Hidingoto 15 - Ma Jou ai Demo-demo o Totobelohoka

O Gareja ma Hihira yomakoketemo ma titi ona ko o Yahudi ma nyawaua abe iwingaku-ngakuoka

¹ De abe ma oraha o Paulusu de o Baranabasa ka yomanoahi o Antiokia ma kotaka de naga o nyawa yamuruono naga yoboa o Yudea ma tonakoka de yaino. De ona yomahiadono de yadoto-dotoko o gareja ma nyawaika ato, “Ngini kiani nianiiki to ngomi mia pareta abe ma dihiraino de o Musa womidotokokau abe kiani homahuna. De nako ngini ko nimahunaua gea ko idadiua Ma Jou winidafongo nginika.”

² Masara o Paulusu de o Baranabasa manga hininga duru ko yahimotekua ho ma ngoe idadi abe o liliara ipuda onangoka angamoi ona duru yomaketeloliliara. De ipahaino de ma gareja ma doomu genangoka yomaputuhu la o Paulusu de o Baranabasa de manga gogianongoru yamuruono naga ma garejaino yahidingoto o Yerusaleeme ma kotaika. De gea yahidingoto la ka idadi yomakoketemo ma titi ena gea de o hidingoto ma nyawa de ma gareja ma hihira utuoli abe naga o Yerusaleemoka.

³ Ho ma gareja o Antiokia ma kotaka yahidingoto de ahao abe manga dodagi ma goronaka de yotulu-tulu o Fenisia de o Samaria ma tonakoka la ka idadi yatutumu manga gogianongoru o ngongakuoka. De abe ma oraha yomaketeade-ade de yahingahu onangika abe hokokia ma dihiraino de ona ko o Yahudi ma nyawaua onangoo manga ngoe iwingakuoka o Yesusika. Ho ma ade-ade gea yoihene de ona mata-mata duru yogogarago abe ma titi o nyawa manga ngoe yomangali Ma Jouika.

⁴ De ma tonakoka gea de yosobo de ipahaino yomahiadonika o Yerusaleeme ma kotaika. De yomahiadonoka de o gareja ma nyawa mata-mataika duru yadafongo irahai, abe ngaro o hidingoto ma nyawa de ngaro o gareja ma hihira de ngaro ma nyawa utu, masara ona mata-mata yadafongo duru irahai onangika. De ahao o Paulusu de o Baranabasa yomulaenge yoade-ade onangika abe ma titi hokokia Ma Jou wodiai to ona manga wowangoino abe ma oraha ihiabari o Abari ma Rorahai o nyawa-nyawaika.

⁵ De yoade-ade ibootino de o Yerusaleeme ma nyawa yamuruono naga yomaokoino la yotemo. Abe ona gea ma dihiraino ko iwingakuahi o Yesusika de ona yatobaniiki o Farisi ma nyawa manga doomuika. Ho ona yomahingahu manga hininga abe yotemo ato, “Onagona dika abe ko o Yahudi ma nyawaua nako yomangali de iwingaku Ma Jouika, gea irahai. Masara ona gea kiani yomahunaka de kiani o Musa ai Pareta yatobanii-niiki manga wowangoka la ahao Ma Jou wadafongo onangika.” Hokogea manga higaro ma demo.

⁶ De ahao o hidingoto ma nyawa de o gareja ma hihira ka ona dika yomatoomuino la yomakoketemo ma titi manga gogianongoru gea manga demo.

⁷ De yomatoomuinoka de yomakoketemo duru manga dekana. De yomakoketemo ipahaino de ahao yahokinoli manga gogianongoru mata-mataika. De ona yomakokitoomuinoka de o Peturusu womaokoino de wotemo onangika wato, “Ahi gogianongoru, ngini mata-mata nihiorikoka ahi ade-ade abe ma dihiraino hokokia idadi ngohino. Abe ma oraha gea de Ma Jou wohiiriki ngohi la o Abari ma Rorahai tahikodoku ona ko o Yahudi ma nyawaikaua la onangoo ka idadi yoihene ma abari gea de yongaku enangika.

⁸ De Ma Jou abe Una gea duru wonahioriki to ngone o nyawa mata-mata nanga borihininga, Una nengokadauino de womahitaana abe wadafongo onangoo ko o Yahudi ma nyawaua abe iwingaku Unangika. Abe ona ahao iwingaku Unangika de wahidoakoo onangika Ma Jou o Womaha abe imaketero hoka ngoneoli himakeoka ma dodihiraino. De ai hidoakino gea de womahitaana abe Una wadafongo ona abe ko o Yahudi ma nyawaua imaketero hoka ngoneoo wonadafongoka.

⁹ Abe genangino de ka idadi hohioriki abe Una ko wairikua o nyawa angamoi wonadafongo ka homakadaene dika ngaro ona eko ngaro ngone masara ko wonahikohowonua abe wonakokidafongo ngone mata-mata. De abe waofi o nyawa manga howono manga hiningaka de aino ma titi manga ngongaku, gea to ona manga howono waofi imaketero hoka to ngoneoli nanga howono waofioka.”

¹⁰ “Ho naa done sarakia ho haleha-leha de haoluku Ma Jou ai ngekomika abe Una ma hirete wairikoka? Mode ngone o nyawa dika de hohitaili Ma Jou ai dongohono? Abe ngone utu hato koaho hohidogo Ma Jou ai hiaturika de hahuloko nanga gogianongoru abe ko o Yahudi ma nyawaikaua la ona yamoku o gina duru kohadubuho, abe ma titi hahuloko la ona yanii-niiki o Musa ai Pareta. Masara ahi gogianongoru, ngaro ngone naa o Yahudi ma nyawa masara ma dodihirainohi de ka hiadono ma oraha naa de ngone ko hapoaua hamoku ma gina gea, ho done sarakia hahitubuho o nyawa utuika de genangino? Duru ko idadiua!”

¹¹ “Masara nako ngohi, ngohi tamao kiani tonahihohininga abe koaho ngone mata-mata homahiketehiningamoi dika ma titi nanga ngongaku. De gea ma titi abe o ngongaku ma ngekomo ka moi dika la Una ka idadi wonaduhunu nanga howo-howonino. Abe ngone homoi-homoi ka idadi wonaduhunu ma titi nanga Baluhu idodutu o Yesusu ai hininga ma owa ngoneino, de abe ma ngekomo utuino duru ko iwa!” Hokogea o Peturusu ai higaro ma demo onangika.

¹² De o Peturusu wotemo ibootino de ko iwaka o nyawa manga leleha ho yomakoketemo ibooto. De ahao o Baranabasa de o Paulusu yogila-gila yoade-ade abe ma titi Ma Jou ai heheranga de ai kuaha ma dodunguu abe Una wodiaioka onangino ma oraha ona naga abe ko o Yahudi ma nyawaua manga hidogoronaka. De ona mata-mata genangoka duru yototoihene manga ade-ade ma demoino.

¹³ De yoade-ade ipahaino de ahao manga hihira o Yakobusu una womaokoino de wotemo wato, “Ahi gogianongoru, abeika ngini nitotoihene ahi demoino naa.

¹⁴ Ahao kangano nanga gianongoru o Peturusu wonaade-ade abe hokokia nengokadauino Ma Jou wadafongo yamuruono naga abe ko o Yahudi ma nyawainoua. De hokogea Ma Jou wodiaioka la genangoka de ahao womulaenge watoomuino o homoa ma nyawaino ona abe ahao ka idadi iwihigiriiri to Una ai romangika.

¹⁵ De abe Una wadafongo o homoa ma nyawa, gea duru imakiniiki de Ma Jou ai Demo-demo moi abe ma dodihirainohi de ai uru ma dodofanga ihitulihuku ato ahao idadi. Abe ma demo gea itemo ato,

¹⁶ ‘De ipahaino abe ma oraha adonoka de Ngohi ahao tolio, De ma oraha gea ahao tahigilio o Dautu ai totoforaukuika o kuaha la ma moioli ka idadi yahikoano manga gogianongoruika. Abe igoungu manga kuaha duru iwederoka masara ahao gea de tohigilioli, Ho tagorakiyeoli manga kuaha onangika,

¹⁷ La ahao o dunia ma nyawa mata-mataika ka idadi yoigo ihilingiri Ngohi manga Baluhu idodutu, Abe ngaro ona ko o Yahudi ma nyawaua masara onangoo ahao ka idadi ihimake Ngohi, Abe ma titi onagona dika onangino abe tahokoka de ipahaino ona ihitobaniiki Ngohino. De hokogea to Ngohi nia Baluhu idodutu ahi demo,

¹⁸ Abe duru ma dodihiraka de tinihingahuokau nginika.’ Hokogea Ma Jou ai Demo-demo abe ma dodihiraino ihitulihukuoka.”

¹⁹ De ahao o Yakobusu wotemo wato, “De hokonaa ahi hininga, abe ngohi tonahigaro tato koaho ibootohi hahitubuho ona ko o Yahudi ma nyawaikaua abe yomangali Ma Jouika.

²⁰ Angamoi tanu naga o pareta muruono naga dika abe koaho ona yanii-niiki la yahisanangi manga gogianongoru o Yahudi ma nyawaika. Ho koaho ngone o hurata moi hodiai de hahidingoto onangika abe nanga huratoka de hahuloko la ma pareta naa kiani yaniiki. Abe ufa yaolomo o aewani ma roehe abe ihihubaka o pangaoika, de ufa yomakitigi ko itiaiua. De nako naga o aewani abe o nyawa yahookoko la yatoma enangika, gea ko idadiua yaolomo to ena ma roehe. De o aewani ma awunu ma enangoo ko idadiua yaokere eko yaolomo.

²¹ De ma pareta gea koaho onangoo yaniiki done nanga gogianongoru o Yahudi ma nyawaino manga hininga akuranga onangika. Angamoi ma dodihirainohi de o Hiaini ma wange ma getongo de ma pareta ma demo gea hobasa o Musa ai Paretaino abe nanga dodotoko ma tau ma dodoomuoka. Hokogea to ngohi ahi hininga.”

O Gareja ma Hihira manga hurata abe ihidumutu ona ko o Yahudi ma nyawaikaua abe iwingaku-ngakuoka

²² De o Yakobusu wotemo ipaha de ahao manga hininga yomahiketehiningamoi ho manga hurata yodiai. De ma hurata yodiaiuku de o hidingoto ma nyawa de o gareja ma hihira de o Yerusaleeme ma gareja ma nyawa utu mata-mataika yomatoomuino de yairiki manga gogianongoru yahinooto la ahao yahidingoto o Antiokia ma kotaika de ma hurata enangoo yao. Abe ona ahao yomakiniiki de o Paulusu de o Baranabasa o Siria ma tonakika la o Antiokia ma garejaka de ka idadi yahingahu onangika ma titi o Yerusaleeme ma doomu manga putuhu sarakia. Ho yomatoomuinoka de yairiki o gareja ma hihira yahinooto, masara womatengo onangino ai romanga hinooto. Abe ai romanga moi o Yudasa de naga ai romanga moioli o Barasabasa. De nagali ai dodiawo o Silasa unangoo iwiiriki. Ho ona gea yomakiniiki yatutumu o Antiokia ma garejaika.

²³ De hokonaa ma hurata ma demo abe ona ihitulihuku. “Mia gogianongoru o Yesusoka abe nimanoa o Antiokia ma kotaka, de o Siria ma tonakoka, de ngaro o Kilikia ma tonakoka. Ngomi naa o hidingoto ma nyawa de o gareja ma hihira abe migogere o Yerusaleeme ma kotaka. De mia hurata naa mihidingoto nginika abe ko o Yahudi ma nyawaikaua masara niwingaku-ngaku o Yesusika. Ho naa mia dora de mia tabea mihidingoto ngini mata-mataika!

²⁴ De ngomi miihenoka abe nengokadauino de naga mia gogianongoru yamuruono naga abe mia doomuino naa de yoiki initutumu ngini genangoka. De yomahiadono nginika de inihipusingi de inihikapusaka ma titi manga dodotoko ma demoino. Masara tanu ngomi naa ko miahidingotua de ko miahulokua onangika la hokogea inidotoko genangoka.

²⁵ De naa ngomi nenangoka mimakoketemoka de to ngomi mia hininga mimahiketehiningamoioka ma titi mia putuhu, ho miato koaho miahidingoto mia hihira yahinooto nginika, abe ona yomakiniiki de nanga gogianongoru abe duru hadora, o Baranabasa de o Paulusu.

²⁶ Abe ona yahinooto manga wowango yosanangi yomahidoaka dika angamoi manga hiningaka de ona yomatemo ato, ‘Iti hileleani nanga Baluhu o Yesusu Kristusu.’

²⁷ Ho naa miahidingoto o Yudasa de o Silasa nginika la ona ka idadi inihingahu nginika to ngomi mia putuhu abe duru imakiniiki de ma hurata naa ma dola.

²⁸ Abe ngomi naa miamao abe Ma Jou o Womaha womihihira to ngomi mia hiningaka ho gea ngomi miato koaho o pareta ma gahumu muruono dika minihidoaka la ngini niatobaniiki enangika.

²⁹ Abe ufa niaolomo o aewani ma roehe abe ihihubaka o pangaoika. De o aewani ma awunu gea ko idadiua niaokere eko niaolomo. De nako naga o aewani abe o nyawa yahookoko la yatoma enangika, enangoo ma ko idadiua niaolomo to ena ma roehe. De ufa nimakitigi ko itiaiua. Ho iti ngini niatobaniiki ma pareta gea de nia wowango ma datoro hatoli irahaioka. Hokogea dika aika mia hurata nginika. Mia tabea ngini mata-mataika.”

³⁰ Ho ona yaruata gea yomataiti o Yerusaleemoka de yosobo la yomakiniiki yoiki o Antiokia ma kotaika. De yomahiadono genangika de yakokiahoko o gareja ma nyawa mata-mataika la yatoomuino. De yomatoomuinoka de yahidoaka ma hurata onangika.

³¹ De ona o gareja ma nyawa yobasa ma higaro ma demo abe ma hurata ma goronaka de ahao ona mata-mata duru manga hininga igogaragoka ma titi ma hurata ma demoino.

³² De ipahaino de o Yudasa de o Silasa ona yotemo-temo manga gogianongoruika genangoka. Abe ona yahinooto naga manga hiakunu Ma Jouino la yatobalufungu de Ma Jou ai kuaha la ka idadi yatobahingahu o nyawaika to Una ai hingahu ma demo. Ho yotemo-temo onangika manga dekana de duru yahigaro de yahiputurungu manga ngongakuika.

³³ De ona yomahidodogumu genangoka manga futu muruono dika de ahao o gareja ma nyawa gea yahigunoa la yolio o Yerusaleeme ma kotaika abe to ona manga doomuika. Masara ko yahigunoauahi de manga gogianongoru o Antiokia ma garejaka yagahoko ma owa Ma Jouino ma titi ona. [

³⁴ De o Silasa una ko wolioua angamoi una womaputuhu la ka womanoahi o Antiokia ma kotaka.]

³⁵ De o Paulusu de o Baranabasa ona ka yomanoahi o Antiokia ma kotaka la ka idadi yaduhunu manga gogianongoruika genangoka abe yotobadoto-dotoko de yahikodoku Ma Jou ai Demo-demoino.

O Paulusu ai dodagi ma hinootoka abe wahingahu-ngahu o Abari ma Rorahai 15:36—18:22 O Paulusu de o Baranabasa yomakitingaka, ho o Silasa de o Paulusu yomakiniiki

³⁶ De hatoli ma dekana ipahainoli de ahao o Paulusu witemo ai dodiawo o Baranabasika wato, “Hoikohi hotagi-tagi o kota homoi-homoiika abe nengokadauino de nanga Baluhu ai demo hahikodoku onangika. Abe irahai ngone hadulu-dulu de hatutumu nanga gogianongoruika la hahioriki manga wowango de manga ngongaku ma bobero sarakia.”

³⁷ De o Baranabasa una wosanangi o Paulusu ai demoika angamoi unangoo ai hiningaka de woigo watutumu onangika. De una wohipuda wato, “Abeika o Yohanese Maruku wonaniiki la inaruange hotagi-tagi homakiniiki nanga dodagioka.”

³⁸ Masara o Paulusu una duru woluku o Baranabasa ai hininga gea, angamoi ma dihiraino manga dodagi ma goronaka de o Yohanese Maruku una wanoaika abe ma oraha ona o Pamafilia ma tonakoka, ho una ai tagongo bari ko wohingodumua.

³⁹ De o Paulusu de o Baranabasa duru manga hininga imakalawana hiadono yomaketeloliliaroka ho ma bahauku de ona yomakitingakoka. De gea o Baranabasa wiao o Yohanese Maruku la yomakiniiki yofarene o kapa de yoiki o Sipurusu ma nuuhika.

⁴⁰ De o Paulusu una wiiriki o Silasa, de ko yosobouahi de ona iwingaku-ngakuoka genangoka yagahoko ma owa Ma Jouino la ona yahinooto manga dodagi ma goronaka de Una watobaduhunu onangika. De yagahoko ipahaino de ahao ona yosobo.

⁴¹ De ona gea yotagi-tagi de yadulu-dulu moduku o gareja homoi-homoiika abe o Siria ma tonakoka de o Kilikia ma tonakoka la yahipoputurungu manga ngongakuika abe ona iwingaku-ngakuoka genangoka.