Habaku 2 - Ma Jou ai Demo-demo o Totobelohoka

2:1-20 ko atailakouahi Ma Jou ma moioli wipaluhu o Habakuika

¹ De o Habaku una womatemo wato, “Ngohi tomaniata ibooto ho naa todamaa dika hokokia Una wohipaluhu. Abe imaketero hoka ngohi todoa o tau ma gurutu ma dekariye la togoa-goana genangoka. De gea tododamaa dika hiadono ka idadi toihene to Una ai babaluhu abe ahi bobeto ma demoino.”

² De ipaha Ma Jou wipaluhu unangika wato, “Ahi demo naa ngona kiani nohitulihuku itararono o hakaru ma baka-bakauku la ahao o hidingoto ma nyawa ka idadi yao ahi demo de o nyawa utuika yahingahu-ngahu itiai onangika.

³ De ahi demo naa ma dola ko ma titiua ma oraha naa dika de gea idadi masara nia himangoka de ahao naga ma oraha idadi. Abe marai ngini niataoko itedekanaholi abe ko idadiuahi ahi demo masara kiani nimatongohono dika. Angamoi duru igou-goungu ahi demo, ho ahao naga ma oraha abe idadi de gea tanu ko ikapaangua.

⁴ Ho hokonaa ahi demo abe ngona kiani nohitulihuku. Abeika o dorou ma nyawaika. Ona gea manga datoro ko itiaiua de gea ma hofoko ka yohonenge dika. Masara o nyawa abe yototiai ahi himangoka, ona ka idadi yowango ma titi manga datoro ma totiaiino gea.”

⁵ “Ho abe ma titi ti ngini nia musu gea, ka idadi tinihingahu dika hokonaa. Duru igoungu abe nako o nyawa manga kaya, gea idadi hoka o o modoi onangika. De ona abe yomagora-gorakiye manga hafini duru ko iwa ma hiaini. Ho ona gea yomaketero hoka o hone-honengoli abe ka ihikaika yohafini ato kiani utuohi ilamoko to ena ma inomo aolomo. Angamoi nia musu gea ona ka ihikaika yohafini o nyawa utu manga kiahonanga de manga wowango. Ho gea ko iwa manga hiaini masara ka yapoparangi dika hiadono yahikala de hoka yalahiri manga musu abe yomahitoona dika ma nyawa gea.

⁶ Masara ko itedekanuahi de marai manga musu onangoli ka idadi yamia-mia onangika. Abe ona ahao yotemo ato, ‘Naa ma duruino de ngini nimagora dika o nyawa manga kiahonanga la ka idadi ti ngini nia kaya itou-touniye. Masara nia datoro gea ko ihikaikaua angamoi ahao kiani naga to ena ma dodogumu. Abe itigioka ma oraha abe nia hininga ma huha iboaino de duru inihikangela nginika.

⁷ De o nyawa utu mata-mata abe niahipareta, ona gea ka itodokanino dika de yomasikaa la yomahibalaha nginika. Abe ona ka ma moi inibaata nginika de gea duru niamodongo onangika. De gea ka idadi onangoli yomagora ti ngini nia kiahonanga la yomahitoonangoli.

⁸ Ho mangale ma titi ngini niaparangi o dutu ma nyawa manga ngoe-ngoeika de niahirusaka manga kapo-kapongo de niatoma ona yowoe-woeika ho naa to ona manga hou onangoli yomahibalaha de inihirusaka nginika!’”

⁹ De manga demo gea ihigila-gila abe yotemo manga musu o Babele ma nyawaika ato, “‘Hiokoo ngini abe nimagora o nyawaino la ka idadi nihigoko nia tau duru ma amo-amoko. Angamoi ngini nimahinganono nia kayaika dika de niato genangino nimamake o hininga ma miriidi de ko kia-kiaua iniruwae ngini o tau moi.

¹⁰ Masara hokogenangua! Mangale ma titi niatoma-toma o nyawa hiadono imaketero hoka nimahiwewedere nia roma-romanga de tanu nimahirusaka dika ngini ma hirete!

¹¹ Ho mangale ma titi nia datoro gea hiadono imaketero hoka ti ngini nia tau ma kiahonanga inibobeto nginika. Abe ngaro to ena ma dadaduhu de ma dudukuru masara gea ipoa-poaka ma titi nia datoro ma dorou!’”

¹² “‘Hiokoo ngini abe nia tiwi nimamake nia datoro ma dorou de nia domaino la nihigoko nia kota-kota. Angamoi ngini ahao nia huha duru ma amoko inidaene!

¹³ Abeika ngini nitotoihene Ma Jou Wokokurutiye ai behehongo ma demo naa. Una winihohowono ma titi o nyawa manga ngoe-ngoe gea abe niataokino de niaribuutu de niahuloko la ma titi to ona manga karajaanga ma dubuho de ngini niamake nia tau-tau. De manga karajaanga ma hasili gea parahaja dika, angamoi ti ngini nia tau ahao ikokirusakoka!

¹⁴ De ahao ma oraha o nyawa yamake abe nia tau irusakoka gea de marai o nyawa mata-mata o duniaka naa ka idadi ihioriki abe Ma Jou Una ai medebini ma dararono duru ilamoko!’”

¹⁵ De ona yogila-gila yotemo ato, “‘Hiokoo ngini abe niaribuutu nia date-datekoka la hiadono ona yadalukoka. Angamoi ngini ahao nia huha duru ma amoko inidaene! Abe ngini nengokadauino de niaribuutu o dutu ma nyawa-nyawa ma titi nia ngamoino hiadono duru yamaleke imaketero hoka ona yadalukoka ahao yamalekoka.

¹⁶ Masara naa adonoka ma oraha la nginioli inimaleke! Abe ma dihiraino de ti ngini nia romanga ihigorakiye, masara naa ka idadi inihitipokouku. De gea ma titi Ma Jou o Yawe winiribuutu la to Una ai ngamo inidaene nginiuku.

¹⁷ Ho ti ngini nia hohowono Ma Jouoka ka idadi mihiketero hokonaa. Ngini ma dihiraino de niatola-tolanga o gota duru iwoe o Libanono ma tonakoka, ho naa nia datoro gea ilioli nginika de nginioli niwoe-woe initolanga! De moioli, ngini ma dihiraino de o fuhuku ma aewani ma ngoeika niatoma, de ena gea duru inimodongo. Ho naa nia datoro genangoo ilioli nginika abe ngini ahao duru niomodongo Ma Jou ai hohowonika! De moiokahi, ngini ma dihiraino de o nyawa manga kapo-kapongoka de manga tonakoka ngini ka niatoma-toma de niahikokangela o nyawa genangoka. Ho naa nia datoro gea ilioli nginika ma oraha Una winihohowono!’”

^18-19 De nagahi o hohedu ma demo utu abe ihidumutu o Babele ma nyawaika, de gea itemo ato, “‘Hiokoo ngini abe nimadiai nia popangao. Angamoi ngini ahao nia huha duru ma amoko inidaene! Abeika, done ma utumu o kia o nyawa yamake o pangaoino? Ko iwa! Gea idadi o nyawa dika manga giamino, ho done sarakia ma nyawa gea yomahinganono enangika? Abe hoka ngini niagoraka o papaawa eko o honotoko la o pangao ma rupa niapakoro. De gea nimadiai ibooto de ahao nihuloko enangika la imomiki ma giookoino de inihihira-hira de to ena ma sosawaro! Eko nihuloko la iniduhunu nia kangelaino. Masara gea nia demo enangika duru ka parahaja dika, angamoi ngaro ma pangao gea ihilapeoka de o gurasi eko o haaka ho ma rupa ma hohailoa, masara doka ma goronaka de duru ko iwa to ena ma wowango. Ho ena gea duru ko idadiua itemo de ipaluhu nia gogahoko, masara bote ka idadiohi gea inibudi angamoi ngini nimahinganono enangika! Ho gea done sarakia?

²⁰ Masara nako Ma Jou o Yawe Una wagou-goungu naga ai Tau ma debi-debinoka. Ho koaho o dunia ma nyawa mata-mata yomarii-riidoka to Una gea ai himangoka.’”