Gogao 4 - Ma Jou ai Demo-demo o Totobelohoka

O Isiraele ma nyawa manga huhuba la manga howono yatamunu

¹ De Ma Jou o Yawe wihibehehongoli o Musaika, wato,

² “Musa, kiani nahingahu o Isiraele ma nyawaika ahi hiaturu ma ngekomo abe o nyawa yaniiki ma oraha naga manga howono Ngohino. Abe mata-mata Ngohi Ma Jou o Yawe tinihidoakoka ahi paretaka abe tinihingahuoka ko idadiua yodiai angamoi ko itiaiua. Masara nako ona ahi pareta yatilakuroka ngaro manga hiningaino de yodiai eko ngaro ko manga hiningainoua ipuda, manga howono gea kiani enangoo ihitamunu de o howono ma huhuba.”

³ “De hokonaa ma hiaturu nako una wahowono abe ti ngini nia hidemo manga haeke wokokurutiye abe ka unangohi iwihitunguuoka hokogea de wabaluhu o hidemo mata-mataino. Nako una gea wahowono, gea to una ai howono yakokidaene o Isiraele ma nyawa mata-mataika. Ho unangoo kiani wao Ngohi Ma Jou o Yaweino ai huhuba o hapi ma nauru ma baluhu abe ko iwa ma heluku eko ma nabo la idadi to una o hidemo wokurutiye ai huhuba Ngohino.

⁴ To una ai hapi gea kiani wohihidoaka Ngohino ahi Tau o Ngoerino ma himangoka abe tohiromangoo o Hikamake ma Tau. Ho duru genangoka ai howono ma huhuba ma hapi wafokumu de ahao una ma hirete watoaka ma ngomaha to Ngohi, Ma Jou o Yawe ahi himangoka.

⁵ Gea watoaka ma hapi ma ngomaha ibooto de ahao una gea waino de wale o hapi gea ma awunu ma hononga dika de ena gea wao de wowohama o Hikamake ma Tauika.

⁶ De gea wowohama ka hiadono ma dadatoko o ngoerino abe ihitatoko o Ngi ma Debi-debinoka abe enangohi Ngohi tomadingakino. Una genangoka ma dadatoko o ngoerino ma himangoka de ahao ai hagaraara watono o huhuba ma awunuku, abe wasoino gea, de wodobureere ma tumidi ma ngoerika abe idateke o Ngi ma Debi-debinoka abe enangohi Ngohi tomadingakino.

⁷ O huhuba ma awunu gea wodobureere ibooto de ahao wohimanga o Manyanyi ma Huhuba ma Ngiikali abe duru Ma Jou o Yawe ahi himangoka o Debi-debini ma Ngioka de ma awunu utu wohiehe ma tatadukika abe naga daku o Manyanyi ma Huhuba ma Ngi ma libuku iatoka. Gea wodiai ibooto de ahao ahi Tau o Ngoerino wohupuoli de o hapi ma nauru ma awunu ma hou wakopoa o Haro-harongo ma Huhuba ma Ngi ma lifunuku ho duru o Tau o Ngoerino ma himangoka wakopoa.” Hokogea Ma Jou ai hiaturu la nia hidemo wokokurutiye to una ai howono ma huhuba iwihihuba itiai.

⁸ De o huhuba ma hapi ma nauru gea duru ma haki mata-mataika yatoomuino ho ona o hidemo yale ma haki abe naga ma pokoro ma goronaka abe ma horoomu ma haki.

⁹ De manga hidemo yale o hapi ma nauru gea to ena ma dogohi hinooto ka ma moi de to ena ma haki abe ataulika ma dogohioka de ma haki atau-taulika ma roehikaoo daku ma porete ma kobongo ma jajaataiye. De to ena ma gate abe ipelaka hinooto de ma hononga ieteteke yatobiki de ihitoomuino de ma haki mata-mata gea.

¹⁰ De ahao manga howono ma huhuba ma hiaturu abe kiani yaniiki duru imakadaene de o gogao ma huhuba abe o hapi ma nauru ma haki mata-mata, de ma dogohi, de ma gate ma belaka, yakokitoomuino de yahihuba de o uku o huhuba iharo-harongo ma ngi ma lokuoka.

¹¹ Masara o hapi ma nauru ma kai de ma roehe ka ma moi de to ena ma pea, de ma lou, de ma giama, de ma wariki de ma ioko ihitoomuino.

¹² De mata-mata gea nia hidemo kiani yao ma hoanika abe o uku ma kafo ma ngiika abe naga manga dodogumu ma ngi ma poretoka. De o uku ma kafo ma ngi gea ihiromanga o debi-debini ma ngi. De o hidemo duru genangoka o hapi ma nauru ma badanga ma kiahonanga mata-mata abe kangano ko ihihihubaua Ngohino ahi haro-harongo ma huhuba ma ngioka, naa ona ihidaulu de o gota hiadono duru itinoka o kafo ma ngioka gea. Hokogea Ma Jou ai hiaturu la o Isiraele ma nyawa manga hidemo wokokurutiye to una ai howono ma huhuba iwihihuba itiai.

¹³ De Ma Jou wogila-gilali de ai hingahu o Musaika, wato, “De hokonaa nako o Isiraele ma nyawa manga doomu ma amokika mata-mata yahowono masara ko yomamaoua. Abe ngaro ona yodiai itorou abe Ma Jou o Yawe ai pareta duru ko yahigunoaua yodiai de ngaro ona manga howono gea ko amaoua masara Ma Jou ai himangoka imaketero dika yahowonoka.

¹⁴ Ho ipahaika hiadono ona ihioriki abe yahowonoka Ma Jouika de ahao kiani manga howono ma huhuba yomahidiai. Abe kiani yairiki o hapi ma naurino ka ma goohi de ahao manga huhuba gea yao o Hikamake ma Tau ma himangino.

¹⁵ De duru genangoka ahao o Isiraele ma nyawa manga dimo-dimono yafokumu o hapi ma nauru ma peauku la ihitunguu ena gea to ona mata-mata manga howono ma huhuba. De genangoka, o Hikamake ma Tau ma himangoka, ona ahao manga hapi o dutu moi gea yatoma de yotetoro Ma Jou o Yawe ai himangoka.”

¹⁶ De Ma Jou wahitararonohi, wato, “De ahao to ona manga hidemo wokokurutiye, una gea waleino o hapi ma nauru ma awunu ma hononga de wowohama doka o Hikamake ma Tau ma goronaika.

¹⁷ De ahao womahiadonika duru o dadatoko ma ngoerika de ai hagaraara watono ma awunuku de ahao wodopopoto o ngoere ma dadatokika ma tumidino la hokogea wodiai duru Ma Jou o Yawe ai himangoka.

¹⁸ De gea wodiai ibooto de ahao manga hidemo wokokurutiye gea womaidulino ai poretoko la wohimanga o Manyanyi ma Huhuba ma Ngiikali abe enangoo naga Ma Jou o Yawe ai himangoka o Hikamake ma Tau ma goronaka. De naga unangoka o hapi ma awunu utuohi abe kiani wohiehe ma tatadukika abe naga o Manyanyi ma Huhuba ma Ngi daku ma libuku iatoka. De ahao una wohupu o Hikamake ma Tauino de wogilio o Haro-harongo ma Ngiika de wao o hapi ma awunu ma hou de ena gea kiani wakopoa o Haro-harongo ma Huhuba ma Ngi ma lifunoka.

¹⁹ De una manga hidemo Ma Jouika gea kiani o huhuba ma hapi ma nauru ma haki mata-mata wale de wodaulu o haro-harongo ma huhuba ma ngi ma lokuoka.

²⁰ Abe una wodiai kiani waniiki imaketero abe hoka ona o hohidemo ma hirete yodiai de to ona manga howono ma huhuba. Ho una wodiai imakadaene la gea o Isiraele ma nyawa wahitebini Ma Jou ai himangoka la Ma Jou manga howono gea wahiapongo.

²¹ De ahao o hapi ma nauru ma badanga ma kiahonanga utu watoomuino mata-mata de wao manga dodogumu ma ngi ma poretoka de wodaulu o uku ma kafo ma ngioka. De o huhuba ma hiaturu mata-mata abe manga hidemo waniiki naa wodiai la idadi o Isiraele ma nyawa mata-mataika manga howono ma huhuba. Ho o huhuba ma hiaturu gea duru imaketero hoka una abe manga hidemo wokokurutiye waniiki ma oraha to una ma hirete ai howono ma huhuba wodiai.” Hokogea Ma Jou ai hiaturu ma behehongo o Musaika.

²² De Ma Jou wogila-gila de ai hingahu o Musaika, wato, “De nako o Isiraele ma nyawa manga hihira womatengo wodiaioka abe ai Jou, Ma Jou o Yawe, wato duru ko idadiua o nyawa yodiai de una, manga hihira gea, wahowonoka. De manga hihira gea ai howono naga ngaro una ma hirete ko ai hiningainoua wahowono abe ko iwa ai hidee wodiai o howono.

²³ Masara ma oraha abe wohioriki wahowonoka de kiani una womahihuba o kabingi ma nauru abe duru ko iwa ma heluku eko ma nabo ma badangoka la gea ena idadi ai howono ma huhuba.

²⁴ De una o Isiraele ma nyawa manga hihira kiani ai huhuba ma kabingi gea wafokumu ibooto de ahao wotoma duru ma ngioka gea abe o howono ma huhuba iharo-harongo ma hapi yotoma. Abe to una ai kabingi enangoo to una ai howono ma huhuba.

²⁵ De nia hidemo abe wileleani de ai huhuba gea una ai hagaraara watono ai howono ma huhuba ma awunuku de wohiehe ma tataduku iatika abe naga o haro-harongo ma huhuba ma ngi daku ma libuku iatoka. De ahao o kabingi ma awunu ma hou wakopoa o huhuba ma ngi ma lifunoka.

²⁶ De o Isiraele ma nyawa manga dimono ai howono ma huhuba ma kabingi ma haki mata-mata, kiani una o hidemo wohidaulu gea daku o haro-harongo ma huhuba ma lokuoka. Hokogea ma hiaturu o hidemo waniiki la manga hihira ai howono ma huhuba wodiai de ma hiaturu gea duru imaketero hoka ena waniiki de o gogao ma huhuba abe yodaulu de o uku. Hokogea ma hiaturu la ka idadi o hidemo gea nia hihiraika wihitebini ai howonino la ka idadi Ma Jou ai howono gea wihiapongoka.”

²⁷ De Ma Jou wihingahu o Musaika, wato, “De nako o Isiraele ma nyawa utu yahowono, ngaro onagona dika manga doomu ma amokika, hiadono yodiai abe Ngohi Ma Jou o Yawe tinihingahuoka ahi paretaka hokogea ko idadiua nidiai, kiani manga howono gea ihitamunu de o howono ma huhuba ngaro ona ko manga hiningainoua manga lawana hiadono yahowono.

²⁸ Ho ka de yomangaratii abe gea yodiai ihowono kiani manga huhuba yaoino la nia hidemo ka idadi ena gea yahihuba la manga howono gea yatamunu. De manga howono ma dadamunu ma huhuba gea kiani o kabingi ma beka iti ufa naga ma heluku eko ma nabo la idadi to ona manga huhuba.

²⁹ De ahao manga howono ma huhuba ma kabingi kiani yafokumu de ahao ona ma hirete yatoaka ma ngomaha o ngioka gea abe biaha o aewani yatoma o Haro-harongo ma Huhuba ma Ngi ma datekoka.

³⁰ De una o hidemo ahao ai hagaraara watonouku o kabingi ma huhuba ma awunuku, abe wasoino gea, de ma awunu gea wohiehe ma tatadukika abe naga daku o Haro-harongo ma Huhuba ma Ngi ma libuku iatoka. Gea wodiai ibooto de ahao ma awunu ma hou wakopoa o Haro-harongo ma Huhuba ma Ngi ma lifunuku.

³¹ De ona abe yahowono kiani o kabingi ma haki mata-mata ma pokoro ma goronaka yagoraka imakadaene hoka yodiai de o gogao ma huhuba. De ahao ma hidemo wale ma haki gea de wohidaulu o Haro-harongo ma Huhuba ma Ngi ma lokuoka de ma haki ma bounu ihailiye de duru ihihisanangi Ngohi Ma Jou o Yaweino hiadono manga howono gea ko tolegaikakaua angamoi yatamunoka de manga huhuba gea abe todafongo de ahi sanangioka.” Hokogea Ma Jou ai hitararono abe hokokia manga howono gea ihitamunu de o howono ma huhuba ngaro ona ko manga hiningainoua manga lawana hiadono yahowono.

³² De utuohi Ma Jou wahitararono, wato, “De nako o nyawa yoboa manga hidemoino de o domba la idadi to ona ma hirete manga howono ma huhuba gea kiani o domba ma beka iti ufa naga ma heluku eko ma nabo.

³³ De ahao manga howono ma huhuba ma domba kiani yafokumohi de ahao ona ma hirete yatoaka ma ngomaha o ngioka gea abe biaha o aewani yotoma o Haro-harongo ma Huhuba ma Ngi ma datekoka.

³⁴ De ahao una o hidemo ahao ai hagaraara watonouku o domba ma huhuba ma awunuku, abe wasoino gea, de ma awunu gea wohiehe ma tatadukika abe naga daku o Haro-harongo ma Huhuba ma Ngi ma libuku iatoka. Gea wodiai ibooto de ahao ma awunu ma hou wakopoa o Haro-harongo ma Huhuba ma Ngi ma lifunoka.

³⁵ De ahao una kiani o domba ma haki mata-mata ma pokoro ma goronaka wagoraka imakadaene hoka yodiai de o gogao ma huhuba ma aewani. De ahao ma hidemo wale ma haki gea de wakelenga wohiloku-loku o huhuba utu abe kanganoinohi wakelengaka o Haro-harongo ma Huhuba ma Ngi ma lokuoka la ka idadi o howono ma huhuba mata-mata gea wohidaulu. De hokogea o hidemo wohihuba de o uku o nyawa ai howono ma huhuba Ma Jou o Yaweiye. Abe ka de ma hiaturu gea o hidemo waniiki itiai de o nyawa gea wahitebini manga howonino abe yahitamunu de manga huhuba gea la ka idadi Ngohi Ma Jou tahiapongo.” Hokogea Ma Jou o Yawe wihidoaka o Musaika o Isiraele ma nyawa manga ngekomo la manga howono Ma Jouika waofi.