Gegetongo 17 - Ma Jou ai Demo-demo o Totobelohoka

O Harunu ai tutukunu itori de hiadono ihofoko

¹ De Ma Jou o Yawe wihibehehongo o Musaika la o dodunguu moioli wodiai la ibootohi o Harunika o nyawa iwilawana, wato,

² “Musa, kiani natemo o Isiraele ma nyawaika de nale onangino o tutukunu ngimoi de hinooto o gota ma doolengino. Manga tutukunu naleino la de ena gea o Isiraele ma nyawa manga dutu yangimoi de yahinootoino naga homoi-homoiika manga dodunguu ma tutukunu. De o dutu amomoiika naga to ona, o dutu moi, manga hidimono abe ka unangohi manga demo ma dodofanga manga doomuoka. Ho o dutu homoi-homoi manga hihira womatengo gea kiani wotuli-tulihika de o gakana to una ai romanga ai tutukunoka la ai tutukunu gea idadi to ona manga dutu ma dodunguu.

³ De nako o Lewi ma dutuino gea o Harunu abe una tihidadi manga hihira ho to una ai romanga kiani naga ai tutukunoka. Nia totofora abe o Isiraele to una ai ngofaka yangimoi de yahinooto de onangika ngini nimahidutu hiadono to ona manga roma-romanga niapake la nimahiromanga o dutu amomoiika. De kiani o dutu ngimoi de hinootoino gea naga manga tutukunu homoi-homoi de to ona manga hihira ai romanga naga manga tutukunoka.

⁴ De ahao manga tutukunu ngimoi de hinooto gea ngona Musa, nao ka ma moi o Hikamake ma Tau o Ngoerino ma goronaika de nakelenga o Behehongo ma Peti ma himangoka abe biaha genangoka ngona de Ngohi homakoketemo.

⁵ De ahao Ngohi Ma Jou todiai la to una ai tutukunu itori la tohitunguu una gea abe Ngohi tiirikoka la ka una dika wodadi ti ngini nia hidemo abe inihidemo Ngohino. De hokogea todiai la o Harunu ai tutukunu de ma dorioka la ka de o Isiraele ma nyawa yamake de iwihioriki una gea tiirikoka la ibootohi ka ihikaika ona ihihihuha Ngohino de manga gurubungu ma demo abe ma dumutu ngona de o Harunika inihigurubungu.” Hokogea Ma Jou ai hingahu o Musaika.

⁶ Ho o Musa wahingahu o Isiraele ma nyawaika abe hokokia manga dodunguu ma tutukunu yomahidiai. Ho manga hihira manga tutukunu ihidiaioka de ahao ona o dutu yangimoi de yahinooto gea yoboa de iwihidoaka o Musaika manga tutukunu homoi-homoiika. Ho o Harunoo ai tutukunu waoino de wihidoaka o Musaika.

⁷ De ahao o Musa wao ma tutukunu ngimoi de hinooto gea hiadono Ma Jou o Yawe ai himangika ai Tau o Ngoerino ma goronaka. De genangoka wakelenga ma tutukunu mata-mata o Behehongo ma Peti ma himangoka hoka Ma Jou o Yawe wihibehehongo unangika.

⁸ De ma dawangeino ma oraha o Musa wowohamoli o Behehongo ma Peti ma Tau o Ngoerino de o Musa wamake o heheranga idadi to Harunu ai tutukunoka abe gea ena ihitunguu o Lewi ma nyawaka manga dutu. Abe o Harunu ai tutukunu gea ngaro o badama ma gota ma doolenge ma, abeika itori de hiadono de ma hurioka! De ma hurino naga idadi o badama ma hofoko de ngaro o futu moi dika ma dekana masara enangoo ma hofoko atimonoka!

⁹ De ahao o Musa wagoraka o tutukunu ngimoi de hinooto gea Ma Jou o Yawe ai himangino de wao o tau ma himangika wohihupu. Genangoka de o Musa wahimatoko ma heheranga gea o Isiraele ma nyawaika de ahao manga hohidimono o dutu amomoiino yokokiboa de homoi-homoi yakokile to ona ma hirete manga tutukunu.

¹⁰ De ahao Ma Jou o Yawe wotemoli o Musaika, wato, “Musa, nako to Harunu ai tutukunu gea, kiani ena gea nohigilio de nakelenga duru ahi himangoka o Behehongo ma Peti ma datekoka la genangoka ka ihikaika naga o hitiari ma dodunguu o Isiraele ma nyawaika abe ma oraha nako idadioli ona ihilawana Ngohino. Hokogea todiai la ibootoka manga gurubungu itagioli Ngohino de ibootoka o nyawa yohonenge ma titi manga lawana Ngohino gea.” Hokogea Ma Jou wahitiari.

¹¹ De o Musa waniiki mata-mata gea abe Ma Jou o Yawe wihibehehongoka ho o Harunu ai tutukunu gea wohigilio Ma Jou ai Behehongo ma Peti ma datekoka.

¹² Ho mata-mata gea ibooto de ahao o Isiraele ma nyawa yoari yomahingahu o Musaika ato, “Ngomi naa imaketero hoka mikokihonengoka! Duru imaketero de ngomi imihihangoka de marai ka hiadono ngomi mata-mataika miboditoka!

¹³ Abe ngaro miboa mimahitigino Ma Jou ai Tau o Ngoerino dika de marai mihonenge! Ho sarakia, ngomi ahao mikokiboditoka?” Hokogea manga toduba ma demo ma oraha yamake ma heheranga abe yahitiari onangika la ibootohi iwilawana Ma Jouika.