Hidingoto 17 - Ma Jou ai Demo-demo o Totobelohoka

O Paulusu o Abari ma Rorahai wahikodoku o Tesalonika ma kotaka

¹ De o Filiipi ma kota yanoaika de ahao o Paulusu de ai dodiawo ona yotagi-tagi de yatilakuru o Amafipolisi ma kota de ahao o Apolonia ma kota de yogila-gila ka hiadono o Tesalonika ma kotaika yomahiadono. De ma kotaka gea naga o Yahudi ma nyawa manga dodotoko ma tau.

² De abe hoka o Paulusu ai biaha, una watobaniiki manga doomu o Hiaini ma wangeoka. De gea o Hiaini ma wange ma getongo waniiki abe o minggu hangeino. Abe ma doomu hange gea homoi-homoioka de una wahigaro de wahitararono onangika ma titi Ma Jou ai Demo-demoino.

³ De ai higaro ma demo ma goronaka de wahitararono onangika ma titi hokokia Ma Jou ai uru ma dodofanga duru ma dodihirainohi de inahingahuokau abe kiani Ma Jou ai Mesia iwihikokangela de iwihohonenge, de hiadono iwihimomikoli ai honengoka de aino. Abe wohidotoomuino ai demo onangika wato, “O Yesusu abe naa tinihingahu-ngahu nginika, Una gea Ma Jou ai Mesia!”

⁴ De o nyawa utu ma doomuoka gea iwihigihene de yongaku ai demoika ho yodadi o ngongaku ma nyawa. Abe naga o Yunanioka ma nauru manga ngoe abe ma dihiraino yomahuba-huba Ma Jouika. De nagali o ngo-ngofeka yamuruono naga abe manga gogere hatoli ikurutiye manga kotaka gea.

⁵ Masara o Yahudi ma nyawa manga hihira genangoka ona yataleana onangika, ho yatoomuino o nyawa ma dorou yamuruono naga o kota ma ngekomo ma date-datekino de yadotoko onangika la o huruhara yodiai ma kotaka. Ho o nyawa ma dorou gea onangoli yatoomuino de yahigaro o nyawa utuika hiadono ko manga ngoe yomakuduhunu yodiai o huruhara genangoka. De manga ngoe gea yangika o Yasono ai tauika angamoi ona ato bote o Paulusu de o Silasa naga ai tauoka gea, de yahideeoka la yataokino ona yahinooto de yaliara o nyawa manga ngoe manga hidogoronaka la yahikangela onangika.

⁶ Masara ona yahinooto ko yaiwa ma tauoka gea, ho ma nyawa yataokino o Yasono de ai gogianongoru o ngongakuoka yamuruono naga de yahihupu manga tauino de yaoika o kota ma hohidimono manga doomuika. De yomahiadono ma doomuika de yatae onangika ato, “O Paulusu de o Silasa ngade-ngade o dunia ma amokika de o nyawa mata-mata manga hininga yahikapusakoka, ho naa yoboainoka to ngone nanga kotaino la ngoneoli inahikapusaka!

⁷ De o Yasono naa una wahokino ona yahinooto la yomanoa to una ai tauoka! Ho ona mata-mata manga doomuino de yatotilakuroka nanga koano o Romaka ai pareta, angamoi ona ka ihikaika yomahuba-huba womatengoikali abe iwihiromanga manga koano o Yesusu.”

⁸ De o kotaka gea de ngaro o kokawaaha de ngaro manga hohidimono masara ona mata-mata duru yopusingi, de utu hiadono yongamo, abe ma oraha yoihene manga dadae ma demo gea.

⁹ De ipahaino abe o Yasono wofangu ma hohowono ma bobangu gea de ahao ma kota ma hohidimono yahihupuika o Yasono de ai gogianongoru la ka idadi yolio dika manga tau-tauika.

O Paulusu de o Silasa o Abari ma Rorahai yahikodoku o Berea ma kotaka

¹⁰ De mangale ma titi ma kangela gea abe yaohana o Tesalonika ma kotaka ho ma futu gea dika de ona yongaku-ngakuoka yahidingoto o Paulusu de o Silasa la manga kotaka yanoaika de yoiki o Berea ma kotaika. De ona yomahiadono o Bereaika de yoiki o Yahudi ma nyawa manga dodotoko ma tauika.

¹¹ De o Berea ma nyawa gea yototoihene manga hingahu ma demoika. Abe nako o Berea ma nyawa de o Tesalonika ma nyawa, masara ka o Berea ma nyawahi abe yosanangi yotoihene de yodafongo manga demo gea. De o wange-wangeiye ona yotoihene ipahaino de ahao yolingi-lingiri Ma Jou ai Demo-demoka la ihioriki nako o Paulusu de o Silasa manga dodotoko ma demoino de gea yagou-goungu eko koua.

¹² De mangale ma titi manga dodotoko gea ho o Yahudi ma nyawa ko manga ngoe iwingaku o Yesusika. De nagali o Yunanioka ma ngo-ngofeka abe manga gogere ma kotaka gea hatoli ikokurutiye, de o nau-nauru yamuruono naga, de onangoo iwingaku Unangika ma titi manga dodotokino o Paulusu de o Silasa.

¹³ Masara ipahaino de ma abari gea imahiadono o Tesalonika ma kotaika ho o Yahudi ma nyawa genangoka yoihene abe o Paulusu naga o Berea ma kotaka de una ka ihikaika wahikodoku Ma Jou ai Demo-demo onangika. De gea yoihenino ho abe yamuruono naga yoboa o Tesalonikaka de aino o Bereaino la ato yahigaro ma nyawa genangoka la iwihikangela o Paulusika.

¹⁴ De ona yomahiadono de yahigaro manga dodiawoika, masara abe iwingaku-ngakuoka ona yoihene abe ma titi to ona manga hidee gea. Ho ka de yoihene de iwihuloko o Paulusika la wanoaika ho iwihidingoto dai ma dowongioko. Masara nako o Silasa de o Timotiusu ona ka yogoo-gogerohi ma kotaka ho ko iwiniikuahi.

¹⁵ De naga manga gogianongoru yamuruono naga abe yomakiniiki de iwigoa-goana o Paulusu ai dodagioka, ho ona yomakiniiki de de una ka hiadono o Atena ma kotaoko. De ona yomahiadonoko de ahao o Paulusu wahuloko onangika la ai demo yadofanga o Silasa de o Timotiusika, abe una wabehehongo onangika la yomataiti yoboa o Atena ma kotaino la genangoka ka idadi yomakamakeoli. Ho ai gogianongoru gea yosoboka de yolio o Berea manga kotaiha.

O Paulusu o Abari ma Rorahai wahikodoku o Atena ma nyawaika

¹⁶ De ma oraha gea o Paulusu naga o Atena ma kotaka de wadodamaa ai dodiawo abe iwihidoduruino o Berea ma kotaka de yaino. De abe ma oraha wadodamaa de una wotagi-tagi o Atena ma kota ma goronaka de womalega-lega abe manga popangaoika, angamoi ngaro o kiaika dika woiki masara naga manga pangao genangoka. De gea wamake ho duru ai hininga ihuha.

¹⁷ De o Paulusu una ka ihikaika wowohama o Yahudi ma nyawa manga dodotoko ma tauika la yomakoketemo de wahigaro onangika ma titi o Abari ma Rorahai. Abe ngaro o Yahudi ma nyawa de ngaro ona ko o Yahudi ma nyawaua abe iwihoromati Ma Jouika, masara una duru wahigaro ona mata-mataika ma titi ai demoino la wato iwingaku o Yesusika. De o wange-wangeiye una woiki o kota ma gogoronaka abe genangoka o nyawa yomatoo-toomuino la onangikaoo wahikodoku o Abari ma Rorahai.

¹⁸ De naga o Atena ma kotaka o doomu hinooto abe ona duru yoigo yomakodotoko de yomakoketemo abe ma titi nanga wowango ma dumutu koaho hokokia, masara ma doomu hinooto gea ko yomaketehiningamoiua manga hininga. Abe ma doomu moi yahiromanga o Epikuroso ma doomu ma nyawa de abe moioli yahiromanga onangika ato o Satoa ma doomu. De o wange moiukuoli de naga o kota ma gogoronaka gea yamuruono naga abe yatobaniiki ma doomu hinooto gea, ho o Paulusu de ona yomakoketemo de wahingahu onangika ma titi o Yesusu de abe Una womomikoka ai honengino. De ona yoihene ai demo gea de yomakoketemo ato, “Una naa marai duru wobodo angamoi naga ai hininga duru o fara moi ma titi o wowango ma dumutu.” De utu manga dodiawoino ato, “Una gea woigo wonahigaro la o homoa ma nyawa manga jou haniiki.”

¹⁹ De ahao ona gea iwiao o Paulusu abe manga hohidimono ma doomuika la ahao manga hohidimono ona ka idadi yoihene ai hingahu ma demoika de yomaputuhu la nako yosanangi ai demoika eko koua. Abe ona gea iwitemo unangika ato, “Abeika nominiiki mia doomuika de nomihingahu ngomi mata-mataino abe ma titi ani dodotoko ma hungi naa.

²⁰ Angamoi ani dodotokino de naga ani demo abe imitodokana ho ngomi mioigo la ngona nohidodiai nomihitararono ani dodotoko gea ngomino.”

²¹ De hokogea iwihigaro o Paulusika angamoi o Atena ma nyawa de ngaro ona abe o homoaino yoboa de yomadioniki o Atenoka masara ona mata-mata duru yoigo la yomatoo-toomuino de yomakoketemo abe ma titi o abari eko o dodotoko o kia dika naga abe yoihenino. De gea ngade-ngade o wange-wangeiye ka gea dika yotobadiai ho manga karajaanga utu ko iwa.

^22-23 Ho ona yomahiadonoka manga dodoomu ma ngiika de o Paulusu womaokoino manga hima-himangoka de wotemo wato, “Ahi balu-baluhu o Atena ma nyawa, ngohi nengokadauinohi de naga o dodunguu ma ngoe tamake nia kotaka naa abe genangino de ka idadi tinihioriki ma titi nia hininga ma dumutu sarakia. De gea abe ma oraha totagi-tagi ani kota ma goronaino de tamake abe naga ma ngoe nia popangao ma ngi, ho genangino de ka idadi tinihioriki abe ngini duru nisanangi nimahuba-huba o jou-jouika. De ma moiuku de tamake nia pangao ma ngi moi abe naga ma dulihi o pangao dau ma timino. De gea ma demo ato, ‘Nenangoka homahuba-huba de homahijou o jouika abe ma romanga ko hohiorikuahi.’ Hokogea ihitulihika ho tohioriki abe ka ma dihirainohi de nimahijou enangika gea. De ngaro ma dihirainohi de ko niwihiorikuahi, masara ma oraha naa naga de duru toigo tinihingahu abe Una gea sarakia la ka idadi ngini niwihioriki Unangika.”

²⁴ “De Una gea Ma Jou abe wotobatulaada o dunia naa de ma dola mata-mata. De Una nanga Baluhu idodutu abe wohipareta mata-mataika abe o dihangoka de o duniauku naa. De mangale Una wohipareta mata-mataika ho Una ngaro ufa dika de wogogere o tauoka abe ngone o nyawa hodiai de nanga giama.

²⁵ De ngone ko idadiua hihidailako to Una ai perelu ma titi hileleani de nanga giamino, angamoi Una gea ko iwa ai perelu! Masara Una ma hirete abe wahidoaka o wowango mata-mataika abe iwango, de ngaro ma womaha, ma gea mata-mata ka Unangoka dika de aino iboa. Ho ka Una dika wohidailako o dunia naa ma perelu mata-mataika.

²⁶ De Una duru ma dodihiraka de witulaada o nyawa womatengo, de ipahaino de o nyawa de o dutu mata-mataika o dunia ma amokika de wonatulaada abe womatengoino gea. De ma dodihiraka gea de womaputuhokau abe ahao ma nyawa de ma dutu o kiaka wagorakiye la naga to ona manga kuaha o nyawa utuika, de abe o kiaka wahiguti la manga kuaha ko iwaka. De ngaro o nyawa manga tonaka ma batingi homoi-homoi ma gea mata-mata ko idadiuahi de Una wohiaturokau.”

²⁷ De o Paulusu wogila-gila wahigaro onangika wato, “De gea ma titi o kia hiadono hokogea Ma Jou mata-mata wohiaturu? Gea ma titi la ngone hohioriki abe hiperelu Unangika. Abe Una woigo wato o dutu amomoiino ma nyawa duru iwilingiri Ma Jou de manga hininga duru ma gahumu la iti iwimake Unangika. De ngaro hokogea totemo masara tanu Una gea ko ihuhaua himake angamoi homakitingaka ko ikurutikaua ngone de Ma Jou.

²⁸ De ngohi ka idadi totemo abe Una ko wokurutikaua angamoi ngone homoi-homoi nanga wowango ma titi gea Unangoka de aino. De ngaro abe ngone ka idadi nanga badanga ma kiahonanga hohikelu-kelu masara enangoo ma titi Unangino dika. De nako ko Unangua, ngoneoo ko inaiwa, ho mata-mata abe naga ngoneoka gea ihititi ka Unangoka dika de aino.” “De ahi demo gea imakiniiki de ti ngini o Yunani ma nyawa nia gianongoru womatengo ai demoli. Abe ma dihiraino una gea wotemo wato, ‘Ngone mata-mata to Ma Jou ai ngofa-ngofaka.’

²⁹ De ai demoino gea wagoungu abe ngone to Una ai ngofa-ngofaka. Ho koaho ufa ngone homadiai o pangao ma rupa abe o gurasi eko o haaka eko o hakaruino de ahao hohiromanga enangika hato ena gea Ma Jou ai rupa. Angamoi to Una ai rupa duru hokogenangua! De ma pangao gea ma rupa idadi o nyawa dika manga hiningaka de aino de hiadono yodiai ma titi manga giama ma hiakunino, ho duru ko igou-goungua imakiniiki de Ma Jou ai hininga.”

³⁰ “De ma dodihirainohi de igoungu o nyawa manga ngoe-ngoe ko iwihiorikua ma titi Ma Jou, ho Una womaputuhu la ko wolegaikauahi manga hirehene ma hiningaika. Masara ma oraha naa de imahikaika de Una wahuloko o nyawa mata-mataika la yokokiporete manga popangaoika de yomangali la Unangikali iwinii-niiki.

³¹ Angamoi to Una ai gahe wogelengaka abe nako ma oraha gea adonoka de ahao ngone o dunia ma nyawa mata-mataika nanga wowango ma datoro watailako abe wapake to Una ai totiaiino. De Una wiirikoka ma nauru womatengo abe ahao Una wonatailako nanga datoro. Abe wiirikoka de ipahaino Ma Jou wihimomiki ai honengino la wowangokali. De gea wihimomiki la ai momomiki gea idadi o dodunguu ngoneino la duru hihioriki abe Una gea naga de ai kuahaka la ahao wonatailako ngone homoi-homoi nanga datoro.” Hokogea o Paulusu ai demo.

³² De abe ma oraha o Paulusu wahingahu onangika ma titi naga o nyawa yohonengoka masara ipahaino de yomomiki manga honengino de naga utu abe iwigogiete angamoi yoluku o momomiki ma dodotokino. Masara naga utuoli abe iwitemo ato, “Ahao ngomi mioigo la utuohi nomihitararono ma titi ani dodotoko naa.”

³³ De hokogea o Paulusu ai demo manga doomuika ma wange gea, ho wotemo ipaha de una wosoboka.

³⁴ De naga o nauru yamuruono naga onangino abe yomahidutuku o Paulusika de yodadi o gogianongoru o ngongakuoka. Abe manga hidimono manga doomuoka womatengo ai romanga o Dionisiusu wingaku, de naga ai dodiawo utuoli abe onangoo iwingaku. De nagali o ngofeka momatengo munangoo mingaku o Yesusika, abe muna ami romanga o ngo Damarisi.