Gogao 6 - Ma Jou ai Demo-demo o Totobelohoka

O howo-howono abe kiani yahitiai Ma Jou o Yaweika de o nyawaikaoo

¹ De Ma Jou o Yawe wogila-gila wihingahu o Musaika wato,

² “De nahingahu o Isiraele ma nyawaika abe manga howono o nyawaika gea igoungu o howono Ma Jou o Yaweika. Abe hoka naga o nyawa abe to ona manga kiahonanga ihidodogumika de manga dodiawo manga datekoka la gea yogoana manga kiahonanga gea. Masara ma bahauku de ona abe yogoana ma kiahonanga gea yahingahu ma dutuika ato ihihangoka, eko ona ato ena gea o nyawa yatohikoka. Masara manga demoino gea de yoeluku dika hiadono manga dodiawo yarusi. De naga o howono o fara moioli abe o nyawa yodiai manga dodiawoika abe ona manga datekoka yadohiki. Ekola naga o nyawa ato to ona ma hirete manga kiahonanga yofukunu de ma ija yahingahu o nyawaika. De ahao naga o nyawa abe yomaija masara ka yofangu ma hononga dika. De ahao ma oraha yoboali la ato ma ija ma hou yofangu o kiahonanga ma dutuika, masara ona abe yofukunu yogahokoli ato kiani utuohi ihidogo ma ija. De hokogea manga rusi yodiai manga dodiawoika. Ekola ihira yofukunu manga kiahonanga yapake ma ija ko itiaiua ka hiadono yaribuutu la kiani yofangu utuohi ilamoko ho ihifoloi manga utumu de enangoo ihititi o rusino. Ho o nyawa manga howono o nyawaika mata-mata hokogea o howono duru Ma Jou o Yaweika.

³ Ekola naga o nyawa abe manga kiahonanga ihihangoka. De ahao womatengo manga datekoka wamake ma kiahonanga gea masara gea ena womahitouna dika de ko wahingahua ma dutuika. De marai unangoo wapake o koboto ma demo ato ma kiahonanga gea ko wamakeua, hokogenangoli o nyawa yahowono. De utuohi ma rupa ma ngoe abe o nyawa manga biaha yodiai abe ko itiaiua hiadono manga howono naga manga dodiawoika.

⁴ De ma howono mata-mata gea de o nyawa duru yahowonoka, ho kiani ihigilio ma kiahonanga ma dutuika abe ena gea yatohikoka, eko kiani yaturuuru gea abe ato ihihangoka. De ona abe yomahiutumu ilamokoholi kiani manga howono ma datoro ihitiai, eko ma kiahonanga abe yomahitoonaka kiani ihigilio ma dutuika.

⁵ De ona abe yotemo ma titi o bobangu, eko ma ija, eko ma hewa, de yahibehehongo o nyawaika ko ma gou-goungua onangoo yahowonoka. Ho ma oraha manga howono gea yahidumutu onangika de gea kiani yatagongo de ma bobangu, eko ma ija, eko ma hewa abe yahibehehongokau. De ngaro yaniiki manga behehongo gea masara naga ma hidogoli abe kiani yofangu. Abe ma ija abe yahibehehongoka kiani ihikodoku ngimoi de ahao o hidoku hinooto kiani yofanguoli ma hidogo. Hokogea yomabangu ibooto la manga howono o nyawaika ihitiai.

⁶ De ona ko o nyawaikaua dika yahowono masara duru Ma Jou o Yaweikaoo yahowonoka ho kiani manga howono ma huhuba yomagao nia hidemoika la una wahidemo Ma Jou o Yaweika. De manga howono ma huhuba gea kiani o domba ma nauru ma baluhu abe ko iwa ma heluku eko ma nabo ma badangoka. De nako ko idadiua yamake o domba ma huhuba hokogea kiani yofangu nia hidemoika de o domba ma ija itiai. De o domba ma ija kiani yaetongo de o tiwi o se-senge o haaka ma dutuino abe niapake o Hikamake ma Tauoka.

⁷ De ahao una o hidemo wahihuba manga huhuba gea ma titi manga howono de hokogea wahitebini Ma Jou ai himangoka angamoi manga howono yatamunoka ho Ma Jou ka idadi de manga huhuba gea wahiapongo.” Hokogea Ma Jou o Yawe ai hiaturu la o Isiraele ma nyawa ka idadi yapaliara itiai manga gogao Unangika de o nyawaika.