Gegetongo 15 - Ma Jou ai Demo-demo o Totobelohoka

15:37-41 ko atailakouahi Ma Jou ai Pareta ma hohininga moi

³⁷ De ahao Ma Jou o Yawe wihuloko o Musaika wato,

³⁸ “Ngona kiani nadofanga ahi demo naa o Isiraele ma nyawaika, nato, ‘Ngohi naa tinihuloko la nia baju ma barene ma laweino de nihidadi la ma lawe ikurutuku. De ma lawe gea kiani ma bihi-bihi abe hoka o dihanga ma bihi-bihi. De gea ka nginiua dika nidiai abe ma oraha naa niwango o duniaka, masara kiani nia totoforauku mata-mata onangoo yomadiai la manga lawe ma bihi-bihi naga manga baju ma bare-barenoka.

³⁹ De naa ahi huhuloko naga de ma titioka, la ngini ma oraha ma getongo niamake ma lawe gea de ka idadi niohininga Ngohi Ma Jou o Yawe ahi Pareta mata-mata de hiadono naga nia hingounu ma pareta ma demoika. Abe done ahi pareta gea niawohangika de ahao ti ngini dika ma hirete nia hininga de nia lako ma hafini niatobanii-niiki de ahao nimahuba-huba ma homoaika.

⁴⁰ Masara ma hohininga gea nia bajuoka ka idadi iniduhunu la niohohininga ahi pareta ma demo de naga nia hingounu enangika hiadono nia wowango itebini Ngohi nia Jou ahi himangoka.

⁴¹ Angamoi Ngohi naa nia Jou o Yawe abe tinihihupu o Mesiiri ma tonakino la ka idadi nimahijou Ngohino dika. De hokogea Ngohi nia Jou o Yawe tinihuloko ngini mata-mataika.’”