Gegetongo 24 - Ma Jou ai Demo-demo o Totobelohoka

O Bileama ai himatoko ma demo Ma Jouoka de aino, de ai hiowa ma demo ma hange o Isiraele ma nyawaika

¹ Ma oraha gea de duru o Bileama wohiorikoka Ma Jou o Yawe ai igo la wahiowa o Isiraele ma nyawa. Ho una duru ko wapakeua o mai-maihi abe hoka ai biaha ma moi ma moi wapake. De duru womalega o tonaka ma kakaahaika manga timiuku.

² Abe genangoka ka idadi wamake o Isiraele ma nyawa yongodumu de manga gogere duru de ma hiaturoka. Abe manga dutu ma doomu ngimoi de hinooto naga homoi-homoiika manga ngi imaketemomomoi abe ihigoko manga tau o ngoerino. Ka de o Bileama wadamaana o Isiraele ma nyawaika de Ma Jou o Womaha wihilufungu.

³ De una womulaenge wohidemo ai demo ma betongo o dakoro abe Ma Jouoka de aino, wato, “Ngohi naa o Bileama, o Beoro ai ngofaka, De ahi hingahu ma demo naa abe Ma Jouoka de aino, Ngohi o nauru abe Ma Jou ai mau tamake la ahi hiningaka itararono,

⁴ Abe Ma Jouino toihene to Una ai demo abe idadi ahi hingahu naa. Ngohino iboa o himatoko abe Una Wokokurutiye wohihimatoko. Tomamotumuku ai himangoka de Una wohihiakunu la tomahioriki itiai.”

⁵ “De abeika o Yakubu ai totoforauku manga tau o ngoerino! Ma rorahai gea to ona manga tau ma doomu o ngoerino, Duru ma hohailoa ti ngini nia gogere ma ngi-ngi gea, Ngini o Isiraele ma nyawa abe inihiowa nia gogere ma ngioka.”

⁶ “Nia tau o ngoerino nihiaturu la nia dodoomu iwoatika, Ho hiadono ihikokaika idola-dolaika ti ngini nia doomu ma ngi. Imaketero hoka o nyawa manga redi ihikokaika yobati-batingoka, O akere ma datekiha de yodahahuru ma akere manga redi-redika. De nia tau ma rupa hoka o gota moi abe Ma Jou o Yawe wohiwangoiye, Ho ma rupa itolomiye duru irahai hiadono de hosanangi enangika, De hoka o gota imatatorika o akere ma ngigoroka ti ngini nia tau.”

⁷ “Ma Jou wohihimatoko moi hiadono ngohi tamake manga akere, O Isiraele ma nyawa ahao ka ihikaika yawedono manga akere, Ho hiadono manga akere ma ngi-ngi ka ihikaika aomanga. De onangoo hoka o datomo ka ihikaika yopehaka ho duru ifaa-faatuku. Abeika ona ka ihikaika manga bobero irahai ho duru yofaa-faatuku.” “De o Isiraele ma nyawa ahao to ona manga koano ko ai buturungu, Nako una de o koano o Agaga, ka to Isiraele ma nyawahi manga koano woputurungu. De ona abe wahikoano ka onangohi o nyawa yagorakiye. Hiadono o horomati ilamoko itagi o koanoika gea de ai kokawaahaikaoo.”

⁸ “Ona ma dihira o Mesiiroka masara Ma Jou wahihupu ona o Mesiirino, Ho manga buturungu gea hoka o fuhuku ma hapi, gea yamake Unangino. O nyawa ngaro o dutu onagona dika ma ufa yatualono o Isiraele ma nyawaika, Angamoi ona ahao yahimataka o nyawa abe yalawana de yahikangela, Manga kobongo yatobi-tobikuku de yapake manga toimi onangika, De yatoimi de manga hihiipi hiadono manga badanga yawederoka.

⁹ Ho onagona de yamoroini o Isiraele ma nyawaika? Duru yokangela ona abe yaruwae hiadono manga ngamo ifae. Gea imaketero de o singa ma boki ma ago-agomo abe yaruwae. Yomagahoko o bodito hoka o boki o singa ma ayoino yamake, Nako to ena ma ngofaka yoduhunu ho yagoli onangika. Ho onagona yamoroini yaruwae o Isiraele ma nyawaika?” “Onagona dika abe yahiowa o Isiraele ma nyawaika, Onangoo ahao yamake ma owa. De onagona dika abe yagahoko onangika o kokangela, Onangoo ahao yamake o kokangela.” Hokogea o Bileama ai demo ma betongo o dakoro.

O Bileama ai hiowa ma demo ma iata o Isiraele ma nyawaika abe Ma Jouoka de aino

¹⁰ De gea o Balaka woihene de duru ai ngamo ihauku o Bileamika ho hiadono duru wopokahoata de wato, “Ngona, done sarakia hiadono hokogea notemo! Ngohi toniahokino la nohiduhunu talawana onangika abe ihimusu naa, ho kiani naagahoko ma kokangela onangika! Masara abeika ngona! Naa ma hangeou ngona nahiowa de ani hiowa ma demo onangika.

¹¹ Ho naa ibooto! Ngona naa nolio! Abeika, ngaro tonihibehehongo o hewa duru kohaamoko nako nohiduhunu masara Ma Jou o Yawe ko wonihigunoaua namake ani hidoaka ma hali-hali gea ho nosoboka!” Hokogea wotemo o Balaka gea.

¹² De o Bileama wipaluhu unangika wato, “O koano, ma dihira doka ahi ngioka, abe to ngona ani hidingoto ma nyawa, ka de ona yoboa de ihihigaro ngohino de ani behehongo gea de ngohi tahingahu onangika tato,

¹³ ‘Ngaro o Balaka wohihidoaka to una ai koano ma tau abe waomangoka de o haaka de o gurasi ma hali-hali, masara ngohi ko idadiua todiai o kia dika abe ihititi to ngohi ahi hiningaka de aino. Ho ngaro ma owa todiai eko ma dorou, masara ko idadiua tatilakuru Ma Jou o Yawe ai behehongo ngohino. Nako ngohi naa kiani gea abe Ma Jou o Yawe wotemoka, gea ena abe ngohi totemo.’ Sarakia, hokogea ahi demo ma dihira eko koua?”

¹⁴ De ahao o Bileama wohigila-gilahi de ai demo, wato, “Ngohi naa tolio ahi gogianongoruika ahi tonakoka masara ko tosobouahi de abeika ahi hitiari ma demo notoihene. Mangale naga ma oraha nanga himangoka abe Ma Jou wohihimatoko ngohino hokokia ahao idadi. Ho naa ngohi tonihingahu gea abe o Isiraele ma nyawa ahao yodiai to ngona ani nyawaika.”

¹⁵ Hokogea o Bileama wihingahu o Balakika de ahao womulaenge de ai demo ma betongo o dakoro moioli abe Ma Jouoka de aino, wato, “Ngohi o Bileama, o Beoro ai ngofaka, De ahi hingahu ma demo naa abe Ma Jouoka de aino, Ngohi o nauru abe Ma Jou ai mau tamake la ahi hiningaka itararono,

¹⁶ Abe Ma Jouino toihene to Una ai demo abe idadi ahi hingahu naa. Ngohino iboa o himatoko abe Una Wokokurutiye wohihimatoko. Tomamotumuku ai himangoka de Una wohihiakunu la tomahioriki itiai.

¹⁷ Naga o Yakubu ai totoforauku womatengo ngohi naa timake, Masara ko ma oraha nenangua de timake ma, ika-ika de una naga, Abe doka ma gurutika mia himangoka una gea timake. Una o Yakubu ai toforauku, abe o nyawa mata-mataika ahao iwihioriki, Una hoka o murumu kohadararono abe ma dihangoka iboaiye, O koano ma tutukunu naga ai giamoka abe ihitunguu o kuaha kohaamoko, De una womaboa o Isiraele ma nyawaka de aino. Una ahao o Moaba ma nyawa manga pea ma kabelanga wakokipelaka, Ona o Sete ai totoforauku abe manga pea wakokipelaka, Una o Isiraele manga koano de ai kuaha gea kohaamoko.

¹⁸ O Edomo ma nyawa onangoo ma, ahao una wahikala, Ka de ona o Seiri ma tonakoka iwimusu de waparangi hiadono wahikala. Masara o Isiraele ma nyawa ka ihikaika manga buturungu idogo, Ona ka ihikaika yogila-gila manga buturungu de manga tobalaku idogo.

¹⁹ O Yakubino, o koano gea womaboa abe o nyawa manga ngoe wahipareta, De ona abe waparangi de manga hou naga, wahigilio de wahibinaaha.” Hokogea o Bileama de ai demo ma betongo o dakoro wahidaere.

O Bileama ai himatoko ma demo abe wahidaere o nyawaika abe ahao yamake manga hohowono

²⁰ De ahao o Bileama womalegaoo o Amaleke ma nyawa manga tonakikali de naga ai demo ma betongo o dakoro moioli abe ma dumutu onangika, wato, “Ona ma dihira abe yomahidutu o Amalekika, Ka onangohi o nyawa yagorakiye, Ngaro o nyawa mata-mataika ma ka onangohi manga kuaha ilamoko. Masara o Amaleke ai totoforauku ahao o bobinaaha ahao yadaene onangikaoo.”

²¹ De ahao o Bileama womalegaoo o Keni ma nyawa manga tonakikali de naga ai demo ma dakoro moioli abe ma dumutu onangika, wato, “Abeika ti ngini nia ngi abe nimahidutu nia tofora o Kenika, Nia gogere duru o lokuhakaruoka abe ko initotokiaua inihikangela nginika, Hoka o totaleo ma igutu o bilatu ma hakaruoka nia gogere ma ngi.

²² Ma, ngaro hokogea, de ahao o Asuru ma nyawa ihibinaaha nia ngi gea. Ngini inikokitaokoka de inikokiaoka ho manga huhuloko nidadioka.”

²³ Gea wotemoka de ahao naga o Bileama ai hingahu ma baha de o demo ma betongo o dakoro, wato, “Abeika, ka de Ma Jou womaputuhu wohiwedere o nyawa manga kuaha, De ngaro ona gea duru ko manga ngoe de manga buturungoka, Masara ona gea ahao ko idadiokaua yofaa-faatuku, Angamoi duru Ma Jou ai hidee onangika gea ahao idadi.

²⁴ De abeika ngaro o Asuru ma nyawa abe duru de manga buturungoka, Masara ko ihikaikaua itagi angamoi onangikali ahao o kangela iboa. Abe naga o kapa ma ngoe o Sipurusu ma nuuhoka de aino yahitipokouku, Ona yaparangi o Asuru ma nyawaika de manga buturungu yawedere, De hokogenangoli ona o Sipurusoka yahiwedere o Hebere ma nyawaika, Masara ika-ika de o hibinaaha yadaene onangikaoo abe o Sipurusino yoboa, Manga kapa ma doomu ma amoko masara ahao iwedere to onangoo manga kuaha.”

²⁵ O Bileama ai hingahu o Balaka de ai dodiawoika gea ibooto de ahao una ka wolio to una ai tonakika. De o Balaka de ai dodiawo onangoo yokokilio manga kotaika.