Gegetongo 35 - Ma Jou ai Demo-demo o Totobelohoka

O Pasala 35 ko atailakouahi O Lewi ma nyawa manga kapo-kapongo

¹ De ahao Ma Jou o Yawe wotemohi o Musaika abe ma oraha gea ona mata-mata ka yomadodogumohi o Yorodani ma akere ma datekoka de o Yeriko ma himangoka, abe gea o Moaba ma dolaka. Ho Una wihingahu o Musaika wato,

^2-3 “Ngona kiani nahuloko o Isiraele ma nyawa la ona ahao yahidoaka o kapongo muruono naga o Lewi ma nyawaika. Abe to ona homoi-homoi manga oara ma tonakino de kiani yahidoaka o Lewi ma nyawaika ma kapongo gea de ma tonakoo abe ihigiloliti ma kapongo. La ahao ona de manga feka-fekata de manga ngofa-ngofaka ka idadi naga manga tau de manga kiahonanga ma ngi-ngi, de manga aewanioo naga ma tonaka la imaino-inomo genangoka, abe ngaro manga hapi de manga aewani ma duduono utuoli masara yawedono manga tonaka gea.

⁴ De abe ma titi manga tonaka gea abe ihigilolitino manga kapo-kapongo, kiani yatuga o kapongo ma dadaduhoka de ma hoanika o metere o ratuhu iata de moritoa ma gurutika arihonongaika, de gea ma tonaka abe kiani yahidoaka o Lewi ma nyawaika.

⁵ Ho nako hatuga ma kapongo ka ma moi de to ena ma tonaka ma homoaka, gea ipahagi iata de ma dateke homoi-homoi ma duduga ngade-ngade o metere o ratuhu hiwo. De hokogea ma hiaturu abe kiani yodiai manga kapongo homoi-homoioka la manga tonaka yawedono.”

^6-7 “Ho nako haetongo ma kapo-kapongo gea abe ahao yahidoaka o Lewi ma nyawaika, gea kiani naga manga kapongo moruata de tufange, de gea homoi-homoi kiani naga de ma tonaka la manga aewani ma inomo yawedono. Masara ma kapo-kapongino gea kiani niairiki o kapongo butaanga la idadi o nyawa manga dadatoko ma kapongo. Abe ma titi nako idadi nginioka abe o nyawa onagona dika yahohonenge manga gianongoru, ona gea ka idadi yoara genangika de yomadatoko ma kapongo ma goronaka la ko idadiua o nyawa yahiodiri eko yatoma onangika.

⁸ De hokonaa ma hiaturu la ma kapo-kapongo gea o Isiraele ma nyawa yahidoaka manga gogianongoru o Lewi ma nyawaika. Abe nako manga dutu moi naga manga oara ma tonaka hatoli ilamoko de gea kiani to ona manga kapongo hatoli iwoe abe yahidoaka o Lewi ma nyawaika. Masara nako manga dutu utuoli abe manga oara ma tonaka hatoli ieteke, gea de ahao ka idadi manga kapongo muruono dika yahidoaka, ko iwoeua. De manga dutu homoi-homoi kiani yahidoaka manga kapongo muruono naga abe imakiniiki de manga tonaka ma amoko.”

Manga dadatoko ma kapongo ma hiaturu

⁹ De ahao Ma Jou o Yawe ka wotemohi o Musaika wato,

¹⁰ “De nagali ma hiaturu utuoli abe ngona ahao kiani nadofanga o Isiraele ma nyawa mata-mataika. Abe kiani nahuloko la ahao ma oraha yomahihora doka o Yorodani ma akere ma honongaika de yowohama o Kanani ma tonakika

¹¹ de kiani yairiki ma kapo-kapongo la gea ahao idadi manga dadatoko ma kapongo. Abe nako hiadono idadi nginioka naga onagona dika yahohonenge manga gianongoru masara gea ko manga hiningaua la yohonenge, gea ahao ka idadi yoara o dadatoko ma kapongo moiika.

^12-13 De ma kapongoka gea duru ko idadiua o nyawa yahibalaha dika onangika. Masara kiani o nyawa mata-mata genangoka yomatoomuino de yaurusu ona yahohonenge gea la yatailako de ihioriki nako naga manga howono eko koua. De hokogea ma titi hiadono kiani naga manga dadatoko ma kapongo butaanga gea manga tonakoka.

¹⁴ Abe kiani naga manga dadatoko ma kapongo hange o Yorodani ma akere ma honongaino naa, de kiani naga hangeoli doka o Yorodani ma akere ma honongaka abe o Kanani ma tonakoka.

¹⁵ De manga dadatoko ma kapongo butaanga gea, onagona dika ka idadi yoara genangika, abe ngaro o Isiraele ma nyawa de ngaro o homoa ma nyawa de ngaro o nyawa abe yomadioniki dika o Isiraele manga hidogoronaka masara ona mata-mata ka idadi yomadatoko ma kapo-kapongo gea ma goronaka. Abe iti yatoma / yahohonenge o nyawa masara gea ko manga hiningaua la idadi de ona gea ka idadi yoara genangika.”

^16-18 “Masara nako idadi abe yomatengo yahipoha manga dodiawo de o behi eko de o hakaru ma amoko eko de o gota de gea ma titi hiadono manga dodiawo yohonenge, gea imakohowono. Nako hokogea manga datoro de ahao ka idadi yaetongo ato ona yatomaka o nyawa, de onagona dika yatoma-toma, ona gea kiani yahohowono de o hone-honenge.

¹⁹ Ho ona yohone-honengoka manga gianongoru abe naga manga tagongo la yahibalaha manga dutu yohone-honengoka, ona gea abe kiani yahohonenge yotoma-toma gea. Ho nako hiadono ona yomakamake de gea kiani yahibalaha manga dutu de ka yahohonenge dika.”

^20-21 “De nako idadi abe yomatengo iwidohata manga dodiawo ho hiadono iwihagogono ma ngekomo ma datekoka de ahao iwitila eko iwitibako eko iwitidingi hiadono manga dodiawo gea wohonenge, genangoo o doma, de onagona dika yotomaka kiani yahohowono de o hone-honenge. Ho ona yohone-honengoka manga gianongoru abe naga manga tagongo la yahibalaha manga dutu yohone-honengoka, ona gea abe kiani yahohonenge yotoma-toma gea. Ho nako hiadono ona yomakamake de gea kiani yahibalaha manga dutu de ka yahohonenge dika.”

^22-23 “Masara abeika nako hoka idadi abe naga yomatengo de ko iwa manga dohata manga dodiawoika. De gea ona manga hininga ma rorahai dika de marai yotagi-tagi eko yomakutuono yokarajaanga de ka itodokanino idadi abe yomatengo onangino iwitila manga dodiawoika eko naga moi yotibako/ihitibako de iwidaene manga dodiawo masara gea ko manga hiningaua de idadi. Eko marai naga o hakaru ma amoko abe yomatengo yapidili de yahitapaluku manga dodiawouku de iwihohonenge. Masara gea ona ko yomakumusua, ho duru ko manga hiningaua la idadi hokogea.

^24-25 Ho nako idadi hokogea o Isiraele ma nyawa manga hidogoronaka de kiani o kapongo ma hihira yaniiki ma hiaturu naa la ahao manga datoro itiai. Abe kiani ona yaurusu la yahioriki nako itiai yomatengo gea abe yahohonenge manga dodiawo yamake manga hohowono eko koua. Ho nako yaurusu ibooto de manga putuhu la yomatengo gea kiani yahohowono de o hone-honenge, de ahao yahidoaka yotoma-toma gea wohone-honenge ai dutuika la iwihohonenge. Masara nako yaurusu ipaha de yamake abe yomatengo gea ko manga hiningaua la manga dodiawo yohonenge, de ahao o kapongo gea ma hihira kiani yahigilio yomatengo gea ma dadatoko ma kapongo ma goronaikali abe ma dihiraino de yoara genangika la yomadatoko genangoka. De yomatengo gea kiani genangoka dika yomanoa ka hiadono ti ngini nia hidemo ma nyawa wokokurutiye wohonenge.”

^26-28 “Masara abe yomatengo gea iwihohonenge manga dodiawo, nako hoka yanoaika ma dadatoko ma kapongo gea de yohupu ma hoanika. Nako hokogea de yomakamake de wohone-honenge ai dutu abe naga ai tagongo la wihibalaha ai dutu, gea ka idadi wahohonenge dika. De gea wohone-honenge ai dutu ko iwa ai howono angamoi yomatengo gea yohupuoka ma dadatoko ma kapongino. Koaho yomatengo gea yomadatoko ma kapongo ma goronaka ka hiadono nia hidemo ma nyawa abe duru wokokurutiye wohonengoka. Abe nako hiadono nia hidemo ma nyawa gea wohonengoka, gea de ahao yomatengo gea abe iwihohonenge manga dodiawo ka idadi yogilio manga oara ma tonakika de yomanoali genangoka.

²⁹ Ho gea ma hiaturu abe ngini o Isiraele ma nyawa kiani nianiiki ma oraha naa de ka hiado-adonika, abe ngaro ngini naa de ngaro ti ngini nia totoforauku masara kiani ngini mata-mataika nianiiki. De ngaro nia tonaka o kiaka dika abe nimanoa ma oraha naa eko ahao nia himangoka masara ka ihikaika ngini nianiiki enangika.”

³⁰ “De nagahi ma hiaturu utuoli abe ngini o Isiraele ma nyawa kiani nianii-niiki. Abe nako o nyawa yagoungu yatomaka manga dodiawo, gea manga hohowono kiani o hone-honenge yadaene. Masara nako o hakihii ma nyawa yomatengo dika abe yotemo ato yatoma manga dodiawo, gea ko idadiua. Angamoi kiani o hakihii ma nyawa yahinooto eko yofoloi de manga demo imakiniiki. Abe nia hiurusu ma ngioka de inihingahu ato yomatengo gea yatomaka o nyawa, de gea ahao o hone-honenge ma hohowono yataana onangika.

³¹ De nako hiadono niaurusoka o nyawa de naga nia putuhu abe yomatengo kiani yamake o hone-honenge ma hohowono, gea ufa ngini niodafongo o bobangu ma tiwi la niahihupu yomatengo gea ma rorahaiika de ko yahohonengokauali. Angamoi onagona dika yagoungu yatomaka o nyawa, onangoo gea kiani yahohonenge.

³² De nako naga o nyawa abe yaurusoka de ato ma hohonenge gea ko o domainoua angamoi ko manga hiningaua la o hohonenge idadi. Ho ona yomanoa o dadatoko ma kapongoka masara ipuda manga hininga la yofangu o bobangu ma tiwi ma hihiraika la ka idadi yosobo de yolio dika to ona manga oara ma tonakika. Abe ma oraha gea de nia hidemo ma nyawa duru wokokurutiye ko wohonenguahi. Ho nako hokogea manga hidee, duru ko idadiua ma hihira yodafongo o bobangu ma tiwi gea, masara kiani yomatengo gea ka yomanoahi dika o dadatoko ma kapongoka.”

³³ “De nako ngini mata-mata nianii-niiki to Ngohi ahi hiaturu naa nginika, gea de ahao ti ngini nia tonaka ko ipesekua masara ka itebini dika. Angamoi nako o doma, ma howono gea ka idadi ihipeseke nia tonaka ahi himangoka. De naga moi dika ma ngekomo la ka idadi ihitebini nia tonaka nako ihipesekoka de o doma, de gea ma nyawa onagona dika abe yatomaka manga dodiawo kiani yahohowono de o hone-honenge ma hohowono onangika.

³⁴ De gea Ngohi tato ufa niahipeseke nia tonaka gea angamoi Ngohioo tomanoa nia tonakoka gea. Abe Ngohi naa Ma Jou o Yawe de Ngohi tomanoa ti ngini o Isiraele ma nyawa nia hidogoronaka.” Hokogea to Una ai hiaturu ma demo o Musaika abe o Musa kiani wadofanga o Isiraele ma nyawa mata-mataika.