Hidingoto 10 - Ma Jou ai Demo-demo o Totobelohoka

O Abari ma Rorahai o Peturusu wahingahu ona ko o Yahudi ma nyawaikaua

¹ De o Kaisarea ma kapongoka naga womatengo o Roma ma tentara manga haeke abe ai romanga o Koroneliusu. De una wahipareta o tentara abe manga doomu ihiromanga ato o Italia ma tonakoka ma doomu.

² De una gea ai hininga la woigo ka ihikaika wihisanangi Ma Jouika. Ho una de ai tau ona mata-mata yomaketehiningamoi abe duru iwihoromati Ma Jouika. De una ai hininga ma rorahaiino wahidoa-doaka o hu-huha ma nyawaika, de ka ihikaika womaniata Ma Jouiye.

³ Ho o wange moiuku abe ngade-ngade o takoro hange o bimaowaka de una wamake o himatoko moi abe Ma Jou ai malaekata womatengo naga woboa unangino. De ma malaekata gea wiahoko unangika wato, “Koroneliusu!”

⁴ De o Koroneliusu una ka widamaana dika ma malaekatika ma titi duru wimodongoholi, de wopaluhu wato, “Iya, ahi baluhu, o kia naga abe nohiperelu ngohi?” De ma malaekata wotemo wato, “Ma Jou wosanangi wamake ani datoro ma rorahai! Abe Una wonimake ma oraha nomaniata de abe o dora ma hidoaka ngona nahidoa-doaka o hu-huha ma nyawaika.

⁵ Ho naa ngona kiani ani nyawa yamuruono naga nahidingoto o Yope ma kapongika, la genangoka iwilingiri womatengo ai romanga o Simono Peturusu.

⁶ De una gea womadioniki o Simono ai tauoka abe ma Simono gea ai karajaanga o aewani ma kai watobatebini ka hiadono inouhu. De manga tau gea imahitigino de o gahi ma ngigoroka. Ho ngona kiani nibehehongo o Simono Peturusika la una woboaino wonitutumu abe naa to ngona ani tauino.”

⁷ Ho ka de ma malaekata wosoboka de o Koroneliusu wahokino ai nyawa yaruange. Abe yahinooto onangino yodadi ai duduhunu ai tauoka, de abe womatengoli unangoo witobaduhunu o Koroneliusika, masara una gea o tentara ma nyawa. De ma tentara gea, unangoo naga ai horomati ma amoko abe itagi Ma Jouika.

⁸ De o Koroneliusu una wahingahu yaruangeika mata-mata abe wamakeoka de woihenoka ma malaekatino, de ahao wahidingoto ona o Yope ma kapongika.

⁹ De ma dawangeino de ona yaruange gea ngade-ngade yomahiadono o Yope ma kapongika. Masara ko yomahiadonuahi de doka o Yopeoka o Peturusu wodoaiye o tau ma lokuiye abe ma baka-baka gea la womaniata genangoka. De itigioka o wange ikorona

¹⁰ masara ma inomo ka yahidiaiohi ho una iwihafinoka. De womaniata ai gogiriaka de una ngade-ngade hoka iwikiooko masara gea ko iwikiookua ho ai hiningaka wamake o himatoko moi Ma Jouoka de aino.

¹¹ De ai himatoko ma goronaka de wamake abe ma dihanga ifelengaika, de naga daku de auku iuti moi abe ma rupa hoka o ngoere ma amoko. De ma ngoere gea ihidowora abe ma aribarene iatika alikoika la ka idadi ihiguti.

¹² De ma ngoeroka naga o aewani irupa-rupa, abe utu de ma lou iata, de utuoli abe imalia-liara o tonakoka, de utu o totaleo abe ihoho daku ma dihangoka. Ho naga ma aewani duru ma ngoe o ngoeroka gea.

¹³ De ahao una woihene o ilingi moi itemo unangika ato, “Peturusu, nomaokoino de nomadoma la ka idadi naolomo!”

¹⁴ Masara una wopaluhu wato, “Ahi Baluhu, ngohi duru ko tadadiua! Angamoi ahi etetekinohi de hiadono naa de ko ma moiuahi taolomo ma roehe abe to ngomi mia Pareta imihuloko ato gea ko idadiua ma roehe gea miolomo.”

¹⁵ De ma ilingi itemoli ato, “Nako hiadono Ngohi Ma Jou tonihingahuoka abe tohitebinoka la ma aewani eko ma roehe gea ko iwaka ma bohono ma Paretaino, gea ibootohi nomahibohono enangika masara ka idadi naolomo.”

¹⁶ De ma himatoko gea Ma Jou wohigalioli ma hange o Peturusika, de ipaha ma ngoere gea imagorakiyeoli daku o Horogaiye.

^17-18 De ona yaruange gea abe o Koroneliusu wahidingo-dingotoka ona yomahiadono ma kotaino de yoleha o nyawaika la ka idadi ihioriki o Simono ai tau gea o kiaka imanoa. De ipahaino yogila-gila de yomahiadono ma tauika ho ona yomaokoino ma loa ma ngoranoka. De ona yoaho-ahoko la ihioriki nako o Peturusu womadionikino o tau naa. De duru ma oraha gea de daku o tau ma lokuoka de o Peturusu ai hininga iwangoroka de una duru wolilifanga abe ko wohiorikuahi ma titi ma himatokino gea.

¹⁹ Ho o Peturusu ka womalingi-lingirohi ma himatoko ma titi, de ahao Ma Jou o Womaha witemo unangika wato, “Naga o nauru yaruange yoboaka inilingiri ngona.

²⁰ Ho ngona nouti natutumu, de ka idadi nimakiniiki de de ona abe manga dumutika. De ufa ani hininga ihuha, angamoi ahao ma rorahai dika ngona namake, abe Ngohi ma hirete tahidingoto ona yaruange gea.”

²¹ De gea o Peturusu woihene ho ka wouti watutumu de watemo onangika wato, “Ngohi naa abe ngini nihilingiri. Ho ani dodagi ma titi o kia hiadono niboaino?”

²² De ona ato, “To ngomi mia baluhu o Koroneliusu, una gea abe womihidingoto naangino. De mia baluhu una gea o Roma ma tentara manga haeke. De una ai wowango ma datoro itotiai, de duru wihoromati Ma Jouika. Ho o Yahudi ma nyawa ai kapongoka ona mata-mata duru iwisanangi de iwihoromati o Koroneliusika. Ho kanugono Ma Jou ai malaekata womatengo witemo unangika de wihuloko la una wonibehehongo ngonaika. De bari wonibehehongo angamoi kiani ngona nominiiki to una ai tauika de o hingahu ma demo notemo-temo unangika. Hokogea mia dodagi ma titi.”

²³ De gea woihene ipahaino de ahao o Peturusu wahoko la ona yomahidodogumohi o futu moiino unangoka la ma dawangeino ka yongorumu yomakiniiki yosobo. De igoungu ma dawangeino ona yaruata de nagali iwingaku-ngakuoka yamuruono naga o Yope ma kapongino, ona mata-mata yomakiniiki yosobo abe manga dumutu o Kaisarea ma kapongika.

²⁴ De manga dodagioka de kiani yomaidu o futu moi, ho ma dawangeino de yomahiadono o Kaisarea ma kapongika. De o Koroneliusu una wadodamaa, abe una watoomuinoka ai tau mata-mata de ai olo yamuruono naga la onangoo ka idadi yomakamake de o Peturusu.

²⁵ Ho ka de o Peturusu wowohama o Koroneliusu ai tauino de ma tau ma dutu womataiti womamotumuku la wato womahuba o Peturusu ai himangoka.

²⁶ Masara ka de gea wamake de o Peturusu witauriye la womaokoinoli de witemo wato, “Ngona kiani nomaokoino dika, angamoi ngohi naa ka o nyawa biaha dika abe imaketero hoka ngonali.”

²⁷ Ho gea woihene de o Koroneliusu womaokoino de yomakoketemo, de ahao yogila-gila doka ma tau ma goronaika abe genangoka ona mata-mata yomatoomuinoka.

²⁸ De o Peturusu wahingahu onangika wato, “Ngini marai nihiorikoka abe nako taniiki to ngomi o Yahudi ma nyawa mia Pareta de tanu ko idadiua nia tau naa towohamino angamoi ngini ko o Yahudi ma nyawaua. Masara Ma Jou wohihimatokoka ngohino abe ko idadiokaua tohikohowono o nyawa. Abe ko idadiua o nyawa utu taetongo o nyawa abe Ma Jou ko wadafongua. Ho gea ngohi ibootohi taoluku ma nyawaika gea masara ka idadi tadodiawo o nyawa mata-mataika.

²⁹ Ho gea ma titi hiadono ka de toihene o tau ma dutu naa ai behehongo de tosoboka la toboa naangino, abe ngaro ngini naa ko o Yahudi ma nyawaua. De naa togahoko la nihihingahu ma titi o kia hiadono nihibehehongo.”

³⁰ De o Koroneliusu wopaluhu wato, “Ma futu iata abe o bimaowaka o takoro hange de ngohi naga ahi tauoka tomaniata. De ka itodokanino naga womatengo womaokoino ahi himangoka de ai baju duru de ma dararonoka.

³¹ De una wohihingahu wato, ‘Koroneliusu, to ngona ani niniata ma demo Ma Jou woihenoka, de abe o dora ma hidoaka nahidoa-doaka o hu-huha ma nyawaika gea Ma Jou wamakeoka ho ai hininga itagi ngonaika.

³² De naa ngona kiani ani nyawa yamuruono naga nahidingoto o Yope ma kapongika, la genangoka iwibehehongo womatengo ai romanga o Simono Peturusu. Abe una gea womadioniki o Simono ai tauoka abe ma Simono gea ai karajaanga o aewani ma kai watobatebini ka hiadono inouhu. De manga tau gea imahitigino de o gahi ma ngigoroka.’

³³ De ka de toihene ma malaekata ai demo gea de ahi nyawa tahidingotoka la tonibehehongo. De ngohi duru tosanangi de totarimakase ngonaika abe noboaka ahi tauino naa. Ho naa ngomi nenangoka mimatoomuinoka miododamaa Ma Jou ai himangoka la miato ka idadi miihene ma hingahu ma demo abe nanga Baluhu idodutu wonihidoaka ngonaika.”

³⁴ De o Peturusu wotemo wato, “Naa de ahao ngohi tohioriki de duru itararono abe Ma Jou ko wairikua o nyawa.

³⁵ Abe o nyawa mata-mata ngaro o tonaka o kiaka dika yogogere masara ka idadi Una wadafongo o nyawa onagona dika abe iwihoromati Unangika de abe manga datorino de yodiai ma rorahai ai himangoka.

³⁶ De ngini naa marai niihenoka abe ma titi o Abari ma Rorahai abe Ma Jou wohidingoto ngomi o Isiraele ma nyawaino. De ma abari gea imihingahu abe o Yesusu Kristusu Una gea to ngone o nyawa mata-mata nanga Baluhu idodutu. De genangino inahingahuoli abe o nyawa ka idadi naga manga gogao itiai Ma Jouika ma titi o Yesusu Kristusu ai datorino.

³⁷ De marai ngini niihenino abe hokokia idadi to ngomi mia tonakoka mata-mataika. Abe ma dihiraino de o Yohanese Wotobaohi-ohiki wahigaro o nyawaika wato kiani yoporete manga howo-howonika la ahao ka idadi waohiki onangika. De ipahaino de o Yesusu o Galilea ma tonakoka de womulaenge womihimatoko Ma Jou ai kuaha. De gea wogila-gila wahimatoko ma kuaha gea to ngomi mia tonaka mata-mataika.

³⁸ Abe o Yesusu Una o Nasaretoka ma nyawa, de Ma Jou wihidoaka Unangika Ma Jou o Womaha de nagali Ma Jou ai kuaha duru kohaamoko wihidoaka Unangika. De gea wihiakunoka de ahao o Yesusu wotagi-tagi abe ai datoro ma rorahai ka ihikaika wotobadiai. De o nyawa mata-mata abe o Ibilihi ma haeke yahikokangela onangika de o Yesusu wakokiduhunu manga kokangelaino gea. De gea mata-mata wakunu wodiai ma titi Ma Jou naga de de Una.”

³⁹ “De ngomi o hidingoto ma nyawa ngomi miamake ai datoro gea mata-mata wodiaioka abe ngaro o Yerusaleeme ma kotaka wodiai de ngaro abe to ngomi mia tonaka mata-mataika. De ona o Yerusaleemoka ona gea abe iwihohonenge o gota isosalioaka.

⁴⁰ De iwihohonenge de ahao o wange hange dika ipahaika de Ma Jou wihimomiki ai honengino la wowangoli. Womomiki ipaha de Ma Jou wihigunoa la ka idadi womahimatoko o nyawaika.

⁴¹ De gea ko ma titiua womahimatoko o nyawa mata-mataika, masara ngomi utu dika abe ma dihirainohi de womiirikokau la wato ahao midadi to Una ai hakihii ma nyawa. Ho ngomi abe miahingahu-ngahu o nyawaika ma titi ai momomiki gea. Abe ngomi naa ma oraha womomikoka ai honengino de ngomi de Una mimakutuono miolomo de miokere.

⁴² De nagali Una womihuloko ngomino la miloiki ma ngi de ma tonaka mata-mataika la miahingahu-ngahu ma titi to Una ai Abari ma Rorahai. De gea kiani mihingahuoo abe Ma Jou wihitagongo o Yesusika la Una ahao watailako de waurusu o nyawa mata-mataika, abe ngaro ona ka yowangohi de ngaro ona yopopahaka.

⁴³ De abe Ma Jou ai uru ma dodofanga ma demo, to ena mata-mata ma hidumutu ka o Yesusika dika. Abe ona yotemo ato onagona dika iwingaku Unangika ka idadi manga howo-howono waofioka ma titi to Una ai romangino.”

⁴⁴ De o Peturusu ka witemohi ai demo onangika de ka itodokanino Ma Jou o Womaha woboauku de walufungu to ona mata-mata manga kokihininga abe yotoihene o Peturusu ai demoika.

⁴⁵ De o Yahudi ma nyawa abe iwingaku-ngaku de abe yomakiniiki de o Peturusu genangika, ona duru yoheranga ma titi Ma Jou wihidoaka ai Womaha onangika abe ko o Yahudi ma nyawaua.

⁴⁶ De gea ko idadiua yaoluku abe gea igoungu Ma Jou o Womaha woboa o nyawauku gea, angamoi ona ma hirete yoihene de manga ngauku abe ona ko o Yahudi ma nyawaua gea yotemo-temo de o demo o fara moi abe ko yomadotokua. De nagali yamake abe ona ko o Yahudi ma nyawaua duru iwihigiriiri Ma Jouika. De ahao o Peturusu waleha onangika wato,

⁴⁷ “Sarakia, naga o nyawa nenangoka abe ato ko idadiua o nyawa naa haohiki onangika? Koua! Irahai haohiki angamoi ngone mata-mata hohiorikoka abe ona Ma Jou o Womaha iwiborimake imaketero abe hoka ngoneoli ma dihiraino himake!” Hokogea o Peturusu ai demo.

⁴⁸ Ho una wahuloko la ona ka idadi yomaohiki ma titi manga ngongaku o Yesusu Kristusu ai romangika. De yomaohiki ipaha de ahao o Koroneliusu wogahoko la o Peturusu womahidodogumohi o wange muruonohi unangoka.