Gegetongo 23 - Ma Jou ai Demo-demo o Totobelohoka

O Bileama wahiowa o Isiraele ma nyawa

¹ De genangoka o Baala ma loku ma tubu-tubuoka o Bileama wihuloko o koano o Balakika wato, “Ngohi togahoko la ngona nonahidiai o huhuba ma ngi tumidi nenangoka de ma huhubaoo nonahidiai abe kiani naga o hapi ma nauru tumidi de o domba ma nauru ma baluhu de enangoo tumidi.” Hokogea wihuloko.

² De o Balaka wihigihene ho wodiai abe hoka o Bileama wihulokoka. De ahao ona yahinooto yomahihuba o huhuba ma ngi amomoiika o hapi moi de o domba moi.

³ De ahao o Bileama wihuloko o Balakika wato, “Ngona nomagoo-gogerohi dika nenangoka ani huhuba ma datekoka de ngohi toikohi tomatingaka. Abeika nako Ma Jou o Yawe ahao wohitutumu de naga ai demo ngohino. De o kia dika wohihingahu ngohino gea dika ahao tohidemo ngonaika.” Hokogea wihingahu o Balakika de ahao woiki o loku gea ma tubu moiikali abe o hakaru mata-mataika.

⁴ De igoungu Ma Jou woboaino witutumu de o Bileama wotemo Ma Jouika wato, “Ngohi naa tohiaturu la naga o huhuba ma ngi tumidi de tonihihuba o hapi tumidi de o domba tumidi abe o huhuba ma ngi amomoiika tonihihuba o hapi moi de o domba moi ibooto.” Hokogea o Bileama ai niniata ma demo Ma Jouika.

⁵ De Ma Jou o Yawe naga ai demo o Balakika abe o Bileama kiani wadofanga unangika, wato, “Bileama, kiani nigilio o Balakika de ahi demo duru naniiki itiai abe hoka tohingohamoka ani hiningaika.” Hokogea o Bileama de Ma Jou yomakoketemo.

⁶ Ho o Bileama wigilio o Balakika de wimake una de o Moaba manga popareta ma nyawa ona mata-mata iwidamaa abe yomaokoinohi o huhuba ma ngi ma datekoka.

⁷ De onangika o Bileama wahingahu de ai demo ma betongo o dakoro abe Ma Jouoka de aino, wato, “O Balaka wohiahokino o Arama ma tonakino, Ngohi o wange ma hiwariha ma loku-lokuoka, De una o Moaboka manga koano wohihibehehongo, wato, ‘Ngona noboa ngohino la o Yakubu ai totoforauku nagahoko o kokangela, Kiani noboa de nahitipokouku o Isiraele ma nyawa!’ Hokogea ngohino ai behehongo ma gogahoko o Balaka.”

⁸ “Masara done sarakia de ngohi tahikangela o nyawa daena, Nako Ma Jou o Yawe ma dodihiraino wato ko wahikangelaua? De done sarakia de ngohi tahitipokouku ona gea, Abe ma dodihiraino de Ma Jou o Yawe ko wahitipokoukua?

⁹ Ngohi daku o loku-lokuoka de ahi lako ma dumutu onangika, Daku o loku ma tubu-tubuoka de tapulono onanguku naa, De tamake o nyawa abe yomatingaka o nyawa utuino, To ona dika manga doomuoka yogogere manga igo, Abe ona ato, ‘Nako ngomi de o nyawa utu, ngomi mimakohowono.’

¹⁰ Ko moiua yapoa yaetongo o Yakubu ai totoforauku, Onagona yakunu yaetongo o dunia ma tonaka ma mui? Igoungu, hoka o tonaka ma kafo, ona o dunia ma lokuika atamunu. Ho ngaro ona yomaregu iata masara o regu moi de manga ngoe, abeika! Ngone ko hapoaua haetongo manga ngoe ngaro o regu moi dika. Ngohi toigo la to ngohioo ahi totiai hoka to onangoli manga totiai, Ho de ma oraha yohonenge de Ma Jou wahiowa onangika, De ngohioo nako adonoka ahi wowango ma baha de duru toigo, La Ma Jou wohisanangi ngohino imaketero hoka wasanangi onangika.” Hokogea o Bileama ai dakoro ma demo itiai abe wamake Ma Jouino.

¹¹ Ma ka de o Balaka woihene de witaere o Bileamika, wato, “Ngona hokogea notemo de nohihikangela ngohino! Ngohi tonihibehehongo la nahikangela ahi musu masara abeika, de ani demo hokogea nahiowa dika onangika!” Hokogea o Balaka ai huha ma demo.

¹² De o Bileama wipaluhu wato, “Sarakia ko tonihingahuahi kangano abe ngohi kiani tohidemo dika abe Ma Jou o Yawe wohihiakunu totemo?” Hokogea womademo o Bileama.

O Bileama ai hiowa ma demo ma hinooto o Isiraele ma nyawaika

¹³ De o Bileama ai demoika o Balaka ko wopaluhua masara ka wihigaro dika wato, “Abeika hoiki o ngi moiikali abe genangokaoo ka idadi hamake o Isiraele ma nyawa gea masara ko manga doomu mata-mataikaua hamake. Marai nako ngona ka manga doomu ma hononga dika namake de ka idadi ona gea naagahoko o kokangela.” Hokogea wihigaro ho o Bileama winiiki o ngi moiikali.

¹⁴ Ho o Balaka wiao o loku ma tubu moioli ma romanga o Pisaga abe genangoka naga ma ngi abe ihiromanga, “O Dudutumu ma ngi,” de genangoka o Balaka wodiai o huhuba ma ngi o gahumu tumidoli. De ahao imaketero hoka kanganoli wohihuba o hapi tumidi de o domba tumidi abe o huhuba ma ngi amomoiika wahihuba o hapi moi de o domba moi ibooto.

¹⁵ De ahao o Bileama hoka kanganoli wihuloko o Balakika wato, “Ngona nomagoo-gogerohi dika nenangoka ani huhuba ma ngi ma datekoka de ngohi toikohi dokenangika la ngohi de Ma Jou mimakoketemoli genangoka.”

¹⁶ Ho o Bileama waika de ma moioli Ma Jou o Yawe naga ai demo o Balakika abe o Bileama kiani wadofanga unangika, wato, “Bileama, kiani nigilio o Balakika de ahi demo duru naniiki itiai abe hoka tohingohamoka ani hiningaika.” Hokogea o Ma Jou wihuloko o Bileamika.

¹⁷ Ho o Bileama wigilio o Balakika de wimake una de o Moaba manga popareta ma nyawa ona mata-mata iwidamaa abe yomaokoinohi o huhuba ma ngi ma datekoka. De o Balaka duru woigo wohioriki Ma Jou ai demo ho wileha o Bileamika wato, “Ho sarakia Ma Jou o Yawe ai demo ngonaika?”

¹⁸ De unangika o Bileama wihingahu de ai demo ma betongo o dakoro abe Ma Jouoka de aino, wato, “O Balaka ngona nomaokoino de ani hininga ma gahumu nototoihene, De ahi demoika ngona, o Siporo ai ngofaka, kiani nohihigihene.

¹⁹ Abe Ma Jou Una ko o nyawaua ho Una duru ko woelu-elukua, De Una ko o nyawa ma ngofakua ho ai hininga ko waturuurua. To Una ai behehongo mata-mataika wohingodumu, Ho done sarakia ngona nafikiri Una wato naga moi wodiai de ngona nato bote Una ko wodiaiuali? Ena gea abe Ma Jou wato wodiai, Una de ahao kiani wodiai. Ai behehongo o nyawaika duru idadi, de imaketero hoka wotemoka ahao idadi.

²⁰ De Una wohihuloko la ngohi tahiowa o Isiraele ma nyawa, De Una ma dodihirainohi wahibehehongo ma owa onangika gea, Ho done sarakia de ngohi tohikawalimi to Una ai behehongo gea? Angamoi Ma Jou Una o Isiraele ma nyawa wahiowaka.”

²¹ “Una o Yakubu ai totoforaukuoka ko wamakeua ma titi, La wahohowono hiadono wanoaika dika o Isiraele ma nyawa gea. Ma Jou o Yawe to ona manga Jou de ka ihikaika waniiki, Una wodadi to ona manga Koano de manga higiriiri ka Unangika dika, Ho ka ihikaika naga o higiriiri ma ilingi manga hidogoronaka, De manga higiriiri ma ilingi yogirangika manga Koanoika.”

²² “Gea Ma Jou dika abe o Isiraele ma nyawa o Mesiirino wahihupu, Naga onangoka o buturungu hoka o fuhuku ma hapi ma nauru ma buturungu. Imaketero hoka o hapi gea imahinganono to ena ma tataduku ma buturungika, Hokogenangoli o Isiraele ma nyawa yomahinganono Ma Jou ai buturungika.”

²³ “Ko iwa o dorouino ma dodiai de yadaene o Yakubu ai totoforaika, De nako o Isiraele ma nyawaika o kokangela ma mai-maihino ko ilakua. Ho hiadono o nyawa utu de manga heranga yomalega onangika, De yotemo ato, ‘Abeika ma rorahai abe Ma Jou wodiai o Isiraeloka.’”

²⁴ “Ona hahiketero hoka o boki kohaamoko abe imomiki de itagioka, De ngaro o kiaika aika ma ko iwa o aewani abe alawana enangika de ilaku, De hokogenangoo de o Isiraele ma nyawa manga buturungu, Abe onangoo ngaro o kiaika dika yoiki de ko moiua yalawana de yolaku. Hoka o boki o singa abe imaino-inomo de ko imahiai-ainua itagi, Ka hiadono amakeokahi ma inomo de yaolomo ka hiadono apunuhu. Ho to ena ma inomo kiani ma awunu akopoakahi de ahao imahiaini. Hokogenangoo ona abe naa yomomikoka de yomulaengoka yotagi, Kiani o nyawa manga awunu akopoakahi de ahao yoriidi, To ona manga dumutu yamakeokahi de ahao onangoo yomahiaini.” Hokogea o Bileama ai demo ma betongo o dakoro ma hinooto abe wamake Ma Jouino.

²⁵ De ka de o Balaka woihene ai demo gea de duru witemoli o Bileamika, wato, “Ngaro ngona onangika duru noluku o kokangela naagahoko ma, iti ufa naagahoko de o hiowa ma demo onangika!”

²⁶ De o Bileama wipaluhu wato, “Sarakia mode ngona ko noihenua abe kanganoinohi tonihingahuokau abe ngohi kiani tohidemo dika abe Ma Jou o Yawe wohihiakunu totemo?”

²⁷ De ahao o Balaka wihigaroli o Bileamika wato, “Abeika toniao o ngi moiikali. Marai genangoka de ahao Ma Jou wosanangi wonihigunoa o kokangela naagahoko onangika la ngona nohiduhunu ngohi.”

²⁸ Hokogea wotemo ibooto de o Bileama winiiki hiadono o Balaka wiao o loku ma tubu moioli ma romanga o Peoro ma tubu abe genangoka ka idadi yamake o dola ma kakaaha mata-mataika manga timiuku.

²⁹ De ahao o Bileama ma moioli wihuloko o Balakika wato, “Ngona kiani nenangokali nohigoko o huhuba ma ngi tumidoli de ma huhubaoo nohihidiai la naga o hapi ma nauru o gahumu ma tumidoli de o domba ma nauru ma baluhu abe enangoo o gahumu tumidi.” Hokogea wihuloko.

³⁰ De hokogea o Balaka waniiki o Bileama ai hiaturu hiadono o huhuba ma ngi amomoiika wahihubali o hapi moi de o domba moi.