Hidingoto 13 - Ma Jou ai Demo-demo o Totobelohoka

Ma Jou ai Gareja imahihora o Asia ma tonakika 13:1—16:5 O Baranabasa de o Saulusu yatingakoka la yodadi o hidingoto ma nyawa

¹ De o Antiokia ma kota ma garejaka naga utu Ma Jou ai uru ma dodofanga de naga utuoli abe yatobadoto-dotoko manga gogianongoruika ma titi Ma Jou ai dodotoko. De ona gea manga roma-romanga hokonaa, naga o Baranabasa de o Saulusu, de nagali o Simeono abe iwifetongo o Daro-daromo ma nyawa, de o Lukiusu abe o Kirenoka ma nyawa, de o Menaheme abe una gea ma oraha ai etetekohi de duru widodiawo de wogogule de o Herodese Antipasa, abe o Herodese gea ipahaino wolamokoka de wodadi wokoano.

² De o wange moiuku de Ma Jou ai nyawa gea yomahuba-huba nanga Baluhika de o inomo yanoaikahi ho ko yolomua la manga hininga ma dumutu duru ka Ma Jouika dika. De gea yomahuba-huba manga gogiriaka de Ma Jou o Womaha wahuloko onangika wato, “Ngini kiani niatingakino Ngohino o Baranabasa de o Saulusu angamoi naga ma leleani moi abe Ngohi ahao tahitagongo onangika.”

³ De wotemo ipaha de ona yogila-gila yomaniata de o inomo ko yolomuahi. De ipahaino de ahao ona yafokumu ona yahinootoika de yomahiketehilooa angamoi kiani yomakitingaka manga gogianongoruoka de aino.

O Paulusu ai dodagi ihira abe wahingahu-ngahu o Abari ma Rorahai 13:4—14:28 O Paulusu de o Baranabasa yahingahu-ngahu o nyawaika o Sipurusu ma nuuhoka

⁴ De gea Ma Jou o Womaha wahidingotoka ona yahinooto, ho yoiki yohupu dai ma gahioko abe naga o kapongo moi ma romanga o Seleukia duru o gahi ma ngigorino. De genangoko yomahiadono de yofarene o kapa moi la ka idadi yoiki o Sipurusu ma nuuhika.

⁵ De ma nuuhu gea yomahiadonoka de youti ma kapaka de yauku ma dudunguku o Salamisi ma kapongoka. De ma kapongoka gea de yoiki o Yahudi ma nyawa manga dodotoko ma tau-tauika de yadoto-dotoko o nyawaika Ma Jou ai Demo-demoino. De ma oraha gea naga o Yohanese Maruku abe watobanii-niiki ona yahinootoika.

⁶ De genangoka yadoto-dotoko ipahaino de ahao yotagi-tagi de o kapongo homoi-homoiika yotulu-tulu moduku la yahingahu-ngahu Ma Jou ai Demo-demoino o kapongo amomoiika. De gea yotagi-tagi ka hiadono ma nuuhu ma batingika abe ma kapongo ma romanga o Pafoso yomahiadonikaka. De genangoka yomakamake de o Yahudi ma nyawa womatengo abe ai romanga hinooto. Abe ai romanga moi o Yahudioka manga demo ato o Bara Yesusu, de moioli iwifetongo de o Yunani ma demo ato o Elimasa. De una gea wotobahouru de o dodiai o nyawaika, de womafetongo wato Ma Jou ai uru ma dodofanga masara ka woelu-eluku dika.

⁷ De una gea wokarajaanga manga gubernuuroka, abe ma nuuhoka gea manga gubernuuru ai romanga o Segiusu Paulusu. De manga gubernuuru gea duru wososawaro. Ho ipahaino de ma gubernuuru woihenino ma titi o Baranabasa de o Saulusu naga ai kapongoka ho wahokino la iwitutumu angamoi woigo woihene Ma Jou ai Demo-demo onangino.

⁸ De ona yoboaino de iwihingahu ma gubernuurika Ma Jou ai dodotoko. Masara o Elimasa una gea duru watoa-toaka manga demo de wihigaro ma gubernuurika la wato ufa woihene to ona manga demoino. Angamoi una duru woluku la ai dodiawo ma gubernuuru wingaku o Yesusika.

⁹ De ahao o Saulusu, abe ai romanga moioli iwifetongo o Paulusu, una gea duru iwilufungu de Ma Jou o Womaha ai kuaha. De gea duru widamaana o Elimasika de witaere wato,

¹⁰ “Ngona naa nomaaduru abe imaketero hoka o Ibilihi ma haeke ai datoro, abe naga ngonaka irupa-rupa ani budi-budi ma demo de ani ngelu-ngeluku, ho hiadono ngona ka ihikaika notobalawana ma rorahaiika! De ngona nohigali-gali nohitaili la nanga Baluhu ai totiai ma dodotoko nohikawalimi la nato ma dumutu ma dorouika!

¹¹ Ho mangale ma titi ani hininga ma dorou gea ho naa nanga Baluhu idodutu wonihohowono ngonauku. Abe gea wonihirafi ho naa hatoli ma dekana de ngona ko nomahiorikokaua.” Ka de o Paulusu wotemo hokogea de o Elimasa gea wamao hoka o hauramo abe duru yofufutuoka iutiuku unanguku ho duru ko womahiorikokaua. De una ka wohohabalanga waika waino de womagaho-gahoko o duduhunu o nyawaino la iwituda-tuda abe ai dumutika.

¹² Ho ka de ma gubernuuru wamake abe hokokia idadioka de wingaku nanga Baluhu idodutuika, de una duru woheranga abe ma dodotoko ma dolaika ma titi nanga Baluhu.

O Paulusu wahingahu-ngahu o Abari ma Rorahai o Antiokia ma kota moiikali

¹³ De ipahainoli de o Paulusu de ai dodiawo ona o Pafoso ma kapongoka de yosobo abe yofarene o kapa moioli la manga dumutu o Pamafilia ma tonakika. De manga kapa imahiadono ho ona youti ma dudungiha abe o Perega ma kapongoka. De genangoka o Yohanese Maruku una wanoaika ai dodiawo yahinooto la una ka idadi wolio dika o Yerusaleeme ma kotaika.

¹⁴ Masara nako o Baranabasa de o Paulusu ona ihigila-gila manga dodagi abe yoiki dinaiha o Antiokia ma kotaiha abe ma kota gea imanoa o Pisidia ma tonakoka. De ma moiuku o Hiaini ma wangeoka de ona yowohama o Yahudi ma nyawa manga dodotoko ma tauika la ma doomu yaniiki genangoka.

¹⁵ De manga biaha gea manga doomu ma getongo de naga yobasa o Musa ai bukuino o hidoku moi de ahao abe Ma Jou ai uru ma dodofanga ma bukuino enangoo o hidoku moi yobasa. De ma wange gea manga biaha yaniiki, ho yobasa ibooto Ma Jou ai Demo-demoino. De ahao ona abe yahihira-hira yahuloko manga nyawa la manga demo naa yahingahu o Paulusu de o Baranabasika ato, “Mia gogianongoru, nako naga moi nia higaro ma demo abe nioigo nimihikodoku ngomino, gea ka idadi niaino de nimihikodoku!”

¹⁶ De hokogea yodiai ho o Paulusu una womaokoino de wodiai o dodunguu moi de ai giama la yomarii-riidohi de ahao wotemo wato, “Ahi gogianongoru o Isiraele ma nyawa, de ngini utu abe ko o Yahudi ma nyawaua masara ngaro hokogea ma niwihoromati de nimahuba-huba nanga Jouika abe o Isiraeloka manga Jou. Togahoko la ngini mata-mata nitotoihene ahi demoino naa!”

¹⁷ “Abe ngone o Isiraele ma nyawa, to ngone nanga Jou Una ma dodihiraka de wairiki nanga totofora. De ipahaino wahiowa onangika ma oraha ona o Mesiiri ma tonakoka la manga kuaha ilamoko. De ino ino abe ma oraha o Mesiiri ma nyawa yahidadi manga gogilaongo de ahao nanga Jou wapake ai buturungu la wahihupu manga kangelaka de aino la ibootohi yodadi o nyawa manga gilaongo.

¹⁸ De abe ma oraha duru yokapakiti manga taongo moruata ma dekanino o tonaka ma kakaahaka de Una duru womatongohono ma titi manga datoro ko itiaiua.

¹⁹ De ipahaino de ahao o Kanani ma tonakoka de Ma Jou wahibobinaaha ma tonaka gea ma nyawa ma doomu tumidi la manga tonaka gea wahidoakoli nanga totoforaika la idadi nanga oara ma tonaka.

²⁰ De gea mata-mata ma oraha aolomo ngade-ngade o taongo o ratuhu iata de moritoa ma dekana.” “De ipahaino de naga to ona manga hihira abe yahiromanga o tobauru-urusu ma nyawa, de ona gea yototuruuru yahihira-hira nanga totoforaika. De gea ka ihikaika yototuruuru ka hiadono ma oraha o Samuele abe una Ma Jou ai uru ma dodofanga womatengo.

²¹ De ma oraha gea de nanga totofora duru yomagaho-gahoko la ka idadi naga manga koano abe wahikoano onangika. De Ma Jou wohimoteke to ona manga hininga de wihidoaka onangika o Saulusu abe una o Kisi ai ngofaka abe womahidutu o Benyamini ma dutuika. Ho Ma Jou wigoraka o Saulusu gea la wodadi manga koano de una wahihira-hira o taongo moruata ma dekanino.

²² Masara ipahaino de ahao wihigutioli de wituruuru de o Dautu. Abe Ma Jou ma dodihiraino de wotemo abe ma titi o Dautu wato, ‘O Dautu abe o Isai ai ngofaka, una naa o nauru abe to una ai hininga duru imakiniiki de to Ngohioli ahi hininga, abe una ahao wodiai mata-mataika abe tihuloko la wodiai.’”

²³ De o Paulusu wogila-gila watemo onangika wato, “De o Dautu ai totoforaukuino naga womatengo abe wohingodumu Ma Jou ai behehongo ngone o Isiraele ma nyawaino, angamoi Una wodadi to ngone nanga Duduhunu abe nanga howo-howonino wonaduhunu. De o Dautu ai totoforauku Una gea o Yesusu!

²⁴ De o Yesusu Una ko woboauahi de naga o Yohanese abe wotobaohi-ohiki o nyawaika, abe una wohira woboa de wahingahu-ngahu o nyawaika abe wato o Isiraele ma nyawa mata-mata kiani yotoba de yoporete manga howo-howonika de yomangali Ma Jouika de yomaohiki.

²⁵ De abe o Yohanese ai gahe ngade-ngade adonoka de una waleha o nyawaika wato, ‘Sarakia, ngini naa niato bote ngohi naa to ngone nanga Mesia abe Ma Jou wonahibehehongoka? Ufa niataoko ihowono ma titi ngohi naa, angamoi ngohi ko Unangua! Masara ai boa duru itigioka. De nako ngohi de Una de duru ka Unangohi wokokurutiye, ho ngaro ngohi todadi ai gilaongo abe tahupu-huputu ai sandaala masara ko tadadiua angamoi Una gea wokurutiyeholi.’ Hokogea o Yohanese ai demo ma titi o Yesusika!”

²⁶ “Ahi gogianongoru, ngini utu o Abarahaama ai totoforauku ho nidadioka o Isiraele ma nyawa. De naga ngini utuoli abe ko o Yahudi ma nyawaua masara niwihoromati de nimahuba-huba Ma Jouika. Ho naa ngohi tinihingahu ngini mata-mataika abe Ma Jou ai duduhunu ma abari naa ihidumutu ngone mata-mataino!

²⁷ De igoungu abe nengokadauino de ma nyawa o Yerusaleeme ma kotaka de manga hihira ona yahingodumoka Ma Jou ai demo ma dodihiraino abe ma oraha iwihohonenge o Yesusika. Abe ona ko iwihiorikua abe ma titi Ma Jou ai uru ma dodofanga ma demo mata-mata, gea iwihidumutu ka Unangika dika o Yesusika. De gea hadongoo de o Hiaini ma wange ma getongo de ona yoihene ma demo manga dodotoko ma goronaka masara duru ko iwihiorikua Unangika.

²⁸ De ma oraha iwitailako de ko yamakeua ma titi hiadono kiani iwihohonenge, masara ngaro hokogea ma yogahoko o Pilatusika la ka iwihohonenge dika.”

²⁹ “De manga datorino gea de duru yahingodumu Ma Jou ai uru ma dodofanga ma demo mata-mataika abe ma titi hokokia iwihohonenge. De gea yahingodumu ibooto de iwihiguti ma gota isosalioaka de wauku de iwikelenga o lungunoka.

³⁰ Masara de ahao Ma Jou wihimomiki ai honengino!

³¹ De womomiki ipahaino de ahao Una womahimatoko iwinii-niikika abe o wange muruonino ma dekana. Abe ona ma dihiraino iwinii-niiki o Galilea ma tonakoka de hiadono o Yerusaleeme ma kotaiye, onangika abe Una womahimatoko la ka idadi iwimakeoli. De duru ona gea abe yodadioka ai hakihii ma nyawa de yahingahu-ngahu o Isiraele ma nyawaika abe ma titi Una wowangokali!”

³² “De naa ngohi de o Baranabasa ngomi miboaino la minihingahu-ngahu o Abari ma Rorahai naa! Abe Ma Jou ai behehongo ma dodihiraino nanga totoforaika, ai behehongo gea idadioka ma oraha naa abe ngone ka howangohi!

³³ Abe ai behehongo wohingodumu ngoneino ma oraha wihimomiki o Yesusu ai honengino. De o Higiriiri ma Nyanyianga ma hinootoka abe ma dodihiraino itulihuku, to ena ma demo ihidumutu o Yesusu ai momomikika. Abe gea ma demo itemo ato, ‘Ngohi o wange naa de tomahitaanoka abe Ngona nodadioka ahi Ngofaka, De abe Ngohi tagou-goungu to Ngona ani Baba.’ Hokogea ma dodihiraino itulihukuoka.

³⁴ De duru igoungu abe Ma Jou wihimomiki ai honengino la ko idadiokaua Una wohonenge. De mangale nanga Duduhunu o Yesusu wowangoli ho genangino de Ma Jou ka idadi wohingodumu ai behehongo moioli abe ma dodihiraino wonahibehehongo ngone o Isiraele ma nyawaino wato, ‘Ngohi ahao tinihidoaka nginika ahi hidoaka ma owa abe ma dihiraino de tihibehehongoka nia tofora o Dautika, abe ahi behehongo gea duru ko tawohangua.’

³⁵ De mangale ma titi ai behehongo ma demo gea kiani wohingodumu, ho kiani naga nanga Duduhunu abe ka idadi wohikala o hone-honengika. De enangoo ma dodihirainohi de wonahingahuokau abe o Higiriiri ma Nyanyianga ma demo moiokali de o Dautu wohitulihuku nanga Duduhunu ai demo abe wotemo Ma Jouika wato, ‘Angamoi Ngohi totebi-tebini ani himangoka abe totobahingounu ani mauika, ho Ngona ahao ko nohigunoaua la ahi honenge ikorofu.’

³⁶ Hokogea o Dautu wohitulihuku, masara itararono abe ai demo gea ko ihidumutua to una ma hirete ai honengika. Angamoi hohioriki abe nanga tofora o Dautu una wohonenge de ahao ai honenge gea ka ikorofu. Abe ma dodihiraino de una waleleani ai gogianongoruika ma oraha wahikoano ho hiadono una wamataka ai karajaanga Ma Jouoka de aino. De ahao una wopahaka de iwilungunoka, de iwilungunu ipahaino de ahao ai honenge ikorofu.

³⁷ Ho genangino de itararono abe ai demo ma dumutu womatengoikali, abe ma titi womatengo gea Ma Jou wihimomiki ai honengino ho ai honenge ko ikorofua.”

^38-39 “Ahi gogianongoru, ngohi duru togahoko la nitotoihene ahi demo-demoino naa! Angamoi duru o Yesusino dika ka idadi Ma Jou waofi ti ngini nia howo-howono Unangika. De onagona dika iwingaku Unangika ona gea yahihoheoka manga hohowonino, de Ma Jou waetongo onangika wato yototiaioka to Una ai himangoka. Abe ma dodihirainohi de ngaro o Musa ai Pareta hatobanii-niiki masara ko ma iwa abe Ma Jou waetongo yototiaioka ma titi genangino.

⁴⁰ Ho naa ngohi tinihitiari nginika la ufa nioluku ai Abari ma Rorahaiika, done ahao Ma Jou ai uru ma dodofanga manga demo ma dodihiraino inidaene nginiuku. Abe ma dodihiraka ona ihitulihuku Ma Jou ai demo abe wohidumutu onangika yotobaoluku ai demoika ato,

⁴¹ ‘Ngini abe nihihohedu Ngohino de ka nioluku ahi demoika, Ngini ahao duru niheranga abe ma oraha niamake ahi datoro abe ahao todiai, Abe ma oraha gea adonoka de ngini niheranga de ahao nihonenge! Angamoi ma oraha ngini ka niwangohi de Ngohi tinihikangela de o kangela duru ma amoko, Abe ngaro o nyawa inihingahuohi ma titi ma kangela hokokia ahao idadi nginika, Masara ngini duru ko niongakua to ona manga demoika!’” De hokogea o Paulusu wahitiari la wato ufa yoluku o Abari ma Rorahaiika angamoi ma abari gea ka idadi inaduhunu nanga howo-howonino.

⁴² De o Paulusu ai higaro ma demo wabootoka ho una de o Baranabasa ato ma dodotoko ma tauoka de yosobo. De ko yohupuahi de naga o nyawa utu genangoka abe yogahoko onangika la o Hiaini ma wange manga himangoka de yoboali la yadotokoli abe ma titi manga abari ma demo gea.

⁴³ De ahao ona mata-mata gea manga dodotoko ma tauoka yohupuoka. Abe naga o Yahudi ma nyawa yamuruono naga de utuoli ko o Yahudi ma nyawaua abe ma dihiraino de yomangali la o Yahudi ma nyawa manga dodotoko enangoli yatobaniiki. De ona manga ngoe yomulaenge yatobanii-niiki o Paulusu de o Baranabasika. Ho ona yahinooto yahigaro onangika ato, “Kiani ngini ka ihikaika nimahinganono Ma Jou ai hininga ma owa nginika, de ufa nimahipipidili genangino.”

⁴⁴ De o futu tumidi ipaha ho o Hiaini ma wange adonoka, de o nyawa duru ko manga ngoe yomatoomuino manga dodotoko ma tauoka. Abe ngade-ngade ma kota ma nyawa mata-mataika yokokiboaino la yotoihene o Paulusu de o Baranabasa manga demo abe yahikodoku Ma Jou ai Demo-demo onangika.

⁴⁵ Masara o Yahudi ma nyawa manga hihira ma kotaka gea ka de yamake manga ngoe-ngoe abe yotoomuino de manga hiningaka aomangoka de o daleana. Ho manga hihira gea yadoa-doana ona yahinootoika, de abe o kia dika yotemo de ma hihira ona yoluku manga demoika hiadono o ribuutu ka ihikaika yotobadiai.

⁴⁶ De ahao o Paulusu de o Baranabasa duru de manga domoroini yaamo-amokiye yahingahu ato, “Igoungu kiani Ma Jou ai Abari ma Rorahai naa itagi ihira ngini o Yahudi ma nyawaikahi. Masara ngini naa niaolukoka ma abari gea ho nimaputuhu abe ko nioigoua o wowango ka hiado-adonika. Ho mangale ngini niaolukoka enangika ho naa ma abari gea ngomi mihidagi de miahingahu ona ko o Yahudi ma nyawaikaua.

⁴⁷ De gea tanu duru imakiniiki de Ma Jou ai behehongo ma dodihiraino abe Una wohuloko ngomino wato, ‘Ngohi naa tonihidadi o hilo la ka idadi ona ko o Yahudi ma nyawaua ihihioriki ma titi Ngohi, Abe ma titi ngonaino de o duduhunu ma abari ka idadi itagi o dunia ma ngi mata-mataika ngaro duru kohagurutika.’ Hokogea itemo Ma Jou ai Demo-demoka abe ma titi ona ko o Yahudi ma nyawaua yamake o Abari ma Rorahai.”

⁴⁸ De abe ma oraha ona ko o Yahudi ma nyawaua yoihene manga demo gea de duru yogogaragoka ho yotarimakase nanga Baluhika ma titi ai abari gea. De ona abe yomaputuhoka la yangaku ma abarika gea, ona mata-mata Ma Jou wahidoaka onangika o wowango ka hiado-adonika.

⁴⁹ De nanga Baluhu ai abari gea imahikabarihi ma tonaka gea mata-mataika.

⁵⁰ Masara o Yahudi ma nyawa manga hihira genangoka ona yahitobahigaro o kota ma nyawa manga ngoe la onangoo yatobalawana o Paulusu de o Baranabasika. Abe ona yahigaro o nau-naurika abe yodadi ma kota gea ma hihira, de nagali yahigaro o ngo-ngofekaika abe manga gogere ikokurutiye o kotaka gea masara tanu yomatobahuba-huba Ma Jouika. De ahao onangoli yahigaro o kokawaaha manga ngoe hiadono o huruhara idadioka abe ona mata-mata yangamo o Paulusu de o Baranabasika de yakiniiki ma kotaka ka hiadono ma hoanika.

⁵¹ Ho ona yahinooto yohupuoka de ahao manga lou yafureereoka la ma kota ma tonaka ma kuhuhunu gea ireroka. De gea idadi o hohowono ma dodunguu ma nyawaika gea abe ko yodafongua o Abari ma Rorahai. De ma dodunguu gea yodiai ibooto de ahao yotagi-tagi yoiki o Ikoniumu ma kotaika.

⁵² De ngaro ona yahinooto yosoboka masara ona o Antiokia ma kotaka abe iwingaku-ngakuoka ona gea ka ihikaika manga hininga yaomanga de o garago, de Ma Jou o Womaha ka ihikaika walufungu onangika.