Gegetongo 25 - Ma Jou ai Demo-demo o Totobelohoka

O Pasala 25 ko atailakouahi O Moaba ma nyawa yahiatara o Isiraele ma nyawaika

¹ Abe ma oraha o Isiraele ma nyawa yomanoa o Sitimi ma dolaka, naga o Moaba ma nyawa abe yogogere ma tonakoka gea. De ipahaino de naga utu o Isiraele manga nau-nauru yomahipeseke de o Moaba ma ngo-ngofeka abe ma titi yomaidu de ona.

² Abe o ngo-ngofeka gea yaahoko ma nauru la ka idadi yaniiki ma oraha manga huhuba yomahihuba manga jou-jouika. Ho o Isiraele ma nyawa yaniiki de yomakutuono yolomo manga ngolo-ngolomoka, de gea ma oraha abe yomahuba-huba de yomaponuku to ona manga jou-jou ma homoaika.

³ Ho mangale o Isiraele ma nyawa yomahidogo o Moaba ma nyawaika gea hiadono onangoo yomahuba-huba manga jou o Baala-Peorika, gea ma titi hiadono Ma Jou o Yawe ai ngamo duru ifae to Una ai nyawaika.

⁴ De gea Ma Jou o Yawe wihuloko o Musaika wato, “Abe onagona dika yahihira ona yatobahowono, ngini kiani niataokino ma hihira gea mata-mata. Niataokino de ahao niakokitomaka to Ngohi ahi himangoka de o nyawa mata-mata manga himangoka, la manga honengino gea de ka idadi ahi ngamo ma giria naa hatoli ihimaata / iowaha. De ahao marai o Isiraele ma nyawa utu ko yadaenuali de ahi ngamo gea.

⁵ Ho o Musa wahuloko o Isiraele ma nyawa manga tobauru-urusu ma nyawaika wato, “Ngini homoi-homoi kiani niatomaka o nau-nauru ti ngini nia kuahaka abe yomahidogo o nyawaika gea hiadono yomahuba-huba manga jou o Baala-Peorika.” De gea ona yosobo yaniiki ai huhuloko ma demo.

⁶ De wahuloko ipaha de ona mata-mata manga hininga duru ihuha ho hiadono duru yoari-ari o Hikamake ma Tau ma himangoka. De abeika, duru ma oraha gea naga o Isiraele ma nauru womatengo woboa ai hijai-jai ma tauino de naga womitaurino o Midiana ma ngofeka. De gea idadi duru o Musa de o Isiraele ma nyawa mata-mata manga himangoka ho ona mata-mata iwimake.

⁷ De naga genangoka o Pinehasa abe una o Eleasara ai ngofaka de o Harunu ai danongo. De o Harunu gea to ona manga hidemo ma nyawa Ma Jouika. Ho ka de o Pinehasa wimake ma nauru gea wowohama ai tauika de womahiburahiye wanoaika ai gogianongoru yowoe-woe. Wanoaika de wagoraka o hokiiki moi ai giamoka.

⁸ De ahao duru womataiti wihidoduru ma nauru gea ai tau ma goronaika. Doka ma goronaka o Pinehasa gea ka wihakara ai gianongoru o Isiraele ma nauru ai goronaiha. De ma hokiiki gea ka igila-gilauku ma ngofeka gea ami pokoroko. De o Pinehasa ai datorino gea ipaha de ahao o Isiraele manga bodito ka idadi ihitogumu, abe ma titi ko yatomakaua manga gogianongoru.

⁹ Masara nako haetongo ona abe yatomaka ma wange gea, naga yasana monaoko de yasana iata abe yokokihonengoka.

¹⁰ De gea ipaha de Ma Jou o Yawe witemo o Musaika wato,

¹¹ “Mangale ma titi o Pinehasa ai datoro gea ho ahi ngamo o Isiraele ma nyawaika ihitogumoka. Abe una gea ai hininga ma hauku to ona manga howonika hatoli imaketero hoka to Ngohioli ahi hininga ma hauku. Ho genangino de ahi hidee ko idadiuali, abe ma dihiraino de tahidee la duru ko manga ngoe tadotoko de o hibinaaha ma titi ahi hininga ma hauku gea.

¹² Ho naa ngona ka idadi nihingahu o Pinehasika abe Ngohi de una ahao mimahiketehibehehongo de o behehongo duru ma rahai hiadono ngomi duru mimaketedodiawo.

¹³ Abe ma titi mia behehongo gea ma goronaka de tihidoaka unangika de ai totoforaukuikaoo la ona ka ihikaika yodadi o Isiraele ma nyawa manga hidemo ma nyawa. Angamoi mangale ai hininga ma hauku la woduhunu de wohidemo Ngohi to una ai Jou ho una hoka wohitebini ai gogianongoru o Isiraele ma nyawa. De ai datorino gea de to ona manga gogao Ngohino idadi itiaiokali. Ho hokogea to Ngohi ahi demo abe ngona o Musa ka idadi nidofanga o Pinehasika.”

¹⁴ De o Isiraele ma nauru gea abe iwihidohonenge ka ma moi de o Midiana ma ngofeka gea, to una ai romanga o Simiri de ai baba ai romanga o Salu. De o Simiri una gea womahidutu o Simeono ma dutuika de wodadi ai gogianongoru manga hihira womatengo.

¹⁵ De ma ngofeka mohone-honenge gea ami romanga o ngo Kosibi abe ami baba o Suuru. De ami baba gea wodadi o Midiana ma nyawa manga hihira womatengo.

¹⁶ De ahao Ma Jou o Yawe wotemoli o Musaika wato,

¹⁷ “Ngini kiani niahikangela o Midiana ma nyawaika hiadono niahibinaaha onangika,

¹⁸ angamoi ona inihikangelaka ma oraha inibudi de manga hininga ma dorou hiadono ngini nimahuba-huba o Baala-Peorika. Abe ma titi o Midiana ma nyawa manga hihira gea ngoi ora o ngo Kosibi abe imihohonenge ma oraha ma bodito gea inidaene o Peoro ma tonakoka.”