Gegetongo 34 - Ma Jou ai Demo-demo o Totobelohoka

O Pasala 34 ko atailakouahi Manga tonaka ma bati-batingi

¹ De ipahaino de Ma Jou o Yawe wotemo o Musaika hokonaa, wato,

² “Ahi huhuloko ma demo naa ngona kiani nadofanga o Isiraele ma nyawaika, nato, ‘Ahao ma oraha ngini niwohama nia oara ma tonakika, abe gea o Kanani ma tonaka, de hokonaa nia tonaka gea ma bati-batingi.

^3-4 Ma tonaka ma batingi abe dakuiye idateke, gea hatoli imakiniiki de o Sini ma tonaka ma kakaaha abe daku o Edomo ma tonaka ma batingoka. Abe nia tonaka ma batingi gea nako o wange ma hiwariha imulaenge o Hone-honenge ma gahi daku ma dekaroka de ahao itagi o loku ma solaika moi abe ihiromanga o Waitota ma loku ma sola. De ahao ma batingi igila-gila ka hiadono daku o Kadese-Baranea ma honongaka. De ahao igila-gilahi hiadono o Hasara-Adara ma ngiika de ahao o Asamonika.

⁵ De genangoka ma batingi irehenoli la itagi daioko ka hiadono o Mesiiri ma akere ma dodagika, de ahao ka igila-gilali dai o Gogoronaka ma gahioko.’”

⁶ De ahao Ma Jou wihingahu unangika wato ahao manga tonaka ma batingi abe o wange ma dumuniha idateke, gea o Gogoronaka ma gahi.

⁷ De ahao Ma Jou wihingahu o Musaika ma titi manga tonaka ma batingi abe daukuku idateke. De hokonaa ai demo abe ahao o Musa kiani wadofanga ai gogianongoruika, wato, “Ahao ti ngini nia tonaka ma batingi abe daukuku idateke hokonaa. Imulaenge o Gogoronaka ma gahi ma ngigoroka de itagi duru irikotiha ka hiadono o loku moiika abe ihiromanga o Hooro ma loku.

⁸ De o Hooro ma lokuoka de ma batingi itagi akaihali hiadono ma ngekomo abe haniiki la howohama o Hamata ma kotaika. De genangoka de igila-gilali ka hiadono o Sedada ma kapongoka.

⁹ De ahao o Sifironika atilakuru hiadono o Hasara-Enana ma kapongika, de genangoka nia batingi abe daukuku idateke ihibobaha.”

¹⁰ “De abe nia tonaka ma batingi o wange ma hiwaroko idateke, gea ka idadi imulaenge o Hasara-Enana ma kapongoka gea de ahao itagi duru irikotiye hiadono o Sefamika.

¹¹ De o Sefamoka de igila-gilaiye o Ribila ma ngioka abe imanoa o Aini ma daaniha. De genangoka de igila-gila akaiyeoli de imakiniiki o Galilea ma ngooto ma ngigorino abe o wange ma hiwaroko idateke.

¹² De ahao ma ngigorino gea yaniiki hiadono imahiadono o Yorodani ma akere. De ma akeroli gea yaniiki daku hiadono o Hone-honenge ma gahi imahiadonoka. De hokogea nia tonaka ma batingi arihononga duru ingodumoka.”

^13-15 De ipahaino de o Musa wahuloko o Isiraele ma nyawaika wato, “Ma tonaka naa ena abe idadi ti ngini nia oara ma tonaka, de gea ahao nia dutu homoi-homoi manga hihira yomaketebobataru la hohioriki ma tonaka ma hidoku o kia abe nia dutu homoi-homoi yaborimake. Abe ma tonaka ma amoko naa Ma Jou o Yawe winihibehehongoka la ngini niamake. Masara gea ko ma titiua nia dutu mata-mata angamoi naga nia dutu yamuruono naga yamakeoka manga oara ma tonaka dina o Yorodani ma akere ma honongaiha de o Yeriko ma kota ma himangoka. Ona abe yamakeoka manga tonaka dina, gea ona mata-mata abe yomahidutu o Rubenika de ona mata-mata abe yomahidutu o Gaadika. De nagali ona utu abe yomahidutu o Manaseika masara ko mata-mataua. Ho nako haetongo ona mata-mata abe yamakeoka manga tonaka dina, gea o dutu hinooto de ma hononga.”

Manga dutu ma hihira abe yahikodoku manga tonaka

¹⁶ De ipahaino de Ma Jou o Yawe wotemoli o Musaika wato,

¹⁷ “De hokonaa ma hiaturu la nia tonaka naa inihikodoku nginika la idadi ti ngini nia oara ma tonaka. Abe naga nia hihira yahinooto kiani yahiaturu ma karajaanga, de gea nia hidemo ma nyawa o Eleasara de nagali o Yosua abe o Nuunu ai ngofaka.

¹⁸ De gea kiani naga nia dutu homoi-homoi manga hihira yomatengo la ona gea yaduhunu o Eleasara de o Yosua ma oraha ma tonaka inihikodoku nginika.

^19-28 De hokonaa nia hihira gea manga roma-romanga abe kiani yaduhunu ona yahinootoika.” Manga dutu Manga hihira ai romanga o Yehuda ma nyawa o Kalebe abe o Yefune ai ngofaka o Simeono ma nyawa o Samuele abe o Amihudu ai ngofaka o Benyamini ma nyawa o Elidada abe o Kisilono ai ngofaka o Daana ma nyawa o Buki abe o Yogili ai ngofaka o Manase ma nyawa o Haniele abe o Efodo ai ngofaka o Efaraimi ma nyawa o Kemuele abe o Sitana ai ngofaka o Sebulono ma nyawa o Elisafana abe o Parana ai ngofaka o Isakara ma nyawa o Palitiele abe o Asana ai ngofaka o Asere ma nyawa o Ahihudu abe o Selomi ai ngofaka o Nafatali ma nyawa o Pedaele abe o Amihudu ai ngofaka

Manga dutu Manga hihira ai romanga

²⁹ Hokogea ma nyawa manga roma-romanga abe Ma Jou o Yawe wairiki de wahitagongo la ona ka idadi o Kanani ma tonaka yahikeregu la idadi o Isiraele ma nyawa manga dutu homoi-homoi manga oara ma tonaka.