Habaku 3 - Ma Jou ai Demo-demo o Totobelohoka

3:1-19 ko atailakouahi O Habaku ai niniata ma demo Ma Jouika

¹ Ma demo naa Ma Jou ai uru ma dodofanga o Habaku ai niniata ma demo abe una wohitulihuku. De wotulihi ipaha de ma demo idadi manga nyanyianga moi. De abe ma oraha yonyanyi ma nyanyianga naa ena, una abe wahihira-hira manga doomuoka kiani wahuloko la ona abe yososawaro yokuti-kuti onangoo yaniiki la ma ilingi duru irahai ma oraha yonyanyi.

² De hokonaa o Habaku ai niniata ma demo. Abe una womagahoko wato, “Ahi Jou o Yawe, ngohi naa toihenoka ma titi to Ngona ani datoro ma rorahai abe ma dihiraino nodiai. De gea toihenino de duru ahi hininga aomanga de o higiriiri Ngonaika. De ma oraha naa, mia Jou, ngomi duru miperelu to Ngona dika ani duduhunu, ho ngomi duru mimagahoko la ani datoro gea nohigalioli la ka idadi nomiduhunu mia kangelaino naa. De igoungu abe ma oraha naa marai Ngona nomingamo ngomino. Masara duru mimagahoko la ma oraha nomidotoko de nagali ani hininga ma dora ma hiokoo abe ka idadi napake ngomino!”

O Habaku wamake Ma Jou ai bobuturungu

³ Ngohi o Habaku tomaniata ipaha de ahao Ma Jou wohihimatoko moi ngohino abe ma himatokino gea de ka idadi tamake Ma Jou ai buturungu. De hokonaa ai himatoko ma dola tamake. Ngohi timake Ma Jou Una o Edomo ma tonakoka de waino woboa. Una abe Wotebi-tebini o Parana ma lokuoka wosoboka de naa woboaino naangino. De ka idadi tamake to Una ai medebini ma dararono daku ma dihangoka arihonongaka. De nako dau o duniauku naa ngaro o kia-kiaka dika masara naga o nyawa abe iwihigiriiri Unangika.

⁴ De to Una ai dararono duru itararonoholi abe hoka o leletongoli ma dararono. De igoungu naga o leletongo abe ihupu to Una giama arihonongaka de aino. Angamoi ai kuaha duru ikiria imanoa ai giamoka gea.

⁵ De abe ma oraha Una ai dodagi ma goronaka woboaino de wohiaturu la naga o panyake enangoo itagi de akorona ai musuika. De ngaro ai poretino masara nagaoo o gogama ma dorou iwihidoduruino.

⁶ De abe ma oraha womatogumuku ai dodagioka de ma tonaka duru ikelu-kelu. De nako hiadono Una womalegaika dika o dutu ma nyawaika de ona duru iwimodongoka. De gea ngohi tamake o loku-loku abe duru ma dihirainohi naga to ena ma ngioka masara gea ka idadi ipelaka hiadono itoropa. Abe ma dodihiraka de Ma Jou Una wotagi-tagi o loku-lokuoka gea, masara naa de ko ipukuiyeokaua angamoi idadi hoka o dola ma tonaka abe itiaiika dika.

⁷ De gea ngohi tamake o Kusana ma nyawa manga hijai-jai ma tau itoropaha, de ngaro o Midianoka manga tau enangoo ihigiwi-giwi.

⁸ Ho marai ma titi o kia hiadono Ngona ahi Jou o Yawe ani ngamo ipuda de noboa la nato noparangi? Bote ani ngamo itagi o akere ma ngoeika, eko marai o gahi abe idadi ani ngamo ma dumutu? Abe ma oraha o lobi-lobi nofarene hoka ani goroba parangi la noboaino de nao ani duduhunu, gea ani ngamo ma dumutu o kiaika? De gea maraioka Ngona notagi-tagi noboaino la ka idadi naduhunu to Ngona ani nyawa. De ngaro ani Huhuloko abe ma dodihiraino niirikoka masara Unangoo niduhunu ma titi ani boa.

^9-10 De to Ngona ani toimi nagorakoka de nomahidiaioka la napake gea. De abe to Ngona ani hihiipi enangoo imahidiaioka la Ngona nahidingoto to ena ma dumutika. De ma oraha o loku-loku inimake de duru ikelu-kelu. De ipaha ma oraha nodiai o awana koharikimi la o akere ihahuruku daku ma lokuoka de auku de ma tonaka ipelaka / ipewanga la idadi o akere ma dodagi. De ipaha dai ma gahioko ma akere gea imahiadonoko de ma ngooto gea hoka imapoa-poaka de ma ruruhu ma amokiye. De ma ngooto gea ma moku-moku duru ifaeiye kohagurutiye.

¹¹ De abe ma oraha nohidingoto ani leletongo de duru ipalesaholi itagi ma dumutika abe imaketero hoka o hihiipi ma palesa. De to ena ma dararono duru itararonoholi. De gea tamake ma wange de ma mede imatogumuku dika ma dodagioka ho ko itagiokauahi.

¹² De Ngona nomakode-kode o dunia ma lokuino ma titi ani ngamo duru ikiriaholi. De o dutu ma nyawa gea nadoko-doko angamoi ani ngamo ifaeiyeoka.

¹³ De gea igoungu abe Ngona notagi-tagi noboaino la ka idadi naduhunu to Ngona ani nyawa. De ngaro ani Huhuloko abe ma dodihiraino niirikoka masara Unangoo niduhunu ma titi ani boa. Ho nako ona o dorou ma nyawa Ngona noboaino la nahibinaaha onangika. Abe to ona manga hidimono nipoha unanguku de ai nyawa mata-mata duru nahikala.

¹⁴ Abe ani musu gea ona mata-mata yomataiti yokokiboaino la imihikabarihi ngomi aika aino. De manga palesa gea imaketero hoka o rato abe ka itodokana dika de imidaenoka. De ma oraha yomahitigino de ona yokokimorene angamoi yosanangi dika yomatohiki yoboaino la imihikangela ngomi o hu-huha ma nyawa. Masara Ngona nomiduhunoka ma oraha nahikala onangika gea. Ho nanga musu gea manga hohidimono abe yotobamoroini yoparangi, ona gea nahiaturu la manga dodiawo manga hihiipi yakorona to ona manga peaika!

¹⁵ De nagali abe Ngona o lobi-lobi nofarene abe imaketero hoka o kudaka nofarenuku. Ho gea nofarene de notagi-tagi de nodoko-doko o gahi ma lokuino hiadono ma gahi duru ihaaranga. Hokogea dika aika ma himatoko abe Ma Jou wohihimatoko ngohino.

¹⁶ De gea mata-mata toihene de tamake ipaha de ngohi duru tohawana hiadono tofafara ahi badanga ma amokika. Abe ahi uru ma kai itodara / ifafara, de ahi kobongo hoka ko iwaka ma buturungu ho ilamaanoka. De ngaro ngohi tato totagi-tagi ma ko takunokaua ma titi ahi lou ibole-boleoka. Ho ngohi duru tododamaa de tongano-nganono la ma wange adono abe Ma Jou Una woboaino de wahikangela mia musu gea abe ka ihikaika ona imihikangela de imingohama ngomi naa. O Habaku ai higaro ma demo naa ma titi ngaro hokokia ma amoko nanga huha masara ko parahajaua ngone homahinganono Ma Jouika. Angamoi Una dika ka idadi wonahigarago nanga huha ma goronaka ma titi wonahihupuoka nanga howonino. De to Una ai buturungu ka idadi wonahidoaka ngone homoi-homoiino.

O Habaku ai hilaru ma demo O Hitararono ma hidogo

¹⁷ “Ngaro o hofoko ma gota mata-mataika ko ihuriokaua, De ko iwaka o angguru ma hofoko, De ko hamakeua o minya mangale to ena ma hofoko ko iwa, De o redioka ko iwangoua nanga inomo, De ngaro nanga domba ko ilioua ma kurungaika, De nanga hapi ma kurunga enangoo ma homoa,

¹⁸ Ma, ngaro hokogea, ngohi tidogaragohi Ma Jou o Yaweoka, De tihigiriiri Ma Jou abe wohihihoheoka ahi howonino,

¹⁹ Mangale Ma Jou o Yawe abe mata-mataika naga ai kuahaka, Una Wokokurutiye gea wodadioka to ngohi ahi buturungu, Ho ahi lou tagoraka ma moguwini hoka o luadana, De ngaro o loku-loku ma mobootuku ma ngohi tapoa touti-doa, De ko topelekua de ko toboditoua ngohi naa.”