Gegetongo 32 - Ma Jou ai Demo-demo o Totobelohoka

O Pasala 32 ko atailakouahi O Rubene de o Gaada ma nyawa manga gogahoko

¹ De ma oraha gea ona abe yomahidutu o Rubenika de onangoli abe yomahidutu o Gaadika, ona gea manga hapi duru kohangoe. Ho ipahaino abe ma oraha ona yamake o Yaesere ma tonaka de o Gileada ma tonaka de yomafikiri ato, “Abeika ma tonaka gea! Nako ka idadi ngone hapaliara nanga hapi genangoka gea duru irahaiholi!”

² Ho ona yoboa de yomarihimangino de o Musa de o Eleasara manga hidemo ma nyawa Ma Jouika, de nagali ma kokawaaha manga hihira mata-mata genangoka. De ona yomahingahu manga hihiraika gea ato,

^3-4 “Naga to ngomi mia gogahoko ngini mia balu-baluhika. Abe naga o kapo-kapongo muruono naga abe naa ma duruino Ma Jou o Yawe wonahidoaka ngone o Isiraele ma nyawaino, de ma tonaka mata-mata abe imahitigino de ma kota gea duru irahaiholi la o nyawa yapaliara manga hapi ma duduono genangoka. De marai ngomi naa abe mimahibaluhu nginika naga to ngomi mia hapi duru kohangoe. De ma kota gea ma roma-romanga o Ataroto, o Dibono, o Yaesere, o Nimara, o Hesebono, o Eleale, o Sebama, o Nebo, de o Beono.

⁵ Ho nako ngini mia baluhu nimisanangi ngomino, ngomi mimagahoko ma tonaka gea la idadi mia oara ma tonaka. De gea ngaro ufa dika de ngomi mimahihora o Yorodani ma akere ma honongaika.” Hokogea manga gogahoko ma demo.

⁶ De o Musa wapaluhu onangika wato, “Ho! Ngini niato bote ka idadi nimanoa naangoka dika masara ti ngini nia gogianongoru mata-mata kiani yogila-gila de yaparangi nanga musuika?

⁷ Nako ngini naangoka dika nimanoa, ahao nia gogianongoru yodadi yohawana de manga hininga ieteke hiadono ko iwaka manga domoroini la yomahihora ma akere de yowohama ma tonakika abe nanga Jou o Yawe wato wahidoaka onangika.

⁸ De ngohi tato ti ngini nia hininga ka imakadaene dika de nia totofora ma dodihiraino abe ma oraha ngomi o Kadese-Baranea ma ngioka de tahidingoto la ona ka idadi yatotailako o Kanani ma tonaka gea.

⁹ De ahao ona yoiki o Esekolo ma dolaika de yamake ma tonaka gea masara yolioino de yahihawana o Isiraele ma nyawa abe ona yahingahu ato, ‘Koaho ufa howohama ma tonaka gea abe Ma Jou o Yawe wato wonahidoaka ngoneino.’

¹⁰ Ho mangale ma titi manga demo gea hiadono nanga Jou o Yawe ai ngamo duru ifae de womahibehehongo wato,

¹¹ ‘Angamoi ona gea manga hininga Ngohino ka hinootohi ho ko ihiniikua, ho ona abe manga ngumuru o taongo monaoko de imahikaiye abe o Mesiiroka de yaino yohupu, ona duru ko moiua ka idadi yowohama ma tonaka abe tahibehehongo manga totofora o Abarahaamika de o Isakika de o Yakubika.

¹² Bowahu o Yefune ai ngofaka o Kalebe de o Nuunu ai ngofaka o Yosua, ona dika yahinooto abe tahigunoa la yowohama ma tonakika, angamoi ona dika abe ihiniiki Ngohi de manga hininga ma gahumu.’ Hokogea nanga Jou ai demo ma dihiraino gea.”

¹³ De o Musa wohigila-gila ai demo wato, “De mangale ma titi nia totofora gea hiadono Ma Jou o Yawe ai hininga ma ngamo duru ifae o Isiraele ma nyawaika hiadono wahiaturu la ona kiani yotagi-tagi yaika yaino o tonaka ma kakaahaka abe manga taongo moruatino ma dekana. Abe ka hokogea dika kiani yotagi-tagi hiadono manga lape moi gea abe yobaluhoka, abe ma dihiraino de manga datoro itorou Unangika, ona mata-mata yokokihonengoka.

¹⁴ Ho abeika, ngini naa duru niaturuuruoka nia totofora gea, abe ma titi nginioo niatobahowo-howono Unangika! De ma hofoko nia howonino genangoo imaketero dika de to ona ma dihiraino, abe mangale ma titi ngini ho hiadono to Una ai hininga ma ngamo duru ifae o Isiraele ma nyawaika.

¹⁵ Ho nako ngini nigila-gila nimahirehene Unangoka de aino ma homoaika, ahao Una kiani o Isiraele ma nyawa wanoaikali o tonaka ma kakaahaka imaketero hoka ma dihirainoli. De nako hokogea ahao idadi onangika, duru ngini naa ma titi hiadono o Isiraele ma nyawa mata-mata yakokibinaahaka!” Hokogea o Musa ai hitiari ma demo ona o Rubene de o Gaada ma nyawaika.

¹⁶ De o Musa ai demo gea yoihene de ahao ona yomahitigi o Musaika de iwitemo ato, “Marai hokonaa mia hininga. Ma tonakoka naa de ngomi ahao mimadiai mia domba ma duduono ma kurunga de mia kota-kota la ngomi de mia feka-fekata de mia ngofa-ngofaka ka idadi migogere naangoka dika.

¹⁷ Masara ngomi o nau-nauru ka idadi ka ihikaika mimahidiai de mia parangi ma dae, de hongoli ka idadi ngomi miahihira-hira mia gogianongoru o Isiraele ma nyawa ma oraha hotagi-tagi haparangi nanga musuika. De ka ihikaika ngomi miaduhunu hokogea ka hiadono onangoo yamake manga oara ma tonaka de yoborigogere manga tonakoka gea. De abe ma oraha ngomi de nanga gogianongoru ka halawanohi nanga musu, to ngomi mia feka-fekata de mia ngofa-ngofaka ka idadi yomanoa yososanangi dika nenangoka, abe ma titi mia kota-kota ahao naga de ma dadaduhoka la o homoa ma nyawa ma tonakoka naa ko idadiua yangohama onangika.

¹⁸ Ho ngomi minihibehehongo abe duru ko miliouahi to ngomi mia tau-tauino hiadono mia gogianongoru mata-mata yamakeoka manga oara ma tonaka. Abe kiani ona yakokimakeoka de ahao ka idadi ngomi milio mia tonakino naa.

¹⁹ De minihibehehongoo ma titi ma tonaka abe doka o Yorodani ma akere ma honongaka. Abe mangale ma titi ngomi miamakeoka mia tonaka o akere ma honongaka naa abe o wange ma hiwariha idateke, ho ngomi duru ko mimaleua de ko miodafongua o tonaka o kia dika abe doka ma honongaka la idadi mia oara ma tonaka. Hokogea ngomi minihibehehongo nginika.”

²⁰ De ahao o Musa wapaluhu onangika wato, “Ho nako niagoungu nidiai hoka nitemoka, gea irahai. Abe ngini nimahidiai de nia parangi ma dae la niaparangi nanga musuika nanga Jou o Yawe ai himangoka.

²¹ De kiani ti ngini nia nau-nauru yomagao manga dae de yomahihora o Yorodani ma akere ma honongaika de nimiduhunu la homaketeparangi de nanga musu ka hiadono nanga Jou wahikala de wahihupu ai musu gea ai himangoka de yaika.

²² De abe ma oraha nanga tonaka wonahidoakoka ngoneino, gea de ahao ngini nia behehongo niangodumoka nanga Jou o Yaweika de nia gogianongoruikaoo o Isiraele ma nyawa. Ho ma oraha gea de ahao ka idadi ngini nilio nia tonakino naa angamoi gea idadioka ti ngini nia oara ma tonaka ma gou-goungu Ma Jou o Yawe ai himangoka.

²³ Masara abeika nako hoka ngini niawohangika nia behehongo gea, ahao Ma Jou winietongo abe ngini niahowo-howonoka Unangika. De ufa nimahieluku ma titi nia howono gea, angamoi Una ahao wagou-goungu winihohowono ho duru ko idadiua niodokaowara nia hohowono gea!” Hokogea o Musa wahitiari onangika.

²⁴ De ahao una ka wohigila-gila dika ai demo onangika wato, “Ho ngini naa ka idadi nihigoko dika ti ngini nia kota-kota la nia feka-fekata de nia ngofa-ngofaka yogogere genangoka, de ka idadi niahidiai nia domba ma duduono ma kurunga. Masara iti ufa ngini niawohangika nia behehongo ma demo ngomino!”

²⁵ Ho o Gaada ma nyawa de o Rubene ma nyawa yoihene o Musa ai demo gea de ahao yopaluhu unangika ato, “Ngomi naa hoka to ngona ani duduhunu ma nyawa, de naa mimahingahu abe ahao midiai duru imaketero hoka ani demo gea ngomino.

²⁶ Abe to ngomi mia ngofa-ngofaka de mia feka-fekata de mia aewani ma duduono mata-mata ahao o Gileada ma tonaka ma kota-kotaka dika yomanoa.

²⁷ Masara ngomi o nau-nauru ahao mimahihora doka ma honongaika, de gea ngomi homoi-homoi mimahidiaioka abe mimagao mia parangi ma dae la mianiiki nanga Jou o Yawe ai huhuloko de miatobalawana nanga musuika, la duru imakiniiki de to ngona ani demo kangano.” Hokogea to ona manga behehongo ma demo.

²⁸ Ho o Musa wahidoaka ai huhuloko ma demo ma titi ona gea o Isiraele ma nyawa manga hihiraika. Abe ma demo gea wahuloko manga hidemo ma nyawa o Eleasarika de ai hehebangika o Yosua de o Isiraele ma nyawa manga dutu homoi-homoiika.

²⁹ Abe o Musa ai huhuloko ma demo onangika hokonaa, wato, “O Gaada ma nyawa de o Rubene ma nyawa yomahibehehongo ato ahao yoboa nginika de ona homoi-homoi yomagao manga parangi ma dae. De nagali manga behehongo abe ona yomakiniiki de de ngini la ngini mata-mata nimakokutuono nimahihora o Yorodani ma akere ma honongaika de niaparangi nanga musu Ma Jou o Yawe ai himangoka. Ho nako ona yagou-goungu manga demoino de yodiai hokogea ka hiadono nia musu ka idadi niahikala de nimahitingini ma tonaka, gea de ahao ngini kiani niahidoaka onangika o Gileada ma tonaka la idadi manga oara ma tonaka.

³⁰ Masara nako ona yawohangika manga behehongo ho ko yomahidiaiua de manga dae de ko nimakiniikua ma oraha nimahihora ma honongaika, gea ahao ko idadiuali yamake o Gileada ma tonaka. Abe gea kiani hahidoaka o tonaka ma hidoku dika abe imanoa o Kanani ma tonakoka, abe imaketero hoka ngini utu mata-mata niaborimake.”

³¹ De gea o Gaada de o Rubene ma nyawa yomahibehehongoli ato, “Ngomi ani duduhunu naa ahao midiai dika abe imaketero hoka nanga Jou o Yawe wotemoka!

³² Abe ahao ngomi mimahidiaioka de mia parangi ma dae de ka idadi ngini de ngomi homakutuono homahihora doka o Kanani ma tonakika. De ipahaika de ahao ka idadi nimihidoaka ngomino mia oara ma tonaka abe imanoa o Yorodani ma akere ma honongaka naa.”

³³ De o Musa wohimoteke de manga demo gea ho wahibehehongo la wahidoaka ma tonaka gea onangika. Abe o Gaada ma nyawa de o Rubene ma nyawa de nagali o Manase ma nyawa manga hidoku moi, onangika gea wahidoaka ma tonaka. De o Manase gea, una o Yusupu ai ngofaka womatengo. De ma tonaka abe ona ahao yamake, gea o Amori ma nyawa abe yomahikoano o Sihonika to ona manga tonaka. De nagali o Basana ma tonaka abe o Ogo wohikoano genangoka, de gea ngaro ma tonaka mata-mataika de to ena ma kota-kotaoo de ma tonaka abe idate-dateke o Basanika, gea mata-mata o Musa wahidoaka onangika.

^34-36 Ho ipahaino de o Gaada ma nyawa ihiputurungoli o kota muruono naga ma tonakoka gea la hiadono idadi o kota ma bobuturungu. Abe ma kota-kota gea ma romanga o Dibono de o Ataroto de o Aroere de o Ataroto-Sofana de o Yaesere de o Yogebeha de o Bete-Nimara de o Bete-Harana. Ho ihiputurungu ma kota-kota gea de nagali abe manga tonaka gea homoi-homoioka yodiai o kurunga la ka idadi manga duduono imanoa genangoka.

^37-38 De o Rubene ma nyawa onangoo ihiputurungoli o kota muruono naga manga tonaka ma hungioka. De ma kota gea ma romanga o Hesebono de o Eleale de o Kiriataimi de o Nebo de o Baala-Meono de o Sibima. Masara ma kota gea utu ihiromangoli ho naga ma romanga ma hungi.

³⁹ De naga o Manase ma nyawa womatengo ai romanga o Makiri, de to una ai totoforauku ona yoiki o Gileada ma tonakika de yahikala o Amori ma nyawa abe yomanoa genangoka. De yahikala ipaha de ahao yakiniiki o Gileada ma tonakoka de yaika ma homoaika.

⁴⁰ Ho o Musa wahidoaka ma tonaka gea o Makiri ai totoforaukuika la ona ka idadi yogogere genangoka.

⁴¹ De naga o Manase ma nyawa womatengoli ai romanga o Yairi, de to una ai totoforauku onangoli yoiki ma tonakika gea de yahikala ma nyawa abe yomanoa o kapo-kapongo muruono naga. Ho yomahitoona ma kapongo gea de yahiromangoli ato o Yairi manga kapo-kapongo.

⁴² De nagali o Manase ma nyawa womatengoli ai romanga o Noba, de una wahihira ai totoforauku la yoiki ma tonakika gea, de ona ka idadi yahikala o Kenata ma kota de ma kapo-kapongo abe imahitigi-tigino de ma kota gea. Ho yahikala ipahaino de ahao una o Noba wohiromangoli ma kota gea abe wohitoomu de to una ma hirete ai romanga ho ihifetongo ma kota gea o Noba.