Gogao 5 - Ma Jou ai Demo-demo o Totobelohoka

Ona abe yahowono kiani yomahihuba o howono ma huhuba

^1-2 De Ma Jou o Yawe wogila-gila de ai hingahu o Musaika, wato, “Nako hiadono idadi nia hidogoronaka abe niamake nia ria-dodoto yomatengo yahowono, manga howono gea ufa niahipongono. Abe nako nia hihira iniahoko la niboa o kokawaaha manga himangoka la gea niade-ade ona yatobatotailakoika kiani niahingounu de niboa. De ahao ma titi nia ria-dodoto manga howono niade-ade la ona de manga kuaha yatobatailako de yaurusu ka idadi yoihene. Ma nako ngini abe niamake nia ria-dodoto yahowono masara duru nioluku niboa niade-ade manga howono de ahao nginioli inihohowono.” “De naa o howono o fara moioli abe ma titi o nyawa yaso o aewani ma honenge abe ena gea Ma Jou wohiromanga ipeseke. De gea ma titi ko idadiua o nyawa yaso o aewani ma honenge gea ngaro o fuhuku ma aewani, de ngaro o nyawa manga dofo ma aewani, de ngaro imalia-liara o tonakoka. De onagona dika abe yaso o aewani ma honenge gea ngaro ihioriki eko ko ihiorikua yatigioka hiadono yadaene o aewani ma honengika gea manga howono ahao idadi abe ona ko yotebinua Ma Jou ai himangoka.”

³ “De naa ma titi moioli abe idadi o nyawaika hiadono ko yotebinua Ma Jou ai himangoka. De gea ma oraha o nyawa yaso o peseke o kia dika abe o nyawa manga badangoka de aino hoka o panyake ma gomuku eko manga ioko. De ngaro ona ihioriki ena gea yasooka, de ngaro ona ko ihiorikuahi abe manga lou eko manga giama adaene ma pesekika gea, masara ko yotebinua Ma Jou ai himangoka. Ho ka de ma oraha ona ihioriki yadaenoka yaso ena ipesekika de manga howono nagau abe kiani yomahitebini Ma Jouika.”

⁴ De Ma Jou o Yawe wogila-gila de ai hingahu o Musaika, wato, “De naa ma titi moioli abe o nyawa yodiai ihowono Ma Jouika de gea ma oraha o nyawa yotemo de o koboto yahitodokanino. Abe ngaro de ma titi manga hidee yodiai moi abe itorou, eko manga hidee yodiai moi abe irahai, masara mata-mataika gea ko idadiua yapake o hidotodokanino ma koboto ma demo. Ho ngaro ona ko yamaoua o demo hokogea ma oraha yapake masara manga howono nagau ho kiani yomahitebini Ma Jou ai himangoka.”

⁵ “Ho naa tinihingahuoka irupa-rupa abe ngini nidiai hiadono nimahipeseke Ngohi Ma Jou ahi himangoka. De naa tinihingahuoo ma hiaturu abe o nyawa kiani yaniiki ma oraha ihioriki manga howono naga Ma Jouika. Abe duru ihira yodiai kiani yomangaku abe yomahingahu Ngohino manga howono nagau.

⁶ De ahao kiani manga howono ma huhuba yomahihuba Ma Jou o Yaweika. De manga howono ma huhuba ka idadi manga duduonino ma beka ngaro o domba eko o kabingi. De manga huhuba gea ihiromanga o howono ma huhuba de nia hidemo Ma Jouika ahao waduhunu de manga huhuba la wahitebini manga howonino Ma Jou ai himangoka. De hokogea ipaha de ahao Ma Jou wahiapongo angamoi manga howono yatamunoka de manga huhuba gea.”

⁷ De Ma Jou wahidoaka o howono ma huhuba ma ngekomo moioli nako ona o huha ma nyawa, wato, “Masara naga o nyawa utu abe yomahipeseke de o howono ma rupa-rupa gea de done ona ko iwa manga domba eko manga kabingi de ko yakunua manga huhuba gea yomaijaino. Ho ona gea kiani yaleino o kuumu-kuumu hinooto eko o namodaara hinooto la ena gea manga hidemo wahihuba Ma Jou o Yaweika. De o totaleo hinootoino gea de yapake moi la idadi o howono ma huhuba abe de ma awunu manga howono ihitamunu, de abe moioli idadi o howono ma huhuba iharo-harongo.

⁸ De ona gea abe yoboa manga hidemo Ma Jouika de yaoino manga huhuba o kuumu-kuumu eko o namodaara de ahao ona hokonaa kiani yodiai. Ma totaleo moi abe idadi o howono ma huhuba kiani ma tomara wafuludi ka hiadono ihonenge masara ma pea ko iakatingakua.

⁹ De ahao to ena ma awunu wodabarihi o huhuba iharo-harongo ma ngi ma datekika. De ma awunu utu wakopoa dau o huhuba ma ngi ma lifunoka.

¹⁰ De o kuumu-kuumu eko o namodaara utu wohihuba de o uku la de o huhuba iharo-harongo gea manga howono watamunu imaketero hoka Ma Jou ai hiaturu ma pareta itemo. De hokogea wodiai la ona wahitebini Ma Jouika abe manga howono watamunoka la Ma Jou ka idadi wahiapongo.”

¹¹ De Ma Jou o Yawe wogila-gila de ai hingahu o Musaika, wato, “Masara naga o nyawa utu abe ngaro o kuumu-kuumu eko o namodaara ma enangoo ko yapoaua yomaija ho kiani manga huhuba o gandumu abe idadioka o tarigu abe duru ialuhu. Ho ona abe yoboa manga hidemo Ma Jouika de manga howono ma huhuba gea kiani o tarigu o supa hinooto ma amoko. De angamoi gea o howono ma huhuba ho ko idadiua naga ma hisapuru o saitunu ma minya eko ma hisapuru o manyanyi.

¹² Ho yomahiadono nia hidemoika de una wale manga tariguino o okutu moi abe idadi o hohininga ma huhuba abe wohihuba Ma Jou o Yaweika de o uku. Ho wohidaulu hiadono itinoka o huhuba iharo-harongo ma ngi ma lokuoka duru imaketero abe wodiai de o huhuba iharo-harongo utu. De gea ena idadi to ona manga howono ma huhuba.

¹³ Hokogea o hidemo wahihuba ibooto de wodiai la ona wahitebini Ma Jouika abe manga howono watamunoka la Ma Jou ka idadi wahiapongo. De o huhuba ma tarigu ma hou idadi o hidemo manga inomo imaketero hoka o gandumu ma huhuba utu abe kiani ma hononga idadi nia hidemo Ma Jouika manga inomo.”

¹⁴ De ahao Ma Jou o Yawe o Musaika wihingahuoli wato,

¹⁵ “Hokonaa ma ngekomo nako idadi nia hidogoronaka naga o nyawa yahowono abe yahipeseke Ma Jou o Yawe ai kiahonangika abe niwidingakoka Unangika. De ngaro manga howono ko manga hiningakaua de aino de ahao hokonaa ma hiaturu abe kiani yaniiki. Ona kiani yale manga huhuba o duduonino o domba ma nauru ma baluhu abe ko iwa ma heluku eko ma nabo ma badangoka. De o domba gea kiani ma ija yaetongo itiai de o tiwi o se-senge o haaka ma dutuino abe niapake o Hikamake ma Tauoka.

¹⁶ De ma kiahonanga abe iwidingakoka Ma Jouika abe yapake ihowono kiani ihira yofangu to ena ma ija ma gahumu de naga ma bobangu ma hidogoli abe kiani yofangu. Abe ihira to ena ma ija kiani ihikodoku ngimoi de ahao o hidoku hinooto kiani yofanguoli ma hidogo. Hokogea yodiai ibooto de manga howono ma bobangu ihingodumu de iwihidoaka manga hidemoika. Ho una manga bobangu gea wodafongoka de ahao ka idadi manga huhuba ma domba wahihuba. Hokogea o hidemo ona wahitebini Ma Jouika abe manga howono watamunoka la Ma Jou ka idadi wahiapongo.”

¹⁷ “Ho naa tinihingahuoka irupa-rupa ngini nidiai hiadono nimahipeseke Ngohi Ma Jou ahi himangoka. De o nyawa abe ko yaniikua Ma Jou o Yawe ai Pareta ma behehongo onangika hiadono ko yodiaiua abe manga tagongo la kiani ona yodiai, de gea yahowonoka. De manga howono gea naga ngaro ona gea ko ihiorikuahi abe naga manga tagongo ka hiadono manga huhuba kiani yodiai. Ho ika-ika abe ma oraha ka de ihioriki igoungu yodiai abe ihowono Ma Jouika de kiani manga howono ma huhuba yomahidiai.

¹⁸ Ho onangoo kiani manga huhuba o duduonino o domba ma nauru ma baluhu abe ko iwa ma heluku eko ma nabo ma badangoka. De o huhuba ma domba gea kiani ma ija yaetongo itiai. De hokogea ma ngekomo la nia hidemo manga howono ma huhuba wahihuba ibooto de una wahitebini ona Ma Jou ai himangoka abe manga howono watamunoka la Ma Jou ka idadi wahiapongo.

¹⁹ De manga huhuba gea ma rupa o howono ma bobangu angamoi o behehongo abe ko yaniikua gea duru Ma Jou o Yawe ai himangoka ho waetongo o howono.” Hokogea Ma Jou o Yawe ai hiaturu ma hingahu o Musaika la ai nyawa manga howono Unangika ka idadi wahiapongo.