Gegetongo 20 - Ma Jou ai Demo-demo o Totobelohoka

O Isiraele ma nyawa manga dodagi o tonaka ma kakaahaka ngade-ngade adono manga taongo moruata ma dekanino O Hitararono ma hidogo

¹ De gea manga taongo ma hungi, abe duru o mede ihira, de ahao o Isiraele ma nyawa manga doomu ma amokika yoboali o Sini ma tonaka ma kakaahaino de ma tonaka ma kakaahaka gea naga ma ngi moi ma romanga o Kadese. De gea yomahiadono o Kadese ma ngioka de manga tau o ngoerino ihigokoli ho genangokali yomanoa. De ma oraha ka yogoo-gogerohi genangoka de o ngo Miriama, abe o Musa ngoi firanga, muna mohonenge de imilungunu o Kadese ma ngioka gea.

O Musa ko wihingounua Ma Jouika hiadono o hakaruika wapoha la o akere ipooteke

² De ma oraha ona ka yogogerohi o Kadesoka gea, de ko iwaka manga akere manga doomu ma amokika. De ma titi gea hiadono o nyawa manga ngoe ato ko yaniikokaua o Musa de o Harunu ho yoiki onangika de yomatoomuino onangoka.

³ De gea ona o Musa iwihigurubungoli ato, “Koaho ma dihira gea de ngomi mihonengoka dika Ma Jou o Yawe ai himangoka hoka mia gogianongoruoli abe ka itodokanino de Ma Jou wahipoha de o hone-honenge hiadono yohonengoka.

⁴ Ngone naa Ma Jou o Yawe wonahidadi to Una ai nyawa ho adodoa ho ngona nomiao o tonaka ma kakaahaino nenanga la ahao ngone de nanga aewani ka ma moi hokokihonenge nenangoka?

⁵ Nonahidodoa Musa, ho hiadono ngona nonahihupu o Mesiirino de nonaao o tonaka duru ma dorouino naa? De ko iwa ma joro hoka o gandumu, eko ma hofoko hoka o angguru, o delima de o gogilioro ma hofoko, de hongoli ko iwa o akere la ka idadi hokere.” Hokogea manga gurubungu ma demo.

⁶ De o Musa de o Harunu yosobo o nyawa manga himangoka de yoiki Ma Jou ai Tau o Ngoerino. Ho ka de yomahiadono o Hikamake ma Tau ma ngoranika gea de yomamotumuku de yomahuba Ma Jouika. De gea Ma Jou o Yawe ai medebini ma dararono womahimatoko ona yahinootoika gea.

⁷ De Ma Jou o Yawe wihibehehongo o Musaika genangoka,

⁸ wato, “Musa, naa kiani ma tutukunu, abe nagogono ahi Behehongo ma Peti ma datekoka, ena gea naleino de ngona de ani riaka o Harunu nia kokawaaha mata-mata niatoomuino o hakaru ma amoko gea ma himangoka. De ahao duru to ona manga himangoka ngona notemo ma hakaruika, nato, ‘Tohuloko ngona o hakaruika la o akere abe naga ani goronaka gea ihupu.’ Hokogea notemo de ahao o akere ipooteke duru kohaamoko ihahurika ka hiadono ngaro ngini de nia aewani mata-mataika ma inikokiwedono.” Hokogea Ma Jou wihibehehongo o Musaika.

⁹ Ho o Musa wodiai hoka Ma Jou wihulokoka ho wowohama de wale ai tutukunu abe naga Ma Jou ai himangoka abe ai Behehongo ma Peti ma datekoka.

¹⁰ De ahao una de o Harunu yahoko manga kokawaahaika la yoiki o hakaruika gea de yomatoomuino de kiani ona mata-mata yohimanga o hakaruika gea. Ho ona yakokitoomuinoka ma hakaru ma himangoka gea de ahao o Musa wabanarata onangika wato, “Ngini o tobalawana ma nyawa, niihene naa! Done sarakia de ngini niato Ma Jou ko winihidailakoua nia akere? Ho sarakia, kiani o akere mihihupuokahi o hakaruino naa de ahao ningaku?”

¹¹ Ka de hokogea o Musa wabobanarata de wagoraka ai tutukunu de o hakaruika wapoha ma hinooto de ai tutukunu gea. De itodokanino o akere duru kohaamoko ipooteke ho hiadono ona mata-mataika yokere de manga aewanioo ihiokere.

¹² Masara Ma Jou o Yawe ko wasanangiua o Musa de o Harunika ho wataere wato, “Ngini ko nihihingounua. Marai nia ngongaku Ngohino ko niapakeua angamoi ko nianiikua hoka tinihibehehongoka nidiai o Isiraele ma nyawa manga himangoka. Abe nako nihihingounu de gea niahimatoko o nyawa mata-mataika gea to Ngohi ahi medebini ma dararono ma oraha o akere ipooteke ma hakaruino. Masara, angamoi ngini ko nihihingounua gea niahimatoko onangika abe nidiai ti ngini nia hininga ma mauoka dika de aino ho ona ko ihihigiriiriua ma titi o akere gea Ngohino. Ho gea Musa de Harunu, ka de ngini hokogea nidiai de nimahitaana abe ko iwa nia horomati to Ngohi ahi medebini ma dararonika. Ho ahao ko nginiua niahihira-hira o Isiraele ma nyawa ma oraha yowohama ahi behehongo ma tonakika abe tahidoakoka onangika.” Hokogea Ma Jou ai hohowono o Musa de o Harunika ma titi ko iwihingounua.

¹³ De o akere gea ihiromanga o Ribuutuino ma akere o Kadesoka angamoi genangoka o Isiraele ma nyawa iwiribuutu Ma Jou o Yaweika. De genangoka Ma Jou wahimatoko onangika abe Una duru Wotebi-tebini de wogogere manga hidogoronaka. O Edomo ma nyawa yomahidutu o Esauika angamoi ai romanga hinooto de moi o Edomo. De o Isiraele ma nyawa yomahidutu o Yakubika angamoi unangoo ai romanga hinooto de moi o Isiraele. O Esau de o Yakubu ona o ngofaka o hagoino abe o Isaka de o ngo Ribeka manga ngofaka. Ho o Edomo ma nyawa de o Isiraele ma nyawa ona duru o gogianongoru idodutu adaene.

O Edomo ma nyawa ko yahigunoaua o Isiraele ma nyawa ihidotobiki manga tonakino O Hitararono ma hidogo

¹⁴ De ma oraha yogogerohi o Kadesoka gea o Musa womahidiai yogila-gila de angamoi manga ngekomo ma hidotobiki o Edomo ma nyawa manga tonakika ho wato ko yoikuahi de kiani yomahingahuohi o Edomo manga koanoika. Ho wairiki o nyawa yamuruono naga la ai hingahu o Edomo manga koanoika ka idadi ona yadofanga unangika. De hokonaa o Musa ai hingahu manga koanoika gea, wato, “Ngomi naa ti ngini nia gogianongoru abe nia tofora o Edomo una o riaka de to ngomi mia tofora ai dodoto o Isiraele abe ngomi o Isiraele ai totoforauku. Ho ngone o ria-dodoto idodutu adaene. De marai ngini niihenoka abe o kokangela ma ngoe imidaene ngomi o Isiraele ma nyawa.

¹⁵ De ngini nihiorikoo abe ma dihira to ngomi mia totofora yomaturuuru o Mesiiri ma tonakika de genangoka ngomi mifaa-faatuku angamoi genangoka migogere duru mia dekana. De ika-ika o Mesiiri ma nyawa gea imihidadi manga huhuloko abe duru imihikarajaanga de ma dubuho.

¹⁶ Masara ngomi duru mimagahoko Ma Jou o Yaweika o duduhunu de Una womigihene de ai malaekata wohidingoto ngomino la womihihupu o Mesiiri ma tonakino. Ho ngomi naa mia dodogumoka o Kadesoka, o kapongo moi abe duru ani tonaka ma batingoka.

¹⁷ Ho genangoka de ngomi mioigo la ma oraha naa mihidotobiki to ngona ani tonakino. De ngomi minihibehehongo ahao ngomi miboa ani tonakino de duru mimahidodiai hiadono minitilakuru. Ho ngaro ti ngini nia angguru ma redi eko nia gandumu ma redi ma ngomi genangika ko miboaua. De ngaro mia akeroo ma ko mialeua ti ngini nia humuino. Ngomi duru minihibehehongo la ka idadi mianiiki ma ngekomo gea abe duru ma deka-dekanuku o nyawa yatobapake yoboa genangika de ihiromanga o Kokoano manga Ngekomo, genangika dika ngomi mianiiki. De ngomi duru ko mirehe-rehenua ka hiadono ani tonaka miatilakuru ma batingi.” Hokogea o Musa ai hingahu abe ai hidingoto yadofanga o Edomo manga koanoika.

¹⁸ Masara o koano gea wato, “Hokonaa ahi babaluhu o Musaika, ‘Ngohi duru toluku ngini niboa ahi tonakino! De nako ngini nimiribuutu ngomino la hiadono niboa ahi tonakino de gea ngohi ahao tinibuhuku de tao ahi tentara!’” Hokogea o Edomo manga koano manga gogahoko wopaluhu.

¹⁹ De o Isiraele ma nyawa gea ka yotemohi unangika ato, “Masara Koano, ngomi duru mia baluhu ai demo mitotaka ho ma moioli de to una ai gogahoko migahoko la nomihigunoa mihidotobiki ani tonakino de ngomi mitowongi de duru mianiiki nia ngekomo ma amoko gea dika abe ihiromanga o Kokoano manga Ngekomo. De nako mia dodagi ma goronaka miboa ani tonakino de ngaro ngomi eko mia aewani miaokere nia akere gea ahao ngomi mifangu. De ngomi duru ko iwa mia gogahoko utu ngonaika bowahu mia gogahoko moi dika la ngomi miboa angamoi mia dodagi ma dumutu doka ani tonaka ma honongaika ho kiani ngomi minitilakuru.” Hokogea manga gogahoko ma hidogo o Isiraele ma nyawa.

²⁰ Masara o Edomo manga koano wahiree-reeika wahingahu onangika, wato, “Ngohi tato duru ko idadiua niboa ahi tonakino!” Ai demo gea wahuloko la ona yadofanga o Musaika ho yototaka o Isiraele ma nyawaika. De ahao o Edomo manga koano ai tentara watoomuino de yokokigoana manga tonaka ma batingoka. Ona ato nako o Isiraele ma nyawa yoboa de duru yabuhuku de manga buturungu de manga tentara gea duru ko manga ngoe.

²¹ Ho o Isiraele ma nyawa ko yoboaua manga tonakino gea angamoi o Edomo ma nyawa manga hininga hokogea, ho o Isiraele ma nyawa kiani yololiti manga poretoko la o Edomo manga tonaka ma batingi ufa yatilakuru.

O Harunu ko idadiuali wowohama o Kanani ma tonakika ho wohonenge o Hooro ma lokuoka

²² Ho o Isiraele ma nyawa mata-mata yokokisobo o Kadese ma ngioka de yoiki yomakutuono hiadono manga doomu ka ma moi yomahiadono o loku moiika ma romanga o Hooro ma loku.

²³ De ona yomatogumu o Hooro ma loku ma timiuku abe genangoka ma dola imakadateke de o Edomo manga tonaka. De genangoka o Musa de o Harunu yamake Ma Jou o Yawe ai hingahu moioli.

²⁴ Abe Ma Jou wahingahu onangika wato, “Musa de Harunu, adonoka naa ma oraha o Harunu wohonenge ho to una ai jiwa de ai totofora manga jiwa ka ma moi tahidotoomuino abe ona yododihiraika yohonenge. Ho una ko idadiua wogila-gila wowohama o tonakika gea abe Ngohi tahidoaka o Isiraele ma nyawaika. Angamoi ngini inihinooto nihilawana hiadono ko nianiikua ahi behehongo nginika ma oraha o akere gea tinihidoaka abe o Ribuutuino ma akeroka. Ho gea ma titi hiadono ngini ko idadiua niwohama o Kanani ma tonakika.

²⁵ Ho naa, Musa, ngona niahoko o Harunu ai ngofaka o Eleasara de ahao ngini iniruange kiani nidoa o Hooro ma lokuiye naa.

²⁶ Daku o lokuoka ngini nimahiadonoka de ahao ngona nahuputu o Harunu ai leleani ma pakeanga gea abe iwihitunguu una o hidemo abe ngini o Isiraele ma nyawa winihidemo Ngohino. De ahao ai hidemo ma pakeanga gea nihinoaukuoli ai ngofaka o Eleasaroka la gea wodadi ai baba o Harunu ai duruuru la unangoli ahao winihidemo Ngohino. De ahao o Harunu wohonenge genangoka ho to una ai jiwa de ai totofora manga jiwa ka ma moi tahidotoomuino de ona abe yododihiraika yohonenge.” Hokogea Ma Jou wahingahu o Musa de o Harunika.

²⁷ Ho o Musa wodiai duru imaketero hoka Ma Jou o Yawe wohibehehongoka. Ona yahange yodoa o Hooro ma lokuiye duru manga kokawaaha manga himangoka ho ona yawuningi ma oraha o Musa de o Harunu de o Eleasara yodoa ma lokuiye gea.

²⁸ Ka de yomahiadonoka o loku ma tubuiye de o Musa wahuputu o Harunu ai leleani ma pakeanga abe iwihitunguu una o hidemo Ma Jouika, de ahao ma pakeanga gea wihinoaukuoli o Harunu ai ngofakika o Eleasara. De ahao o Harunu wohihononga wohonenge genangoka o Hooro ma loku ma tubuoka. Ho gea ai honenge yaleleani ibooto de ahao o Musa de o Eleasara youti o lokuino.

²⁹ Ka de manga gogianongoru iwihioriki abe o Harunu igoungu wohonengoka de ona mata-mata duru kahumutaigarika hiadono o Isiraele ma nyawa o Harunu iwigari hiadono manga dekana manga wange moruangeino.