Gogao 2 - Ma Jou ai Demo-demo o Totobelohoka

O Isiraele ma nyawa manga huhuba o gandumino ma hiaturu

¹ De Ma Jou o Yawe ai hingahu o Isiraele ma nyawaika abe ma titi manga huhuba manga datomo ma hasilino naga abe hokonaa wihingahu o Musaika wato, “De ti ngini nia huhuba moioli abe nimahihuba la nihihisanangi Ngohino, Ma Jou o Yaweino, gea ti ngini nia gandumino. Ho onagona dika abe yahidiai manga gandumu ma huhuba, kiani yairiki o tarigu o gandumino abe duru ialuhu de yadedetaka. De ena gea utu ihidaulu de utu idadi nia hidemo manga inomo. De abe ihidaulu kiani de ma hisapuroka abe ihisapuru o saitunu ma minya de o manyanyi abe Ma Jou womadingakoka.

² De manga huhuba gea yao o Harunu de ai ngofa-ngofakika abe yodadioka nia hidemo Ngohino. Ho nia hidemo ahao yale o okutu moi ani gandumino abe de ma hisapuroka o minya de o manyanyi. O tarigu o okutu moi gea ona inihihuba o uku iharo-harongo ma ngioka. Ka de nia huhuba gea itokara de naga ma bounu ma rorahai ihaili Ngohi Ma Jou o Yaweiye abe duru ihihisanangi.

³ De nia tarigu ma huhuba ma hou gea ena niahidoaka o Harunu de ai ngofa-ngofakika la idadi to ona manga inomo. De abe ti ngini nia huhuba iharo-harongo naga o fara muruono naga. De naa ena abe o tarigu o gandumino gea o huhuba moi abe taetongo duru ma debi-debini abe nimahihuba de o uku Ngohi, Ma Jou o Yaweino.”

⁴ De Ma Jou wahitararono wato, “De nako nia huhuba o roti ma bobululunu abe niaharongo o haharongo ma goronaka kiani nidiai o gandumino abe niawederoka hiadono duru ialu-aluhuku ho idadioka o tarigu ma mangaluhu. De nia tarigu ma mangaluhu gea kiani niahisapuru de o saitunu ma minya masara moi abe duru ko idadiua niahisapuru de gea o ragi. Eko ka idadi nia huhuba o gandumino nidiai o roti ko iwa ma ragi ma hinyole ma ngina-ngina abe niahiehe de o saitunu ma minya abe enangoo tosanangi todafongo.”

⁵ De Ma Jou wahitararono wato, “De nako nia huhuba o gandumino o hinyole ma roti kiani niapake o tarigu o gandumino abe niahisapurokahi de o saitunu ma minya de ahao niahinyole nia tarigu gea de ko idadiua niahisapuru de o ragi.

⁶ De ahao o hinyole ma roti gea niapela-pelakuku de nihituagiokahi de o saitunu ma minya de ahao nia huhuba gea niahidoaka onangika abe inihidemo Ngohino.

⁷ De nako nia roti gea niahihinyole o bohukuku enangoo nidiai de o tarigu ialuhu de yadedetaka abe nihisapuroka de o saitunu ma minya.

⁸ De nia gandumu ma tarigu ma huhuba irupa-rupa gea abe nidiai de nianiiki ma hiaturu abe tinihidoakoka nginika gea nia huhuba ma hidoaka Ngohiye Ma Jou o Yaweino. De ma oraha nia huhuba gea niao nia hidemoika una wodafongo de wao o haharongo ma huhuba ma ngiika.

⁹ De ahao o rotino gea wale ma dobiki abe o hohininga ma dodunguu de gea ena wotufuku o haharongo ma huhuba ma ngioka la gea ihiboaiye ma bounu ma rorahai Ngohi Ma Jou o Yaweiye abe duru nihihisanangi de gea ena.

¹⁰ De nia huhuba ma roti abe ko aharongua, gea ena idadi nia hidemo manga inomo. De masara o huhuba ma hidoaka abe Ngohi Ma Jou o Yawe taetongo duru ma debi-debini ena gea ma hononga abe nimahihuba de o uku Ngohi Ma Jou o Yaweino.”

¹¹ De Ma Jou wahitararonohi wato, “De nia huhuba o tariguino abe nimahihuba Ngohi, Ma Jou o Yaweino, ko idadiua naga ma hisapuru o ragi abe ihifero ma tarigu. Abe nako o haro-harongo ma huhuba ko idadiua o ragi de ko idadiua o ofungu ma gula nihidaulu o ukuika la gea ena nimahihuba Ngohi, Ma Jou o Yaweino.

¹² Ma nako ma oraha nimahihuba nia huhuba nia datomino ma domoro de ka idadi o ragi de o ofungu ma gula niahihuba Ngohi Ma Jou o Yaweino iti ufa idadi nia huhuba iharo-harongo. De angamoi duru ko idadiua naga ma hisapuru o ragi eko o ofungu ma gula abe nihidaharongo de nia huhuba iharo-harongo. Hokogea ahi behehongo ma hiaturu la nia huhuba iharo-harongo ihihisanangi Ngohino.

¹³ De ti ngini nia huhuba o gandumino mata-mata kiani nihisapuru de o gahi. O huhuba ma hisapuru o gahi gea idadi o hohininga ma dodunguu abe ihitunguu to Ngohi nia Jou ahi behehongo o Isiraele ma nyawaika abe ilaku ka hiado-adonika. Ho ufa ngini niawohanga ma hisapuru o gahi gea ma oraha nimahihuba Ngohino nia huhuba o gandumino. De nia huhuba utu ngaro o domorino eko nia huhuba o aewanino utu ma, kiani mata-mataika nia huhuba de ma hisapuroka o gahi.”

¹⁴ De Ma Jou wahitararonohi wato, “De nako nimahihuba o gandumu ma domoro Ngohi Ma Jou o Yaweino de hokonaa ma hiaturu: Nimale o gandumu ma hofoko ma gobe de nihirero de ahao ma bunuhu gea niatuku de niahauku o ukuoka ka hiadono ipotoka ma hohutulu.

¹⁵ De angamoi gea o gandumu ma huhuba kiani naga de ma hisapuru o saitunu ma minya. De ahao ma hononga nihikatingaka la ma hononga gea idadi o hohininga ma dodunguu de ma gandumu gea nioderero ma lokuino de o manyanyi ma ngedere.

¹⁶ De nia huhuba gea niahidoaka nia hidemoika de ona yodafongo nia huhuba gea abe ma hononga nihisapuroka de o saitunu ma minya de o manyanyi. De ena gea idadi o gandumu atutukoka ma huhuba abe yotufuku o haharongo ma huhuba ma ngioka la ma gandumu gea inihihuba de o uku Ngohi Ma Jou o Yaweino.” Hokogea Ma Jou wihingahu o Musaika abe kiani wahitararono o Isiraele ma nyawaikali.