Gegetongo 16 - Ma Jou ai Demo-demo o Totobelohoka

O Kora wahihira ona abe iwilawana o Musaika ato iwihiguti ai kuahaino

¹ De naga o Lewi ma nyawa womatengo ahao wahihira o nyawa manga ngoe la ona iwilawana o Musaika. Abe to una ai romanga o Kora de ai baba o Yisara de ona o Lewi ma dutuino abe yotofora o Lewika de to una ai ngofaka o Kehatika. De o Kora gea wadodiawo de o Rubene ma nyawa yahange abe yahinooto manga romanga o Datana de o Abirama de manga baba o Eliaba de womatengoli ai romanga o Ono abe ai baba o Pelete.

² Naa o Kora de ona yahange gea iwihidee la ato o Musa iwihiguti la ibootohi wahihira-hira o Isiraele ma nyawaika. Ho yahigaro o Isiraele ma nyawa manga dimo-dimonika la onangoo manga hininga yaturuuru ka hiadono naga yaratuhu hinooto de yamoritoa manga dimo-dimono abe o Kora iwiniiki. Abe onangoo ato kiani o Musa iwituruuru la ato o nyawa ma hungioli wahipareta.

³ Ho o Kora, de o Datana, de o Abirama, de o Ono, de o Isiraeloka manga hihira yaratuhu hinooto de yamoritoa, gea ona mata-mata yokokiloiki yatutumu o Musa de o Harunika. De yahingahu onangika ato, “Ngini ma dihiraino nimihipareta masara naa ti ngini nia pareta ma kuaha ma hiaturu duru niatilakuroka! Abeika Ma Jou o Yawe wonairiki ngone o Isiraele ma nyawa mata-mataika la wonahidadi to Una ai nyawa abe duru womadingakoka Unangino. Ho Una naga to ngone nanga hidogoronaka de ko moiua ngoneoka abe ko womadingakua. Ho done sarakia de ngini ka inihinooto dika de niato ka ti nginiohi nia gogere ikurutiye Ma Jou o Yawe ai himangoka?” Hokogea manga ngamo ma demo o Musa de o Harunika.

⁴ Ka de o Musa woihene manga demo gea de womangumo o tonakuku womamotumuku womaniata.

⁵ Ka de womaokoinoli de wahidetemo o Koraika de onangika abe o Kora iwinii-niiki, wato, “Itebini o ngorumino de ahao Ma Jou o Yawe wonahidumutu ngoneino la hahioriki ona gea abe wato ona duru to Una ai nyawa. De Ma Jou wihidumutoli onaguna abe duru unangohi womadingakoka abe ka una dika ka idadi woboa womahitobahitigi Unangika. Ho womatengo gea abe wiirikoka ahao una ka idadi ngini niwikokimake ma oraha Ma Jou o Yawe wihiboa ai himangino.

⁶ De ngona, Kora, de ani dodiawo abe ininii-niiki niato nginioo niwileleani Ma Jou hoka o hohidemo kiani ngini mata-mata homoi-homoiika nimale o hidemo manga manyanyi ma dudufuku ma ngi abe nidiai ma tabaagaino abe ihisapuru o hori, de gea ena niahidiaiohi la ka idadi niapake.

⁷ De ahao itebini ngini homoi-homoiika kiani o manyanyi nikokitufuku nia manyanyi ma dudufuku ma ngioka de niboa niwihimanga Ma Jou o Yaweika. Hokogea ma hiaturu ngini mata-mataika nianiiki la genangoka de ahao ngone hamake abe onaguna ahao Ma Jou o Yawe wiiriki ai himangoka abe una gea womadingakoka ho wotebi-tebini ai himangoka. Ngini niato ngohi de o Harunu miatilakuru mia hiaturu ma kuaha, masara ko ngomiua abe miatilakuru mia kuaha masara ngini o Lewi ma nyawa nia ngoe ahi himangoka naa abe nia kuaha niatilakuroka!” Hokogea o Musa wahingahu onangika.

⁸ De ahao o Musa witaere o Koraika de ai dodaere yadaene ona o Lewi ma nau-nauru mata-mataika abe o Kora iwinii-niiki. Ho ona mata-mataika o Musa wataere wato, “Naa tinileha nginika abe o Lewi ai totoforauku ho niatotoihene ahi demoika naa.

⁹ Adodoa ho ngini ko iniwedonua ti ngini nia karajaanga Ma Jouika? Ma Jou o Yawe to ngone o Isiraele ma nyawa mata-mataika nanga Jou masara ngoneino gea ngini dika o Lewi ma dutuino abe winiirikoka la winitingaka o leleanika abe duru winihitigi-tigino to Una ai datekoka. Abe ti ngini nia tagongo o karajaanga abe yadaene Ma Jou o Yawe ai Tau o Ngoerino. De gea ti ngini nia leleani hiadono nia gogianongoruikaoo nialeleani ho ngini Ma Jou winigorakiye ona mata-mata manga himangoka abe onangikaoo ngini nialeleani. Gea ngohi tagoungu eko sarakia?

¹⁰ Abeika, Kora, ngaro o Isiraele ma nyawa mata-mataino ma ka ngone o Lewi ma nyawahi abe Ma Jou o Yawe wonahitigino Unangino. Ho adodoa ho ngini naa ko iniwedonua de nia karajaanga ma rahai Ma Jou ai Tauoka gea hiadono nimaokoino Ma Jou ai nyawa manga himangoka la nialeleani? Done sarakia niato nia leleani gea ko kia-kiaua? Abe ngohi tataoko ti ngini nia hiningaka niato kiani inihitagongo de o hohidemo to onangoo manga karajaanga abe inahidemo Ma Jou o Yaweika. Marai hokogea ti ngini nia hininga e?

¹¹ Ngini naa nimatoomuino de nimitutumu ngohi de o Harunu ma titi nia lawanino. Masara ti ngini nia lawana ma dumutu ko o Harunikaua angamoi nia lawana gea ma dumutu igoungu Ma Jou o Yaweika!” Hokogea o Musa ai dodaere ma demo onangika.

¹² De ahao o Musa wato kiani wataere o Rubene ma nyawaikaoo abe ona o Kora iwinii-niiki ho o Datana de o Abirama wabehehongo la yoboa unangino masara manga demo dika ihidingoto la yadofanga o Musaika ato, “Ngomi duru mioluku miboa ngonaika Musa!

¹³ Marai ngona nato o kiali nodiai ngomino? Marai ngona ko iniwedonuahi nomihikangela ngomino e? Abeika mia kangela ma ngoeoka ma titi ngona nomihihupu o Mesiiri ma tonakino abe genangoka ma joro duru ikutufuru ho nanga inomo duru kohaamoko. Masara ngona! Ngona nato nomiao o tonaka ma kakaahaino naa la ka idadi nomihohonenge nenangoka. De naa nato nomihipareta de ma buturungu hiadono nomihulo-huloko hokonaa.

¹⁴ Ho naa moi miolukoka mininiiki angamoi ngona ko nomihingohamua o tonakika gea abe ma joro duru ikutufuru genangoka ho nanga inomo duru kohaamoko ma tonakoka gea. De o kiaka mia oara gea abe nomihibehehongoka nato ahao miamake o redi ma rorahai de o angguru ma redi kohangoe? De done ngona, Musa nomibudi hiadono ngomi ko mihioriki ma dugaua to ngona ani hininga ma dodagi ho marai ngomi o nau-nauru naa nomitoomuino la duga-duga nomielu-eluku dika ho ngomi miato ngaro nomibehehongo ma, ko miboakaua!” Hokogea o Datana de o Abirama manga dadae ma demo o Musaika.

^15-16 Ka de manga boi ma demo gea o Musa de o Harunika yoihene de o Musa duru wongamo hiadono wihingahu Ma Jou o Yaweika wato, “Ahi Jou, ngohi tato to ona manga huhuba ngaro ufa nodafongo! Abeika manga gurubungu ma demo ato tahikangela masara ngaro tomagahoko onangino moi ma ko iwa abe ngaro o keledai ma ko iwa todafongo. De ko ma moiuahi itaana tahowono onangika ngaro o nyawa moioo ma ko ma moiuahi!” Hokogea o Musa wihingahu ibooto Ma Jouika de ahao witemo o Koraika, wato, “Itebini o ngorumino de ahao ngona noboa nomahidutuku Ma Jou o Yaweika, abe ngona Kora de ona mata-mata abe ininii-niiki kiani naga Ma Jou o Yawe ai himangoka. De ngohi de o Harunoo ngomioo kiani naga genangoka.

¹⁷ De ngona, Kora, nohiaturu la ngona de ani nyawa naa yaratuhu hinooto de yamoritoa niakokiaoino nia huhuba o manyanyi abe to ena ma dudufuku ma ngioka la ka idadi ngini mata-mataika homoi-homoi nimagao Ma Jou o Yawe ai himangoka.” Hokogea o Musa wihingahu o Koraika de ahao wihingahu o Harunikaoo wato, “Itebini ngonaoo nohiniiki ngohi abe ngonaoo kiani naga genangoka de nao ani huhuba o manyanyi abe ahao natufuku ani manyanyi ma dudufuku ma ngioka Ma Jou o Yawe ai himangoka.” Hokogea o Musa wahibehehongo to ona mata-mata manga himangoka.

¹⁸ Ho ma dawangeino de o Kora de iwinii-niiki yokokiboa Ma Jou ai Tau o Ngoerino de manga manyanyi ma dudufuku ma ngi yomagao abe ma goronaka ihidotonoauku o uku ma ngaboho de o manyanyi. De ona mata-mata yomaokoino Ma Jou ai Tau ma himangoka ka ma moi de o Musa de o Harunu.

¹⁹ Ho o Kora wohiaturu la iwinii-niiki mata-mata yongodumu la genangoka yalawana o Musa de o Harunika o Hikamake ma Tau ma himangoka. De mangale o Kora wahigaro o Isiraele ma nyawa mata-mataika la iwilawana o Musaika hiadono onangoo ko manga ngoe yoboa de yomahitigika Ma Jou ai Tau o Ngoerino. Ona yomatoomuino Ma Jou ai Tau ma ngorana ma himangoka la onangoo yomanguningi abe hokokia ahao idadi genangoka. Ho ona mata-mata gea naga genangoka de ahao Ma Jou o Yawe womahimatoko ai medebini ma dararono la hiadono ona mata-mataika ka idadi yamake abe Unangoo naga genangoka.

²⁰ De Ma Jou o Yawe wahuloko o Musa de o Harunika, wato,

²¹ “Ngini kiani nimahiditokoka to Kora ai doomuino gea angamoi Ngohi ma oraha naa dika de ka itodokanino Ngohi tahikokibinaahaka!” Hokogea Ma Jou ai ngamo ma demo.

²² Masara o Musa de o Harunu duru yomangumo yomamotumuku o tonakoka de duru manga gogianongoru gea yagahoko Ma Jouika ato, “Ma Jou, o wowango mata-mata ihititi Ngonaka de aino ho o nyawa mata-mataika manga nyawa to Ngona. Ho done sarakia Ngona nato nangamo ona mata-mataika naa ma titi womatengo dika ai howono?” Hokogea manga niniata ma demo.

²³ De ahao Ma Jou o Yawe wipaluhu o Musaika, wato,

²⁴ “Nako gea kiani niahingahu onangika abe yogogere yomakadateke de o Kora, de o Abirama, de o Datana abe kiani yomataiti yomatingaka onangoka abe to ona yahange manga tauino yomatingaka.” Hokogea Ma Jou wihuloko o Musaika la wahitiari.

²⁵ Ho o Musa womaokoino de duru womataiti woiki o Datana de o Abiramika de o Isiraele manga hihira iwikokiniiki genangika.

²⁶ De wahitiari ma kokawaahaika wato, “Ngini kiani nimataiti nimatingaka ma gurutika onangino naa abe manga hininga itotorou dika! De ngaro o kia dika abe to ona manga kiahonanga ma, ufa ngini niasoika angamoi nako hokogenangua de ahao nginioo ka ma moi inihiofi ma titi to ona manga howono ma ngoe Ngohino.” Hokogea o Musa ai hitiari ma tataiti onangika.

²⁷ Ho o nyawa abe naga yotigi o Kora, de o Datana, de o Abirama manga kokitau ma datekoka duru yomataiti yadokaowara. Ho naa o Datana de o Abirama ka de o Musa woboa de yohupu manga tauino ho ona de manga feka-fekata de manga ngofa-ngofaka mata-mata ka ma moi yomaoko manga tau ma himangoka. De ngaro utu o ngofaka ma gilauohi masara onangoo naga manga dimonoka gea.

²⁸ De ahao o Musa wotemoli wato, “Naa adonoka ma oraha abe ngini niamake nako ahi karajaanga abe nihigurubungu gea o karajaanga abe ngohi dika tomahihohiningaiye de todiai eko gea Ma Jou o Yawe abe wohihidingoto de wohihikarajaanga hiadono ngohi todiai.

²⁹ Abe hokokia ma oraha naa de ngone hamake abe idadi de o nau-nauru naa ma titi manga dohata ngohino. Nako ona gea ahao yohonenge hoka ma titi o kia naga abe biaha genangino hiadono o nyawa yohonenge gea de ahao itaana abe Ma Jou o Yawe ko wohihidingotua ngohi naa.

³⁰ Masara nako Ma Jou o Yawe wodiai o heheranga hiadono o tonaka manga timiuku ipelaka ma amokoka hiadono yakokiotaka o tonaka ma goronauku genangoka de ahao ngini mata-mata nihihioriki ngohi duru tagoungu. Abe ka de ona de manga ngangoka de manga kiahonanga mata-mata ka ma moi o tonaka alahiri nia himangoka de ngini nihioriki abe ona iwidohata Ma Jou o Yaweika de manga hininga wahitaana de manga hohowono hokogea ma amoko.”

³¹ O Musa ngade-ngade ko wabootuahi wahingahu hokogea de itodokanino ipelaka ma tonaka abe o Datana, de o Abirama, de o Kora manga timiuku.

³² O tonaka gea itaanga ma ngoatika de yaotaka genanguku o nau-nauru gea de manga feka-fekata, de manga ngofa-ngofaka, de manga tau, de manga kiahonanga ka ma moi. De o Kora ai dodiawo abe kangano ko yomahirehenua onangino, onangoo ka ma moi de manga kiahonanga o tonaka yalahiri.

³³ Hokogea Ma Jou walungunu de manga ngango ka ma moi de manga kiahonanga abe ka de yakokiotaka ibooto de ahao ma tonaka gea Ma Jou wohikahumokali ho ka aiaho, manga gogianongoru ko yamakeokauali.

³⁴ De o Isiraele ma nyawa utu, ngaro ka manga gurutika ma, ka de yoihene manga gogianongoru gea manga boaka ma dorou de onangoo duru yohawanaholi hiadono yoara ma gurutika ato done o tonaka utuohi ma ngoatika itaanga de onangoo yakokiotaka.

³⁵ Masara ona yaratuhu hinooto de yamoritoa gea abe iwinii-niiki o Kora ko yoarua yomahikabarihi ho ona nagahi manga dingiioka de itodokanino nagali o uku Ma Jou o Yaweoka de aino! De o uku gea duru ka itodokanino itokara ma amokika de yakokiuku ka ma moi o nau-nauru yaratuhu hinooto de yamoritoa gea abe yomahihuba manga manyanyi, gea ona mata-mata Ma Jou wakokitufukoka.

Ko idadiokaua manga manyanyi ma dudufuku ma ngi yapake masara yatutuku la duru yabaka-bakaka

³⁶ De ahao Ma Jou o Yawe ai hiaturu utuohi wihingahu o Musaika,

³⁷ wato, “Musa, nihuloko nia hidemo o Harunu ai ngofaka o Eleasarika, la una waika ma uku ma kafoika gea de kiani wagoraka manga manyanyi ma dudufuku abe ena gea o tabaagaino abe ihisapuru de o hori. De angamoi ena mata-mata o debi-debini ma kiahonanga abe ma dihira ihikokidingakokau Ngohino. Ho kiani o Eleasara wakokigoraka de to ena ma uku ma ngaboho kiani wohikabarihoka ma gogurutika.

³⁸ Kiani hokogea de manga manyanyi ma dudufuku ma ngi mata-mata abe yapake o nau-nauru gea abe manga howono yofangu de manga wowango. De o manyanyi ma dudufuku ma ngi mata-mata nako o Eleasara watoomuino ibooto de ahao watutukoli hiadono ma baka-bakaka ka hiadono ma ngina-nginakahi. De gea ena ahao una de ona abe iwiduhunu yapake la o haro-harongo ma huhuba ma ngi ihilape ma poretino. Ngini kiani hokogea niapake ma tabaaga gea abe ihisapuru o hori angamoi ma dihira o manyanyi manga dudufuku ma ngi gea ona ihidingakokau Ngohi Ma Jou o Yaweino. Ho naa idadi o haro-harongo ma huhuba ma lape ma lokuoka. De ahao ka ihikaika ka de o Isiraele ma nyawa yamake ena gea ma oraha manga huhuba yomahihuba de ona yomahihohininga ma hohowono abe o wange naa idadioka. De ona yomahitiarioo la ufa ihigalioli ihilawana Ngohino.” Hokogea Ma Jou ai behehongo o Musaika de hokogea wadofanga o Eleasarika.

³⁹ Naa o Eleasara una gea manga hidemo abe o Isiraele ma nyawa wahidemo Ma Jouika ho naa wihingounu o Musaika ho watoraka o manyanyi ma dudufuku ma ngi o ratuhu hinooto de moritoa abe ona gea yapake ma oraha yohonenge o uku ma goronaka. De ahao wohiaturu la o manyanyi ma dudufuku ma ngi gea ai dodiawo yatutukoli ka hiadono ma ngina-nginaka la yapake ihilape o haro-harongo ma huhuba ma ngi.

⁴⁰ Hokogea o Eleasara wodiai duru imaketero de Ma Jou o Yawe ai behehongo o Musaika la idadi o hitiari o Isiraele ma nyawaika. Ma Jou woigo la duru ko yawohangua abe o Harunu dika de to una ai ngofaka yolape-lapeuku ka idadi o manyanyi yotufuku la idadi o huhuba Ma Jou o Yawe ai himangoka. Ho nako naga o nyawa abe ko o Haruninoua abe yatufuku o manyanyi Ma Jou o Yawe ai himangoka de ahao onangoo kiani yahohowono ka hiadono yohonenge abe duru imaketero hoka o Kora de ona abe iwinii-niiki una.

O Harunu womataiti wodiai manga howono ma dadamunu la ufa o Isiraele ma nyawa yokokihonenge

⁴¹ Masara ma dawangeino dika de o Isiraele ma nyawa manga doomu ma amokika ona yomulaenge yahigurubungoli o Musa de o Harunika hiadono yahingahu manga himangika ato, “Ngini inihinooto abe duru niatomaka Ma Jou o Yawe ai nyawa!”

⁴² De ona yodogo-dogo yomatoomuino la ato yomarihimanga de o Musa de o Harunu de manga lawana ma demo. Masara naga abe idadi hiadono yomalega manga gumurukika de manga dumutu Ma Jou ai Tau o Ngoerino angamoi genangoka o lobi ma lou iutioli hiadono yatamunu ma tau de Ma Jou o Yawe ai medebini ma dararono womahimatoko o lobi ma goronaka.

⁴³ Ho o Musa de o Harunu genangika yoboa Ma Jou ai Tau o Ngoerino de yomaokoino duru Ma Jou ai Tau ma ngoranoka.

⁴⁴ De genangoka Ma Jou o Yawe wotemoli o Musaika, wato,

⁴⁵ “Musa, kiani ngona de o Harunu nimataiti nimatitokoka o nyawa mata-mataino gea! Ngohi naa tato ka itodokanino dika de tahibinaahaka ona mata-mata ka ma moi.” Hokogea Ma Jou wohuloko masara o Musa de o Harunu ko yoarua. Ona duru yomangumo o tonakuku de yomamotumuku yomaniata.

⁴⁶ De ahao o Musa wihuloko witataiti o Harunika wato, “Harunu, kiani ngona nomataiti nale ani manyanyi ma dudufuku ma ngi de genanguku nonoa o uku ma ngaboho o Haro-harongo ma Huhuba ma Ngiino. De ka de Ma Jou ai manyanyi natufuku de nomapopaata manga hidogoronaika la nomataiti nodiai manga howono ma dadamunu. Abeika imulaengoka, Ma Jou o Yawe ai ngamo ma amoko duru itagi manga hidogoronaka. Abe igoungu o hone-honenge ma panyake ma hohowono idadioka imahora-hora manga hidogoronaka.”

⁴⁷ De o Harunu duru womataiti womahidiai hoka o Musa wihuloko ho una womapopaata o Isiraele ma nyawa manga hidogoronaika. De o hone-honenge ma panyake ma hohowono enangoo duru itaiti imahora masara o Harunu womahihuba o manyanyi gea Ma Jou o Yaweiye la ai huhubaino gea manga howo-howono Ma Jou wahiapongo.

⁴⁸ Hokogea o Harunu wohitogumu o hone-honenge ma panyake ma hohowono gea. Abe o Harunu womaokoino o nyawa manga honenge de manga ngango ma hidogoronaka hiadono Ma Jou ai hohowono duru ko itagiokaua onangika abe ka yowangohi.

⁴⁹ Masara manga ngoe abe yohonengoka gea yasana ngimoi de iata de yaratuhu tumidi angamoi o hone-honenge ma panyake ma hohowono yadaene onangika de ka itodokanino de yohonenge. De nagali ona abe kanugonika yohonengoka ka ma moi de o Kora.

⁵⁰ De naa o Harunu womaokoinohi o nyawa manga honenge de manga ngango ma hidogoronaka ka hiadono duru wohioriki abe o hone-honenge ma panyake ma hohowono gea imatogumoka. Ho gea wohioriki ko imahorakaua de ahao ka idadi o Harunu wigilioli ai dodoto o Musaika abe una nagahi Ma Jou ai Tau o Ngoerino ma ngoranoka.