Gegetongo 27 - Ma Jou ai Demo-demo o Totobelohoka

27:1-11 ko atailakouahi O pareta ma hungi ma titi o nyawa manga oara ma tonaka

¹ De o wange moiuku naga o ngofeka yamotoa yoboa o Musa de o hihira utu manga hima-himangino la yomarihimangino de ona. Abe ona yamotoa gea o ria-dodoto de manga baba ai romanga o Selafehada. De nako manga baba una gea o Hefere ai ngofaka de o Gileada ai danongo. De iyeoli o Gileada ai baba o Makiri, de o Makiri ai baba o Manase, de o Manase ai baba una gea o Yusupu abe o Yakubu ai ngofaka. De ma ngo-ngofeka yamotoa gea manga roma-romanga o ngo Mala, o ngo Noa, o ngo Hogala, o ngo Milika de o ngo Tirisa.

² Ho ona yamotoa yomaokoino o Hikamake ma Tau ma himangoka, de yomarihimangino de o Musa de o Eleasara manga hidemo ma nyawa Ma Jouika, de nagali ma kokawaaha manga hihira mata-mata genangoka. De ona yamotoa yomahingahu ma hihiraika gea ato,

³ “Ma dihiraino to ngomi mia baba wohonenge o tonaka ma kakaahaka masara ko iwa ai ngofaka o nauru. De una ko waniikua o Kora ai nyawa abe ona duru iwilawana Ma Jou o Yaweika. Ho ngaro ko waniikua ona gea masara igoungu unangoo o howono ma nyawa, de gea ma titi hiadono una wopahaka.

⁴ Ho naa ngomi minileha, sarakia, gea itiai nako to ngomi mia baba ai romanga ka ihihanga dika o Isiraele ma nyawaino ma titi ko wamakeua ai ngofaka o nauru? Marai ko itiaiua, e? Ho ngomi naa duru mimagahoko la ngini mia hihira nimihidoaka mia baba ai oara ma tonaka ngomino, abe imaketero hoka mia gogianongoru utu mata-mata yamake manga oara ma tonaka.”

⁵ Ho manga demo gea yoihene de ahao o Musa woiki Ma Jou o Yawe ai himangino de wileha ma titi manga gurubungu gea.

⁶ De Una wipaluhu o Musaika wato,

⁷ “O Selafehada ngoi ora-ora gea manga gurubungu ma demo itaana. Ho kiani ngini niahidoaka manga baba ai oara ma tonaka onangika abe imaketero hoka manga gogianongoru utu yamake. De gea manga baba ai oara kiani imaturuuru onangika.

⁸ De kiani ngona nahingahu o pareta ma hungi naa o Isiraele ma nyawa mata-mataika, nato, ‘Nako hiadono naga o baba womatengo wohonenge masara ko iwa ai ngofaka o nauru, gea kiani to una ai oara imaturuuru ngoi oraika.

⁹ De nako hoka una gea ko iwa ngoi ora de ahao kiani niahidoaka ai oara ai ria-dodoto o naurika.

¹⁰ De masara nako ko iwa ai ria-dodoto o nauru de ahao kiani niahidoaka ai baba ai ria-dodotika.

¹¹ De nako ai baba ko iwa ai ria-dodoto de ahao kiani niahidoaka ai gianongoru onagonaika dika abe duru wohone-honenge gea ai dutu (ma digi-digino).’” De hokogea ma pareta ma hungi Ma Jou o Yawe wihuloko o Musaika la wato o Isiraele ma nyawa mata-mata kiani yahingounu enangika.

Ma Jou wiiriki o Yosua la una wodadi o Musa ai duruuru

¹² De ipaha Ma Jou o Yawe witemo o Musaika wato, “Musa, la ngona ka idadi o Kanani ma tonaka ngona namake ahao nodoa genangika abe nihiromanga Itotoporoniye de ahao daku o lokuoka de ka idadi nomalega ma gurutika hiadono o tonaka gea abe tahibehehongoka tato ahao tahidoaka o Isiraele ma nyawaika. Masara ma tonaka gea ka idadi namake de ani lako dika.

¹³ Ho ngona namakeoka ma tonaka gea de ahao ngonaoo hoka ani riaka o Harunoli abe ani gogianongoru ko yowohamikauahi de ngona nohonengoka. Abe naa adonoka ma oraha ngonaoo nohonenge ho to ngona ani jiwa de ani totofora manga jiwa ka ma moi tinihidotoomuino de ona yododihiraika yohonenge.

¹⁴ De gea angamoi ngona de o Harunu inihinooto ko nihihingounua abe ko nianiikua ahi behehongo nginika ma oraha o Sini ma tonaka ma kakaahaka. Abe ma oraha gea ona o Isiraele ma nyawa de manga gurubungu ihiribuutu Ngohino la tahiokere onangika de kiani ngona notemo o hakaruika gea duru imaketero hoka tinihibehehongo abe nako ngini nihihingounu de gea niahimatoko o nyawa mata-mataika gea to Ngohi ahi medebini ma dararono ma oraha o akere ipooteke ma hakaruino gea. Masara, ngini niahimatoko onangika abe nidiai ti ngini nia hininga ma mauoka dika de aino ho ngona de ani riaka niahowonoka Ngohino.” Hokogea Ma Jou wihingahu o Musaika abe ma titi ma dihira o Isiraele ma nyawa iwiribuutu Ma Jou o Yaweika la wahidoaka o akere ho ma akere gea ihiromanga o Ribuutuino ma akere o Kadesoka.

¹⁵ Ho ka de Ma Jou o Yawe wihingahu o Musaika abe itigioka wohonenge de o Musa womagahoko Unangika, wato,

¹⁶ “Ngona Ma Jou o Yawe, duru tonganono ahi duruuru naga. Ngona Ma Jou abe o nyawa nakokitulaada ho Ngona ka idadi womatengoli niiriki abe ka idadi nihitagongo la unangoli wahihira-hira ani nyawa manga doomuoka naa.

¹⁷ Ona yoperelu manga hihira hoka o domba ma gogoana abe wakunu wahihira la ngaro o kiaika dika yoiki ma ka idadi wahigilioli manga ngiino. De una wahimagaweoo onangika ma oraha nenangoka yosobo la wao wahingohama ani behehongo ma tonakika gea. Ufa hiadono to Ngona Ma Jou o Yawe ani nyawa yaika yaino hoka o domba ma duduono abe ko iwa ma gogoana.” Hokogea o Musa ai dora itagi ai nyawaika.

¹⁸ De Ma Jou o Yawe wipaluhu o Musaika, wato, “Musa, ani duruuru nagau, una gea o Yosua abe to Nuunu ai ngofaka de ai hiakunu ahi Womahino. Ho ngona ahao o Yosua nile de nifokumu la nohitunguu abe una to ngona ani duruuru.

¹⁹ De ahao o Yosua gea niao o Eleasarika, abe una nia hidemo Ngohino, la una ahao o Yosua witingaka ai karajaangika abe una wodadioka o Isiraele ma nyawa manga hihira. De gea kiani o Eleasara wodiai duru o Isiraele ma nyawa manga doomu ma amokika manga himangoka.

²⁰ De ngonali Musa ahao nahingahu onangika abe to ngona ani kuaha imaturuuruoka o Yosuaikali la ona ahao iwihingounu unangika.

²¹ De ma oraha ona yoperelu ihioriki abe to Ngohi Ma Jou o Yawe ahi hininga, abe o kia toigo ona yodiai, gea kiani o Yosua wileha o Eleasarika. De una ka idadi wihingahu to Ngohi Ma Jou ahi mau o Yosuaika. Abe o Eleasara ka idadi wapake o hidemo ma kiahonanga o Urimi de o Tumimi abe ka ihikaika imanoa ai alu ma dadatoko ma juberaka. To ena ma hiaturu tinihidoakoka abe kiani waniiki. De o Urimi de o Tumimi gea ihitunguu la wohioriki to Ngohi ahi mau nginika. De gea angamoi o Eleasara una ti ngini nia hidemo Ngohino ho ahi hininga tihimatoko unangika ma oraha wapake o Urimi de o Tumimi gea. De ahao unangoli wihingahu o Yosuaika.” Hokogea Ma Jou ai hiaturu abe wihingahu o Musaika.

²² Ho o Musa wodiai mata-mata gea duru imaketero hoka wihibehehongoka la Ma Jou o Yawe ai mau waniiki. Ho manga hidemo abe wahidemo Ma Jouika, o Eleasara, de o Yosua ahao o Musa wao o Isiraele ma nyawa manga doomu ma himangika la wahiketehirihimanga de manga doomu ma amokika.

²³ De genangoka manga doomu ma himangoka de ahao o Musa de ai giama ma hinooto wifokumu o Yosua ai mumukuku de wihibehehongo o Yosuaika abe ai tagongo ma karajaanga. De wihinoa o Yosuaikali ma kuaha abe ma dihira Ma Jou wihidoaka o Musaika. Hokogea o Musa waniiki Ma Jou o Yawe ai behehongika la naa o Yosuaikali wihidoaka ai tagongo la unangoli wahihira-hira o Isiraele ma nyawaika.