Gogao 10 - Ma Jou ai Demo-demo o Totobelohoka

O Harunu ai ngofa-ngofaka o Nadaba de o Abihu yahowono

¹ O wange moiuku naga Ma Jou ai Tau o Ngoerino ma goronaka o Nadaba de o Abihu, abe ona yahinooto o Harunu ai ngofaka, ho ona o Isiraele ma nyawa manga hidemo abe yahitobahidemo Ma Jouiye. De ma oraha gea ona yahinooto manga karajaanga ma goronaka de ato iwileleani Ma Jou o Yaweika la iwihisanangi de o manyanyi yotufuku Unangiye. Ho ona yale manga manyanyi ma dudufuku ma ngi de yonoa o uku ma ngaboho ma goronauku de ahao ihingohamoli ma dudufuku ma ngiika ma manyanyi abe yotufuku. Masara o uku ma ngaboho abe yapake ko enangua dika abe Ma Jou wato kiani ena gea dika yapake.

² Ho ka itodokanino naga o uku Ma Jou o Yaweoka de aino de yadaene o Nadaba de o Abihu o Tau o Ngoerino ma himangoka de genangoka ona yokokihonenge Ma Jou o Yawe ai himangoka.

³ De ahao o Musa wihingahu o Harunika wato, “Hokonaa idadi la ngone hihioriki kiani hihingounu itiai Ma Jou o Yaweika. Una naa wonahimatoko ai medebini ngoneino la ngone duru hohioriki to Una ai demo ma titi abe ma dihirainohi wonahingahuoka wato, ‘Ngohi tomahitaana ahi medebini onangika abe naga ahi datekoka, La o nyawa mata-mataika naga manga horomati itagi Ngohino.’ Hokogea Ma Jou wonahingahuokau la ngone hihingounu de nanga modongoka Unangika.” Hokogea o Musa wihingahu o Harunika ibooto de o Harunu duru womarii-riidoka dika. Ma Jou o Yawe wahingahuokau o Isiraele ma nyawa manga hidemoika abe nako o manyanyi yotufuku Unangiye kiani yapake o uku abe yale o Haro-harongo ma Huhuba ma Ngiino angamoi ma uku gea iwidingakoka Unangika. Masara o Harunu ai ngofaka yahinooto naa marai de manga sade yale dika o uku utu de manga hiningaka ato, “Adodoua ngaro ka hapake.” Masara gea manga horomati ko iwa Ma Jou ai behehongika abe kiani iwihingounu itiai. De angamoi to ona manga datoro duru ka ihikaika o nyawa manga himangoka ho done onangoo ahao yomaaduru hoka o Nadaba de o Abihuoli. Abe Ma Jou wahioriki o Isiraele ma nyawa iwihigihene ko itiaiua ho hiadono ma dihiraino abe o Sinai ma lokuoka kiani wahitiari onangika la ufa yatilakuru ai behehongo ma demo ngaro ona o Isiraele ma nyawaika eko ngaro manga hidemo unangika ma, ko idadiua yatilakuru Ma Jou ai hingahu ma demoika. De Ma Jou ai hingahu o Musaika gea hamake O Huhupu 19:22: “De hongoli onangoo abe manga gogianongoru yahidemo Ngohiye done yomaputuhu yatilakuru ahi loku ma batingino angamoi ona ato, ‘Ngomi o hohidemo Ma Jouika ho ka idadi abe mia biaha miboa Ma Jou o Yaweino,’ masara nako ona yotemo hokogea la ato yomahuba Ngohino masara ko yomahidiaiuahi de ko yomatingakinouahi Ngohino, ho onangoo gea kiani tahohonenge.” Hokogea Ma Jou ai medebini ho hiadono ma oraha o Abihu de o Nadaba ato iwileleani Ma Jou masara ka yaniiki dika abe ipuda to ona manga hiningaino hoka o Kainoli ho hiadono kiani wahohowono onangika.