Gogao 1 - Ma Jou ai Demo-demo o Totobelohoka

O huhuba iharo-harongo ma hiaturu Ma Jouino

¹ De Ma Jou o Yawe naga ai Tau o Ngoerino ma goronaka, abe ihiromangoo o Hikamake ma Tau. De Una wibehehongo o Musaika ho o Musa woboa la wohioriki Ma Jou ai hininga. De Ma Jou wihingahu, wato,

² “Ngona Musa, nahingahu o Isiraele ma nyawa mata-mataika ma hiaturu abe kiani yaniiki ma oraha manga huhuba o aewani yomahihuba Ngohi Ma Jou o Yaweino. Ihira ma hiaturu nako manga aewani abe yomahihuba ka idadi o hapi, eko o domba, eko o kabingi ma, kiani yale to ona o Isiraele ma nyawa manga duduonino.”

³ “De nako manga huhuba gea o huhuba iharo-harongo abe yale manga duduonino o hapi gea kiani yomahihuba ma nauru abe duru ko iwa ma heluku eko ma nabo. De abe womatengo womahihuba to una ai hapi ma nauru gea kiani wao o Hikamake ma Tau o Ngoerino ma ngoranika. De genangoka ai hapi wahidoaka onangika abe yodadioka nia hohidemo Ngohino abe ona yatobaleleani de manga huhuba iharo-harongo. Ho ai huhuba wahidoaka onangika genangoka la ka idadi Ngohi Ma Jou o Yawe todafongo.

⁴ De ahao una ma aewani ma dutu kiani wafokumu ai huhuba ma aewani ma peauku la wohitunguu ma aewani gea to una ai duruuru. De ahao ona o hohidemo ma nyawa ka idadi yodafongo ai duruuru gea de o aewani ma dutu iwihihuba la idadi to una ai howono ma dadamunu.

⁵ De gea wafokumu ibooto de ahao una ma dutu ai aewani ma ngomaha watoakoka de ma awunu wohidakunu o bokoluku ho ma aewani ihonengoka Ma Jou o Yawe ai himangoka. De ahao ti ngini nia hidemo abe o Harunu ai ngofa-ngofaka ma awunu gea yao o huhuba ma ngiika abe naga o Hikamake ma Tau o Ngoerino ma himangoka. Genangoka de ahao ma awunu gea yoderero ilamoko o huhuba ma ngi ma pahagi ma baka iatika.

⁶ De ma awunu yodabarihi ibooto de ahao ma hapi gea ma kai yafelenga. De yafelenga ma kai ibooto de ahao o hapi ma badanga yatobi-tobikuku.

⁷ De ahao nia hidemo o Harunu ai ngofa-ngofaka o hidaulu ma gota yafafo o uku ma ngioka abe o huhuba ma ngi ma goronaka de atufuku ho ma gota gea imakohoraka.

⁸ Gea de ahao o Harunu ai ngofa-ngofaka abe onangoo nia hidemo naga manga hiaturu la yakelenga itiai o huhuba ma uku ma lokuoka ma hapi ma badanga ma dobi-dobiki ka ma moi de ma pea de ma haki.

⁹ Masara nako o huhuba ma pokoro ma dola de ma lou de ma giama kiani yaihorokahi de o akere de ahao enangoo yakelenga o ukuoka. De ma bounu idoa Ngohi Ma Jou o Yaweiye de tosanangi ma bounika gea angamoi nianiiki itiai ahi mau. Hokogea ma hiaturu ihidaulu o nyawa manga duruuru o hapi la youku hiadono itinoka.”

¹⁰ “De nako manga huhuba iharo-harongo yomahihuba o aewani utu, abe o domba eko o kabingi, enangoo kiani yale manga duduonino ma nauru abe duru ko iwa ma heluku eko ma nabo.

¹¹ Ho o nyawa abe woboaino ahi huhuba ma ngiino de to una ai huhuba ma aewani wao hiadono o huhuba ma ngi ma hononga abe daukiye idateke. De genangoka ai huhuba ma aewani watoma Ma Jou o Yawe ai himangoka. De ahao o Harunu ai ngofa-ngofaka, abe inihidemo Ngohino, ona kiani to ena ma awunu yatakunu de ahao ma awunu gea yodabarihi o huhuba ma ngi ma pahagi ma baka iatika.

¹² De ma huhuba ma dutu ai huhuba ma aewani wotobi-tobikuku, de ahao o hidemo abe wileleani, una wagoraka o huhuba ma dobi-dobiki gea, de ma pea, de ma haki. De ahao una watatorika wakelenga mata-mata o hidaulu ma gota ma lokuoka de angamoi imulaengoka yohora ho itokaroka ma uku o huhuba ma ngi ma lokuoka.

¹³ De o huhuba ma pokoro ma dola de ma lou de ma giama yaihorokahi de ahao ka idadi enangoo ka ma moi de ma badanga ma dobi-dobiki utu watatorika o huhuba ma gota ma lokuoka. Hokogea ma hiaturu la o ukuoka de aino ihailiye o huhuba iharo-harongo ma bounu abe duru ihihisanangi Ngohi Ma Jou o Yawe.”

¹⁴ De Ma Jou wohigila-gilahi de o huhuba ma hitararono, wato, “De ngaro o totaleoli ma ka idadi o huhuba iharo-harongo Ma Jou o Yaweika de ma hiaturu imakadaene. Masara ma totaleo kiani o namodaara eko o kuumu-kuumu ma goo abe ka idadi yomahihuba la youku hiadono itinoka.

¹⁵ De ko una ma dutua abe watoma ma totaleo masara kiani manga hidemo wodafongino de ahao una o totaleo ma tomara wafuludi hiadono watoakoka de ahao ma pea wakelenga o huhuba ma ngi ma lokuoka la youku hiadono itinoka. Masara ma badanga yakelenga dau itimi-timi duru o uku ma dokaroka. Masara ko wakelengauahi ma ukuku de kiani ma totaleo ma badanga wagulupoauku la to ena ma awunu iuihi o huhuba ma ngi ma datekuku.

¹⁶ De ahao o totaleo ma bilaono nia hidemo wagoraka, abe ka ma moi de ma gogoka wohidogoraka, de ena gea waumo o huhuba iharo-harongo ma ngi idateke o wange ma dumuniha abe genangoka o uku ma kafo ma ngi.

¹⁷ De ahao o totaleo ma gafuufu o hidemo wamongooika hiadono ma badanga ikakihi masara ko igila-gilaua itoaka. Hokogea ibooto de ahao to ena ma badanga gea wakelenga o hidaulu ma gotaka, abe duru itokaroka ma uku, de enangoo idadi o huhuba ma gahumu iharo-harongo abe duru ihihisanangi Ngohi Ma Jou o Yaweika.”