Gogao 3 - Ma Jou ai Demo-demo o Totobelohoka

O Isiraele ma nyawa manga gogao Ma Jouika ma huhuba

¹ De naa Ma Jou o Yawe ai hingahu o Isiraele ma nyawaika abe ma titi manga gogao Unangika yapaliara itiai abe duru woigo la naga manga gogao irahai homoi-homoiika. Ho gea wihingahu o Musaika wato, “De ti ngini nia gogao ma huhuba Ngohino abe duru nihihisanangi Ngohi, Ma Jou o Yaweino, ka idadi o aewani abe nia duduonino. Ho ka idadi nia huhuba o hapi ngaro ma nauru eko ma beka ma iti ufa naga ma badangoka abe iheluku eko ma nabo abe nimahihuba Ngohi, Ma Jou o Yaweino.

² De ahao o nauru abe womahihuba woboa ahi Tau o Ngoerino ma himangoka abe tohiromanga o Hikamake ma Tau. De o Harunu ai ngofa-ngofaka abe inihitobahidemo Ngohino abe niahiromanga nia hohidemo naga genangoka iwibuhuku una gea abe woboa de ai huhuba o hapi. De kiani ihira to una ai hapi wafokumu ma peauku la wohitunguu gea to una ai huhuba abe watingaka Ngohi Ma Jouino. Ho ai hapi wafokumu ibooto de ahao una ma hirete watoaka genangoka de ma awunu nia hidemo yatakunu. De ahao ma awunu yatakunino gea nia hohidemo yodabarihi ma awunu gea o huhuba ma ngi ma pahagi ma baka iatika.

³ De kiani nia hidemo womatengo Ma Jouika wagoraka ma dobiki o gogao ma huhubaino abe ena gea wohihuba Ngohi Ma Jou o Yaweino de o uku, de abe wale gea ma haki abe naga o huhuba ma aewani ma pokoro ma goronaka abe ma horoomu ma haki.

⁴ De una kiani wale o aewani gea to ena ma dogohi hinooto ka ma moi de to ena ma haki abe ataulika ma dogohika de enangoo abe atau-taulika ma roehikaoo daku ma porete ma kobongo ma jajaataiye. De to ena ma gate abe ipelaka hinooto ahao ma hononga ieteteke watobiki de wohitoomuino de ma dogohi hinooto de ma horoomu gea.

⁵ De ahao o Harunu ai ngofa-ngofaka abe winihidemo Ngohiye de ena mata-mata gea ka ma moi yahihuba de o uku. Ho yakelenga daku o huhuba ma lokuoka abe nagaoo o hidaulu ma gota abe ataulu o huhuba ma ngi ma lokuoka. De o huhuba iharo-harongo ma bounu abe ihailiye duru ihihisanangi Ngohi Ma Jou o Yawe.”

⁶ “De nako nia hininga la nia gogao ma baliarino ma huhuba nia domba eko nia kabingi, de ko nia hapiua, ma gea ka idadi de ngaro ma nauru eko ma beka ma ka idadi. Masara kiani nihidodiai niairiki ma domba eko ma kabingi la ena gea ko iwa ma heluku eko ma nabo ma badangoka.

⁷ De nako womatengo ai huhuba o domba ma ngofaka abe waoino Ngohi Ma Jou o Yawe ahi himangino hokonaa wodiai,

⁸ kiani wafokumu ma peauku la wohitunguu gea to una ai huhuba abe wohidingaka Ngohi Ma Jouino. De ahao ai domba ma ngofaka watoma de watetoro ahi Hikamake ma Tau ma himangoka. De o Harunu ai ngofa-ngofaka yatakunu to ena ma awunu de yodabarihi ma awunu gea o huhuba ma ngi ma pahagi ma baka iatika.

⁹ De ai domba ma ngofaka gea o gogao ma huhuba ho kiani ma hononga ihikatingaka de ihihuba Ngohino Ma Jou o Yaweino de o uku. De to ena ma badanga ma kiahonanga abe kiani nia hidemo yapake la idadi o huhuba iharo-harongo gea ma bikini ma gahumu abe watobiki duru o porete ma kobongo ma bahaoko. Ho to ena ma bikinoka ma haki mata-mata kiani ihidaulu de o horoomu ma haki mata-mata abe naga o aewani ma pokoro ma goronaka.

¹⁰ De ena yatoomu de ma dogohi hinooto de to ena ma haki abe ataulika ma dogohika de ma haki abe atau-taulika ma roehikaoo daku ma porete ma kobongo ma jajaataiye. De to ena ma gate abe ipelaka hinooto de ma hononga ieteteke yatobiki de o domba ma badanga ma kiahonanga mata-mata abe yagoraka gea ka ma moi ihitoomuino.

¹¹ De nia hidemo ihidaulu la gea ena idadi o inomo ma huhuba abe ihihuba de o uku Ngohi Ma Jou o Yaweiye.

¹² De nako womatengo ai huhuba o kabingi abe womagao Ngohi Ma Jou o Yawe ahi himangino hokonaa ahao wodiai,

¹³ kiani wafokumu ma peauku la wohitunguu ena gea to una ai huhuba abe wohidingaka Ngohi Ma Jouino. De ahao ai kabingi watoma de watetoro ahi Hikamake ma Tau ma himangoka. De o Harunu ai ngofa-ngofakuku ona yatakunu to ena ma awunu de yodabarihi ma awunu gea o huhuba ma ngi ma pahagi ma baka iatika.

¹⁴ De ani huhuba o kabingi kiani ma hononga ihikatingaka de ihihuba Ngohino Ma Jou o Yaweino de o uku. De abe ihihuba de o uku gea ma haki abe naga o kabingi ma pokoro ma goronaka abe ma horoomu ma haki.

¹⁵ De to ena ma dogohi hinooto ka ma moi de to ena ma haki abe ataulika ma dogohika de atau-taulika ma roehikaoo daku ma porete ma kobongo ma jajaataiye. De ma gate abe ipelaka hinooto de ma hononga ieteteke enangoo o hohidemo yale ma oraha yale ma dogohi.

¹⁶ De o kabingi ma badanga ma kiahonanga abe yagoraka gea mata-mata ihitoomuino de nia hohidemo ihidaulu la gea ena idadi o inomo ma huhuba abe ihihuba de o uku Ngohi Ma Jou o Yaweiye abe duru ihihisanangi. De kiani ngini ka ihikaika nimahihohininga abe ma haki mata-mata Ngohi Ma Jou o Yawe tomahitongohioka.

¹⁷ Ngini o Isiraele ma nyawa duru ko idadiua niaolomo o awunu eko o aewani ma haki. De nenanga o hiaturu ma behehongo moi abe Ngohi tinihidoaka nginika abe ilaku ka hiado-adonika ngaro nia totoforauku yolape-lapeuku. De ngaro ngini o kiaka dika ahao nigogere masara duru ko idadiua o haki eko o awunu niaolomo.” Hokogea Ma Jou ai behehongo ma hiaturu la yopaliara itiai manga gogao Unangika de manga huhuba.