Hidingoto 14 - Ma Jou ai Demo-demo o Totobelohoka

O Paulusu de o Baranabasa yahikodoku o Abari ma Rorahai o Ikoniumu ma kotaika

¹ De o Ikoniumu ma kotaka de o Paulusu de o Baranabasa yomakiniiki yowohamika o Yahudi ma nyawa manga dodotoko ma tauika la yahikodoku Ma Jou ai Demo-demoino onangika. De ma oraha yahikodoku manga gogiriaka de Ma Jou ai kuaha duru ilamoko imanoa onangoka hiadono o nyawa ko manga ngoe genangoka iwingaku nanga Baluhika. Abe ngaro o Yahudi ma nyawa de ngaro ona ko o Yahudi ma nyawaua, masara naga ko manga ngoe onangino gea abe yongaku manga demoika.

² Masara nagali genangoka o Yahudi ma nyawa yamuruono naga abe duru yoluku Ma Jou ai Demo-demoika, ho ona gea yahitobahigaro onangika ko o Yahudi ma nyawaua la hiadono onangoo yadohata ona iwingaku-ngakuika.

³ De ngaro hokogea masara ona yahinooto yomanoa manga dekana ma kotaka gea de duru yahingahu-ngahu de manga domoroinoka abe ma titi nanga Baluhu ka idadi wonaduhunu ma titi ai hininga ma owaino dika. De nanga Baluhu Una gea womahitaana o nyawaika abe manga demoino gea ma titi Una duru yagou-goungu. Abe gea wohitaana ma titi wahiakunu o Paulusu de o Baranabasika la ona yodiai o heheranga de o kuaha ma dodunguu o nyawa manga hima-himangoka la ka idadi duru yongaku manga demoika.

⁴ De o nyawa ma kotaka gea yomahikeregu abe ma titi manga hininga ona yahinootoika, angamoi ma hononga ona duru yasanangi onangika masara ma hononga moioli yahimoteke o Yahudi ma nyawaika abe yaoluku o Abari ma Rorahaiika.

⁵ De ipahainoli de abe ko yasanangiua ona yahidee onangika de o hidee ma dorou. De manga doomuoka naga o Yahudi ma nyawa de abe ko o Yahudi ma nyawaua, de to ona mata-mata manga hihira. Ho ona yahideeoka ona yahinootoika ato yahikokangela de hiadono yahohonenge onangika ma titi yahohakaru.

⁶ Masara manga hidee gea ko idadiuahi de ona yahinooto yoihenoka ma titi ena gea, ho ona yoaroka dika abe ma kotaka gea de yosobo la manga dumutu o kota utuikali abe imanoa o Likaonia ma tonakoka. Abe gea yoiki o Lisitira de o Derebe ma kota-kotaika. De ngaro ma kota gea homoi-homoioka de ngaro ma tonaka abe ihigilolitino ma kota,

⁷ masara o Abari ma Rorahai ona yahingahu-ngahu ma nyawa mata-mataika abe yogogere genangoka.

O Paulusu de o Baranabasa yahikodoku o Abari ma Rorahai o Lisitira ma kotaika

^8-9 De o Lisitira ma kotaka naga womatengo wotalo abe womahidoboainohi ho duru ko idadiua womadagi-dagi. De abe ma oraha o Paulusu de o Baranabasa yomanoa o Lisitira ma kotaka de o wange moiuku o Paulusu wahingahu-ngahu ai gogiriaka de wimake wotalo gea abe wototoihene ai demoika. Ho o Paulusu womalega unangika de ka idadi wihioriki abe doka wotalo gea ai hiningaka de una duru wongaku o Abari ma Rorahaiika ho ka idadi wihitogumu unangika.

¹⁰ De wihioriki ho waamo-amokiye wiahoko unangika wato, “Ngona nomaokoiye!” Ka de wiahoko hokogea de wotalo-talo wotogumoka ho womaokoiye de wotagi-tagi!

¹¹ De ma nyawa genangoka abe onangoo yototoihene o Paulusu ai demoika ka de ai datoro gea yamake de yomakoketemo abe yopoa-poaka to ona manga demoka ato, “O nyawa yahinooto naa tanu ko o nyawa biahaua, masara nanga jou-jou abe youtiuku ngoneuku de yomahimatoko o nyawa manga badangino!”

¹² De ona yowoe-woe ato bote nako o Baranabasa una marai manga jou abe ma romanga o Seusu, de nako o Paulusu una bote manga jou abe ma romanga o Heremese, angamoi una gea abe watobahingahu-ngahu ai demo onangika.

¹³ De manga kotaka gea naga moi manga tau abe genangoka yomahuba-huba o Seusu manga jouika, abe ma tau gea idateke ma hoanika. De naga abe yomataiti ma tauika gea yoiki de iwihingahu manga hidemo ma nyawaika abe hokokia idadioka. Ho ma hidemo ma nyawa gea de o kokawaaha manga ngoe ona yaoino o hapi o dutu muruono naga de o bunga-bunga abe ihikiliko de agaleino la ma rupa ma hohailoa. De ona mata-mata yomahidiaioka la ato ma kota ma ngoranoka de manga hapi yomahihuba o Paulusu de o Baranabasika.

¹⁴ Masara ma oraha ona yahinooto yoihene o nyawa manga hidee abe ato yomahuba onangika de o Baranabasa de o Paulusu ona manga hininga duru ihuha. Ho manga baju yakakihi de yomataiti yongohama manga hidogoronaka de yobobanarata onangika.

¹⁵ Abe yotemo ato, “Mia gogianongoru, ngini naa adodoa ho niato nidiai hokonaa? Angamoi ngomi naa ka o nyawa biaha dika imaketero hoka nginioli! De ngomi miboaino nenangino la o Abari ma Rorahai minihingahu-ngahu nginika, la ngini nia popangao nianoaka. Angamoi ena gea mata-mata ka parahaja dika! Ho gea nianoa dika la nimangali Ma Jouika abe Una duru wotobawango! Abe Una gea wotobatulaada mata-mataika, abe ngaro daku ma dihangoka eko ma duniauku naa de ma gahi de gea mata-mata ma dola, masara ka Una dika wotobatulaada mata-mataika!

¹⁶ De ma dodihiraino de wahigunoa o dunia ma nyawa mata-mata la yomalingi-lingiri de yotobaniiki to ona homoi-homoi manga wowango ma ngekomo.

¹⁷ De ngaro hokogea wahigunoa, masara duru ka ihikaika naga ai hohininga abe o nyawa mata-mata ka idadi yamake manga wowangoka. Abe hoka Una ka ihikaika winihidoaka o awana de o joro ma hasili nginika la ka idadi niamake nia inomo de nia hininga ma garago.”

¹⁸ De ngaro hokogea o Paulusu de o Baranabasa manga hitararono ma demo onangika, masara duru yokangela yahitogumu ma nyawaika gea la ufa manga huhuba gea yomahihuba onangika.

¹⁹ De ipahainoli de naga o Yahudi ma nyawa yamuruono naga abe yoboa o Antiokia de o Ikoniumu ma kotaino de duru yahigaro ma kokawaaha genangoka la yadohata ona yahinootoika. Ho o nyawa ko manga ngoe yomatoomuino de iwingika o Paulusika de iwihohakaru unangika. De iwihohakaru ipahaino de ahao iwiliara de iwihihupu o kota ma hoanika de iwinoaika genangoka, angamoi ona ato bote una wohonengoka.

²⁰ Masara ona iwingaku-ngakuoka yoboa unangino yomatoomuino ho iwihigilolitino. De ahao una ka womaokoiye de wolio ma kota ma goronaika. De ma dawangeino de una de ai dodiawo o Baranabasa ona yomakiniiki yosobo la manga dumutu o Derebe ma kotaika yoiki.

O Paulusu de o Baranabasa yolio manga kotaika o Siria ma tonakoka

²¹ De o Paulusu de o Baranabasa ona hatoli manga dekana o Derebe ma kotaka abe genangoka yahikodoku o Abari ma Rorahai o nyawaika hiadono manga ngoe yongaku enangika de yatobaniiki o Yesusu ai dodotokika. De yahingahu-ngahu ibooto de ahao ona yahinooto yagilio manga gogianongoruika abe yogogere o Lisitira de o Ikoniumu de o Antiokia ma kota-kotaka. De o Antiokia ma kota, gea imanoa o Pisidia ma tonakoka.

²² De ma kota-kotaka gea de duru yahipoputurungu o ngongaku ma nyawa manga hininga mata-mataika. Abe ona yahitobahigaro la ka ihikaika o ngongaku ma dodotoko yatobanii-niiki enangika. De yahihohininga onangika ato, “Ngone hingaku-ngakuoka ko ma titiua nanga wowango ma goronaka de ma rorahai dika ka ihikaika hamake. Masara kiani nagaoo o kokangela abe haohana. De abe ma kokangela hohimangoka de ahao ika-ika hohapongo dakuiye la Una ka idadi wonahikoano ngone ai nyawa.” Hokogea manga higaro onangika.

²³ De o gareja homoi-homoioka de ona yahinooto yairiki de yagoraka o nyawa yamuruono naga la yodadi ma gareja ma hihira genangoka. Ho yagoraka de ahao ko yosobouahi de yagahoko ma owa Ma Jouino ma titi ma hihira gea, abe o inomo ko yolo-olomuahi de yomaniata Ma Jouiye la manga hininga duru itagi ka Ma Jouika dika. De gea ma hihira yahidoaka Ma Jou ai giama ma hoatika la Una dika watobaduhunu onangika ma titi manga tagongo ma hungi gea. De hokogea yagahoko Ma Jouiye angamoi ma hihira onangoo yomahinganono ka Unangika dika.

²⁴ De o kota homoi-homoioka yodiai hokogea de ahao yogila-gila de o Pisidia ma tonaka yanoaika de yowohama o Pamafilia ma tonakika.

²⁵ De ma tonakoka gea de yotulu o Perega ma kotaika de genangokali o Abari ma Rorahai yahikodoku ma nyawaika. De yahikodoku ipaha de yogila-gila o Atalia ma kapongika.

²⁶ De ipaha yosobokali ho o kapa yofarene de yolio manga gareja ma doomuika o Antiokia ma kotaika abe imanoa o Siria ma tonakoka. Abe ma dihiraino de genangoka yagoraka la yodadi o hidingoto ma nyawa abe o tonaka utuika. De ma dihiraino de manga gogianongoru gea abe yahitagongo de yagahoko onangika la Ma Jou ai hidoaka ma owa yahihira-hira ma oraha manga tagongo ihidagi-dagi o tonaka utuikali. Ho naa manga tagongo gea yabootoka ho yolioino manga gogianongoruika.

²⁷ De yomahiadono o Antiokia ma kotaika gea de yatoomuino o gareja ma nyawa mata-mata. De yomatoomuinoka de yoade-ade onangika abe hokokia idadi manga dodagi ma goronaka, de abe ma titi Ma Jou ai datoro mata-mata wodiaioka o nyawaika. De onangoo yoade-ade abe hokokia Ma Jou wahigunoa ona ko o Yahudi ma nyawaua la onangoo ka idadi iwingaku Unangika de yodadi o ngongaku ma nyawa.

²⁸ De ona yahinooto yomanoa manga dekana manga gogianongoruoka abe o Antiokia ma kotaka.