Hidingoto 16 - Ma Jou ai Demo-demo o Totobelohoka

O Paulusu ona yogilio o Derebe de o Lisitira ma kapongika

¹ De o Paulusu de o Silasa yosoboka manga dodagioka de ihira yoiki o Derebe ma kapongika de ipahaino ahao yogila-gila o Lisitira ma kapongika. De genangoka naga womatengo wingaku-ngaku abe ngoi meme o Yahudi ma nyawa abe munangoo mingakuoka o Yesusika, masara ai baba una gea o Yunanioka ma nyawa. De to una ai romanga o Timotiusu.

² De nanga gogianongoru o ngongakuoka abe yogogere o Lisitira de o Ikoniumu ma kapongoka, ona mata-mata manga hininga duru iwisanangi o Timotiusika.

³ De ahao una yomakamake de o Paulusu, de ipahaino o Paulusu wogahoko la o Timotiusu waniiki onangika la ona yaruange ka idadi yomakiniiki manga dodagi ma goronaka. De o Timotiusu wohimoteke ai hininga ho womahidiai la wosobo waniiki. Masara ko yosobouahi de o Paulusu wohiaturu la o Timotiusu womahunahi, la wato ufa o Yahudi ma nyawa ma tonakoka gea manga hininga ikuranga genangika. Angamoi ona mata-mata iwihioriki abe o Timotiusu ai baba o Yunanioka.

⁴ De womahunaka de ahao o Lisitira ma kapongoka de yosobo de yotagi-tagi yadulu-dulu moduku o kapongo homoi-homoiika. De ma kapongo amomoiika gea de yahingahu manga gogianongoruika abe ma titi o gareja ma hihira de o hidingoto ma nyawa o Yerusaleemoka manga doomu ma putuhu, la ona mata-mata ihioriki ma pareta o kia kiani yaniikohi.

⁵ Ho mangale ma titi yatuu-tutumu onangika ho manga gogianongoru manga ngongaku idogo iputurungu Unangika. De naga utuoli abe ko iwingakuahi Ma Jouika, de o wange-wangeiye o nyawa yongaku o Abari ma Rorahaiika gea ho ka ihikaika naga abe yomahidogo o gareja ma nyawaika manga ngoe.

Ma Jou ai Gareja imahihora o Yunani ma tonakika 16:6—19:20 Ma Jou wihidumutu o Paulusu la woiki wahingahu-ngahu o Makedonia ma tonakika

⁶ De abe ma oraha gea o Paulusu de ai dodiawo tanu naga manga hininga la o Asia ma tonakika yoiki, masara Ma Jou o Womaha ko wahigunoauahi. Ho gea ona yogila-gila yoiki o Firigia de o Galatia ma tonakika de genangokaoo yadulu-dulu moduku de yahingahu-ngahu manga gogianongoruika manga abari gea.

⁷ De ipahainoli de yomahitigikaka o Misia ma tonaka ma batingika ho manga hininga la yowohama o Bitinia ma tonakika. Masara ma moioli nanga Baluhu o Yesusu ai Womaha ko wahigunoauahi yowohamika.

⁸ Ho genangoka de yogila-gila yowohama o Misia ma tonakika de gea ma tonaka yatilakuru ka hiadono o Toroasa ma kotaika yomahiadonika.

⁹ De ma futu gea Ma Jou wihidoaka o Paulusika la ka idadi wamake o himatoko moi Unangoka de aino. De ma himatoko ma goronaka de naga o Paulusu wimake womatengo o Makedonia ma nyawa. De una gea duru wogaho-gahoko o Paulusika wato, “Duru togahoko la ngona nainohi ahi tonakino naa la ka idadi nomiduhunu ngomi nenangoka.” De hokogea o Paulusu wamake ma futu gea.

¹⁰ De mangale ma titi ma himatoko gea ho ngomi naa imiruata mimaputuhoka miato kiani mimataiti misobo la mia hidumutu o Makedonia ma tonakika, angamoi duru miamao abe Ma Jou Una ma hirete womiahoko la ai Abari ma Rorahai miahingahu-ngahu genangoka.

O Paulusu wahikodoku o Abari ma Rorahai o Filiipi ma kotaka

¹¹ De ngomi mimaputuhoka abe o Makedonia ma tonakika miloiki ho o Toroasa ma kapongoka de ngomi mifarene o kapa moi la mihidotobiki o Samotarake ma nuuhika. De mia futu moi dika genangoka de ahao ma dawangeino de migila-gila o kapaka abe miloiki o Neapolisi ma kapongika ho miuti ma dudungiha genangoka.

¹² De ahao ngomi migila-gila o Filiipi ma kotaika, abe ma kota gea nako hohidotelega de o kota utuika o Makedonia ma tonakoka gea masara ka enangohi hatoli ikurutiye. De genangoka o Roma ma nyawa yahipareta ma kokawaahaika. Ho ngomi mimanoa ma kotaka gea mia futu muruono naga dika.

¹³ De o Hiaini ma wangeoka de ngomi mihupu o kota ma hoanika abe o akere moiika imahitigi-tigino. Angamoi ngomi miihene naga o nyawa yamuruono naga yomatoo-toomuino o akere ma ngigorino gea la yomaniata. Ho ngomi mimahiadono manga niniata ma ngi gea de mimakamake de o ngo-ngofeka yamuruono naga abe yomatoomuinoka genangoka. De migogeruku la ka idadi mimakoketemo de de ona.

¹⁴ Abe momatengo gea ami romanga o ngo Lidia abe o Tiatira ma kotaka ma nyawa, de muna motobafuku-fukunu o ngoere ma wuu-wuu abe duru ihohailoa. De munangoo momatobahuba-huba Ma Jouika. De ipahaino abe muna motoihene o Paulusu ai demoino de Ma Jou wafelenga to muna ami hininga la ka idadi mataoko itiai ai demo, de ahao muna modafongo ai demo munangika.

¹⁵ De muna mingakuoka de ahao muna de abe ona ami tauoka ona yomaohiki. De yomaohiki ipahaino de muna momagahoko la ngomi mimaidu to muna ami tauoka. Abe motemo mato, “Nako ngini nihidafongo ngohi abe tagou-goungu tingakuoka nanga Baluhu idodutuika, gea de ahao tomagahoko la ngini nimanoa ahi tauoka.” De muna mohigali-gali momagahoko hokogea, ho ma bahauku de mianiiki ami higaro ma demoika.

O Paulusu de o Silasa yabuika o Filiipi ma kotaka

¹⁶ De o wange moiukuoli de ngomi miloikoli abe mia dumutu manga niniata ma ngiika gea, masara ko mimahiadonuahi de mimakamake de momatengo naga o ngofeka abe muna o nyawa manga gilaongo de imikitokata. De to muna ami dutu yomamake o tiwi ma amoko ma titi munangino angamoi muna ka makunu mahingahuohi o nyawaika abe hokokia ahao idadi ngaro gea ko idadiuahi.

¹⁷ De muna gea mia poretino momihidoduruino de mopoa-poaka mato, “O nau-nauru gea ona iwitobaleleani Ma Jou Wokokurutiye, de yoboaino naa la inihingahu-ngahu nginika abe hokokia ka idadi Una winiduhunu nia howo-howonino.”

¹⁸ De muna gea o wange-wangeiye ka hokogea dika motobadiai abe momihidoo-doduru mia poretino hiadono o Paulusu ko wapoakaua ami demo gea. Ho una womidogilioro munangika de wotemo ma tokatika abe imanoa munangoka wato, “Naa ngohi tonihuloko de tapake o Yesusu Kristusu ai romanga. Abe tonihuloko la ngona ami badangoka de aino nohupuino de nominoaka!” Ka de hokogea wotemo de ma tokata imatitokoka munangoka de aino.

¹⁹ De gea to muna ami dutu yamake de ihioriki abe ko idadiokaua o tiwi ma amoko yomamake muna ami hiakunino ho duru yongamo. De ona yataoko o Paulusu de o Silasa de yaliara o kota gea ma hohidimonika abe ona naga o kota ma paharoka.

²⁰ De muna gea ami dutu yatae-tae onangika ato, “O Yahudi ma nyawa yahinooto naa ma titi onangino hiadono nanga kota ma amokika de naga o kangela haohana!

²¹ Abe ona yadoto-dotoko de yahigaro nanga nyawaika la yodiai gea abe imakalawana de o Roma manga hiaturu, ho tanu ko idadiua ngone haniiki to ona naa manga demo!”

²² De ka jai-jai dika de o huruhara idadioka angamoi o nyawa ko manga ngoe yomatoomuino la ato yahikangela o Paulusu de o Silasika. De o kota gea ma hohidimono yahuloko la manga baju yahuputokahi de ahao kiani yahipoha-poha de o gota.

²³ Ho duru yapoha-poha onangika de ipahaino ahao yabuika o bui ma tauoka. De ahao iwihuloko o bui ma tau ma gogoana ma haekika la duru wohidodiai wagoana done yoara ma hoanika.

²⁴ De igoungu una duru wohidodiai wagoana abe wahingohama ona yahinooto o kamar moiika abe duru ma tau ma gogoronaka la ko igapangua yoara, de hongoli wohidopilatuku manga lou de o gota.

²⁵ De ma futu gea abe duru o futu gorona adonoka de o Paulusu de o Silasa ona yomaniata de o higiriiri ma nyanyianga yonyanyiohi Ma Jouiye. De abe ma nyawa utu yabuika genangoka ona mata-mata yokokiihene manga nyanyiangika.

²⁶ Ho ka itodokanino de o tonaka ihikelu-kelu duru kohabuturungu, de ma bui ma tau gea enangoo duru ihikeluoka hiadono ma tau ma lifunu ihigiwi-giwi. De ngaro ma ngorana ma dadatoko masara enangoo mata-mata ikokifelengaika, de abe yabuika to ona manga rante o behino mata-mata ikokihoheoka ho iotakuku.

²⁷ De ma gogoana ma haeke unangoo womamaoino de ahao womalega ma bui ma tau ma ngoranika. Womalega de wamake abe ikokifelengaika ho ai hiningaka wato bote ona mata-mata abe wagoa-goana yokokiloaroka. De hokogea wataoko ho una ai humaranga wagoraka la wato womatoma dika la ufa o hohonenge ma hohowono iwidaene.

²⁸ Masara ko womatomauahi de o Paulusu wiboaka wato, “Ufa nomatoma! Ngomi mata-mata nagahi, ko miloarua!”

²⁹ Ka de gea woihene de ma gogoana duru wohawana hiadono wofafara, de una wahoko ai dodiawoika la o oboro yaoino la ka idadi yomahioriki. De gea yaoino de manga haeke una womataiti wowohamika o Paulusu de o Silasa manga kamarika de womamotumuku manga himangoka.

³⁰ De ahao una womaokoiye de wao ona yahinooto doka ma hoanika de waleha wato, “Ahi balu-baluhu, ka o kia todiai la Ma Jou wohiduhunu ahi howo-howonino?”

³¹ De ona yahinooto yopaluhu ato, “Ngona kiani ningaku nanga Baluhu o Yesusika la Una ahao woniduhunu ani howo-howonino. De to ngona ani tau onangoo mata-mata kiani hokogea iwingaku Unangika.”

³² De ahao ona yahinooto yahikodoku Ma Jou ai Demo-demo unangika de abe ai tau ma goronaka onangikaoo mata-mata yotoihene manga demoika.

³³ De duru ma oraha gea de ma gogoana ma haeke una waihoro de watebini ona yahinooto manga nabo, de watebini ipahaino de ahao una de ai tau ona mata-mata yomaohikoka!

³⁴ De yomaohiki ibooto de ma gogoana ma haeke wahokino la iwiniiki to una ai tauika de genangoka waleleani de o inomo. De ma futu gea ma bui ma tau ma gogoana ma haeke de ona ai tauoka ona duru yogogarago angamoi ona mata-mata iwingakuoka Ma Jouika.

³⁵ De ma dawangeinoli o ngoru-ngorumino de ma kota ma hohidimono yahidingoto o polisi ma nyawa yamuruono naga o bui ma tauika la ka idadi manga demo yadofanga ma gogoana ma haekika. Abe manga demo ma goronaka ato, “Ona yahinooto nahihupuoka dika o buino!”

³⁶ Ho ma gogoana ma haeke wihingahu o Paulusika wato, “Ngona de ani dodiawo ka idadi nihupu dika ma hoanika. Ho ngaro nilio de nia hininga ma goguwini dika angamoi nia hohowono gea ibootoka.”

³⁷ Ka de manga demo gea woihene de o Paulusu wato, “Ona kanugonino de imipoha-poha ngomi o nyawa manga hima-himangoka, abe gea imihohowonoka masara ko iwahi abe imitailako la ihioriki naga mia howono eko koua! De imipoha ibootino de imibuika o bui ma tau ma goronaka. Masara ngomi naa o Roma manga kokawaaha ho tanu ko idadiua imiao itorou hokogea! De naa ona bari yoigo la mimatohiki dika mihupuika ma hoanika? Mia hininga marai ma hohutulu ko adaenua! Ho koaho o kota ma hohidimono ona ma hirete yoboa naa mia hima-himangino de ahao imihihupu ma hoanika!”

³⁸ De o polisi ma nyawa gea yoihene o Paulusu ai demo de yagilio manga hohidimonika de ma demo yadofanga onangika. De ma hohidimono ka de yoihene de duru yohawanoka angamoi kanugonino de ko ihiorikua abe o Paulusu de o Silasa ona yodadi o Roma ma kokawaaha.

³⁹ De gea ihiorikoka manga howono ho ona yoboa o bui ma tauino la yatutumu de duru yomahilooa ona yahinootoika. De yomahilooa ipahaino de ahao yahihupu ma bui ma tauino de duru yogaho-gahoko onangika la manga kota yanoaika dika de yogila-gila o ngi moiikali.

⁴⁰ De o Paulusu de o Silasa ona yoliohi o ngo Lidia ami tauika la genangoka yomatoomuino de manga gogianongoru o ngongakuoka de yahigaro manga ngongakuika. De yahigaro ibooto de ahao ma kota gea yanoaika.