Gegetongo 21 - Ma Jou ai Demo-demo o Totobelohoka

O Isiraele ma nyawa yaparangi o Arada ma nyawaika de yolaku

¹ O Kanani ma nyawa utu yogogere o Negebe ma tonakoka de naga manga koano womatengo abe o Arada ma kota wahikoano. Ka de ma koano gea woihene o Isiraele ma nyawa gea yoboa to una ai tonakino de ai hininga ihuha. De o Arada ma koano gea una wohioriki abe yaniiki duru o Atarimi ma ngekomo gea abe o nau-nauru yangimoi de yahinooto ma dodihiraino yaniiki ma oraha yoiki yatailako o Kanani ma tonaka. Ho o koano gea de ai tentara yosobo de yaparangi o Isiraele ma nyawa manga dodagi ma goronaka de yamuruono naga yataoko de yaoka.

² De ahao o Isiraele ma nyawa yomaniata de iwihibehehongo Ma Jou o Yaweika, ato, “Mia Jou, nako Ngona ahao nomiduhunu la hiadono o Arada ma nyawa gea miahikala de ahao ngomi mimahihuba de o uku Ngonaika manga kota-kotaka hiadono moioo de ko iwa abe mimadumungu manga kiahonangino.” Hokogea manga niniata ma demo.

³ De Ma Jou o Yawe wagihene manga niniata gea de waduhunu o Isiraele ma nyawa ho hiadono o Kanani ma nyawa gea duru yahikala. De ona mata-mataika yahibinaahaka o Aradoka de manga kapongo utu imahitigino enangoo yatufu-tufukoka. De gea ma titi o Kanani ma tonaka ma hononga gea ihiromanga o Hibinaaha abe nako to ona manga demo o Horama.

O dodiha o tabaagaino

⁴ De ahao o Isiraele ma nyawa manga ngi o Hooro ma loku ma timiuku gea yokokisobo. De kiani o ngekomo yaniiki abe ma dumutu o Bongo-bongo ma gahioko la gea ka idadi o Edomo ma tonaka yaloliti hiadono yoboa o Kanani ma tonaka ma batingino doka o Edomo ma honongaka. Masara manga dodagi gea ma gurutika hiadono ko yomatongohonokaua.

⁵ De angamoi yokangela manga dodagi ma gurutinoka de manga ngomaha yodudungu de manga inomo o mana dika ho hiadono yomulaengoli iwihigurubungu Ma Jouika de o Musaikaoo. Ho yotemo o Musaika ato, “Adodoa ho ngona nomihihupu o Mesiirino? Marai nomiao o tonaka ma kakaahaino naa la mikokihonenge dika e? O akere nenangoka ma ko iwa, de o inomo ka o mana dika de duru miodebeturoka hiadono miaemono o inomika gea.” Hokogea ihigurubungu Ma Jou ai hidailakoika.

⁶ De ahao naga Ma Jou o Yawe ai hohowono abe wohiboaino o dodiha ma ngoe abe duru kohabiha nako o nyawa yagoli. De manga ngoe o Isiraele ma nyawa yohonenge ma titi o dodiha gea yatuduku.

⁷ De ahao ona utu yoboa o Musaino de yomangaku manga howono, ato, “Ngomi miahowonoka! Duru itorou wiwihigurubungu Ma Jou o Yaweika de mitemo ngonaikaoo duru itorou. Ho ngomi migahoko la ngona Musa, nomidemo Ma Jou o Yaweika. Nomigahoko la Una o dodiha naa wakokiduhuoka.” De manga gogahoko gea o Musa wohimoteke ho ai nyawa waniata.

⁸ De Ma Jou o Yawe wigihene o Musaika ho wihingahu, wato, “Musa, hokonaa nodiai la ngini ko niboditokaua. Ngona kiani naleino o tabaaga, abe ihisapuroka de o hori, de nodiai ma rupa hoka ma dodiha ma biha-bihali moi ma tabaagaino gea. De gea ngona nodiai ibooto de ahao nohidapakitika o liate daku ma barenoka de nohibelohuku ani kokawaaha manga hidogoronaka la ona mata-mataika ka idadi yomalega genangika de yamake. Ho nako yatudukoka o dodiha ma biha-biha, de ahao iti yomalega enangika abe nodiai o tabaagaino, de gea ko yohonengua masara ka yowangohi.” Hokogea Ma Jou wahidoaka ma ngekomo onangika la o honenge ma hohowono ko yadaenokaua iti angaku ai demoika.

⁹ Ho o Musa wodiai o dodiha moi o tabaagaino duru imaketero hoka Ma Jou wihuloko de ahao wohidapakitika o liate daku ma barenoka. De onagona dika abe yatudukoka o dodiha ma biha-biha de yomalega o dodihaika o tabaagaino abe o Musa wodiai de gea ko yohonenguali masara yotogumu de ka yowangohi!

O Isiraele ma nyawa yotulu-tulu moduku ka hiadono o Moaba ma tonakika

¹⁰ De o Isiraele ma nyawa gea ahao yogila-gila o ngi moiika ma romanga o Bilaono ma akere ma Ngi. De genangoka manga tau o ngoerino ihigoko la yomahiaini manga dodagino.

¹¹ Gea yomahiaini ibooto de ahao yogila-gilali hiadono o ngi ma romanga Itotoporoniye de gea enangoo o tonaka ma kakaahaka abe yohimangika o Moaba ma tonakika o wange ma hiwariha.

¹² De ahao yoikoli hiadono o tonaka ma dola ma amokika ma romanga o Gota-gota ma Dola. De genangokaoo manga tau o ngoerino ihigokoli.

¹³ De ipaha yoikoli ka hiadono o akere moioli duru ipahahanguku ma romanga o Kokoroongo ma akere abe imanoa o tonaka ma kakaahaka de idadi manga tonaka ma batingi o Amori ma nyawa de o Moaba ma nyawa. Ho yomahihora doka o Kokoroongo ma akere ma honongaika abe gea o Moaba ma nyawa manga tonaka de ahao manga tau o ngoerino ihigokoli la yomahiaini genangoka.

^14-15 De abe ihiromanga o Kokoroongo ma akere, naga ma ngoe idadi genangoka hiadono o nyawa yotulihi ma ade-ade o bukuika moi ma romanga Ma Jou o Yawe ai Parangi ma Ade-ade ma Buku abe genangoka hamake ma titi o loku-loku ma hapa, o akere ma ngigoriha, de o ngai-ngairi ma roma-romanga abe naga genangoka hoka itulihoka, ato, “O Wahebe, de o Sufa, de o Kokoroongo ma akere de to ena ma bobilatu ma ngoe-ngoe. De gea o Kokoroongo ma akere ma bobilatu ka ipahahanguku abe o Moaba ma tonaka ma batingoka.” De naa o Isiraele ma nyawa o Kokoroongo ma akere gea yomahihora yotobongo doka ma honongaika de duru genangoka o Moaba ma tonakoka ona yomatogumu jai-jaiohi.

¹⁶ De ahao yogila-gilali hiadono o humu moiika abe nako to ona manga demo o Beeri. De gea ma humu abe genangoka Ma Jou o Yawe witemo o Musaika wato, “Musa, ani nyawa nakokitoomuino angamoi Ngohi toigo tahidoaka o akere onangika.” Ho ona o Musa wakokiahokino.

¹⁷ De ahao o Isiraele ma nyawa yonyanyi de manga tarimakase ma demo nenanga: “Ngonaika, o humu, mimagahoko la ani akere nohibubungiye, Ngonaika minyanyi de mia garago ma titi nomihiokere ani akere,

¹⁸ O nyawa manga baluhu yokokurutiye inibaiti, O tutukunu dika yapake abe manga kuaha ma dodunguu, Ho ngaro de manga tutukunu dika ona o hihira imibaiti, Ho hiadono ngona o humu nomihiokere ani akere.” Hokogea manga nyanyianga ma demo. De gea manga dodagi o tonaka ma kakaaha ma goronaika ma baha angamoi yoboaka o ngiino abe ma romanga o Hadia.

¹⁹ De ma oraha o Hadiaka yosobo de yoiki o ngiika abe ihiromanga o Akere Ihahuru Ma Jouino. De ma ngi gea yanoaka de yoikoli hiadono o Bilatu ma loku-lokuika.

²⁰ De ahao o loku-loku genangoka yosoboli de yoiki o dolaika o Moaba ma tonakoka de yogila-gila hiadono yodoa o Belaka ma loku ma tubu-tubuiye abe ihikokaika itou-touniye. De o Belaka ma lokuoka gea naga ma tubu-tubu muruono abe moi ma romanga o Pisaga ma tubu abe genangoka ka idadi yomalega ma timiuku o dola abe duru ko kia-kiaua yowango genangoka de gea ena ma romanga o Tonaka ma Kakaaha ma Dorou.

O Isiraele ma nyawa yaparangi o Koano o Sihono de ai nyawaika de yolaku

²¹ De ahao o Isiraele ma nyawa yahidingoto o nyawa yamuruono naga la ka idadi manga gogahoko ma demo iwidofanga o Amori ma nyawa manga koanoika, ai romanga o Sihono.

²² Hokonaa manga demo o Sihonika ato, “Ngomi o Isiraele ma nyawa duru migahoko la ma oraha naa mihidotobiki to ngona ani tonakino. De ngomi minihibehehongo ahao ngomi miboa ani tonakino de duru mimahidodiai hiadono minitilakuru. Ho ngaro ti ngini nia angguru ma redi eko nia gandumu ma redi ma ngomi genangika ko miboaua. De ngaro mia akeroo ma ko mimaleua ti ngini nia humuino. Ngomi duru minihibehehongo miato mianiiki dika o Kokoano ma Ngekomika. De ngomi duru o ngekomino gea ko mirehenua ka hiadono ani tonaka miatilakuru ma batingi. Hokogea migahoko nomihigunoa la miboa ti ngini o Amori ma nyawa nia tonakino.”

²³ Masara o koano o Sihono gea duru ko wodafongua manga gogahoko gea ho ko wahigunoaua o Isiraele ma nyawa yoboa o Amori ma nyawa manga tonakino gea abe to una ai kuahaka. De woluku hiadono wato waparangi onangika. Ho to una ai tentara wakokitoomuino de yotagi de manga midirihi o tonaka ma kakaahaika hiadono o Yahasika abe genangoka o Isiraele ma nyawa manga doomu naga. De genangoka o Sihono de ai tentara duru yaparangi o Isiraele ma nyawaika.

²⁴ Masara o Isiraele ma nyawa duru yomaduhunu de yahikalaka hiadono duru yatetetoruku o Amori ma nyawa manga tentara de ka hiadono manga koano o Sihono unangoo ma, iwitomaka. Ho gea to una ai tonaka o Isiraele ma nyawali yakuaha o Kokoroongo ma akeroka de ka hiadono o Yaboko ma akerika. Masara ko yogila-gilaua o Amono ma nyawaika angamoi to ona manga tonaka ma batingi duru yogoana de manga buturungu.

²⁵ Masara nako o Amori ma nyawa manga kota-kota gea, o Isiraele ma nyawa yaleoka ho genangokaoo yogogere ngaro manga kota o Hesebono ka hiadono manga kota mata-mataika o Isiraele ma nyawali ahao yogogere.

²⁶ Abe o Hesebono gea o Amori ma nyawa manga kota ma ayo abe ma dodihiraino manga koano o Sihono genangoka wogogere. Ma dihiraino o kota gea o Moaba ma nyawa manga kota masara o Sihono abe wahikoano o Amori ma nyawa una wale o Hesebono ma kota gea ma oraha waparangi o Moaba ma nyawa de wahikala. Ho o Moaba manga tonaka gea o Sihonoli ai kuahaka igogere ka hiadono o Kokoroongo ma akerika.

²⁷ Masara naa o Isiraele ma nyawa o Sihono de ai nyawa yahikalaka ho onangoli yale ma tonaka gea ho duru yogarago hiadono yodiai o hohininga ma dakoro la manga lolaku ma ade-ade ufa yawohanga. De manga hohininga ma dakoro utu ona yodiai de utu yapake o Amori ma nyawa manga lolaku ma dakoro abe ma dihira yodiai ma oraha manga koano o Sihono de ai tentara yaparangi o Moaba ma nyawa hiadono yahikala. Ho ma oraha o Amori ma nyawa gea yolaku de manga nyawa abe yososawaro de manga datoro itiai ma demo yotulihi hokonaa manga dakoro ma betongo, ato, “Ngini o roria-dodoto niaino, o Hesebono ma kotaka homatoomuino, La ngone o Amori ma nyawa ma kota naa hohigokoli, De angamoi naa idadioli o Sihono ai kota wohikoano.

²⁸ O uku ma amoko imulaenge o Hesebono ma kotaka, Genangoka de itagi hiadono o Moaba ma kota o Araika, Ona yogogere o Kokoroongo ma akere ma loku-lokuoka yotinoka.

²⁹ De ngini o Moaba ma nyawa ma oraha naa o Sihono winileoka, Abeika ngini naa inihibinaahaka ngaro nimahuba o Kamosika. Ngini o nau-nauru niloara angamoi nia pangao o Kamoso wininoaika, De ngini o ngo-ngofeka o Sihono winitaoko abe o Kamoso winihidogunoaika. Ho nidadi o Sihono ai huhuloko, o Amorioka manga koano ai huhuloko.

³⁰ Masara ona o Amori ma nyawa ato imiparangi o Isiraele ma nyawaoo, Ona imiparangi ngomino de ka ngomiohi miputurungu ho miahikalaka. Ho manga kota o Hesebono ka hiadono o Dibonika miahibinaaha, De manga kota utuoli mihirusaka ka hiadono o Nofa ma kotaika, Ho ngomioli mialeoka o Sihono ai tonaka ka hiadono o Medebaika.” Hokogea o Isiraele ma nyawa manga lolaku ma dakoro ma betongo mangale ma titi ma tonaka gea yaleoka.

³¹ Ho o Isiraele ma nyawa o Amori ma nyawa yaturuuruoka de ma tonaka gea idadioli o Isiraele ma nyawali manga tonaka abe yogogerika.

O Amori ma nyawa mata-mataika o Isiraele ma nyawa yahikala

³² Masara o Amori ma nyawa utuohi naga yogogere manga tonaka ma honongaka abe ihiromanga o Jaesere. Ho ahao o Musa wahidingoto ai nyawa o nauru yamuruono naga la yatailako abe hokokia o Amori ma nyawa manga buturungu manga tonakoka gea. Ho ona yatailako to ona manga ngekomo abe ka idadi yaniiki de ahao yolio manga gogianongoruika. Ka de yahingahu abe hokokia ka idadi yoboa yaparangi de ahao o Isiraele ma nyawa yangohama de yaduhu o Amori ma nyawa manga hou abe yogogere o Jaeseroka de manga kapo-kapongoka abe yodateke ka hiadono ko moiokaua o Amori ma nyawa abe yogogere o tonakoka gea.

³³ Ho ona gea yahikala ibooto de ahao yogila-gila yotagi de manga buturungu de yololiti manga dumutu o Amorioka manga kota moiikali abe ma romanga o Basana. Masara ko yomahiadonuahi o Basanika de o Basana manga koano o Ogo de ai tentara yabuhukika o Ederioka de duru yaparangi o Isiraele ma nyawaika genangoka.

³⁴ Masara Ma Jou o Yawe wihingahu o Musaika wato, “Ufa ngini niwimodongo o Amori ma nyawa manga koano o Ogoika gea. De angamoi tinihidoakoka o lolaku nginika ho niwiparangi dika ka hiadono una de ai tentara niahikala de to una ai kokawaaha manga tonaka mata-mataika ka idadi nimale. Ngini nidiai unangika abe imaketero hoka nidiai o koano o Sihonika abe wahikoano o Amori ma nyawa abe yogogere o Hesebono ma kotaka.” Hokogea Ma Jou witemo o Musaika de unangoli Ma Jou ai hingahu gea wadofanga o Isiraele ma nyawaika.

³⁵ De igoungu, o Isiraele ma nyawa yolaku de o koano o Ogo iwitoma de to una ai ngofa-ngofaka o nau-nauru onangoo yahidotomaka. De o Isiraele manga tentara yogila-gila ai nyawa yatoma ka hiadono o Ogo ai kokawaahaoo yatomaka ka hiadono ko moiokaua. Ho gea o Amori ma nyawa manga tonaka mata-mataika idadi o Isiraele ma nyawa to onangoli manga tonaka.