Gegetongo 6 - Ma Jou ai Demo-demo o Totobelohoka

O Nasiri ma nyawa manga behehongo ma titi yomatingaka Ma Jouika

¹ De Ma Jou o Yawe wihidoaka o Musaika ma hiaturu abe kiani o nyawa yaniiki nako manga wowango yomatingaka Ma Jouika. Ho wihibehehongo wato,

² “Musa, hokonaa kiani nahingahu o Isiraele ma nyawa mata-mataika nato, ‘Nako ngini ngaro o nau-nauru, ngaro o ngo-ngofeka, nako naga womatengo eko momatengo abe yoigo yomatingaka Ngohi Ma Jouino la yodadi abe yahiromanga o Nasiri ma nyawa de naga to ona dika manga behehongo Ngohino Ma Jou o Yaweino. De manga behehongo gea de ma gaheoka abe ona ma hirete homoi-homoiika ka idadi yomaputuhu ma dekanino yaniiki o Nasiri ma nyawa manga leleani. Abe kiani yomahingahu hokokia ma dekana manga behehongo ilaku Ngohino, hoka o mede muruono dika, eko o taongo muruono dika yaniiki, eko ka idadi manga behehongo ka hiadono manga wowango ma bahaika yaniiki o Nasiri ma nyawa manga leleani Ma Jouika.

³ Ho ona abe yoigo yomatingaka Ma Jouika de yaniiki o Nasiri ma behehongo de naga ma hiaturu abe enangoo kiani yaniiki. Abe duru ko idadiokaua o angguru ma teongo yokere ngaro ma gohaka eko ma goo. De o daluku ngaro o kia dika ma hofoko ma teongino ma ko idadiokaua yaokere. De nako o angguru ma hofoko enangoo ma, ko idadiua yaolomo ngaro ma goo ngaro ma tore.

⁴ Ho ma oraha yaniiki o Nasiri ma nyawa manga behehongo de ko idadiua yaolomo eko yaokere o kia dika abe o angguru ma datomoka de aino. De ngaro o angguru ma hofoko ma kai eko ngaro ma mui masara, ko idadiokaua yaolomo.’ Hokogea ko tahigunoaua la manga wowango duru yomatingakoka Ngohino.”

⁵ “De o Nasiri ma nyawa manga dodunguu moioli abe yomatingaka Ngohi Ma Jouino gea kiani manga tadauru yodarunu la ikurutu. Ho, Musa, kiani nahitararono onangika nato, ‘De ngini kiani nimangaratii ngaro onagona dika abe yaniiki o Nasiri ma nyawa manga behehongo ko idadiua yomaguti manga tadauru ngaro o roehe moi dika, de ko idadiua yomakulu. Abe ka de manga behehongo Ma Jouika gea imulaenge de hiadono abootoka de manga tadauru yahidogunoa la ikurutu angamoi hokogea yomahitunguu abe yomatingakoka Ma Jou o Yaweika de yaniiki to Una dika ai hiaturu la yomahitaana abe yotebini Ma Jou o Yawe ai himangoka.’”

⁶ De Ma Jou wihingahu o Musaika ai hiaturu moioli onangika abe ko idadiua o Nasiri ma nyawa yomahitigi o nyawa manga honengika ka hiadono ma oraha manga behehongo Ma Jou o Yaweika yabooto.

⁷ Abe Ma Jou wihingahu o Musaika wato, “De kiani nadofangoo onangika nato ona kiani yaniiki ma hiaturu gea ngaro manga baba eko manga meme yohonenge eko ngaro manga ria-dodoto yohonenge ma ko idadiua yomahitigi to ona manga honengika angamoi manga tadauroo yatigi manga honengika de gea yomahipeseke Ma Jou ai himangoka abe manga tadauru gea idadioka manga behehongo Ma Jouika ma dodunguu.

⁸ De manga higunoaua o honengika gea kiani yaniiki ka hiadono ma oraha manga behehongo Ma Jou o Yaweika yabooto. Hokogea Musa, kiani ngona nahingahu nahitararono onangika ka hiadono duru yomangaratii itararono abe nako manga behehongo yatilakuru gea ko yotebinokaua Ngohi Ma Jou ahi himangoka abe yomahipesekokali.”

⁹ De Ma Jou wihingahuohi o Musaika wato, “Masara nako ko manga hiningainoua de yomahitigi o nyawa manga honengika de ahao hokonaa ma hiaturu abe ngona kiani nahingahu onangika, nato, ‘De nako ngona nomatengo abe nodadioka o Nasiri ma nyawa de itodokanino naga o nyawa yohonenge ani datekoka de gea to ngona ani behehongo ma dodunguu ani tadaurino Ma Jou wamake ipesekoka. Ho o wange tumidino ma dekana nohiaini de ahao ani tadauru de ani gumi mata-mataika ka ma moi kiani nomakulu. Hokogea ngona ka idadi naofi abe ipesekoka Ma Jouika.

¹⁰ De ahao ma wange ma tufangeoka kiani nomale o namodaara hinooto eko o kuumu-kuumu ma goo hinooto de nao Ma Jou ai Tau o Ngoerino de nahidoaka ti ngini nia hidemoikahi abe nia huhuba una winihitobahihuba-huba Ma Jouika.

¹¹ De o totaleo moi ani howono biaha ma huhuba. Ho o totaleo ihira nia hidemo gea waleino de wonihihuba la idadi o huhuba atamunu ani howono. De ngaro ani howono ko ma titiua ani hiningaino masara ani behehongo ma higunoaua natilakuroka ho ani tilakuru enangoo kiani atamunu de o huhuba Ma Jouika. Ho ma totaleo moioli gea nia hidemo wale de enangoo wonihihuba iharo-harongo. Hokogea ani tilakuru o honengika ani hidemo wohitamunu de ma huhuba o totaleoino gea. Gea ibooto de ahao duru o wange gea dika de kiani o Nasiri ma behehongo nihibehehongoli Ma Jouika ho nodarunu la ani tadauru de ani gumi iwangoli.

¹² De ani behehongo ma dihira to ena ma oraha ko idadiokaua naetongo ngaro o wange muruono naniikoka. Ho ka de ngona nohibehehongoli Ma Jou o Yaweika de kiani nomulaenge ani oraha ma hungioli naetongo ka hiadono nabooto ani behehongo ma oraha abe ma dihiraino nohibehehongo la ma dekana ani wowango nomatingaka Ma Jou o Yaweika. De ma oraha ani behehongo ma hungi nodiai Ma Jou ai Tauoka de kiani naoino o domba ma nauru abe ma ngumuru adonoka o taongo moi la idadi to ngona ani huhuba abe atamunu ani howono ani wowangoka abe ko ani hiningainoua ipuda ma howono. Ho o huhuba gea enangoo kiani nihidoaka ani hidemoika abe wonihitobahihuba-huba Ma Jouika.’ De hokogea, Musa, kiani nahitararono onangika abe yoigo yaniiki o behehongo o Nasiri.”

¹³ De Ma Jou wohigila-gila wahitararono ma hiaturu abe kiani o Nasiri ma nyawa ihioriki, wato, “De hokonaa idadi o Nasiri ma nyawa manga hiaturu abe kiani ona yaniiki nako manga behehongo ma oraha yomatingaka Ma Jou o Yaweika yabootoka. Ka de ma oraha gea yabootoka de kiani yoboa o Hikamake ma Tauika abe Ma Jou ai Tau o Ngoerino.

¹⁴ De kiani yoboa de manga huhuba muruono naga abe genangoka yahihuba Ma Jou o Yaweika. De abe yaoino gea o domba o gahumu hange abe moi ma nauru abe ma ngumuru adonoka o taongo moi de duru ko iwa ma heluku ma badangoka la ena gea idadi o haro-harongo ma huhuba. De kiani naga manga domba moioli ma beka abe ma ngumuru adonoka o taongo moi de duru ko iwa ma heluku ma badangoka la ena gea idadi o howono ma dadamunu ma huhuba. De kiani naga manga domba moioli ma nauru duru ibaluhoka abe enangoo duru ko iwa ma heluku ma badangoka la ena gea idadi o hikadame ma huhuba abe ihitunguu manga gogao Ma Jouika itiai.

¹⁵ De kiani naga manga huhuba utuoli abe o datomino o gandumu. Abe yaoino o karaanja moi aomanga o roti ko ihisapurua de o ragi. O roti gea utu ma haro-harongo de ma hisapuru o saitunu ma hofoko ma minya, de utu o hinyole abe ihiehe daku ma lokuino de o saitunu ma minya. De nagali o gandumu ma huhuba de o ngokere ma huhuba abe ahao kiani yapake la manga huhuba ma doomu ihibobaha.

¹⁶ De hokonaa nia hohidemo yaleleani o Nasiri ma nyawa abe manga behehongo yabootoka Ngohino: ihira manga howono ma huhuba de manga haro-harongo ma huhuba yahihuba Ngohi Ma Jou o Yaweino.

¹⁷ Gea ibooto de ahao manga hikadame ma huhuba o domba ma nauru abe duru ibaluhoka, enangoli yahihuba Ngohino. De ma rotioo abe o karaanja moi gea aomanga de o roti ireeika abe ko iwa ma hisapuru o ragino enangoo yahihuba. De nagaoo o ngokere ma huhuba o angguru ma hofokino de o huhuba moioli o gandumu ma hofokino abe enangoo o inomo o datomino de igoo-gosela de ma rupa imakadaene hoka o pine. Ho o ngokere de o roti o gandumino gea enangoo yahihuba la gea manga hikadame ma huhuba ingodumu abe nia hohidemoika yahihuba Ngohi Ma Jou o Yaweino.”

¹⁸ “De nagali ngona nahingahu onangika nato, ‘Gea mata-mata nia hohidemo yahihubaka de ahao ona abe yabootoka manga Nasiri ma behehongo yoboa Ma Jou ai Tau o Ngoerino ma ngoranino de genangoka yomakori manga tadauru de manga gumi yomakulu abe yatingakokau Ma Jouika de gea ihidaulu. Abe genangoka nagaoo ma uku abe manga hikadame ma huhuba ma roehe yotobahakai. Ho ka de akori manga tadauru ibooto de manga gumioo yomakulu ibooto de ahao manga tadauru mata-mata gea ka ma moi o hohakai ma uku ma goronauku yakelenga la ihidaulu.

¹⁹ Ho nako o Nasiri ma nyawa gea manga pea homoi-homoiika akuluoka hiadono duru iofi de manga tadauru gea ihidauloka. De gea ihidaulu ibooto de ahao nia hidemo womatengo waleino o hikadame ma domba ma roehe ma panga ka ma moi de ma kobongo abe ma roehe gea ihidahakaioka de o akere. Ho ma roehe gea wahidoaka manga giamika la ona homoi-homoiika yakokisoino manga huhuba ma roehe gea. De ma hidemo ahao waleinoli o roti ko iwa ma ragi abe iharo-harongino wahidoaka onangika amomoi de ihohinyoleoo enangoo wahidoaka manga giamino la yakokisoino manga roti hiadono ona mata-mata yakokimake ma roehe de ma roti gea.

²⁰ De una o hidemo unangoo wasoino ma roti de ma roehe imakadaene hoka onangoli. De ahao ena gea wohikokidoakiye ai giama de wohipari-parihi ma huhuba la wohitunguu ma inomo gea iwihidoakokahi Ma Jou o Yaweiye. De ma inomo mata-mata gea idadioka o hohidemo to ona manga inomo de to onangoo manga inomo o domba gea ma alu de ma uguru abe enangoo ihidoakiyeoka Ma Jou o Yaweiye. Mata-mata gea yodiai ibooto de ahao o Nasiri ma nyawa ka idadioli yokere o angguru ma teongo.’ Hokogea Musa ngona kiani nahingahu o Isiraele ma nyawa mata-mataika ma hiaturu ma ngekomo abe kiani ona yaniiki abe yomatingakoka Ngohino abe yapake de o Nasiri ma nyawa manga behehongo.”

²¹ “Abe hokogea o Nasiri ma nyawa manga behehongo ma hiaturu abe kiani yaniiki itiai abe ihibehehongoka Ngohi Ma Jou o Yaweino. De nako naga manga hidoaka utuoli abe ma dihiraino yomaputuhoka yato ihihidoaka Ngohino enangoo kiani yabootohi duru imaketero hoka ma dihira ihihibehehongoka Ngohino. Hokogea manga behehongo ma hiaturu de manga tagongo abe yapake o Nasiri ma behehongo la yomatingaka Ngohino.” Hokogea Ma Jou wihingahu o Musaika ma hitararono abe ma titi o Nasiri ma nyawa manga huhuba.

O Hohidemo manga Hiowa ma Demo o Isiraele ma nyawaika

²² De Ma Jou o Yawe wihingahu o Musaika, wato,

²³ “Musa, abe o Harunu de ai ngofa-ngofaka yahidemo o Isiraele ma nyawa Ngohino ho naa tahidoaka onangika o hiowa ma demo abe kiani yaniiki ma gou-goungu abe ma oraha yatobagahoko ma owa manga gogianongoruika. Ho ngona Musa nadotoko o Harunu de ai ngofa-ngofakika nato, ‘Ngini abe ka ihikaika naga ma oraha ma getongo niatobagahoko ma owa o Isiraele ma nyawaika manga himangoka de hokonaa nia demo abe duru ena kiani ngini nianiiki ma gou-goungu, ho niato,

²⁴ “Ngomi minigahoko la Ma Jou o Yawe winihiowa de winigoana nginika,

²⁵ De ngomi minigahoko la Ma Jou o Yawe womalega nginika de ai sosanangi, de hiadono duru ai dora itagi nginika.

²⁶ De ngomi minigahoko la Ma Jou o Yawe winipaliara de winihimatoko nginika to Una ai hininga ma owa. De winihiriidi ngini homoi-homoiika nia hiningaka de to Una ma hirete ai hininga ma miriidi.”’”

²⁷ “Ngohi hokogea tahidoaka manga hiowa ma demo o Harunu de ai ngofa-ngofakika la yapake de to Ngohi ahi romanga la yahitunguu o Isiraele ma nyawaika abe Ngohi to ona manga Jou.” Hokogea Ma Jou wihingahu o Musaika la una wadotoko o Harunu de ai ngofa-ngofakika de o hiowa ma demo gea. De o hiowa ma demo gea yapake la ona o Isiraele ma nyawa ihioriki Ma Jou wagou-goungu wahidadi to Una ai nyawa abe duru womadingakoka Unangino.