Hidingoto 11 - Ma Jou ai Demo-demo o Totobelohoka

O Peturusu wahitararono o Yahudi ma nyawaika abe ma titi ona ko o Yahudi ma nyawaua ka idadi iwingaku o Yesusu Kristusika

¹ De ko itedekanuahi de o Yesusu ai hidingoto ma nyawa de o Yahudi ma nyawa utu abe iwingaku-ngakuoka o Yesusika o Yudea ma tonakoka, ona gea naga yoihenino o abari. De gea yoihene abe naga ko o Yahudi ma nyawaua yamuruono naga yodafongoka Ma Jou ai Demo-demo ho onangoo iwingakuoka o Yesusika.

² De abe ma oraha o Peturusu wolio womahiadono o Yerusaleeme ma kotaika de naga ai gogianongoru iwingaku-ngakuoka o Yahudi ma nyawaino yamuruono naga abe duru iwitaere unangika ato,

³ “Ngona bari nowohamika abe ko o Yahudi ma nyawaua manga tau ma goronaika, de hongoli ngona bari nolomo ka ma moi de ona! Gea duru ko itiaiua!”

⁴ De ahao o Peturusu wohidodiai wahingahu onangika mata-mata abe idadioka.

⁵ Abe wotemo wato, “Nengokadauino abe ngohi naga o Yope ma kapongokahi de o wange moiuku tomaniata ahi gogiriaka de ngade-ngade hoka ihikiooko abe gea ko ihikiookua masara ahi hiningaka tamake o himatoko Ma Jouoka de aino. De ma himatoko ma goronaka de tamake daku ma dihangoka de auku iuti moi abe ma rupa hoka o ngoere ma amoko. De ma ngoere gea ihidowora abe ma aribarene iatika alikoika la ka idadi ihiguti. De gea iuti duru ahi himangoka.

⁶ De ngohi tomalega ma ngoeroka gea de naga o aewani irupa-rupa, abe utu de ma lou iata, de utuoli abe itotualono de abe imalia-liara o tonakoka, de utu o totaleo abe ihoho daku ma dihangoka. Masara gea ma aewani mata-mata o aewani abe ngone ko idadiua haolomo ma titi nanga bohono nanga Paretaka.

⁷ De ahao ngohi toihene o ilingi moi itemo ato, ‘Peturusu, nomaokoino de nomadoma la ka idadi naolomo!’”

⁸ “Masara topaluhu tato, ‘Ahi Baluhu, ngohi duru ko tadadiua! Angamoi ngohi duru ko ma moiuahi taolomo ma roehe abe to ngomi mia Pareta imihuloko ato gea ko idadiua ma roehe gea miolomo.’”

⁹ “De ma ilingi itemoli ato, ‘Nako hiadono Ngohi Ma Jou tonihingahuoka abe tohitebinoka la ma aewani eko ma roehe gea ko iwaka ma bohono ma Paretaino, gea ibootohi nomahibohono enangika masara ka idadi naolomo.’”

¹⁰ “De ma himatoko gea Ma Jou wohigalioli ma hange, de ipaha ma ngoere gea imagorakiyeoli daku o Horogaiye.

¹¹ De duru ma oraha gea naga o nauru yaruange abe o Kaisarea ma kapongoka de aino yahidingoto ngohino, ona gea yomahiadono ma tauino abe genangoka tomadionikino.

¹² De Ma Jou o Womaha Una wohihuloko wato kiani ngohi de ona yaruange mimakiniiki de abe ngohi ngaro ufa de topusingi abe ma titi ona ko o Yahudi ma nyawaua. De ahi gogianongoru yabutaanga naa onangoo iminiiki ho ngomi mitagi-tagi ka hiadono mimahiadono to una ai tauika abe una wohibehehongo ngohi.

¹³ De ai tauoka de ma tau ma dutu womahingahu abe hokokia o malaekata womatengo womahimatoko unangika ai tau ma goronaka. De ma malaekata wihuloko unangika wato, ‘Kiani ani nyawa yamuruono naga nahidingoto o Yope ma kapongika, la genangoka iwilingiri womatengo ai romanga o Simono Peturusu.

¹⁴ Angamoi una ahao wonihingahu ngonaika abe hokokia ma ngekomo la ngona de ani tau mata-mata ka idadi Ma Jou winiduhunu nia howo-howonino!’”

¹⁵ De o Peturusu wogila-gila woade-ade wato, “De ipahaino abe ngohi naga onangoka de tomulaenge tahingahu-ngahu o Abari ma Rorahai onangika. Masara ahi demo ko iwoeuahi totemo-temo de Ma Jou o Womaha woboauku de walufungu to ona manga hiningaka, abe duru imaketero hoka ma dihiraino de to ngoneoo nanga hininga walufungoka.

¹⁶ Ka de gea idadioka de tongano-nganono nanga Baluhu ai demo abe wotemo wato, ‘Ma dihiraino de o Yohanese una wahiohiki o nyawa de o akere, masara ngini naa ahao inihiohiki de Ma Jou o Womaha.’ Hokogea to Una ai demo.

¹⁷ Ho duru itararono abe Ma Jou wahidoakoka ona ko o Yahudi ma nyawaikaua ai hidoaka abe ma titi Ma Jou o Womaha wihidoakoka. De gea duru imaketero abe hoka ma dihiraino de ai hidoaka ena gea wonahidoakoka ngoneino ma oraha hingaku nanga Baluhu o Yesusu Kristusika. Ho mangale ma titi gea ho ngohi naa duru ko idadiua taoluku eko talawana onangika gea angamoi itararonoka Ma Jou ai hininga ma sanangi itagi onangika.”

¹⁸ Hokogea o Peturusu ai hitararono ma demo ai gogianongoruika, de abe ma oraha ona yoihene ai demo de ko iwaka manga lawana ma demo ma titi ona ko o Yahudi ma nyawaua. Ho ona duru iwihigiriiri Ma Jouika ma titi gea de yotemo ato, “Igoungu Ma Jou wahidoakoka la ona abe ko o Yahudi ma nyawaua ka idadi yoporete manga howo-howono. De gea ahao ka idadi yamake o wowango ka hiado-adonika Unangoka de aino.”

O Abari ma Rorahai imahikabarihi o Antiokia ma kotaika

¹⁹ De abe ma dihiraino ma oraha o Setefanusu iwihohonenge de ona iwingaku-ngaku o nyawa yahikokangela onangika, ma oraha gea de ona iwingaku-ngakuoka yomahikabarihoka. Abe ona utu yoara de yomadioniki o Fenisia ma tonakika, de utu o Sipurusu ma nuuhoka yomadionikika, de utuoli yomaturuuru o Antiokia ma kotaika abe o Siria ma tonakoka imanoa. De ona mata-mata yomaturuuruoka de o Abari ma Rorahai yahingahu-ngahu o nyawaika, masara gea o Yahudi ma nyawaika dika ihiabari.

²⁰ Masara ipahaino de naga iwingaku-ngakuoka yamuruono naga abe o Sipurusu de o Kirene ma tonakoka ma nyawa abe yoiki o Antiokia ma kotaika. De ona yomahiadono ma kotaika gea de yahingahu-ngahu o Abari ma Rorahai ma titi nanga Baluhu o Yesusu onangika abe ko o Yahudi ma nyawaikaua.

²¹ De ma oraha gea de nanga Baluhu ai kuaha duru ma amoko imanoa onangoka abe yahingahu-ngahu, ho abe ko o Yahudi ma nyawaua ona ko manga ngoe iwingaku de yomangali nanga Baluhika.

²² De ipahaino de o gareja ma nyawa o Yerusaleeme ma kotaka ona yoihenino abe hokokia idadi o Antiokia ma kotaka, ho iwihidingoto o Baranabasa genangika la una ka idadi wamake abe hokokia idadioka ma kotaka gea de ahao o abari wohidingoto onangika.

²³ De o Baranabasa una womahiadonoka de wamake abe Ma Jou ai hidoaka ma owa ona ko o Yahudi ma nyawaua yamakeoka. De gea wamake abe hokokia Ma Jou womahitaana abe wokarajaangoka ona gea manga kokihiningaka, ho o Baranabasa una duru wogogaragoka. De una wahigaro ona abe ahao iwingaku-ngaku nanga Baluhika la ona ka ihikaika yatobaniiki nanga Baluhu o Yesusu dika ai mau onangika.

²⁴ De o Baranabasa una ai hininga ma rorahai, de Ma Jou o Womaha duru iwilufungu unangika, de ai ngongaku duru iputurungu Ma Jouika. De genangoka ma nyawa duru ko manga ngoe yomahidogo iwingaku-ngaku manga doomuika.

²⁵ De ipaha o Baranabasa o Antiokia ma kotaka wosobo de woiki o Tarasuusu ma kotaika la wato wilingiri o Saulusu genangoka.

²⁶ De womahiadono de wimake genangoka, ho wiao la yomakiniiki yolio o Antiokia ma kotaika. De ona yahinooto yomahidodogumohi ma kotaka gea abe manga taongo moiino ma dekana de yotobadoto-dotoko o Antiokia ma nyawa ko manga ngoeika. De ma kotaka gea de ahao idadi abe iwingaku-ngaku ma nyawa yahiromanga onangika ato “o Kristen ma nyawa.”

²⁷ De abe ma oraha gea naga Ma Jou ai uru ma dodofanga yamuruono naga abe o Yerusaleemoka de yosobo yoiki o Antiokia ma kotaika.

²⁸ De manga doomu ma goronaka de naga womatengo onangino abe ai romanga o Agabusu, de una womaokoino manga hidogoronaka la wahingahu onangika o demo moi abe wamake Ma Jou o Womahino. De ai hingahu ma demoka de wotemo wato ahao o hafini duru ma amoko iboaino de yadaene o tonaka ma amokika gea. De igoungu ma hafini ahao idadi abe ma oraha o Kalaudiusu wahikoano o nyawaika.

²⁹ Ho mangale ma titi ai hingahu gea ho ona iwingaku-ngaku o Antiokia ma kotaka yomaputuhu la ato yahidingoto o dora ma hidoaka manga gogianongoru o ngongakuoka abe o Yudea ma tonakoka yogogere. De ona homoi-homoi yahidoaka onangika abe hokokia imakiniiki de manga borigogakunu.

³⁰ De ona mata-mata yahidoaka de yahitoomuino ma dora ma hidoaka de ahao yahitagongo gea o Baranabasa de o Saulusika. De gea yahitagongo la ona ahao yototaka ma hidoaka gea o Yerusaleemika de yahidoaka o gareja ma hihiraika genangoka la onangoli ahao yahikodoku manga nyawaika.