Gogao 23 - Ma Jou ai Demo-demo o Totobelohoka

O Isiraele ma nyawa manga rame-rame abe Ma Jou o Yawe wahidoaka onangika

¹ De Ma Jou o Yawe wihingahu o Musaika, wato,

² “Musa, kiani naa nahingahu o Isiraele ma nyawaika manga rame-rame ma oraha de ma hiaturu abe Ngohi Ma Jou o Yawe tahidoaka onangika. De ma rame-rame gea Ngohi tomadingakino la nia huhuba de nia higiriiri nihiboa Ngohino. Ho nako adonoka nia rame-rame ma oraha de kiani nimahikangahu la ngini mata-mataika nianiiki angamoi ma rame-rame gea tomadingakino ho duru ma debi-debini.” Hokogea Ma Jou wato kiani o Isiraele ma nyawa ihioriki de yaniiki itiai manga rame-rame ma hiaturu.

O Hiaini ma wange enangoo ma ihirame-rame

³ De abe ihira kiani yaniiki itiai gea o Hiaini ma wange ma hiaturu, Ma Jou wato “Ihira Ngohi tinihihohininga abe ma wange tomadingakoka o minggu-mingguiye. Abe ngini naga o wange butaangaino ka idadi nimakarajaanga masara nako o wange ma tumidi adonoka de nia karajaangino nimahiaini angamoi ma wange gea Ngohi tomadingakoka de gea o hohininga ma hiaini ho niaetongo o wange gea ma debi-debini. Ho o Hiaini ma wangeoka ngini kiani nimatoomuino la nimahuba de nihiboa o hohininga ma higiriiri Ngohi Ma Jou o Yaweino. De ngini kiani nianiiki ahi Hiaini ma wange ngaro o kiaka dika nigogere.”

⁴ “De naga ti ngini nia rame-rame utuohi abe o tao-taongiye niahirame-rame abe ma oraha naa tinihitararono nia rame-rame gea. De angamoi nia rame-rame gea homoi-homoiika o debi-debini ma rame-rame ho kiani nihirame-rame duru de ma oraha de ma tanggala abe adono Ngohi Ma Jou o Yawe taputuhoka.” Hokogea Ma Jou wihibehehongo o Musaika.

O Totilakuru ma rame-rame de o Roti ko Iwa ma Ragi ma rame-rame

⁵ De ahao Ma Jou wohigila-gila ai hingahu abe kiani o Musa wadofanga o Isiraele ma nyawaika wato, “O tao-taongiye nia rame-rame ihira gea o Totilakuru ma rame-rame abe duru adaene ma mede ihira abe o mede gea ma romanga o Abibi de ma tanggala ngimoi de iatuku.

⁶ De ka de o wange imahidutuluku o Totilakuru ma wangeoka ho adonoka ma tanggala ngimoi de motoa de ahao nia rame-rame ma romanga o Roti ko Iwa ma Ragi ma rame-rame imulaenge de gea kiani nihirame-rame Ngohi Ma Jou o Yaweino de nihigila-gila ka hiadono o wange tumidino ma dekana. Ho ma dekana o wange tumidi gea duru ko idadiua naga nia hisapuru o ragi nia rotioka ho nia roti ko iwa ma ragi dika abe niaolomo nia rame-rameoka naa.

^7-8 De o wange ihira de o wange ma baha nia rame-rameoka naa ko idadiua nimakarajaanga abe nia karajaanga o kia dika la ka idadi nimakokitoomuino. De nia doomu hinooto abe o wange ihira de o wange ma baha gea ngini kiani nihiromanga o debi-debini ma doomu angamoi gea Ngohi duru tomadingakoka nia doomu hinooto gea ho gea ma titi ko idadiua nikarajaanga masara o rame-rame ma wange utu de ka idadi niagorakoli nia karajaanga abe nia biaha kiani nikarajaanga o wange-wangeiye. Masara o wange-wangeiye nimatoomuino la nimahuba Ngohino ka hiadono o wange ma tumidino abe ngini kiani o wange moi naga moi nia huhuba iharo-harongo abe nimahihuba Ngohi Ma Jou o Yaweino. De nako adonoka o Roti ko Iwa ma Ragi ma rame-rame ma wange tumidoka de o wange gea kiani ngini mata-mata nimatogumu abe nia karajaanga abe nia biaha kiani nikarajaanga o wange-wangeiye. De gea angamoi o wange ma tumidoka gea nimatoomuinoli la o debi-debini ma doomu moioli nidiai abe nihirame-rame Ngohino.” Hokogea Ma Jou ai hiaturu la yaniiki itiai manga rame-rame ma oraha.

Manga Joro ma Domoro ma rame-rame

⁹ De ahao Ma Jou o Yawe naga ai hingahu utuohi o Musaika, wato,

¹⁰ “Musa, naga ti ngini nia rame-rame utuohi ma hiaturu abe enangoo kiani o Isiraele ma nyawa yaniiki itiai ma oraha yowohama o tonakika gea abe Ngohi tinihibehehongoka nginika tinihidoaka. Ho ma oraha ngini nimaredi genangoka de kiani nimahihuba nia datomo ma domorino. Abe ma oraha nia datomo o gandumu ikuratioka de gea ihira-hira abe niautuku gea nihiromanga to ena o gandumu ma hofoko ma riaka ma domoro, gea ena idadi nia huhuba ti ngini nia redi-redino. De angamoi nia gandumu ma hasili gea ko niaolomuahi de kiani ma hofoko ma riaka abe duru ma domoro niwihidoakuahi Ma Jouika ho nimagooto dika hiadono idadi o pakiti moi de gea ena niao nia hidemoika.

¹¹ Ho nia hidemo una wodamaa o Hiaini ma wange ibooto de ahao ma dawangeino nia gandumu ma domoro ma pakiti gea waleino de ko watufukua masara wodiai o dodunguu. De nia hidemo gea wohitunguu de ma pakiti moi gea wohidoakiye naga ai giamoka de wohipari-parihi nia huhuba Ngohiye. Hokogenangohi ihira nidiai la Ngohi todafongo nia huhuba nia gandumu ma hofoko ma riakino abe Ngohi tohiromanga ma domoro.

¹² Masara duru o wange nia pakiti o gandumu ma domoro gea nihihidoaka Ngohiye de o wange genangoo naga nia huhuba moi iharo-harongo. Abe kiani nialeino nia huhuba o domba ma nauru abe adonoka ma umuru o taongo moi de ko iwa ma heluku eko ma nabo ma badangoka la idadi ti ngini o Isiraele ma nyawa nia doomu ma amokika nia huhuba iharo-harongo Ngohi Ma Jou o Yaweino.

¹³ De nia huhuba o domba iharo-harongo gea naga nihikokadogo abe nia hasili o gandumu ma riakino. De hokonaa nimadiai nia huhuba nia gandumino, ihira nia gandumu niawedere ka hiadono idadi o tarigu de ahao niadedeta de hiadono duru o tarigu ma alu-aluhu niamake genangino de ena dika niapake. De o tarigu ma alu-aluhu gea nialeino o duduga hange abe ngade-ngade o litere iata de ena gea niasapuroka de o saitunu ma minya de ahao enangoo nia hidemo winihihuba de o uku la nia huhuba ma bounu idoaiye ihihisanangi Ngohi Ma Jou o Yaweino. De nagali nimahihuba Ngohino o ngokere o angguru ma teongo ma gohakino o mangko iata ma dola.

¹⁴ De nihidodiai de nia gandumu ma riaka abe ahao gea niautukino abe ko idadiuahi genangino niaolomo hiadono nia domoro ma huhuba niabootokahi. Ho ngaro niato nia gugutuku ma riakino nimadiai o roti, eko niato nimahinyole, eko ma hofoko ma roehe niato nimaharongo, masara kiani niodamaa nia hidemo inihihubakahi Ngohi nia Jouino de ahao Ngohi ka idadi tinihigunoa la ngini niaolomo nia gandumu ma riaka ma hasilino. Naa o hiaturu ma ngekomo abe kiani ka ihikaika ngini mata-mata nianiiki ka hiadono nia totofora yolape-lapeuku de ngaro ahao o kiaka dika yogogere.” Hokogea manga Joro ma Domoro ma rame-rame ma hiaturu abe Ma Jou wato kiani yaniiki.

O Gugutuku ma rame-rame

¹⁵ De ahao Ma Jou wohigila-gila de o Gugutuku ma rame-rame ma hiaturu abe kiani yaniiki itiai, wato, “De ti ngini nia inomo nia datomo ma hofoko ma riakino nihirame-rame de ahao nigila-gila niutuku nia gandumu hiadono nia gugutuku o hofoko ma gorona de ma dodoto gea enangoo ibooto de ahao nia gugutuku gea nihirame-rame. De nia rame-rame gea ma oraha hokonaa ma hiaturu: Kiani niaetongo o minggu tumidino abe imaketero de o wange moruata de hiwo ma dekanino. Ho o Hiaini ma wange ma dawangeino abe duru o wange gea nia gandumu ma domoro ma pakiti nia hidemo wohidoakiye la winihihuba de nimulaenge niaetongo genangoka de aino ka hiadono o minggu tumidino ma gahumu de ahao adonoka nia Gugutuku ma rame-rame ma oraha.

¹⁶ Ho o minggu tumidi ma dekana abe o Hiaini ma wange ma tumidi ipaha de ahao ma dawangeino adonoka o wange moritoa ma dekana. De duru o wange gea niaoino nia huhuba nia gandumu ma hungi nia gugutukino abe ahao gea niabooto niautuku nia gandumu mata-mataika ho ngini kiani naga nia huhuba moioli nia gandumino gea abe nimahihuba Ngohi Ma Jou o Yaweino.

¹⁷ Ho o wange ma moritoa gea nidiai nia huhuba o roti nia gandumu ma hungino. Nia huhuba ma roti nenanga kiani nidiai o tariguino abe duru ma alu-aluhino o duduga hange ho ngade-ngade o litere iata ma amoko. De nia roti niaharongo la idadi o roti ma bululunu hinooto abe niao nia hidemoika de una wohidoakiye la enangoo gea idadi o hipari-parihi ma huhuba abe niapake nia gandumu nia gugutukino abe niabootoka. De ka ihikaika ngaro o kiaka dika ngini nigogere kiani nimahidiai nia huhuba nenanga nia roti o haro-harongino o bululunu hinooto abe nihifero de ma hisapuru o ragi.”

¹⁸ De Ma Jou wahitararono abe naga manga rame-rame ma huhuba imaketemomoi, wato, “De ma oraha nihirame-rame o Gugutuku ma rame-rame gea ma titi nia redi ma hasili ma riakino abe nihitunguu de nia huhuba o gandumino. De kiani nagali nia huhuba iharo-harongo o domba ma nauru ma goo ma dutu tumidi abe ko iwa ma heluku eko ma nabo ma badangoka, de nimahihubaoo o hapi ma nauru ma goo moi, de o domba ma nauru ma baluhu hinooto. De ti ngini nia huhuba nia aewani o dofoino nenanga idadi nia huhuba iharo-harongo Ngohi Ma Jou o Yaweino. De nihidaulu de o uku ka hiadono ikokitinoka la de ma bounu niwihisanangi Ngohi Ma Jou o Yawe. Hokogenangoo nihihisanangi Ngohi de nia huhuba nia gandumino de nia ngokere ma huhuba abe o angguru ma teongino.”

¹⁹ “De nagahi nia huhuba moioli ma oraha o Gugutuku ma rame-rameoka de gea nia howono ma dadamunu ma huhuba de gea o kabingi ma nauru moi. De nia huhuba moioli naga, abe nia gogao ma baliarino ma huhuba, de gea ena niapake o domba ma nauru hinooto abe ma umuru o taongo moi.

²⁰ De o domba hinooto gea nia hidemo wohidoakiye Ngohi Ma Jou o Yawe ahi himangoka de nia roti ma bobululunino hinooto la gea ihitunguu nia redi-redino ma hasili ma riaka nia gugutukino. Nia huhuba nenanga Ngohi Ma Jou o Yawe tomadingakoka ho o huhuba ma debi-debini, de gea ena idadi nia hidemo manga inomo abe ona gea initobaleleani nia huhuba de genangino yapake de inihidemo Ngohino.

²¹ De duru o huhuba ma wange gea kiani ngini mata-mata nimatogumu nia karajaangino abe nia biaha kiani nikarajaanga o wange-wangeiye la nimakokitoomuino de nia doomu gea nihiromanga o debi-debini ma doomu angamoi ma wange genangoo ma, Ngohi tomadingakoka. Naa o hiaturu ma ngekomo abe niahikokingahu nia nyawaika angamoi kiani ka ihikaika ngini mata-mata nianiiki ka hiadono nia totofora yolape-lapeuku de ngaro ahao o kiaka dika yogogere.”

²² “De ma oraha ngini niale nia redi ma hasili de abe iwangoiye nia redi ma batingoka eko ma libukuoka, gea ufa niutuku niamataka, la ka idadi o huha ma nyawa ona dika yomale. De hokogenangoo ma oraha niutuku de naga ipurarahuku o tonakoka, abe enangoo ma hou-hou gea, nianoaika la idadi o huha ma nyawa de o homoaino ma nyawa manga inomo abe yomadionikino nginioka ka idadi ona dika yomale. Ngohi Ma Jou o Yawe ti ngini nia Jou ho ahi hiaturu naa kiani nianiiki.” Hokogea Ma Jou ai hiaturu ma hingahu o Isiraele ma nyawaika.

O Guguli ma rame-rame

²³ De Ma Jou o Yawe wihingahuohi o Musaika wato,

²⁴ “Musa, ahao o mede tumidi adonoka de duru o mede ma wange ihira, ho ma tanggala moi o mede tumiduku ena gea o Hiaini ma wange ngaro ko adaenua o minggu-mingguiye ma Hiaini ma wange. De o wange gea o Isiraele ma nyawa kiani niakokiahokino la ngini mata-mata nihirame-rame o Guguli ma rame-rame. Abe nia guguli niawuwu nihigali-gali la ma ilingi yogirangika abe hokogea niapake nia guguli la nia nyawa mata-mataika niahokino. O rame-rame ma wange gea enangoo nia Hiaini ma wange abe duru tomadingakoka ho ko idadiua nikarajaanga abe nimatoomuino de nidadi o debi-debini ma doomu abe ngini nimahuba de nihiboa o hohininga ma higiriiri Ngohi Ma Jou o Yaweino.

²⁵ De o Hiaini ma wangeoka gea kiani ngini mata-mata nimahiaini nia karajaangino. Masara kiani nia huhuba nimahidiai abe ahao nimahihuba Ngohino de o uku.” Hokogea Ma Jou ai hiaturu ma hingahu o Isiraele ma nyawaika.

O Howono ma Dadamunu ma Wange

²⁶ De Ma Jou o Yawe ka wihingahuohi o Musaika manga rame-rame ma hiaturu ma ngekomo wato,

²⁷ “De o Guguli ma rame-rame ipahaika o wange hiwo dika ma dekana de adonoka o Howono ma Dadamunu ma Wange ma gahe. De o wange gea ufa ngini niolomo la nimahitipokouku to Ngohi ahi himangoka. De ko idadiua o inomo niaolomo la nimahihohininga ti ngini nia howono Ngohino. De nia huhuba naga abe kiani nimahihuba Ngohi Ma Jou o Yaweino de o uku. Ho ngini mata-mata kiani nimakokitoomuino de nia doomu gea nihiromanga o debi-debini ma doomu angamoi ma wange gea Ngohi tomadingakoka.

²⁸ De o wange gea duru ko idadiua nimakarajaanga abe nia karajaanga o kia dika angamoi o wange gea o Howono ma Dadamunu ma Wange. De ti ngini nia hidemo ona inihihuba Ngohi Ma Jou o Yaweiye abe Ngohi ti ngini nia Jou. De ti ngini nia howono ma dadamunu abe inihitebini ahi himangoka gea ena abe ona inihihuba.”

²⁹ “De nako naga o nyawa nginioka abe o wange naa ko yapakeua la yomahitipokouku ahi himangoka abe ko yaniikua o Howono ma Dadamunu ma Wange ma hiaturu hiadono yaniiki dika to ona manga hininga, ona gea kiani niahikatingaka nia doomuino.

³⁰ Abe ona ko ihihigihenua hiadono yokarajaanga o Howono ma Dadamunu ma Wangeoka, ona gea kiani Ngohi tahohowono de o hone-honenge.

³¹ Ufa niataoko ihowono ahi demo nenanga, abe inidaene ngini mata-mataika, tato ko idadiua nikarajaanga o kia dika o Howono ma Dadamunu ma Wangeoka! Naa o hiaturu ma pareta abe kiani ka ihikaika ngini mata-mata nianiiki ka hiadono nia totofora yolape-lapeuku de ngaro ahao o kiaka dika nigogere.

³² Abe o wange gea duru idadi ti ngini nia Hiaini ma wange abe ko niolomuahi de ko nikarajaanguahi de ko iwa moi utu nimahiaka angamoi homoi-homoi nia kokihiningaka kiani nimahitipokouku ahi himangoka. De ti ngini nia hiaini imulaenge ka de o wange imahidutuluku ka hiadono ma dawangeino abe nia howono ma dadamunu ma wange. De angamoi gea ena ma wange abe inihihuba la nia howono atamunu ho nia hiaini igila-gila ka hiadono ma wange imahidutulukoli abe genangoka de ahao nia hiaini ibooto. De gea ahao ka idadi o inomo niaolomoli.” Hokogea Ma Jou ai hiaturu wahiree-reeika onangika la ka idadi manga howono ihitamunu o taongo moi ma moi.

O Hijai-jai ma Tau ma rame-rame

³³ De Ma Jou o Yawe ai hingahu moioli naga o Musaika wato,

^34-35 “Musa, nagali nia rame-rame ma hiaturu abe kiani ngona nadofanga o Isiraele ma nyawaika. Abe nia Howono ma Dadamunu ma Wange ipaha o wange iata ma dekana ho nia taongo ma mede tumidoka de ma tanggala ngimoi de motoa de ahao imulaengoli nia rame-rame abe nihiromanga o Hijai-jai ma Tau ma rame-rame. De hokonaa o Hijai-jai ma Tau ma rame-rame ma hiaturu: Abe ma oraha nia rame-rame gea nikokigogere o hijai-jai ma tauokahi la idadi moi nia hohininga abe nimahihohininga nia kangela ma dodagi ma oraha Ngohi tinihihupu nia kangela o Mesiiri ma nyawaino. Ho gea nihirame-rame Ngohi Ma Jou o Yaweino o wange tumidino ma dekana de ahao ma dawangeino nia rame-rame nihibobaha. De o wange ihira de o wange ma baha nia rame-rameoka naa kiani ngini mata-mata nimatogumu nia karajaangino abe nia biaha kiani nikarajaanga o wange-wangeiye la ka idadi nimakokitoomuino. De nia doomu hinooto abe o wange ihira de o wange ma baha gea ngini kiani nihiromanga o debi-debini ma doomu angamoi gea Ngohi duru tomadingakoka nia doomu hinooto gea. Masara o rame-rame ma wange utu de ka idadi niagorakoli nia karajaanga abe nia biaha kiani nikarajaanga o wange-wangeiye.

³⁶ De o wange tumidino gea kiani o wange ma getongo naga nia huhuba abe nimahihuba Ngohi Ma Jou o Yaweino de o uku. De ahao o wange ma tufange gea nia rame-rame nihibobaha ho ko idadiua nikarajaanga la ngini ka idadi nikokitoomuino de o doomu ma debi-debini ahi himangoka de naga nia huhuba moioli abe nimahihuba Ngohino de o uku.”

³⁷ “Ngohi Ma Jou o Yawe de gea ti ngini nia rame-rame mata-mata abe tinihidoaka nginika amomoiika la ikokidadi o hohininga nginika. De nia rame-rame amomoiika naga ma hiaturu abe tinihidoaka la ka idadi nihirame-rame itiai. De nimatoomuino la nidadi o debi-debini ma doomu ahi himangoka. Ho ma oraha nimatoomuino hokogea de ma oraha nia huhuba naga irupa-rupa abe nimahihuba de o uku Ngohi Ma Jou o Yaweino de gea nihihisanangi. Abe naga nia huhuba o aewani ma gahumino iharo-harongo ka hiadono itinoka, de naga o huhuba nia gandumino, de o inomo, de o angguru ma teongino ma gohakino abe nimahihuba o rame-rame ma wange-wangeiye de ma hiaturoka.

³⁸ De gea mata-mata ti ngini nia huhuba abe ma rame-rameoka de ahao ngini kiani nimahihuba Ngohino. De nagahi nia dora ma hidoaka abe o minggu-mingguiye nihihidoaka Ngohino to Ngohi Ma Jou o Yawe ahi Hiaini ma wangeoka. De ma oraha mata-mataika nagaoo ti ngini nia hidoaka Ngohino abe ti ngini nia igoka de aino, de nagaoo nia behehongo Ngohino gea abe ngini homoi-homoiika nihihibehehongoka niato niagoungu nidiai Ngohi Ma Jou o Yaweino. Ho nia hidoaka abe niaoino o Hijai-jai ma Tau ma rame-rame ma wange ma baha gea ena mata-mata o hidoaka ma hidogo.”

³⁹ “De naga utuohi abe toigo tinihitararono nginika ma titi gea kiani nidiai o Hijai-jai ma Tau ma rame-rameoka abe imulaenge o mede tumidoka de ma tanggala ngimoi de motoa. Abe nia rame-rame ma oraha ka ihikaika ngini o tau homoi-homoiika nigogere nia hijai-jai ma tauoka. Ho o rame-rame naa ko nidiaiuahi ma oraha naa masara ngini niodamaa hiadono ma oraha nigogeroka ti ngini nia tonakoka nia tau ma gou-goungoka de ahao nihirame-rame o hohininga ma rame-rame nenanga. De nia rame-rame naa adaene de ma oraha abe nia karajaanga nia redi-redioka niabootoka. Abe o taongo moiino ma hasili nia redi-redino niale de niatoomu ibootoka de ahao adono o Hijai-jai ma Tau ma rame-rame. De gea nihirame-rame o wange tumidino ma dekana de ufa niawohanga abe o wange ihira de o wange ma tufange abe ma rame-rame gea nihibobaha ngini mata-mata ko idadiua nia karajaanga niagoraka ho duru nimahiaini dika nako o wange hinooto gea.

⁴⁰ De nialeino o gota ma tage abe o gota o fara muruonino abe de ma tageoka, de o akere ma datekoka ka idadi nihidotoino o gota utu ma jaga abe de ma hoka kohamurubu la ena gea nialeino la nimahikatu nia hijai-jai ma tau homoi-homoiika. De o wange ihira gea nimaleinoli o gota ma rahai ma hofoko. Hokogea nia hidiai ibooto la itiai nimahuba de nihihigiriiri Ngohi Ma Jou o Yaweino o wange tumidino ma dekana.

⁴¹ De ngini kiani o rame-rame naa nihirame-rame Ngohi Ma Jou o Yaweino ka ihikaika ngaro nia totofora yolape-lapeuku la onangoo ka ihikaika ihirame-rame o wange tufangeino gea o tao-taongiye abe ma mede tumiduku. De o hiaturu ma pareta naa kiani ka ihikaika ngini mata-mata nianiiki.

⁴² De ngini mata-mataika abe nimaboa o Isiraele ma nyawa idodutu kiani nigogere nia hijai-jai ma tauoka o rame-rame ma wange tumidino ma dekana gea.

⁴³ Hokonaa nidiai la ufa niawohanga abe ma oraha gea Ngohi tinihihupu o Mesiiri ma nyawa manga giama ma kuahaino ho idadi nia hohininga ka hiadono nia totoforaukuoo yahihohininga abe ti ngini nia dodagino ma kangela ma oraha nigogere o hijai-jai ma tauoka. Abe ma oraha o Mesiiroka manga kuahaino Ngohi Ma Jou o Yawe tinihihupu ngini o Isiraele ma nyawa de Ngohi tinihigogere o hijai-jai ma tauoka. Ngohi ti ngini nia Jou.” Hokogea Ma Jou ai hingahu o Musaika la ona yaniiki itiai ma rame-rame abe idadi manga hohininga abe yahidumutu Ma Jou o Yaweika.

⁴⁴ Hokogea o Musa ahao wahingahu o Isiraele ma nyawaika abe manga rame-rame mata-mata gea Ma Jou o Yawe wahidoaka de ma hiaturoka onangika la ka idadi o hohininga ma ngoe onangika. Ho ona kiani o rame-rame mata-mata gea o tao-taongiye ihirame-rame. De manga rame-rame abe itagi ma wange moritoa gea, naga ma romanga hinooto abe moi o Gugutuku ma rame-rame de ma romanga moioli o Wange ma Tumi-tumidi ma rame-rame abe o minggu tumidi ibooto de ahao ma dawangeino de adonoka ma rame-rame ma amoko gea. Masara ika-ika de ihiromangoli o Pentakosta ma rame-rame abe ma romanga o Pentakosta gea ma titi adonoka o wange moritoa ibooto. De o wange moritoa gea adaene ma oraha duru ma dodihiraka o Isiraele ma nyawa naga o Sinai ma lokuoka de Ma Jou wahidoaka ai pareta ngimoi onangika ho ma titi enangoo yomahihohininga de ihirame-rame o Pentakosta ma Wangeoka. De hokogea ihiromanga ma oraha o Yesusu woboa o duniauku. Abe Una iwihidapakuika o gotaika duru o Totilakuru ma rame-rame ma wangeoka de Una wohonenge la wodadi nanga duruuru de unangoo iwihiromanga nanga Totilakuru ma Domba. Ho o Yesusu wohonenge ai wange moritoa adonoka de ai duruuruoli wouti o duniauku de Una gea Ma Jou o Womaha wouti duru o Pentakosta ma Wangeoka. Ho imaketero hoka ma dihira Ma Jou wahidoaka o Isiraele ma nyawaika manga duduhunu ai pareta ngimoiino o Pentakosta ma wangeoka, hokogenangoli wonahidoaka nanga duduhunu Ma Jou o Womahino o Pentakosta ma Wangeoka abe wodadi ai pareta ma duruuru ngoneino dika abe hingaku o Yesusika.