Gegetongo 22 - Ma Jou ai Demo-demo o Totobelohoka

O Balaka abe wahikoano o Moaba ma nyawa wamodongo o Isiraele ma nyawaika

¹ De o Isiraele ma nyawa yosoboli yogila-gila o Moaba ma tonaka ma dolaika abe idateke o Yorodani ma akerika de doka ma honongaka o Kanani ma tonakoka. Ho ona de o Yeriko ma kota ko ikurutikakaua de genangoka ihigoko manga doomu ma tau mata-mata o Moaba ma dolaka gea.

² De o Moaba ma nyawa manga koano ai romanga o Balaka abe ai baba o Siporo. De o koano o Balaka gea duru wamodongo o Isiraele ma nyawaika angamoi wohioriki abe hokokia o Isiraele ma nyawa yahikangela o Amori ma nyawaika.

³ De ma oraha o Moaba ma nyawa yamake o Isiraele ma nyawa manga doomu kohaamoko abe yogogerika to ona manga tonaka ma dolaka, de utuohi yamodongo o Isiraele ma nyawaika. Ho manga hawana ma huha manga kokawaaha mata-mataika duru kohagiria.

⁴ De o Moaba ma nyawa yoiki o Midiana ma tonaka ma date-datekika la yomahikaaturu de o Midiana manga balu-baluhu la ato yomakuduhunu abe nako o Isiraele ma nyawa yaparangi onangika. De yahingahu o Midiana ma nyawa manga balu-baluhika gea ato, “Abeika o duduono kohaamoko gea yoboaino naa. Ona imaketero hoka o hapi ma duduono abe ka de yamake o ruruubu ma bihi-bihi de aolomo hiadono ko iwaka. De hokogenangoo ona ahao inaolomo hiadono inamataka ngone mata-mata!” Hokogea manga demo la yahigaro o Midiana ma nyawaika hiadono yomakuduhunu. Hokogea manga hawana o Isiraele ma nyawaika hiadono o Balaka, o Siporo ai ngofaka, abe ma oraha gea wahikoano o Moaba ma nyawa, duru womalingiri o duduhunu.

O Balaka wibehehongo o Bileamika la woboa widuhunu

⁵ De woihenoka naga womatengo abe ato bari una wososawaro wotobamai-maihi de ka idadi waduhunu de ai houru ma buturungu. Una gea ai romanga o Bileama de ai baba o Beoro de wogogere o wange ma hiwariha o Petoro ma kotaka abe idateke o Efaraata ma akere ma honongaka. Ho o koano o Balaka wahidingoto o nyawa la yoiki iwitutumu o Bileama gea de ai demo yototaka unangika. De hokonaa o Balaka ai demo abe kiani iwihingahu o Bileamika: “De ahi horomati ngonaika ahi baluhu o Bileama, ngohi o Balaka abe tahikoano o Moaba ma tonakoka de ahi perelu ngonaika ma titi naga. Ma dihiraino naga o nyawa o dutu moi manga doomu masara duru ko manga ngoe abe yohupu o Mesiiri ma tonakino. De ma oraha naa ona yomahiadonoka to ngomi mia tonakino. Abeika ngona noboa la namake de ani lako abe ahi perelu o duduhunu ngonaika angamoi manga ngoe dika de hiadono ahi tonaka ma dola ko hamakeokaua. De ma oraha naa ona naga yomatau-tauuku ahi tonaka ma dolaka mia kota ma honongaka ho marai ngade-ngade imihibodito ngohi de ahi nyawa.

⁶ Ho ngohi duru togahoko ahi baluhu la ngona nomataitino noboa nomiduhunu. Abe ngohi toigo la ngona noboa de naagahoko o kokangela o nyawaika gea angamoi ona ko manga buturungu hiadono nako ngomi dika ko idadiua mimaduhunu de miapoa. Masara, ahi baluhu nako ngona naagahoko o kokangela de yadaene hiadono manga buturungu ihihanga marai ka idadi ona ahao ngohi tahikala de takiniiki hiadono tahihupu ahi tonakino. Ngohi tonihioriki abe to ngona ani dodiai ma buturungu o nyawaika. Abe onagona dika ngona nagahoko ma owa gea yamake ma owa ma amoko, de onagona dika abe naagahoko o kangela gea ahao ona yamake o kokangela ma amoko. Ho to ngohi ahi perelu gea ena ma titi abe tonibehehongo la itaiti noboa nohiduhunu. Hokogea dika aika ahi behehongo ahi baluhu o Bileamika de ngohi naa o koano o Balaka.” De hokogea o Balaka ai demo abe ai hidingoto ma nyawa yadofanga o Bileamika.

⁷ De ona, o Balaka ai hidingoto, utu to una ai nyawa abe yahibaluhu o Moaba ma nyawa de utuoli o Midiana ma nyawa manga balu-baluhu onangoo yoiki. Ho ona mata-mata yomahidiaioka yoiki de ahao yokokisobo de yao o dodiai ma hewa ma amoko abe iwihewa o Bileama la una wagahoko o kokangela o Isiraele ma nyawaika. Ho ka de yomahiadono o Bileama ai ngiika de duru iwihigaro unangika de o koano o Balaka ai demo.

⁸ De o Bileama wapaluhu onangika wato, “Ngini kiani nimaiduohi ngohioka la itebini o ngorumino de ahao ti ngini nia gogahoko ngohino tapaluhu. De ahi babaluhu ma demo gea abe ahao Ma Jou o Yawe wohihidoaka ngohino la tinihingahu nginika.” Hokogea o Bileama ai demo ho o hidingoto ma nyawa gea yomaidu unangoka.

⁹ De o futu gea Ma Jou woboa o Bileamino de waleha ma titi ona abe yoboaino, wato, “Bileama, onagona gea yoboaino inirekata?”

¹⁰ De o Bileama wipaluhu Ma Jouika wato, “Ona gea o koano ai demo yototaka ngohino. Abe o Moaba ma nyawa manga koano o Balaka, abe una o Siporo ai ngofaka, una gea wahidingoto ngohino la ai demo yototaka.

¹¹ De to una ai hingahu ato bari naga o nyawa duru ko manga ngoe yohupu o Mesiiri ma tonakino. De ma oraha naa ona yomahiadonikaka to una ai tonakoka de manga ngoe dika hiadono ai tonaka ma dola ko hamakeokaua. De o Balaka gea wogahoko la ngohi toboa unangika de o nyawa manga ngoe-ngoeika gea ngohi tagahoko o kokangela onangika la hiadono manga buturungu ikuranga. Abe nako manga buturungu ikuranga wato marai una de ai nyawa ka idadi yaparangi onangika de wahihupu to una ai tonakino. Gea ma titi hiadono una wahidingoto la ai demo ona yoboa yototaka ngohino naa.”

¹² Gea Ma Jou woihene de ahao wihingahu o Bileamika, wato, “Bileama, ufa ngona naniiki to ona manga hininga. Ufa ngona naagahoko o kokangela o nyawaika gea abe manga ngoe-ngoe angamoi ona gea Ngohi tahiowakau ho ufa ngona noiki genangika.” Hokogea Ma Jou wotemo ibooto o Bileamika.

¹³ De ma ngorumino o Bileama womomiki de o Balaka ai hidingoto o balu-baluhu gea walega de wahingahu onangika wato, “Ngini naa ngaro ka nilio dika. Ngohi ko idadiua toiki angamoi Ma Jou o Yawe duru woluku wohihigunoa la tininiiki.”

¹⁴ Hokogea o Bileama wotemo ma balu-baluhika ho ona yosobo yolio o Balakika de iwihingahu, ato, “Mia koano, o Bileama gea woluku wominiiki ngomi ho ko woboaua.”

¹⁵ Ka de manga demo gea woihene de o Balaka wato wohitailoli o Bileama wibehehongo ho wairiki ai poparetaino abe ka onangohi yokurutiye la onangoli wahidingoto. Ho naa yoikoli de to una ai hidingoto utuohi yowoe.

¹⁶ De ma oraha ona gea yoboali o Bileamika de duru iwihigaro de o Balaka ai demo unangika ato, “Mia baluhu, hokonaa mia koano o Balaka, o Siporo ai ngofaka, ai behehongo ma demo ngonaika, wato, ‘Ngohi o koano duru togahoko ngonaika o Bileama la ufa o kia naga initatoko hiadono ngona ko noboaua ngohino.

¹⁷ De tonihibehehongo abe ani utumu duru kohaamoko tonihidoaka ho iti ngona noboa de o kia dika nogahoko de idadioka to ngona. De gea ena idadi o horomati ma dodunguu ma amoko ngonaika. Mata-mata gea tonihibehehongo ahao todiai iti ngona noboa de naagahoko o kokangela o nyawaika abe ona naa yoboainoka mia tonakoka. Ho duru ngohi tonganono ani duduhunu gea.’ Hokogea mia baluhu to ngomi mia koano o Balaka ai behehongo ngonaika.”

¹⁸ Masara ngaro o koano o Balaka ai demo hokogea ma, o Bileama wapaluhu onangika wato, “Ngini kiani nimangaratii abe ko idadiua tininiiki de ngaro o Balaka wohihidoaka to una ai tau de o koano ma tau gea waomanga de o haaka de o gurasi ma hali-hali masara parahaja dika ngohi toiki. De angamoi ngohi ko idadiua todiai o kia dika ngaro ma hohutulu eko ma amoko angamoi ko iwa ma hasili nako de ahi demo gea tatilakuru Ma Jou o Yawe ai behehongo ngohino angamoi Una to ngohi ahi Jou.

¹⁹ Masara nako ngini o futu naa nimaiduohi ngohioka de ngohi todamaahi Ma Jou o Yawe wohitutumoli bote ahi Jou naga utuohi ai demo ngohino.”

²⁰ De o futu gea idadi hoka o Bileama wonganono abe Ma Jou woboali unangino de wihingahu wato, “Bileama, abe ona naa yoboaino ka idadi naniiki angamoi manga koano wonibehehongo. Ho ngona noiki naniiki masara abe ahao nodiai gea ena dika abe Ngohi tonihingahu ngonaika la ka idadi nodiai. De ufa naniiki to ona manga huhuloko ngonaika.” Hokogea Ma Jou wihingahu o Bileamika.

²¹ Ho ma ngorumino o Bileama womomiki de womahidiai wosobo ho ai gogogere wohipasanga ai keledai ma poretuku de ahao wofarene ma keledai ma poretuku de waniiki o Moaba manga balu-baluhu ma oraha yolio manga koanoika.

²² Masara ahao Ma Jou duru wingamo o Bileamika ma titi woiki witutumu o koano o Balaka ho ai dodagi ma goronaka gea de naga Ma Jou o Yawe ai malaekata womaokoino o ngekomo ma goronaka abe o Bileama de ai duduhunu o nauru yahinooto ma ngekomo gea yaniiki. Abe o malaekata gea wato watatoko manga dodagi la ufa yogila-gila o koano o Balakika.

²³ De ona yahange gea ko idadiua yamake ma malaekata, masara o Bileama ai keledai ka idadi iwimake. Ho ka de iwimake Ma Jou o Yawe ai malaekata gea de ma keledai duru iwimodongo angamoi ma malaekata gea womahingairoko de ai dia abe ma doto arihononga! Ho o keledai atodokana de imapopaata irehene o redi ma goronaika de o Bileama nagahi o keledai ma poretoka. Ho una duru wohiniporo ma himanga ma ngekomikali de duru wapoha ai keledaiika ho hiadono iboali ma ngekomino.

²⁴ De ahao Ma Jou o Yawe ai malaekata womaturuuruoli ma ngekomo ma dodefefotika abe genangoka naga o redi arihononga. De o redi arihononga gea ma dutu ihigilolitino de o hakaru abe yafafoiye hoka o dadaduhu. De genangoka o malaekata gea imanoa. Ho ko idadiuali o Bileama ai keledai ihupuoli o ngekomino.

²⁵ Ma, ka de ma keledai iwimakeoli Ma Jou o Yawe ai malaekata de imahidutuku ma dadaduhika ho o Bileama ai lou iwihidatapalu ma dadaduhika ho kohaodiri. Ho o Bileama wongamo hiadono ai keledai wapohali.

²⁶ De Ma Jou o Yawe ai malaekata womaturuuruokali manga himangika de wairiki ma ngi abe genangoka ma ngekomo ipilatu ho ngaro ma keledai iwirehene ma hohutuloo ma ko idadiokaua ngaro ma nirakika eko ma gubadika.

²⁷ Ho ma oraha ma keledai imahitigi ma malaekatika de ko idadiokaua igila-gila ho imamotumuku ma keledai de o Bileama nagahi o keledai ma poretoka de duru ai ngamo ihauku ai keledaiika. Ho de ai ngamoka de aino wohipoha de ai tutukunu ai keledaiika.

²⁸ Gea de Ma Jou o Yawe wohiakunu ma keledai gea la itemo de o nyawa manga demo ho ma keledai gea iwileha o Bileamika, ato, “O kia ngohi tahowono ahi dutuika hiadono naa ma hangeou ngona nohipoha-poha?”

²⁹ De o Bileama wopaluhu ai keledaiika wato, “Ngona nohihiona-ona ho hiadono nohihimaleke ho hiadono tonipoha! Ngona o aewani dika de nako ahi dia naga ahi giamoka koaho tonitomaka dika!”

³⁰ Ka de o Bileama wotemo ibooto de ai keledai itemoli abe ileha unangika ato, “Sarakia ngohi naa ko to ngonaua ani keledai abe naa ma dekanino tonileleani tonihidagi-dagi ahi poretoka? De sarakia ma dodihiraino de ngohi tabiaha tonilawana hokonenangoli?” De o Bileama wopaluhu ai keledaiika wato, “Koua, ko ma iwahi ma dihiraino nohilawana.”

³¹ De ka de wotemo hokogea de Ma Jou o Yawe wohiakunu o Bileama ai lakoika la hiadono ka idadi unangoo wimake Ma Jou o Yawe ai malaekata ai himangoka. De o malaekata una duru o ngekomo ma goronaka de womahingairoko de ai dia abe ma doto arihononga! Ho ka de o Bileama wimake de duru watilabukuku o ngekomoka de womaponuku ka hiadono ai pea itiki ma tonakuku.

³² De Ma Jou o Yawe ai malaekata iwitaere o Bileamika wato, “Adodoa ho ngona ani keledai napoha-poha hiadono naa ma hangeou napoha? Abeika, ngohi naa toboa la ani dodagi ma ngekomika tatatoko la ufa nogila-gila angamoi ngohi tonihioriki abe ani hininga ma dodagioka tamake ngona ko nomahidodiaiua naniiki Ma Jou ai mau.

³³ To ngona ani keledai ihimake ngohi ho inihirehene naa ma hange ibooto hiadono ka nowangohi. Angamoi nako ani keledai ko inihirehenua marai ngohi tonitomaka ma nako ani keledai ko tatomaua.” Hokogea o malaekata ai dodaere ma demo o Bileamika.

³⁴ De o Bileama wipaluhu Ma Jou o Yawe ai malaekatika, wato, “Ngohi naa tahowonoka! Ngohi ko tonihiorikua abe ngona nomaokoiye ahi himangoka la ahi dodagioka nohitatoko. Ho naa, nako ngona ko noigoua ngohi togila-gila de tolio dika ahi tauika.”

³⁵ Masara Ma Jou o Yawe ai malaekata woihene o Bileama ai demo gea de iwihigunoa dika wato, “Ngona naniiki dika o nau-nauru nenanga masara nomahidodiai notemo onangika. Ngona kiani nohidemo dika abe ngohi tonihingahuoka.” Hokogea o malaekata iwihigunoa ho o Bileama wogila-gila waniiki o Balaka ai hidingoto o Moaba ma nyawa manga poparetaino.

³⁶ De ma oraha o Balaka woihene ona yoboa de una woiki wibuhuku o Bileama. Ho gea woiki to una ai kota moiika abe imahitigi-tigika o Kokoroongo ma akerika abe o akere gea o Moaba manga tonaka ma batingi abe wohikoano genangoka ma batingi. Ho o kotaka gea una de o Bileama yomakamake.

³⁷ De o Balaka witemo o Bileamika wato, “Adodoa ho ma dihira de ko nomataitua noboa? Sarakia, ngona ahi behehongo ngonaika ko nomangaratiiua abe la itaiti noboaino? Eko ngona ka nofikiri ngohi ko tapoaua tonihidoaka ahi kiahonanga abe tonihibehehongoka tato naga ani utumu ma amoko?” Hokogea o koano o Balaka wihimaleke o Bileamika.

³⁸ De o Bileama wipaluhu wato, “Masara abeika, ngohi naa toboaka! De homarihimanga ngona de ngohi. Ma, ngaro hokogea, masara ko iwa ahi kuaha ka hiadono ngohi totemo de o demo o kia dika abe adaene ahi hiningaika. Ngohi kiani tomahidodiai totemo abe tohidemo dika Ma Jou ai demo abe Una ma hirete wohihidoaka ngohino.” Hokogea wihingahu o koano o Balakika.

³⁹ De ahao o Bileama winiiki o Balaka de yoiki o ngi moiika ma romanga o Kiriata-Husoto.

⁴⁰ De genangoka o Balaka wahihuba o hapi muruono naga de o domba muruono naga. De ahao to ena ma roehino naga ma hidoku abe wihidoaka o Bileamika de wahidoakoli to una ai popareta ma nyawaika abe yomakiniiki de o Bileama gea.

⁴¹ De ahao ma dawangeino o Balaka gea wiahoko o Bileamika la yodoa o lokuiye abe ma romanga o Baala ma loku ma tubu-tubu abe genangoka ka idadi o Bileama wamake doka manga timiuku o Isiraele ma nyawa manga doomu ma hononga dika.