao ko iwa abe inihikangela ani badangika nenangoka, angamoi naga ko manga ngoe to Ngohi ahi nyawa ma kotaka naa.”

¹¹ Hokogea nanga Baluhu ai demo o Paulusika, ho una ka womagoo-gogerohi o Korintusu ma kotaka abe o taongo moi de ma honongahi ai dekana. De ka ihikaika una watobadoto-dotoko Ma Jou ai Demo-demoino genangoka.

¹² De ipahainoli de naga womatengo ai romanga o Galio abe iwigoraka la wodadi o Akaya ma tonaka ma gubernuuru. Abe o Korintusu ma kota gea imanoa o Akaya ma tonakoka. De ma oraha gea naga o Yahudi ma nyawa yamuruono naga yomakuduhunu abe iwihidee o Paulusika la iwitaoko de iwiurusu o Roma ma poparetaka. Ho ona iwitaoko o Paulusu de iwiao ma gubernuuru ai himangoka.

¹³ De ahao iwitae unangika ato, “Una naa ka ihikaika wahigaro o nyawaika la yomahuba-huba Ma Jouika. Masara abe o nyawa yomahuba-huba Ma Jouika gea ma hiaturu imakalawana de to ngone nanga pareta, ho una watilakuroka ma pareta de kiani iwihohowono!”

¹⁴ Hokogea iwitae o Paulusika de ahao una woigo womademo masara ka de ai uru wofelenga la wotemo de ma gubernuuru o Galio watoaka ai demo ho wotemo o Yahudi ma nyawaika abe iwitae-tae o Paulusika. De una wotemo wato, “Abeika ngini nitotoihene ahi demoino naa. Nako hoka ngini niwitae unangika abe niato una watilakuru o Roma ma pareta eko wodiaioka o datoro ma dorou, gea de ahao ka idadi tinihigihene.

¹⁵ Masara nia dadae ma demo naa tanu ma dumutu ti ngini o Yahudi ma nyawa dika nia paretaika abe ihititi nia dodotoko ma demoino de nia roma-romangino, ho ko imakadaenua de o Roma ma pareta. Ho mangale ma titi gea ho ngohi toluku toputuhu onagona nginioka manga demo yagoungu de onagona ko yagoungua! De koaho ngini ma hirete nimaputuhu ma titi nia pareta gea!”

¹⁶ De hokogea ai demo de ahao wahuloko ai nyawaika la ona mata-mata yaduhu unangoka de aino.

¹⁷ Masara ka itodokanino de o nyawa manga ngoe gea iwitaoko o Yahudi ma nyawa manga dodotoko ma tau ma hihira womatengo abe ai romanga o Sosetenese. De iwitaokino de ahao iwipoha-poha unangika duru o Galio ai himangoka, masara ma gubernuuru gea ko wilegaikaua ho ko wopusingua.

O Paulusu wolioli o Antiokia ma kotaino

¹⁸ De abe o Paulusu womaokoino ma gubernuuru ai himangoka gea de hatoli ma dekanohi ipahaikahi de ahao o Korintusu ma kotaka de wosobo. Ho una womahilooakahi ai gogianongoruika de ahao wohupu ma dowongioko o Kenekerea ma kotaoko. De ma kotaka gea de o Paulusu ai tadauru wagutioka angamoi wohingodumoka ai behehongo moi Ma Jouika. De hokogea ma dodunguu yotobadiai la o nyawa ihioriki abe manga behehongo ihingodumoka. De ai tadauru wagutioka de ahao wofarene o kapa moi abe ihidumutu o Siria ma tonakika. De ai dodiawo o ngo Pirisikila de ami rokata o Akila onangoo yomakiniiki de de una.

¹⁹ De ipahaino abe ma kapa imahiadono o Efesusu ma kotaika de o Paulusu yomakitingaka de ai dodiawo o giabereki moi gea. Abe una ai futu muruono dika genangoka masara ona yahinooto yomanoa manga dekana o Efesusoka. Masara o Paulusu ko wosobouahi de woikohi o Yahudi ma nyawa manga dodotoko ma tauika la ka idadi yomakoketemo de wahigaro onangika ma titi o Abari ma Rorahai.

^20-21 De ona genangoka yogahoko unangika la ngarouahi wosobo, masara una woluku de wahingahu onangika wato, “Ahao ma moioli tinigilio tinitutumu ngini nenangoka, iti abe imakiniiki de Ma Jou ai mau.” De ahao una womahilooa onangika de wofarenoli ma kapa ho o Efesusu ma kotaka de wosobo.

²² De manga kapaka gea yohidete hiadono o Kaisarea ma kotaiha yomahiadoniha o Isiraele ma tonakoka. De o Paulusu wouti ma dudungiha de ahao wotagi-tagi o Yerusaleeme ma kotaiye la watutumohi ai gogianongoru o gareja ma nyawa genangoka. De watutumu ipahaino de ahao wolioli ai dingiino o Antiokia ma kotaino abe o Siria ma tonakoka.

O Paulusu ai dodagi ma hange abe wahingahu-ngahu o Abari ma Rorahai 18:23—21:17 O Paulusu wahiputurungu ai gogianongoruika o Galatia de o Firigia ma tonakoka

²³ De o Paulusu una hatoli ai dekana o Antiokia ma kotaka la watutumu ai gogianongoru genangoka, de ahao wosobokali wotagi-tagi o Galatia de o Firigia ma tonakika. Abe ma tonakoka gea de una wadulu-dulu ai gogianongoruika la wahigaro de wahiputurungu nanga Baluhika la ka idadi manga ngongaku ifero Unangika.

O Apoloso iwidotoko de ahao woiki o Korintusika la wahiputurungu onangika

²⁴ De ma oraha gea naga womatengo o Yahudi ma nyawa abe ai romanga o Apoloso de una ahao gea womahiadono o Efesusu ma kotaino. De una gea o Alesandaria ma kotaka ma nyawa, abe ma kota gea imanoa o Mesiiri ma tonakoka. De una duru ma ngoe womadotoko Ma Jou ai Demo-demoino, de naga ai hiakunu la duru wososawaro wotemo-temo o nyawaika.

²⁵ Abe una ma dihiraino de iwidotokoka nanga Baluhu ai dodotoko ho ipahaino de una duru womagawe wahingahu-ngahu o nyawaika ma titi o Yesusu, de ai hingahu ma demoino de duru itaana ho duru igoungu ai demo mata-mata. Masara nagahi ma kuranga ai demoino, angamoi una ahao woihene ma titi o Yohanese ai dodotoko ma demo abe ma dihiraino de watobadotoko o nyawaika ma oraha waohi-ohiki onangika, ho o Apoloso ai tobahioriki genangokahi dika aika.

²⁶ Ho ipahaino de ma oraha o Apoloso womahiadono o Efesusu ma kotaino de woiki o Yahudi ma nyawa manga dodotoko ma tauika de wadoto-dotoko genangoka, de wodotoko gea duru de ai magaweoka. De naga genangoka o ngo Pirisikila de ami rokata o Akila, de ona yotoihene ai demoika de ipaha iwiahoko la ka idadi ona yaruange dika yomakoketemo, de ahao ona yahinooto duru ihidodiai iwihitararonoli unangika ma titi Ma Jou ai dodotoko ma demo abe hatoli ingodumu la unangoo ka idadi wohioriki.

²⁷ De ipaha o Apoloso naga ai hininga la woiki o Akaya ma tonakika, de ai gogianongoru o Efesusu ma kotaka onangoo yosanangi ma titi ai hidee gea. Ho ona yotulihi o hingaku ma hurata o Akaya ma nyawaika abe gea ma dolaka de yahigaro onangika la ahao iwidafongo irahai manga gianongoru o Apoloso. De ahao una o Efesusoka wosobo de woiki o Akaya ma tonakika. De abe womahiadono genangika de una duru wahiutumu de waduhunu ai gogianongoru o ngongakuoka, abe ona ma dihiraino ka idadi iwingaku o Yesusika mangale ma titi Ma Jou ai hidoaka ma owa wahidoaka onangika.

²⁸ Masara nagali genangoka o Yahudi ma nyawa yamuruono naga, de ona de o Apoloso yomaketeliliara o nyawa manga hima-himangoka abe ma titi Ma Jou ai hininga, de gea o Apoloso duru wahikala ona mata-mataika. Abe una ka ihikaika ai demo wohititi Ma Jou ai Demo-demoino abe ma oraha wahitararono o nyawaika wato, “Ngohi naa tagou-goungu tinihingahu ma titi Ma Jou ai Mesia abe ma dodihirainohi niwidodamaa, Una gea o Yesusu!”