Habaku 1 - Ma Jou ai Demo-demo o Totobelohoka

1:1-17 ko atailakouahi Ma Jou ai uru ma dodofanga o Habaku wagahoko Unangika ma titi ai gogianongoru de Ma Jou wipaluhu 1:1—2:20

¹ Ma demo naa Ma Jou o Yawe wahingahu ai uru ma dodofanga o Habakuika o himatoko ma goronaka.

O Habaku ai daiana ma demo Ma Jouika

² De o Habaku witemo Ma Jouika wato, “Ahi Jou o Yawe, done hokokia ma dekana ngohi kiani tohigali-gali tomagahoko o duduhunu Ngonaika? Angamoi Ngona ko nohipaluhuahi! Abe ma muruono ibooto tonihingahu ma titi o kangela de o huha ngomi miaohana, masara Ngona ko nomiduhunuahi! Muruonoka de ahao nomiduhunu ngomi naa?

³ De ma titi o kia nohihimalaika hiadono kiani tawuningi dika ma oraha tamake o datoro ma dorou? Abe ka ihikaika tamake o nyawa yomahiketehikokangela de yomakopoha de hiadono yomakotoma. Tanu irahai Ngona nahitogumu dika manga datoro ma dorouino gea la ufa ka yogila-gila dika, masara Ngona naa ko kia-kiaua nodiai! Ho ngohi naa imaketero hoka ihihigororomino de o nyawa abe yomaketeribuutu de yomaketeloliliara dika.

⁴ De mangale ma titi manga wowango hokogea hiadono to Ngona ani Pareta duru ko ilakuokaua ngomioka! Ngaro yaurusu o nyawa ma titi manga dorou masara gea duru ko ihofokua. De barikua o hiurusu ma ngioka de o dorou ma nyawa ka idadi yahikangela o totiai ma nyawaika! De gea ma titi hiadono o totiai duru ko ilaku-lakua ngomioka.” Hokogea o Habaku ai daiana ma demo Ma Jouika.

Ma Jou wipaluhu o Habakuika

⁵ De ahao Ma Jou o Yawe wipaluhu wato, “Abeika ngini nimalega-lega o dutu-dutu ma nyawa utuika de nimafiki-fikiri abe ma titi hokokia niamake onangoka. Angamoi ma oraha ngini ka niwangohi de Ngohi todiai moi onangoka, de nako hiadono niamake ahi datoro gea de ahao duru niheranga hiadono inihitodokana. De gea ngaro hoka ma dihiraino de inihingahuokau masara ka de niamake de duru nikangela niangaku abe igoungu idadioka.”

⁶ “Ho abeika, Ngohi naa itigioka tahiakunu o Babele ma nyawa la yaparangi o nyawaika. De igoungu ona gea duru manga hininga aomanga de o dualono de o horoodo. De ahao ona gea duru de manga hiapoto yotagi-tagi o dunia ma lokuino la yaparangi o dutu ma nyawa manga ngoe-ngoeika. De gea ahao yahikala onangika de yomahitoona o tonaka ma ngoe.

⁷ De ona gea o nyawa utu mata-mata duru yamodongo onangika, angamoi yaniiki to ona ma hirete manga hininga ma mau dika ho duru ko yolegaikaua o nyawa manga paretaika.

⁸ De ona gea manga kuda duru ipalesa imaketero hoka o fuhuku ma boki ma ago-agomoli ma palesa. De hongoli manga kuda gea duru itualono hoka o fuhuku ma kaho abe imaino-inomo o wange ilobioka. Ho o Babele manga tentara ma gurutoka de yaino yoboa abe yofarene manga kudauku gea, de ahao yomataiti yomahitigino la yaparangi o nyawaika. De gea imaketero hoka o koloba abe daku ma dihangoka imalingiri ma inomo de ka itodokanino iutiuku de imale o aewani ma eteteke moi de imadoma.”

⁹ “De o Babele ma nyawa ona gea manga hininga ma dumutu la yahitobahikokangela o nyawaika, ho yokokiboaino la yoparangi. De gea ona yoboaino de yabaata manga musuika de yataokino ko manga ngoe hiadono ona yatao-taokino ngade-ngade ko hakunua haetongo.

¹⁰ De o Babele ma nyawa gea yahohedu dika o nyawa utu manga kokoano de manga hohidimonika. De ngaro yomahiadono o kota ma dadaduhu abe duru iputurungu de ikurutiye masara enangoo yaetongo ko kia-kiaua angamoi naga manga sosawaro la ihikala enangika. Abe o tonaka de o hakaru duru iwoe yaoino de yafafo ma tonaka de ma hakaru gea la manga tako-tako ma ngekomo yodiai abe ihiheharika ka hiadono o kota ma dadaduhu daku ma bareniye. De hokogea yodiai manga tako-tako ma ngekomo ibooto de ahao yaniiki ka hiadono yomahiadoniye de ka idadi yangohama o kota ma goronaika de yahikala ma nyawaika gea.

¹¹ Ho ona gea ma oraha yaparangi o nyawaika de ka idadi yomataiti yahikala onangika. De yahikala ipaha de ahao yogila-gila o dutu eko o kota moiikali de onangikaoo yaparangi hiadono yahikala onangika. Masara ona gea duru yahowonoka, angamoi yomaetongo ona ma hirete ato yodadioka yomaketero hoka o jou-jou. De gea ma titi hiadono kiani manga hohowono yadaene onanguku.” Hokogea Ma Jou o Yawe ai babaluhu o Habakuika.

O Habaku ai daiana ma demo moioli Ma Jouika

¹² De ipaha o Habaku ma moioli womaniata Ma Jouika wato, "Ahi Jou o Yawe, tohioriki abe Ngona naa duru ma dodihiraka de Ngona nagau, de ka ihikaika ani hininga ma rorahai dika. De Ngona nomigoa-goana la ufa ngomi mihotumu, abe nomahidadi hoka to ngomi mia dadatoko. Masara naa done ma titi o kia hiadono nahidingoto o Babele ma nyawa gea la imihikangela de imihohowono ngomino?

¹³ Angamoi Ngona naa notebi-tebini dika de ko napoaua namalaika o datoro ma dorou. De ona gea yahiraramaka de manga hafini ma dorou! De hadongoo ona gea ka ihikaika yahikala o nyawa utuika abe manga howono ikuranga iwoe, masara Ngona ko nahohowonuahi ma titi manga datoro gea! Done ma titi o kia Ngona ko nomasikaauahi?”

¹⁴ “De naa tonihingahu dika ahi bobeto moi. Abe mangale ma titi Ngona ko nomiduhunua ho ngomi naa midadi mimaketero hoka o nawoko dika eko hoka o aewani utu o gahi ma goronaka abe moioo de ko iwa mia haeke la womiduhunu.

¹⁵ Ho o Babele manga tentara gea ona ka idadi imiamono dika hoka ngomi o nawoko de ona yapake o gumaa eko o homa ho igapanga imitaokino. De ona imitaoko ipaha de ahao ona mata-mata yokokimorene de yohagaaga!

¹⁶ De gea manga lolakuino de yomahitoona to ngomi mia kiahonanga de mia aewani mata-mata hiadono ona manga inomo duru ifoloiholi de ko iwa manga kuranga. Ho mangale ma titi manga kaya gea hiadono manga huhuba ma ngoe yomahihuba manga jou-jouika.

¹⁷ De hokogea to ona manga datoro abe ka ihikaika yahikokangela o nyawaika de ko iwa manga hininga ma dora ma hiokoo ho duru ko yomatogu-togumua. Ho naa tonileha, ahi Jou, done hokokiahi ma dekana Ngona nahigunoa ona gea la yogila-gila dika de manga datoro ma dorou?”