Gogao 16 - Ma Jou ai Demo-demo o Totobelohoka

O Isiraele ma nyawa manga Howono ma Dadamunu ma Wange ma hiaturu

¹ Gea o Harunu ai ngofaka yahinooto yohonengoka ma titi yodiai ihowono ma oraha yomahuba de o uku abe ena gea ko iwidingakinoua Ma Jou o Yaweika. Abe manga uku ma ngaboho yale o uku ma homoaino ho ko ma debi-debinua ma uku ho ma oraha yomahitigi Unangika de wahohonenge.

² De ipaha Ma Jou o Yawe witemo o Musaika wato, “Musa, done o Harunoo wohonenge ho kiani nihitiari la ufa unangoo wahowono womahitigi Ngohino. Abe done ai hiningaino dika ipuda de wowoha-wohama o Debi-debini ma Ngiika abe Ngohi tomadingakino doka o dadatoko o ngoerino ma honongaka abe ahi Tau ma goronaka. Abe ma dadatoko o ngoerino ikokorona gea mangale doka ma hononga naga ahi Behehongo ma Peti. De ahi Behehongo ma Peti ma dadamunu ena gea o Hikadame ma Ngi abe genangoka o nyawa manga howono ihitamunu la ahi nyawa manga howono Ngohino ka idadi tahiapongo. De Ngohi tomahimatoko genangoka abe tomahihawo de o lobi abe imanoa ahi Behehongo ma Peti ma lokuiye. Ho kiani nihingahu ani riaka o Harunika abe una kiani womahidodiai wowohama ahi ngiika gea.”

³ “Ho hokonaa ma hiaturu ma ngekomo abe kiani o Harunu womahitiari la waniiki ma oraha wowohama o Debi-debini ma Ngi ma honongaka abe ka enangohi Ngohi tomadingakino. Ihira kiani womahihuba o hapi ma nauru ma goo la idadi to una de ona ai tauoka manga howono ma dadamunu ma huhuba. De o domba ma nauru ma baluhu moi enangoo o huhuba iharo-harongo. O huhuba hinooto gea kiani wabootokahi de ahao ka idadi wowohama womahitigi Ngohino.” Hokogea Ma Jou wihingahu o Musaika la ka idadi wihitiari ai riaka o Harunika. Ma Jou de ai medebini ma dararono naga ai Behehongo ma Peti ma lokuoka o Ngi ma Debi-debini ma goronaka abe ka enangohi Ma Jou o Yawe womadingakino. De ka womatengo dika ka idadi wowohama doka ma goronaika de una gea o Isiraele ma nyawa manga hidemo manga haeke abe ka unangohi manga hidemo wokurutiye. De gea wowohama o taongo moi ma moi dika abe adaene de o Howono ma Dadamunu ma Wange abe duru o wange gea o Isiraele ma nyawa mata-mataika wahihuba manga howono ma dadamunu ma huhuba. Ho gea woboa Ma Jou o Yawe ai himangino de o howono ma huhuba ma awunu abe wodabarihi o Hikadame ma Ngiika abe daku o Behehongo ma Peti ma dadamunu ma lokuoka. Ho ma oraha o Isiraele ma nyawa gea, abe ma oraha o Yesusu ko womaboauahi, duru imakawalimi de ma oraha naa abe o Yesusu wodadioka to ngone nanga hidemo wokurutiye ho Una nanga hidemo Ma Jou o Babaika. Ho ma oraha naa ka idadi hoboa Ma Jou ai himangika o wange de o futu de nanga domoroini angamoi ko iwa ma oraha o Yesusu wonaoluku masara ka ihikaika wonahidemo Ma Jouika. De gea imakohowono de ma dihira o Isiraele ma nyawa manga hidemo, abe manga hidemo wokurutiye gea, abe ka idadi wowohama Ma Jou ai himangino o taongo moi ma moi dika de marai duru wofafara de ai hawana ma oraha wowohama done Ma Jou wihohonenge mangale done naga abe ko womahidiaiuahi ma ko womahiorikua.

O Hitararono ma hidogo

⁴ De ahao Ma Jou wohigila-gilahi de ai hitiari ma demo o Musaika abe ahao kiani wadofanga ai riakika. Abe Ma Jou wato, “De ai hidiai gea wohiaturu ibooto de ahao o Harunu womaohiki la ai badanga ma amokika itebinoka de ahao womahibajuoli. De womahinoauku ai pakeanga abe ona o hidemo mata-mata yapake o wange-wangeiye abe o ngoere ma lawe ma alu-aluhino. Ho ihira ai pakeanga abe duru ai badangika idateke womahinoa, de ahao ai baju ma gogurutuku ma biaha dika womahinoa. Ena gea womahinoa ibooto de ahao womahidubuluino de ma bulu abe enangoo o ngoere ma lawe ma alu-aluhino. De ahao womahidutuaaoko de o hidemo manga tuaa abe enangoo yodiai de o ngoere ma lawe ma alu-aluhino. Hokogea o hidemo manga pakeanga abe yodingakoka ma titi manga karajaangika.

⁵ De kiani o Harunu una wale o Isiraele ma nyawa manga doomu ma amokino manga kabingi ma nauru hinooto abe idadi manga howono ma huhuba. De kiani waleoo o domba ma nauru moi abe ahao idadi o huhuba iharo-harongo abe wohihuba ma gahumu de o uku.” Hokogea Ma Jou ai hingahu o Musaika abe kiani wadofanga ai riaka o Harunika.

⁶ De Ma Jou wogila-gila de ai behehongo ma hiaturu abe ma titi manga huhuba mata-mata gea, wato, “De o Harunu ahao womahihuba o hapi ma nauru ma goo abe idadi o Harunu ona o tau moi manga howono ma dadamunu ma huhuba.

⁷ De ma oraha womahidiaioka la womahihuba ai hapi ma, una ko wogila-gilauahi, de kiani wale o kabingi ma nauru hinooto gea, abe idadi o Isiraele ma nyawa manga howono ma huhuba. De ahao o kabingi gea wao o Hikamake ma Tau ma ngoranika abe gea Ngohi, Ma Jou o Yawe, ahi himangoka.

⁸ De genangoka o Harunu wapake ai mamaihi ma kiahonanga abe ihidingakoka Ngohino la wohioriki to Ngohi Ma Jou ahi hininga ma mau. Ho o Harunu naa ena wapake la adaene o kabingi ma nauru moiika abe Ngohi toiriki la idadi o Isiraele ma nyawa manga howono ma huhuba. De ma kabingi ma dodiawo ena gea ihitunguu la idadi o howono ma hikatingaka ma dodunguu. De o kabingi gea ahao yaloara duru kohagurutika o tonaka ma kakaahaika.

⁹ De o kabingi ma nauru abe o mamaihi adaene ena gea idadi ahi nyawa manga howono ma huhuba ho ahao o Harunu wotoma de wohihuba Ngohi Ma Jou o Yaweino.

¹⁰ De ma dodiawo ena gea ahao idadi o howono ma hikatingaka ma dodunguu abe ma kabingi gea idadi o huhuba ma ngango abe ihidingaka Ngohi, Ma Jou o Yaweino. Ho o Harunu wapake ma kabingi gea la wodiai mata-mata abe tihibehehongo unangika. De una kiani ahao o kabingi gea wahidoaka o nyawaika abe yaloara duru kohagurutika o tonaka ma kakaahaika.”

¹¹ “Ho ma hiaturu ma hidiai mata-mata gea o Harunu wabootoka de ahao adonoka ma oraha o hapi ma nauru ka ma goohi abe kanganoinohi waleino de womadoma la ena gea idadi o Harunu ona o tau moi manga howono ma dadamunu ma huhuba.

¹² De ahao o Harunu woiki o Haro-harongo ma Huhuba ma Ngiika abe naga Ma Jou o Yawe ai himangoka de waleino o uku ma ngaboho de wonoa ai manyanyi ma dudufuku ma ngiuku. Ho ai manyanyi ma dudufuku ma ngi waomanga de ahao waleino o manyanyi o okutu hinooto ma ngedere abe ma bounu duru ma rorahai. De ena mata-mata o Harunu wao de wowohama o Debi-debini ma Ngiika abe Ngohi Ma Jou tomadingakino doka o dadatoko o ngoerino ma honongaka.

¹³ De genangoka una o manyanyi o okutu hinooto wohingohama o manyanyi ma dudufuku ma ngiuku duru Ngohi Ma Jou o Yawe ahi himangoka. De o manyanyi ma nofo ma amoko ahao ihailiye de atamunu o Hikadame ma Ngi o Behehongo ma Peti ma lokuoka. Abe o Hikadame ma Ngi gea daku o Behehongo ma Peti ma dadamunu ma lokuoka abe genangoka o howono Ngohino atamunoka. De Musa, ka idadi genangino ani riaka o Harunu woboa de ko wohonengua iti duru wohidodiai ma hiaturu mata-mata waniiki itiai abe naa tonihidoakoka ngonaika.

¹⁴ Gea o Harunu wodiai ibooto de ahao wohupu wogilio o Huhuba iharo-harongo ma ngiika de ai huhuba o hapi ma awunu wale de wowohamoli o Debi-debini ma Ngiika abe Ngohi tomadingakino. De naa o Harunu ai hagaraara ma dekara watonouku o hapi ma awunuku de wodopopoto daku o Hikadame ma Ngi ma himangoka de ahao wodopopotoli ma tumidino dau o Behehongo ma Peti ma pahagika abe ma himangoka.”

¹⁵ “De gea o Harunu wodiai ibooto de ahao wohupuoli de watoma o kabingi moi gea abe idadi o Isiraele ma nyawa manga howono ma huhuba. De ahao to ena ma awunoo wao wowohamoli o Debi-debini ma Ngiika abe Ngohi tomadingakino de wodiai de ma awunu gea duru imaketero abe wodiai de o hapi ma nauru ma awunu. Ho o kabingi ma awunoo wodopopoto daku o Hikadame ma Ngi ma himangoka de ahao dau wodopopotoli ma tumidino o Behehongo ma Peti ma pahagika abe o peti ma himangoka.

¹⁶ Hokogea o Harunu kiani o huhuba wahihuba ma titi o Debi-debini ma Ngi abe tomadingakino. De angamoi ma Ngi abe tomadingakino enangoo ihipeseke mangale ma titi o Isiraele ma nyawa ka ihikaika to Ngohi ahi pareta yatilakuru de manga howono mata-mata. De ahao kiani o Harunu waleinoli o huhuba ma awunu de wodopopotoli o Hikamake ma Tau ma amokika la naga to enangoo ma howono ma dadamunu.

¹⁷ De o nyawa ko moiua utu abe ka idadi yowohama Ma Jou ai Tau o Ngoerino ma goronaika ma oraha o Harunu naga ai leleani ma gogiriaka. Abe o Harunu kiani ona o tau moi manga howono ma dadamunu wodiai de ahao wodiaioli o Isiraele ma nyawa manga doomu ma amokika manga howono ma dadamunu. Nako gea mata-mata wodiai ibooto de wohupuoka o Hikamake ma Tauino de ahao ona o hidemo abe yotobaleleani genangoka ka idadi yowohamoli.”

¹⁸ “De o Harunu ka de wohupu o Hikamake ma Tauino de woboa o huhuba iharo-harongo ma ngiika abe ka ihikaika naga Ma Jou o Yawe ai himangoka de to enangoli ma howono ma dadamunu wodiai. Ho naa ai huhuba o hapi ma nauru ma awunu de o kabingi ma nauru ma awunu abe kanganoino wapake de naa ena waleinoli de wohiehe o huhuba ma ngi ma tatadukika abe naga ma libuku iatoka.

¹⁹ De ahao o Harunu ai hagaraara watonouku o awunuku gea de wodopopoto ma tumidino o huhuba iharo-harongo ma ngi ma lokuika. De hokogea kiani o Harunu wodiai la o huhuba ma ngi gea wohitebini o Isiraele ma nyawa manga wowango ma datoro ma pesekino la ma huhuba ma ngi idadiokali ma debi-debini abe hoka ma dihirali.” Hokogea Ma Jou ai behehongo o Musaika abe kiani una wadofanga o Harunu ai riakika angamoi o Harunu wodadioka manga hidemo wokokurutiye la wahidemo o Isiraele ma nyawa Ma Jou o Yaweika.

²⁰ De Ma Jou wogila-gila de ai behehongo ma hiaturu, wato, “Hokogea o Harunu kiani wodiai o howono ma dadamunu la wohitebini o Debi-debini ma Ngioka abe Ngohi tomadingakino, de o Hikamake ma Tau ma goronaka, de o Huhuba Iharo-harongo ma Ngioka. De o howono ma dadamunu ma hiaturu mata-mata gea wabootoka de ahao o huhuba ma kabingi ma ngango wale.

²¹ De ihira una de ai giama hinooto wafokumu o kabingi gea ma peauku de o Isiraele ma nyawa mata-mataika una wahidemo ho o kabingi gea wafokumu de wohidefetongo ka ma moi abe o Isiraele ma nyawa manga howono irupa-rupa Ngohino. De o Harunu ai hingahu gea ngade-ngade imaketero hoka ona ma hirete yomangaku manga howono irupa-rupa Ngohino. Hokogea o Harunu wohitunguu abe manga howono mata-mata wakelenga o kabingi ma peauku la ena idadi o howono ma hikatingaka abe yaloara duru kohagurutika o tonaka ma kakaahaika. De naga o nauru womatengo abe iwiirikoka la una ma kabingi gea wangotaka duru kohagurutika la ihikatingaka de o Isiraele ma nyawa manga dodogumu ma ngiino.

²² De ma kabingi naa amoku o Isiraele ma nyawa manga howono mata-mata ho ka de una abe wangotaka ma kabingi wapidili o tonaka ma kakaahaka de o Isiraele ma nyawa manga howono ihiloara ma gurutika.”

²³ “De o Harunu ai hidemo ma pakeanga abe o ngoere ma lawe ma alu-aluhino abe kangano wapake ma oraha wowohama o Debi-debini ma Ngiika naa kiani wahuputu. De gea angamoi ai leleani ma karajaanga mata-mata gea wabootoka ho wowohamoli o Hikamake ma Tau ma goronaika de wahuputu ai pakeanga gea de kiani wanoaika genangoka.

²⁴ De o gogohiki ma ngi ma debi-debini naga genangoka abe kiani wowohama de womaohiki de o akere de ahao to una ai hidemo wokokurutiye ma pakeanga abe duru ma rorahai womahinoaukuoli. De ahao woiki o huhuba iharo-harongo ma ngiika la to una ai howono ma huhuba o domba ma nauru ma baluhu watetoro de womahihuba ma gahumu de o uku la idadi o Harunu ona o tau moi manga howono ma dadamunu ma huhuba. De wale o domba ma nauru ma baluhu gea abe kangano ihidiaioka la idadi o Isiraele ma nyawa mata-mataika manga howono ma huhuba. De o domba genangoo watetoro de wahihuba ma gahumu de o uku la idadi o Isiraele ma nyawa mata-mata manga howono ma dadamunu. Ho o domba hinooto gea wahihuba ibooto de to una ma hirete ai howono watamunoka de o Isiraele ma nyawa manga howono mata-mataino enangoo wakokitamunoka la ona wahitebini Ma Jou ai himangoka la ka idadi wahiapongo.

²⁵ De naga o huhuba utuohi abe kiani wohidaulu o haro-harongo ma huhuba ma ngi ma lokuoka de gea ma haki o hapi ma naurino abe ihira wotoma. De kiani wohidauloo ma haki abe wale o kabingi ma naurino abe enangoo idadi o howono ma huhuba. Ho o domba ma nauru hinooto ma gahumu, de o hapi ma nauru ma haki, de o kabingi ma nauru ma haki, gea mata-mata wohidaulu genangoka hiadono ikokitinoka.”

²⁶ De Ma Jou wogila-gila de ai behehongo ma hiaturu, wato, “De nagahi ma hiaturu o nauru womatengo gea kiani waniiki abe wangotaka o kabingi ma nauru gea abe idadi o howono ma hikatingaka. Una ka de ma kabingi gea waoka o tonaka ma kakaahaika de wolio de kiani unangoo womaohiki de o akere de ai pakeanga womaboka de ahao womahinoaukuoli. Una kiani hokogea wodiai ibooto de ahao wotebini hiadono ka idadi wowohamoli o Isiraele ma nyawa manga dodogumu ma ngiika.”

²⁷ “De o hapi ma nauru de o kabingi ma nauru abe kangano idadi o howono ma huhuba naga to ena ma badanga ma kiahonanga abe ko idadiua ihidaulu o huhuba iharo-harongo ma ngioka. Abe to ena ma kai, de ma badanga ma kiahonanga abe naga to ena ma pokoro ma goronaka de ma ioko ena gea mata-mata kiani yao o ngi moiika abe nia dodogumu ma ngi ma poretoka de genangoka niatufuku. O aewani hinooto gea abe kangano to ena ma awunu o Harunu wao o Debi-debini ma Ngi ma goronaika la idadi o howono ma dadamunu.

²⁸ De o nauru abe ma huhuba gea ma badanga ma kiahonanga watufuku doka manga dodogumu ma poretoka, una gea watufuku ibooto de ahao unangoo kiani womaohiki de o akere de to una ai pakeanga womaboka de ahao womahinoaukuoli. Una kiani hokogea wodiai ibooto de ahao wotebini hiadono la unangoo ka idadi wowohamoli o Isiraele ma nyawa manga dodogumu ma ngiika.” Hokogea Ma Jou o Yawe ai behehongo ma hiaturu abe kiani yaniiki la manga howono ma dadamunu yodiai.

O Howono ma Dadamunu ma Wange enangoo o Hiaini ma wange abe kiani yaniiki o tao-taongiye

²⁹ De ahao o Musaika Ma Jou wihingahu naga o wange moi abe wairikoka la idadi o Howono ma Dadamunu ma Wange abe o wange gea Una ma hirete womadingakoka. Ho ka de adonoka o wange gea de ai behehongo ma hiaturu mata-mata gea kiani yaniiki itiai abe kanganoino Una wihingahuoka o Musaika. Abe ma titi Ma Jou wotemo wato, “De duru o tao-taongiye kiani o mede ma tumiduku de o wange ngimoioka ngini o Isiraele ma nyawa de ona o homoaino ma nyawa abe yogogere nginioka kiani ngini mata-mata nianiiki o hiaturu ma behehongo nenanga mata-mata abe kanganoino tinihitararonoka. De gea angamoi adonoka o Howono ma Dadamunu ma Wange abe Ngohi Ma Jou tomadingakoka. De o wange gea ufa ngini niolomo la nimahitipokouku to Ngohi ahi himangoka. De o wange gea duru ko idadiua nimakarajaanga abe nia karajaanga o kia dika.

³⁰ De hokogea tinihibehehongo, ngini nia doomu ma amokika, angamoi duru o wange gea ti ngini nia hidemo wokokurutiye winihihuba nia howono ma huhuba abe idadi ti ngini nia howono ma dadamunu la inihitebini Ngohi Ma Jou o Yawe ahi himangoka.

³¹ Ho o wange gea kiani niaetongo o wange ma debi-debini ho idadi o Hiaini ma wange abe duru nimahiaini dika nia karajaangino. De Ngohi tinihibehehongoo abe duru o inomo ko niaolomua la nimahihohininga ti ngini nia howono Ngohino. De o Howono ma Dadamunu ma Wange ma hiaturu ma behehongo naa tinihidoaka la idadi o pareta nginika ka hiado-adonika.”

³² “Ho ma oraha naa de ka hiado-adonika onaguna dika o Harunu ai totoforaukuino abe iwidingakoka la wituruuru hiadono unangoli wodadi ti ngini nia hidemo wokokurutiye, una gea ahao kiani duru waniiki itiai ma hiaturu gea. Abe ma titi o tao-taongiye abe o Howono ma Dadamunu ma Wangeoka de unangoo gea kiani womahinoauku o hidemo ma baju abe imadingakoka ma karajaangika abe naa tinihidoakoka.

³³ Ho o hidemo wokokurutiye una kiani ahao o tao-taongiye wodiai o howono ma dadamunu ma huhuba abe ihitebini o Debi-debini ma Ngi abe Ngohi Ma Jou o Yawe tomadingakoka Ngohino. De wodiaioo o howono ma dadamunu ma huhuba abe ihitebini o Hikamake Ma Tau ma amokika. De wodiaioo o howono ma dadamunu abe ihitebini o Huhuba iharo-harongo ma Ngi. De wodiaioo o howono ma dadamunu abe yahitebini nia hidemo utu ona mata-mataika. De ma moiohi wodiai o howono ma dadamunu abe yahitebini o Isiraele ma nyawa manga doomu ma amokika. Hokogea kiani o Isiraele ma nyawa nia hidemo wokokurutiye wodiai o howono ma dadamunu mata-mataika.”

³⁴ “De ahi behehongo ma hiaturu ma hingahu nenanga idadi o pareta moi abe ngini o Isiraele ma nyawa mata-mataika kiani nihingounu la nia howono ma dadamunu Ngohino o tao-taongiye niadiai angamoi hokogea ma ngekomo la ngini ka ihikaika nia gogao niapaliara Ngohino abe ngini to Ngohi Ma Jou o Yawe ahi nyawa.” Hokogea Ma Jou o Yawe ai behehongo ma hingahu abe kiani o Musa wadofanga o Isiraele ma nyawaika.